Category: தற்போதைய செய்திகள்

பாராளுமன்ற உறுப்பினர் சிவநேசதுரை சந்திரகாந்தன் (பிள்ளையான்) மற்றும் முன்னாள் பாராளுமன்ற உறுப்பினர் விநாயகமூர்த்தி முரளிதரன் (கருணா அம்மான்) ஆகியோர், கிழக்கு மாகாணத்தைச் சேர்ந்த பிரதிநிதிகளுடன், இந்திய பிரதி உயர் ஸ்தானிகர் வினோத் கே ஜேக்கப்பை பெப்ரவரி 02 ஆம் திகதி சந்தித்து பேச்சுவார்த்தை நடத்தியுள்ளனர்.

இந்த சந்திப்புகள் இருவேறு சந்தர்ப்பங்களில் இடம்பெற்றன என இந்திய உயர்ஸ்தானிகராலயம் விடுத்துள்ள ஊடக அறிக்கையில் தெரிவிக்கப்பட்டுள்ளது.

இந்த இரு சந்திப்புக்களிலும் இலங்கையுடனான நீண்ட அபிவிருத்தி பங்குடைமையை பேணுவதற்கான இந்தியாவின் உறுதிப்பாட்டினை பிரதி உயர் ஸ்தானிகர் ஜேக்கப் வலியுறுத்தியிருந்தார். பிரதி உயர் ஸ்தானிகர் ஜேக்கப், சிவநேசதுரை சந்திரகாந்தன் ஆகியோர் மாகாண சபைகள் மற்றும் 13 ஆவது திருத்தத்தினை முழுமையாக அமுல்படுத்துதல் குறித்தும் கலந்துரையாடியுள்ளனர்.

இதேவேளை, போரினால் பாதிக்கப்பட்ட விதவைகள் மற்றும் விசேட தேவையுடையோர்களுக்கான வாழ்வாதார வாய்ப்புக்கள், கல்வி மற்றும் புலமைப்பரிசில் உள்ளிட்ட பல்வேறு விடயங்களின் எதிர்கால அபிவிருத்தி ஒத்துழைப்புக்கான சாத்தியப்பாடுகள் தொடர்பாகவும் இந்த சந்திப்பின்போது திரு.விநாயகமூர்த்தி முரளிதரன் எடுத்துரைத்துள்ளார்.

மாகாண சபை மற்றும் 13 ஆவது திருத்தத்தினை முழுமையாக அமுல்படுத்துதல் ஊடாக தமிழ் மக்களின் அபிலாஷைகளை நிறைவேற்றுவதற்கான சிறந்த வழி அர்த்தப்புஷ்டியான பரவலாக்கம் என்பதே இந்திய அரசாங்கத்தின் நிலைப்பாடு என்பதனை பிரதி உயர் ஸ்தானிகர் இந்த சந்தர்ப்பத்தில் வலியுறுத்திக்கூறினார் எனவும் அவ்வறிக்கையில் மேலும் தெரிவிக்கப்பட்டுள்ளது.

2009 ஆம் ஆண்டு எமது ஆயுதப்போராட்டம் மௌனிக்கப்பட்டதன் பின்பு தமிழ் மக்கள் கடும் அநீதிக்குள் தள்ளப்பட்டிருக்கின்றார்கள் என மட்டக்களப்பு ரெலோ பாராளுமன்ற உறுப்பினர் கோவிந்தன் கருணாகரம் தெரிவித்தார்.

தமிழ்த் தேசியக் கூட்டமைப்பினால் எற்பாடு செய்யப்பட்டிருந்த பொங்கல் விழா களுதாவளை ஈஸ்வரன் ஆலய முன்றலில் மண்முனை தென் எருவில் பற்று பிரதேச சபை தவிசாளர் யோகநாதன் தலைமையில் நடைபெற்றது.

இந் நிகழ்வில் மட்டக்களப்பு மாவட்ட பாராளுமன்ற உறுப்பினர் இரா.சாணக்கியன், முன்னாள் பாராளுமன்ற உறுப்பினர்களான பொன்.செல்வராசா, பா.அரியநேத்திரன், ஞா.ஸ்ரீநேசன், முன்னாள் மாகாண சபை உறுப்பினர் மா.நடராசா, மட்டக்களப்பு மாநகர மேயர் சரவணபவன் மற்றும் பிரதேச சபைகளின் தவிசாளர்கள், பிரதேச சபை உறுப்பினர்கள் என பலரும் கலுந்து கொண்டனர்.

இந் நிகழ்வில் அதிதியாக கலந்து கொண்டு உரையாற்றும் போதே இவர் இவ்வாறு தெரிவித்தார்.

