ஶ்ரீலங்கா பொதுஜன முன்னணியின் தேசிய அமைப்பாளரான பஸில் ராஜபக்ச எதிர்வரும் 6ஆம் திகதி தேசியப்பட்டியல் பாராளுமன்ற உறுப்பினராகச் சத்தியப்பிரமாணம் செய்வார் என்று அக்கட்சியின் உள்ளகத் தகவல்கள் தெரிவிக்கின்றன.
அமெரிக்கா சென்றிருந்த பஸில் ராஜபக்ச நேற்றுமுன்தினம் நாடு திரும்பிய நிலையில், சுய தனிமைக்கு உட்படுத்தப்பட்டுள்ளார். எனினும், இணையம் ஊடாக முக்கிய சந்திப்புகளை கட்சி செயற்பாட்டாளர்களுடன் அவர் நடத்தி வருகின்றார்.
இதன்போது பாராளுமன்ற பிரவேசம் குறித்தும் ஆராயப்பட்டுள்ளது. இதன்படி பஸில் எதிர்வரும் 6ஆம் திகதி எம்.பியாகப் பதவியேற்க வேண்டும் என அவருக்கு நெருக்கமானவர்கள் கோரிக்கை விடுத்துள்ளனர்.
அத்துடன், அமைச்சர் உதய கம்மன்பிலவுக்கு எதிரான நம்பிக்கையில்லாப் பிரேரணை தோற்கடிக்கப்பட்ட பின்னரே பஸில் பாராளுமன்றம் வரவேண்டும் என மேலும் சிலர் கோரிக்கை விடுத்துள்ளனர்.
பஸில் ராஜபக்ச பாராளுமன்றம் வருவதற்காக ஸ்ரீலங்கா பொதுஜன முன்னணியின் தேசியப்பட்டியல் எம்.பியொருவர் பதவி துறக்கவுள்ளார்.
6ஆம் திகதி சபைக்கு வரும் பஸிலுக்கு மறுநாள் பொருளாதார விவகார அமைச்சு வழங்கப்படவுள்ளது எனவும் இன்னொரு தகவல் தெரிவித்தது.