அம்பாறை மாவட்ட தமிழ் ஈழ விடுதலை இயக்கத்தின் பொதுக்குழுக் கூட்டம் உபதலைவர் ஹென்றி மகேந்திரன் தலைமையில் இடம்பெற்றது

எமது தமிழ் ஈழ விடுதலை இயக்கத்தின் அம்பாறை மாவட்டப் பொதுச் சபை உறுப்பினர் குழுக் கூட்டம் கட்சியின் சிரேஷ்ட உப தலைவர் திரு. ஹென்றி மஹேந்திரன் அவர்களின் பிரசன்னத்துடன், அம்பாறை மாவட்ட அமைப்பாளர் திரு. நேசன் கந்தசாமி அவர்களின் தலைமையில், அக்கரைப்பற்று பிரதேச பொறுப்பாளர் செல்வன்: முருகப்பன் சிவானந்தன் அவர்களின் அனுசரணையுடன் கடந்த 2024.03.15 ஆம் திகதி அக்கரைப்பற்றில் நடைபெற்றது.

இதன் போது, கட்சியின் எதிர் கால நடவடிக்கைகள் தொடர்பில் கருத்துக்கள் முன் வைக்கப்பட்டு முக்கிய தீர்மானங்கள் எடுக்கப்பட்டன. மேலும், ஜனநாயகத் தமிழ் தேசிய கூட்டமைப்பில் அமையவுள்ள நிருவாகக் கட்டமைப்பு தொடர்பில் உப தலைவர் ஹென்றி அண்ணன் விளக்கம் அளித்தார்.

கூட்டத்தில் சிறப்பு நிகழ்வாக அக்கரைப்பற்று பிரதேச பொறுப்பாளர் திரு : சிவானந்தன் மற்றும், பொதுக்குழு உறுப்பினர்களது ஒருங்கமைப்பில், இலங்கைத் தமிழரசுக் கட்சியின் அக்கரைப்பற்று 7/4 வட்டாரக் கிளையின் செயலாளர் திரு. வன்னியசிங்கம் லோகநாயகம் ( குட்டி ) அவர்கள் எமது காட்சியில் உத்தியோகபூர்வமாக இணைந்து கொண்டார்.

இக் கூட்டத்தில் கட்சியின் அம்பாறை மாவட்டத் துணை அமைப்பாளர் திரு. சபா.நேசராஜா அவர்களும் பிரதேச பொறுப்பாளர்கள் மற்றும், பொதுக்குழு உறுப்பினர்கள் எனப் பலரும் கலந்து கொண்டனர்.