அவர் அங்க தொடர்ந்து உரையாற்றுகையில்-

எமது பிரதேசம் தற்போது படும் இன்னல்களை நாங்கள் அறிந்த வண்ணவே இருக்கின்றோம். தற்போது வடகிழக்கிலே கடந்த காலங்களில் தமிழ் மக்கள் அடிமைகளாக இரண்டாம்தர பிரஜைகளாக நடாத்தப்பட்டதன் காரணமாக இந்த நாடு பல போராட்டங்களை சந்தித்து வந்திருந்தது. 2009 ஆம் ஆண்டு எமது ஆயுதப்போராட்டம் மௌனிக்கப்பட்டதன் பின்பு தமிழ் மக்கள் கடும் அநீநிதிக்குள் தள்ளப்பட்டிருக்கின்றார்கள். இவை அனைத்திற்கும் ஒரு தீர்வு வேண்டி வெளி உலகத்திற்கு எடுத்துக் கூறப்பட வேண்டும். குறிப்பாக எதிர்வரும் மார்ச் மாதம் ஜெனிவாவிலே மனித உரிமை பேரவைக்கான கூட்டத்தொடர் ஆரம்பிக்க இருப்பதால் எமது பிரச்சினையை உலக நாடுகளுக்கு தெளிவுபடுத்தும் முகமாக பொத்துவிலில் இருந்து பொலிகண்டி வரை மாபெரும் பேரணி ஒன்றினை நடாத்துவதற்கான வடகிழக்கு சிவில் சமூகத்தின் தீர்மானத்திற்கு தமிழ்த் தேசியக் கூட்டமைப்பும் ஆதரவு வழங்க இருக்கின்றது.

எதிர் வரும் மார்ச் மாதம் ஜெனிவாவிலே கொண்டுவர இருக்கும் பிரச்சினை மிகவும் கடுமையானதாக இருக்க வேண்டும் என்பது எமது அவாவாக இருக்கின்றது. இதனை அறிந்த கோட்டபாய ராஜபக்ச மூவர் கொண்ட குழுவினை நியமித்திருக்கின்றார். கடந்த காலங்களிலே இங்கு தமிழர்களுக்கு நடந்த அட்டூழியங்களை கண்டறிவதற்கான ஒரு ஆணைக்குழுவை நியமித்துள்ளார். இதில் உள்ள ஆச்சரியம் என்னவென்றால் அவர் பாதுகாப்பு அமைச்சின் செயலாளராக இருக்கும் போது நடைபெற்ற அநியாங்களை கண்டறிவதற்கு அவரே ஆணைக்குழுவை நியமித்துள்ளார். இந்த செயற்பாடு என்பது இந்த நாட்டு மக்களையல்ல ஐக்கிய நாடுகள் சபையைக் கூட ஏமாற்றும் வித்தையாகவே நாங்கள் இதனை பார்க்கின்றோம்.

அதற்கு மேலாக அவரும் அவருடன் இருக்கும் அமைச்சர்களும் என்ன கூறுகின்றனர். அந்நிய சக்திகள் ஒரு நாட்டின் இறைமைக்குள் மூக்கை நுழைக்கக் கூடாது விரலை நுழைக்கக் கூடாது என்றெல்லாம் கூறிவருகின்றனர். நீங்கள் இந்த நாட்டிலே இருக்கின்ற சிறுபான்மை இனமான தமிழ் பேசும் சமூகத்திற்கு இழைக்கின்ற இன்னல்களுக்கா சர்வதேசம் மூக்கையல்ல முழு உடலையே நுழைக்கும் அளவிற்குதான் நீங்கள் செயற்பட்டுக் கொண்டு இருக்கின்றீர்கள் என்பதனை நீங்கள் உணர வேண்டும்.

ஆயுதப் போராட்டத்தை முடிவுக்கு கொண்டு வந்த நீங்கள் தொடர்ந்து போராடிவரும் எமது இனத்திற்காக நீங்கள் மக்ளளது அபிலாசைகளை வெல்லக் கூடிதொரு தீர்வினை உங்களால் கொடுக்க முடியும். காரணம் பாராளுமன்றத்தில் உங்களுக்கு பெரும்பான்மை இருக்கின்றது முழு அதிகாரத்தையும் நீங்கள் இருபதாவது திருத்தச்சட்டத்தின் மூலம் பெற்றிருக்கின்றீர்கள். ஆகவே உங்களால் தமிழ் மக்களுக்குரிய நியாயமான தீர்வினை வழங்க முடியும். அவ்வாறு வழங்கிவிட்டு சர்வதேசத்திடம் மூக்கை நுழைக்க வேண்டாம் என்று கூறுங்கள் அவர்களும் மூக்கை நுழைக்கமாட்டார்கள்.

