எதிர்வரும் மார்ச் மாதம் நடைபெறவுள்ள கச்சத்தீவு அந்தோனியார் தேவாலய விழாவுக்கு, இந்திய யாத்திரிகர்களை அனுமதிக்காதிருப்பதற்கு தீர்மானித்துள்ளதாக யாழ்ப்பாண மாவட்ட அரசாங்க அதிபர் கணபதிபிள்ளை மகேசன் தெரிவித்துள்ளார்.
இந்தியாவில் பரவிவரும் கோவிட் ஒமிக்ரோன் தொற்று மற்றும் இந்தியாவில் அமல்படுத்தப்பட்டுள்ள ஊரடங்கு ஆகியவற்றை கருத்திற்கொண்டே இந்த தீர்மானம் எட்டப்பட்டுள்ளதாகவும் அவர் கூறுகின்றார்.
இதன்படி, சுமார் 500 வரையான மட்டுப்படுத்தப்பட்ட இலங்கை யாத்திரிகர்களுடன் இம்முறை விழா நடத்தப்படவுள்ளது.
இலங்கை சுகாதார அதிகாரிகளினால் முன்வைக்கப்பட்ட பரிந்துரைகளை அடிப்படையாகக் கொண்டே இந்த தீர்மானம் எட்டப்பட்டுள்ளது.
கச்சத்தீவு புனித அந்தோனியார் தேவாலய வருடாந்த உற்சவம் இம்முறை மார்ச் மாதம் 11 மற்றும் 12ம் திகதிகளில் நடைபெறவுள்ளமை குறிப்பிடத்தக்கது.
இதே நேரம், கச்சதீவு புனித அந்தோனியார் ஆலயத் திருவிழாவில் தமிழ்நாடு மீனவர்களையும் அனுமதிக்க வேண்டும் என இராமேஸ்வரம் விசைப்படகு உரிமையாளர் சங்கத் தலைவர் யேசுராயா கோரிக்கை விடுத்தார்.
கச்சதீவு அந்தோனியாருக்கு கோரோனா காரணமாக இரண்டு ஆண்டுகள் திருவிழா இடம்பெறவுள்ளது. இந்த திருவிழாவில் வருடாந்தம் 10 ஆயிரம் பேர் பங்குகொண்டாலும் இம்முறை 500 பேராக மட்டுப்படுத்தப்பட்டுள்ளதாக தெரிவிக்கப்படுகின்றது.
இவ்வாறு இடம்பெறும் இந்த திருவிழாவிற்கு தமிழ்நாடு மீனவர்களும் பங்குகொண்டு வழிபட விரும்புகின்றோம். மத வழிபாட்டை ஏற்று எமது மீனவர்களிற்கும் குறைந்த பட்சம் 200 பேர் பங்குகொள்ள யாழ்ப்பாணம் மறைமாவட்ட ஆயர் நடவடிக்கை எடுக்க வேண்டும் என இறைவனை மன்றாடுகின்றோம்.
கொரோனா அச்சம் இருப்பின் புறப்படும் சமயம் பரிசோதனை மேற்கொண்டு கொரோனா இல்லை என உறுதிப்படுத்தப்பட்ட சான்றிதழுடன் பயணிக்க முடியும். ஏனெனில் தற்போது இந்தியாவில் இருந்து தினமும் ஆயிரக் கணக்கானோர் விமானம் மூலம் இலங்கைக்கு பயணிக்க முடியும் என்றால் ஏன் கச்சதீவிற்கு பயணிக்க கூடாது என்ற கேள்வி மீனவர்களிடத்தில் உள்ளது.
இதனால் இந்த விடயத்தை அவச்மாக தமிழ்நாடு முதலமைச்சரின் கவனத்திற்கும் கொண்டு சென்று மத்திய அரசின் ஊடாக இலங்கை அரசைகோரவுள்ளோம் என்றார்.