Author: Telobatti

வெளியுறவுச் செயலாளர் அட்மிரல் பேராசிரியர் ஜயநாத் கொலம்பகே அவர்களின் அழைப்பின் பேரில்  இந்திய வெளியுறவுச் செயலாளர் ஸ்ரீ ஹர்ஷ வர்தன் ஷ்ரிங்லா 2021 அக்டோபர் 2 – 5 வரையான காலப்பகுதியில் இலங்கைக்கு உத்தியோகபூர்வ விஜயத்தை மேற்கொள்ளவுள்ளார்.

இந்த விஜயம் நீண்டகால பலதரப்பட்ட உறவுகளை ஒருங்கிணைப்பதற்கும் இரு நாடுகளுக்கிடையிலான இருதரப்புக் கூட்டுறவுகளை மேம்படுத்துவதற்கும் பங்களிக்கும். வெளியுறவுச் செயலாளர் ஷ்ரிங்லாவின் இலங்கை வெளியுறவுச் செயலாளருடனான இருதரப்புக் கலந்துரையாடலுக்கும் மேலதிகமாக, ஜனாதிபதி, பிரதமர், நிதி அமைச்சர்  மற்றும் வெளிநாட்டு அமைச்சர் ஆகியோரையும் சந்திக்கவுள்ளார்.

விஜயம் செய்யவுள்ள இந்திய வெளியுறவுச் செயலாளர் இலங்கையில் தங்கியிருக்கும் போது கண்டி,  திருகோணமலை மற்றும் யாழ்ப்பாணத்திற்கு விஜயங்களை மேற்கொள்வார் என எதிர்பார்க்கப்படுகின்றது.

இந்தியாவின் வெளியுறவுச் செயலாளராகப் பதவியேற்றதன் பின்னர், ஸ்ரீ ஹர்ஷ வர்தன் ஷ்ரிங்லா இலங்கைக்கு விஜயம் மேற்கொள்ளும்  முதலாவது சந்தர்பபம் இதுவாகும்.

மோசடிக்காரர்களின் செயற்பாடுகளுக்கு எதிராக நடவடிக்கை எடுக்கத் தவறியுள்ள ஸ்ரீலங்கா அரசாங்கம் உண்மையை அம்பலப்படுத்தும் ஊடகவியலாளர்கள் மற்றும் செயற்பாட்டாளர்களை சட்டத்தை மீறி அடக்குவதாக தென்னிலங்கை தேரர் ஒருவர் குற்றஞ்சாட்டியுள்ளார்.

சரத் வீரசேகர  போன்ற முட்டாள்தனமான அமைச்சர்களின் செயற்பாடுகள் மற்றும் கருத்துகள் காரணமாக ஜிஎஸ்பி பிளஸ் வரிச்சலுகையை தக்கவைத்துக்கொள்ள முடியாத நிலை இன்று ஏற்பட்டுள்ளதாக உலப்பனே சுமங்கல தேரர்  இன்று கொழும்பில் இடம்பெற்ற ஊடக சந்திப்பில் குறிப்பிட்டுள்ளார்.

சரத் வீரசேகர போன்ற முட்டாள் அமைச்சர்களைக் கொண்டு ஆசிரியர்கள், அதிபர்கள் மற்றும் தொழிற்சங்கத் தலைவர்களை அச்சுறுத்துகின்றனர். இந்த நாட்டின் சட்டங்களை மேலும் வலுப்படுத்த வேண்டுமென சரத் வீரசேகர குறிப்பிடுகின்றார்.

இந்த நாட்டில் உள்ள சட்டங்கள் இந்த நாட்டை நிர்வகிக்க போதாதா? இவர்களுக்கு எதிரான மக்களின் ஆர்ப்பாட்டங்கள், எதிர்ப்புகளை அடக்குவதற்கு புதிய சட்டத்தை இவர்கள் வேண்டுமென்கின்றனர். இந்த நாட்டில் இராணுவ ஆட்சியை ஏற்படுத்த முயல்கின்றனர்.

