Category: தற்போதைய செய்திகள்

யாழ்ப்பாணம் – நயினாதீவு நாக விகாரையில் நடத்துவதற்கு திட்டமிடப்பட்டிருந்த தேசிய வெசாக் நிகழ்வு இரத்து செய்யப்பட்டுள்ளது.

சுகாதார சேவைகள் பணிப்பாளர் நாயகத்தினால் வழங்கப்பட்ட ஆலோசனைக்கு அமைய நிகழ்வு இரத்து செய்யப்பட்டுள்ளது.

எதிர்வரும் 23 ஆம் திகதி முதல் ஒரு வாரத்தை அரச வெசாக் வாரமாக முன்னெடுக்க திட்டமிடப்பட்டிருந்ததுடன், பிரதான நிகழ்வை யாழ்ப்பாணம் நயினாதீவில் நடத்த புத்தசாசன அமைச்சு திட்டமிட்டிருந்தது.

தற்போது நிலவும் கொரோனா நிலையை கருத்திற்கொண்டு வெசாக் பண்டிகையை வீடுகளிலேயே கொண்டாடுமாறு புத்த சாசன அமைச்சின் செயலாளர் கபில குணவர்தன குறிப்பிட்டுள்ளார்.

தமிழக முதலமைச்சராக மு.க.ஸ்டாலின் இன்று (07) பதவியேற்றார்.

தமிழக முதல்வராக திராவிட முன்னேற்றக் கழகத் தலைவர் மு.க.ஸ்டாலின் பதவியேற்றதை தொடர்ந்து 33 அமைச்சர்களும் பதவியேற்றனர்.

சென்னை கிண்டி ராஜ்பவனில் இன்று காலை பதவியேற்பு விழா எளிமையான முறையில் நடைபெற்றதாக தமிழக செய்திகள் தெரிவித்துள்ளன.

ஆளுநர் பன்வாரிலால் புரோஹித் முதல்வருக்கான பதவியேற்பு உறுதி மொழியையும் இரகசிய காப்பு உறுதிமொழியையும் செய்து வைத்தார்.

‘முத்துவேல் கருணாநிதி ஸ்டாலின் என்னும் நான்’ என ஆரம்பித்து தமிழில் பதவியேற்பு உறுதிமொழியை வாசித்தார்.

தமிழக முதல்வர் பதவியேற்றதை தொடர்ந்து துரைமுருகன் உள்ளிட்ட திமுக சட்டமன்ற உறுப்பினர்கள் 33 பேர் அமைச்சர்களாக பதவியேற்றனர்.

கொளத்தூர் தொகுதி சட்டமன்ற உறுப்பினரான முதல்வர் மு.க.ஸ்டாலின் இந்திய ஆட்சிப் பணி, உள்துறை, காவல், சிறப்புத் திட்ட செயலாக்கத் துறைகளுக்குப் பொறுப்பேற்றார்.

கட்சியின் சிரேஷ்ட உறுப்பினரான துரைமுருகன் நீர்ப்பாசனம், சட்டமன்றம், கனிமம் மற்றும் சுரங்கத் துறை அமைச்சராகப் பதவியேற்றார்.

உயர் கல்வித்துறை, அறிவியல் மற்றும் தொழில்நுட்பவியல், தொழிற்கல்வி, மின்னணுவியல் அமைச்சராக பொன்முடி பதவியேற்றார்.

அனிதா ராதாகிருஷ்ணன் மீன் வளம், மீனவர் நலத்துறை, கால்நடை பராமரிப்பு அமைச்சராகப் பதவிப்பிரமாணம் செய்தார்.

கயல்விழி செல்வராஜ் ஆதி திராவிடர் நலன், மலைவாழ் பழங்குடியினர், கொத்தடிமைத் தொழிலாளர் நலன் அமைச்சராகப் பதவியேற்றுள்ளார்.

கொரோனா கட்டுப்பாடு காரணமாக சுமார் 500 பேரே பதவியேற்பு விழாவில் பங்கேற்றனர்.

பதவியேற்பு விழாவில், அனைத்திந்திய அண்ணா திராவிட முன்னேற்றக் கழகத்தின் ஒருங்கிணைப்பாளர் ஓ.பன்னீர்செல்வம், மக்கள் நீதி மய்யத்தின் தலைவர் கமல்ஹாசன் ஆகியோரும் கலந்து கொண்டனர்.