குறிப்பாக 2020 ஆம் ஆண்டிற்கு பிற்பாடு வடக்கு கிழக்கு பிரதேசங்களை பௌத்த மயமாக்கும் ஒரு நிகழ்ச்சி நிரலின் கீழ் இந்த அரசாங்கம் செயற்பட்டுக் கொண்டு இருக்கின்றது. எல்லையோரங்களில் இருக்கும் காணிகள் அனைத்தும் கபளிகரம் செய்யப்பட்டுக் கொண்டு இருக்கின்றது இந்த நேரத்தில் தமிழ் மக்களாகிய நாங்கள் அனைவரும் ஒற்றுமையாக இருக்க வேண்டும். கடந்த காலங்களிடையே தமிழ்த் தேசியம் பேசும் கட்சிகளிடையே குழப்பங்கள் ஏற்பட்டு இருந்தது அவை அனைத்தையும் மறந்து எமது எதர் காலத்தில் ஒற்றமையாக ஜனநாயக ரீதியில் இராஜதந்திர ரீதியில் போராடி எமது மக்களுக்குரிய உரிமைகளை பாதுகாக்க வேண்டும் என இதன்போது தெரிவித்தார்.

தமிழர்கள் தீர்வுக்காகவும் நீதிக்காகவும் ஜனநாயக வழியில் போராடினால் அந்தப் போராட்டத்தை எவரும் கொச்சைப்படுத்தக்கூடாது என்று முன்னாள் ஜனாதிபதியும் ஸ்ரீலங்கா சுதந்திரக் கட்சியின் தலைவருமான மைத்திரிபால சிறிசேன தெரிவித்துள்ளார்.

இந்த விடயம் தொடர்பாக கருத்து வெளியிட்டுள்ள அவர், “கடந்த எமது ஆட்சியில் தமிழர்களின் மனதை நாம் வென்றிருந்ததோடு சர்வதேச சமூகத்தின் மனதையும் வென்று காட்டியிருந்தோம். ஆனால், இந்த ஆட்சியில் அவற்றை ஏன் சாதிக்க முடியாமல் உள்ளது என்பது தொடர்பில் அரசு ஆராய்ந்து பார்க்க வேண்டும்.

அதைவிடுத்து இன முறுகலை மேலும் வலுவடையைச் செய்யும் விதத்திலும் சர்வதேச மட்டத்தில் நாட்டுக்கு அபகீர்த்தியை ஏற்படுத்தும் வகையிலும் அரசிலுள்ள சிலர் கருத்துக்கள் வெளியிடுவதை உடன் நிறுத்த வேண்டும்.

இது தொடர்பில் ஜனாதிபதி, பிரதமர் ஆகிய இருவரும் கவனம் செலுத்த வேண்டும். பிரச்சினைகளை ஏற்படுத்த முனைவோரை ஜனாதிபதியும் பிரதமரும் தூரத்தில் வைத்திருக்க வேண்டும். அவர்களைப் பக்கத்தில் வைத்துக்கொண்டு ஆட்சியைத் திறம்பட முன்னெடுக்க முடியாது” என அவர் மேலும் தெரிவித்துள்ளார்.

தனி தமிழ் ஈழம் அமைந்திட பொது வாக்கெடுப்பு நடத்த வேண்டும் என உலக தலைவர்களுக்கு தி.மு.கழகத்தின் சார்பில், பொதுச்செயலாளர் வைகோ வேண்டுகோள் விடுத்துள்ளார்.

ஐ.நா. மனித உரிமைகள் ஆணையத்தின் கூட்டம் நடைபெறவுள்ள நிலையில், இந்த விடயம் தொடர்பாக அவர், நூற்றுக்கும் மேற்பட்ட மின் அஞ்சல் கடிதங்களை அனுப்பி உள்ளார்.

அமெரிக்க ஜனாதிபதி ஜோ பைடன், இந்தியப் பிரதமர் நரேந்திர மோடி, பிரித்தானிய பிரதமர் பொரிஸ் ஜோன்சன், கனடா பிரதமர் ஜஸ்டின் ட்ரூடோ, அவுஸ்ரேலிய பிரதமர் ஸ்கொட் மொரிசன் உள்ளிட்ட உலக நாடுகளின் தலைவர்கள், ஐ.நா. மன்றப் பொதுச்செயலாளர், ஐ.நா. மனித உரிமைகள் ஆணையத் தலைவர், ஐரோப்பிய ஒன்றிய நாடாளுமன்றத் தலைவர், இந்திய வெளிவிவகார அமைச்சர் ஜெய்சங்கர் உள்ளிட்ட பல நாடுகளின் வெளிவிவகார அமைச்சர்கள், நாடாளுமன்ற உறுப்பினர்கள், மனித உரிமைகள் பாதுகாப்பு அமைப்புகளுக்கு அவர் இவ்வாறு கடிதங்களை அனுப்பியுள்ளார்.