சீனி மோசடி, வெள்ளைப்பூண்டு மோசடி மாபியாக்களுக்கு எதிராக இவர்கள் எடுத்த சட்ட நடவடிக்கை என்ன? மாபியாக்காரர்களின் அருகில் சென்று மண்டியிட்டு, ஊடக நிறுவனங்களுக்குள் ஒழிந்துகொண்டு, கீழ்த்தரமான ஊடகப் பிரசாரத்தை எதிர்பார்க்கின்றனர்.

இவர்கள் மாபியாக்களுக்கு எதிராக எவ்வித சட்ட நடவடிக்கையையும் எடுக்கமாட்டார்கள். இந்த விடயங்களை அம்பலப்படுத்தும் ஊடகவியலாளர்களை இன்று விசாரணைக்கு அழைக்கின்றனர்.

அரசாங்கத்திற்கு எதிராக ஏதாவது ஒரு கருத்தை வெளியிட்டால் சட்டத்தை மீறி இவர்கள் அடக்குகின்றனர். ஜிஎஸ்பி பிளஸ் வரிச்சலுகையை தக்கவைத்துக்கொள்ள முடியாத நிலை இன்று ஏற்பட்டுள்ளது. ஐரோப்பிய ஒன்றியம் இந்த நாட்டிற்கு வருகைதந்துள்ள இந்த சந்தர்ப்பத்தில் சரத் வீரசேகர (sarath weerasekara) போன்ற முட்டாள் அமைச்சர்களின் செயற்பாடுகள் மேலும் பாதிப்பினை ஏற்படுத்தும் என அவர் மேலும் தெரிவித்துள்ளார்.

சிறுவர்களின் நலன்களுக்கும் உரிமைகளுக்கும்  முன்னுரிமையளித்தே  பிரதேசத்தின் அபிவிருத்தியினைத்திட்டமிட்டு நடைமுறைப்படுத்தி வருவதாக தமிழீழ விடுதலை இயக்கத்தின் (ரெலோ)  யாழ் மாவட்ட அமைப்பாளரும், வலிகாமம் கிழக்கு பிரதேச சபையின் தவிசாளருமான   தியாகராஜா நிரோஷ் தெரிவித்தார்.

இன்று (ஓக்டோபர் 01) காலை சபையின் அபிவிருத்தியினை நடைமுறைப்படுத்துதல் தொடர்பான பிரதேச சபைக் கூட்டம் தவிசாளர் தியாகராஜா நிரோஷ் தலைமையில் நடைபெற்றது. இக்கூட்டத்தில் சிறுவர் தினம் ஆகையினால் சிறுவர் தொடர்பான விடயம் முக்கியத்துவப்படுத்தப்பட்டது.

இக் கூட்டத்தில், சபையின் எல்லைப் பரப்பிற்குள்; சிறுவர்களின் உரிமைகளுக்கும் நலன்களுக்கு முன்னுரிமையளித்தே அபிவிருத்தியினையும் கருமங்களையும் திட்டமிட்டு நடைமுறைப்படுத்துவதற்கான உறுதி மொழியினை மக்கள் பிரதிநிதிகளும் சபையின் செயலாளர் உள்ளிட்ட உத்தியோகத்தர்களும் எடுத்துக்கொண்டனர்.

இவ் உறுதிமொழியினை தொடர்ந்து உரையாற்றுகையிலேயே தவிசாளர்;, சிறுவர்களுக்கு எதிரான குற்றங்கள் மற்றும் துஷ்பிரயோகங்கள் அதிகரித்தே வருகின்றன. அத்துடன் சிறுவர்கள் சமூகத்தில் எதிர்கொண்டுள்ள பிரச்சினைகளை பாரிய பிரச்சினைகளாக கருதாமல் சகஜமாக விட்டுவிடும் துர்ப்பாக்கிய நிலைமையும் காணப்படுகின்றது. இதற்கு எதிராக மக்கள் பிரதிநிதிகள் சமூகத்தில் விழிப்பினை ஏற்படுத்துவதுடன் காத்திரமாகவும் செயற்படவேண்டும்.   சகல அரச, தனியார், அரசசார்பற்ற தாபனங்களும் தமது செயற்றிட்டங்களில் சிறுவர்கள் தொடர்பான நலன்களுக்கு முக்கியத்துவமளிக்க பொறுப்பளிக்கப்பட்டுள்ளது.