அத்துடன், திமுக கூட்டணிக் கட்சித் தலைவர்கள் வைகோ, திருமாவளவன், ப.சிதம்பரம் ஆகியோரும் நிகழ்வில் பங்கேற்றிருந்தனர்.

பதவியேற்பு விழாவையடுத்து, ஆளுநர், முதல்வர் மற்றும் புதிய அமைச்சர்களுக்கு ராஜ்பவனில் தேநீர் விருந்து அளிக்கப்பட்டதாக தமிழக செய்திகள் தெரிவிக்கின்றன.

முதல்வராக பதவியேற்றபின் மு.க.ஸ்டாலின், கோபாலபுரம் இல்லத்திற்கு சென்று தன் தாயார் தயாளு அம்மாளிடம் ஆசி பெற்றுக்கொண்டதுடன், தன் தந்தையும் முன்னாள் தமிழக முதல்வருமான கருணாநிதியின் உருவப்படத்திற்கு மரியாதை செலுத்தி ஆசி பெற்றார்.

தமிழக முதல்வருக்கு பல்வேறு தரப்பினரும் வாழ்த்து தெரிவித்துள்ளதுடன், ஆதரவாளர்கள் பட்டாசு கொளுத்தி கொண்டாட்டங்களில் ஈடுபட்டுள்ளனர்

இந்நிலையில், மு.க.ஸ்டாலின் 5 முக்கிய உத்தரவுகளைப் பிறப்பித்துள்ளார்.

இதனடிப்படையில், கொரோனா நிலைமையால் வாழ்வாதாரம் பாதிக்கப்பட்டுள்ள மக்களுக்கு உதவும் வகையில், குடும்ப அட்டைகளைக் கொண்டுள்ள அனைவருக்கும் 2 ஆயிரம் இந்திய ரூபா கொடுப்பனவு வழங்கப்படவுள்ளது.

அத்துடன், தமிழகம் முழுவதும் சாதாரணக் கட்டண நகரப் பஸ்களில், பெண்களுக்கு இலவசப் பயணம் மேற்கொள்ள சந்தர்ப்பம் அளிக்கப்பட்டுள்ளது.

இதன் பிரகாரம், தமிழகம் முழுவதும் இயங்கும் அரசின் சாதாரண கட்டண நகர பஸ்களில் அனைத்து பெண்களும் கட்டணமின்றியும் பஸ்களுக்கான பயண அட்டை இன்றியும் நாளை முதல் பயணிக்க முடியும் என முதல்வர் ஸ்டாலின் உத்தரவிட்டுள்ளார்.

கொரோனாவால் பாதிக்கப்பட்டு தனியார் வைத்தியசாலைகளில் சிகிச்சை பெறுவோரின் சிகிச்சைக் கட்டணத்தை மாநில அரசே காப்பீட்டுத் திட்டத்தின் கீழ் ஏற்க ஸ்டாலின் ஆணை பிறப்பித்துள்ளார்.

மேலும், பசும்பாலின் விலை ஒரு லிட்டருக்கு 3 ரூபா வீதம் குறைக்கப்பட்டுள்ளதாக தமிழக செய்திகள் தெரிவிக்கின்றன.

தமிழ் ஈழ விடுதலை இயக்கத்தின் முன்னாள் தலைவர் ஸ்ரீசபாரெத்தினம் அவர்களின் 35வது ஆண்டு வீரவணக்க நிகழ்வு நேற்றைய தினம் மட்டக்களப்பில் அமைந்துள்ள தமிழ் ஈழ விடுதலை இயக்க காரியாலயத்தில் அதன் உபதலைவரும், கிழக்கு மாகாணசபை முன்னாள் பிரதித் தவிசாளருமான இந்திரகுமார் பிரசன்னா தலைமையில் இடம்பெற்றது.

இந்நிகழ்வில் மட்டக்களப்பு மாநகரசபை பிரதி மேயர் க.சத்தியசீலன், மண்முனை தென் எருவில் பற்றுப் பிரதேச சபைத் தவிசாளர் ஞா.யோகநாதன், மாநகரசபை உறுப்பினர்களான த.இராஜேந்திரன், சீ.ஜெயந்திரகுமார், பு.ரூபராஜ், ச.கமலரூபன் ஆகியோர் உட்பட பலரும் கலந்து கொண்டிருந்தனர்.

இதன்போது மறைந்த தலைவரின் திருவுருவப்படத்திற்கு மலர்மாலை அணிவித்து, ஈகைச் சுடரேற்றப்பட்டதுடன், தலைவருடன் இணைந்து மறைந்த அத்தனை இயக்க உறுப்பினர்களுக்குமாக அகவணக்கம் செலுத்தப்பட்டமையும் குறிப்பிடத்தக்கது.