எமது உள்ளுராட்சி மன்றத்திற்கு சிறுவர்களின் பாதுகாப்புத் தொடர்பில் பாரிய பொறுப்புள்ளது. பிரதேசத்தில் சிறுவர்களின் உடல் உள முன்னேற்றத்தினை நோக்காகக் கொண்ட உட் கட்டமைப்பினை ஏற்படுத்த வேண்டிய பொறுப்புள்ளது. வருடாவருடம் எமது வரவு செலவுத்திட்டம் ஊடாக சிறுவர் நலத்திட்டங்களுக்கு நாம் முன்னுரிமை அளிக்கின்றோம்.
பிரதேசத்தில் சிறுவர்களுக்கான பாலர் கல்வி வசதிகளை மேம்படுத்தும் திட்டங்களைச் செயற்படு;த்தி வருகின்றோம். பிரதேச சபையின் முன்பள்ளிகளை வசதிக்குறைவான இடங்களில் உருவாக்கி வருகின்றோம். இவ்வாறாக ஆவரங்கால் முன்பள்ளி சிறப்பாக இயங்கியுள்ளது. இருபாலையில் மேலும் ஒரு நவீன முன்பள்ளியை அமைத்து வருகின்றோம்.

சபை, நூலக வாரத்தினைக் கூட சிறுவர்களின் தேடலை அதிகரித்தல் என்ற தொனிப்பொருளிலேயே நடத்தியது. ஆயுர்வேத வைத்தியசாலைகள் ஊடாக சிறுவர்களின் மருத்துவத் தேவைகள் விடயத்தில் இயங்குகின்றோம். பிரதேசத்தின் எந்த அபிவிருத்தியிலும் சிறார்களின் நலன்கள் பற்றிச் சிந்தித்தே முடிவுகள் எடுக்கின்றோம். அபிவிருத்தியில் சிறுவர்களின் அபிப்பிராயங்களும் உள்வாங்கப்படவேண்டும்.  அபிவிருத்திகளில் பிள்ளைகள் உச்ச அளவில் எப்படிப்பயனடைவர் என்பதை ஆராய்கின்றோம். முன்பள்ளிக் கல்வி முறை தொடர்பில் நடளாவிய ரீதியில் பலகுறைபாடுகளும் பிரச்சினைகளும் உள்ளன. முன்பள்ளிக் கல்வியில் அரசின் சரியான மறுசீரமைக்கப்பட்ட ஒழுங்கு விதிகள் அவசியமாகவுள்ளன.

இவ் வருடம் நாம் வலிகாமம் கிழக்கில் பொது சிறுவர் பூங்காவினை தாபித்து உள்ளோம். மேலும் பாடசாலை மாணவர்கள் பயன்படுத்தும் வீதிகளை முன்னுரிமைப்படுத்தி அமைத்துள்ளோம். சிறுவர்கள் நாளைய தலைவர்கள் என்ற வகையில் அவர்களது சிறுவர் நலன்களை மேம்படுத்தத் தக்க வகையில் தொடர்ந்தும் எமது சபை செயலாற்றும். அபிவிருத்தியில் சிறுவர்களின் அபிப்பிராயங்களுக்கு முன்னுரிமை அளிக்கும் என வலிகாமம் கிழக்குப் பிரதேச சபைத் தவிசாளர் தியாகராஜா நிரோஷ் தெரிவித்தார்.