யாழ்ப்பாணம் மாநகரைச் சுத்தமாக வைத்திருப்பதற்கும் தண்டப் பணம் அறவிடும் நடைமுறையைக் கையாள்வதற்கும் என அமைக்கப்பட்ட யாழ். மாநகர காவல் படையின் பணியாளர்கள் ஐவரும் விசாரணைக்காக அழைக்கப்பட்டுள்ளனர்.

இவர்கள், கொழும்பிலுள்ள நாலாம் மாடியில் அமைந்துள்ள பயங்காரவாத விசாரணைப் பிரிவினரின் அலுவலகத்துக்கு எதிர்வரும் 11ஆம் திகதி காலை ஒன்பது மணிக்குச் சமுகமளிக்குமாறு அழைப்பு விடுக்கப்பட்டுள்ளது.

யாழ். மாநகரத்தை தூய்மையான நகரமாகப் பேணும் பொருட்டு, மாநகர சபை ஊழியர்கள் ஐவர் மாநகர காவலர்களாக தனியான சீருடை அணிந்து கடந்த மாதம் பணியில் அமர்த்தப்பட்டிருந்தனர்.

எனினும், உத்தியோகத்தர்கள் அணிந்திருந்த சீருடை தமிழீழ விடுதலைப் புலிகளின் காவல்துறையின் சீருடைக்கு ஒத்தது என சர்ச்சைகள் எழுந்தன.

இந்நிலையில், இதுதொடர்பாக யாழ்ப்பாணம் மாநகர முதல்வர் சட்டத்தரணி வி.மணிவண்ணன், பயங்கரவாத விசாரணைப் பிரிவினரால் கைதுசெய்யப்பட்டதுடன் பின்னர், பிணையில் விடுவிக்கப்பட்டிருந்தார்.

இதேவேளை, குறித்த சீருடை அமைப்பு கொழும்பு மாநகர சபையின் சீருடை அமைப்பைப் பின்பற்றியே உருவாக்கப்பட்டது என வி.மணிவண்ணன் விளக்கமளித்திருந்தமை குறிப்பிடத்தக்கது.

மாகாண சபைத் தேர்தலை விரைவில் நடத்தாதிருக்க அரசாங்கம் தீர்மானித்துள்ளதாக தெரிவிக்கப்படுகின்றது. பிரதமர் மஹிந்த ராஜபக்ஷ தலைமையில் இடம்பெற்ற ஆளும் கட்சித் தலைவர்கள் கூட்டத்தின்போதே இந்த தீர்மானம் மேற்கொள்ளப்பட்டுள்ளது.

கொரோனா தொற்று பரவி வரும் தற்போதைய சூழ்நிலையில் மாகாண சபைத் தேர்தலை நடத்துவது சிறந்த விடயமல்லவென இதன்போது ஆளுந்தரப்பின் கட்சித் தலைவர்கள் சுட்டிக்காட்டியுள்ளனர்.

அத்துடன் நாட்டில் தற்போதைய சூழ்நிலையில் தேர்தலொன்றை நடத்துவதில் பல்வேறு சிக்கல் நிலைமைகள் காணப்படுவதாக பொதுஜன பெரமுனவின் அமைப்பாளர் பஸில் ராஜபக்ஸ தெரிவித்துள்ளார்.

ஜனாதிபதி கோட்டாபய ராஜபக்ஸ, உலக சுகாதார ஸ்தாபன தலைவர் Tedros Adhanom உடன் காணொளி கலந்துரையாடலில் ஈடுபட்டார்.

இது குறித்து ஜனாதிபதி ட்விட்டரில் பதிவிட்டுள்ளார்.

இரண்டாம் கட்ட கொரோனா தடுப்பூசிகளை வழங்குவதற்கு தேவையான 6 இலட்சம் AstraZeneca தடுப்பூசிகளை பெற்றுக்கொள்வது தொடர்பில் இதன்போது கலந்துரையாடப்பட்டுள்ளது.

குறித்த தடுப்பூசிகளை நாட்டிற்கு வழங்குவதற்காக உலக சுகாதார ஸ்தாபனத்தின் தலைவர் Tedros Adhanom முயற்சிகளை மேற்கொள்வார் என தாம் நம்புவதாக ஜனாதிபதி நம்பிக்கை வௌியிட்டுள்ளார்.