குறித்த கடிதத்தில் மேலும் தெரிவித்துள்ள அவர், “2009-ம் ஆண்டு நோர்வே- பிரான்ஸ், கனடா, சுவிட்சர்லாந்து, ஜெர்மனி, நெதர்லாந்து ஆகிய நாடுகளில் வாழ்கின்ற புலம்பெயர்ந்து வந்த இலங்கைத் தமிழர்கள் இடையே ஒரு பொது வாக்கெடுப்பு நடத்தப்பட்டது. தமிழ் ஈழம் அமைவதற்கு அவர்கள் பெரும் ஆதரவு அளித்தனர்.

2011ம் ஆண்டு மார்ச் 25ஆம் திகதி இந்தியாவின் தமிழ்நாடு மாநிலச் சட்டமன்றம், ஐ.நா. அறிக்கையின் அடிப்படையில் ஒரு தீர்மானத்தை ஒருமனதாக நிறைவேற்றியது.

விடுதலைப்புலிகள் உட்பட இலங்கைச் சிறைகளில் அடைக்கப்பட்டுள்ள அனைத்துத் தமிழர்களையும் உடனடியாக விடுதலை செய்ய வேண்டும், அனைத்திற்கும் மேலாக இலங்கையின் வடக்கு கிழக்கு மாநிலங்களைப் பிரித்து தனித்தமிழ் அமைப்பதற்கு ஐ.நா. மன்றத்தின் மேற்பார்வையில் பொது வாக்குப்பதிவு நடத்த வேண்டும் என தமிழ்நாடு சட்டமன்றத் தீர்மானம் கோருகின்றது.

இலங்கை வடக்கு மாகாண மன்றம், 2015-ம் ஆண்டு பெப்ரவரி 10ஆம் திகதி ஒரு தீர்மானம் நிறைவேற்றியது. அதன்படி இலங்கையின் வடக்கு, கிழக்கு மாநிலங்களை ஒன்றாக இணைக்க வேண்டும்.

சிறைகளில் அடைக்கப்பட்டுள்ள தமிழர்களை விடுதலை செய்ய வேண்டும் தமிழர் தாயகப் பகுதிகளில் இருந்து சிங்கள ஆக்கிரமிப்பாளர்கள் அனைவரையும் வெளியேற்ற வேண்டும் என அந்தத் தீர்மானம் கோருகின்றது.

இலங்கையின் வடக்கு கிழக்கு மாகாணங்களில் ஐ.நா. மன்றத்தின் மேற்பார்வையில் ஒரு பொது வாக்குப்பதிவு நடத்த வேண்டும் என்று அந்தத் தீர்மானம் வலியுறுத்துகின்றது.

எனவே ஐ.நா. மனித உரிமைகள் மன்றம் மற்றும் ஐ.நா.வின் அனைத்து உறுப்பு நாடுகளும் சேர்ந்து கீழ்காணும் கோரிக்கைகளை ஆய்வு செய்து தீர்வு காண வேண்டும் என நாங்கள் கோருகின்றோம்.

1. ஈழத்தமிழர்களின் தன்னாட்சி உரிமையை ஏற்க வேண்டும், ஐ.நா. மன்றத்தின் மேற்பார்வையில் பொது வாக்கெடுப்பு நடத்த வேண்டும்.

2. 2015 பெப்ரவரி 10ஆம் திகதி இலங்கை வடக்கு மாகாண மன்றம் நிறைவேற்றிய தீர்மானத்தை ஏற்க வேண்டும்.

3. இலங்கை அரசு நடத்துகின்ற எந்த விசாரணையின் மீதும் தமிழ் மக்களுக்கு நம்பிக்கை இல்லை எனவே பன்னாட்டுக் குற்ற இயல் நீதிமன்றம் விசாரணை மேற்கொள்ள வேண்டும்.

4. இந்திய அரசு, மனித உரிமைகள் மன்ற உறுப்பு நாடுகளை ஒருங்கிணைத்து நிகழ்ச்சி நிரல் 4-ன்படி சிறப்பு ஆணையர் ஒருவரைத் தெரிவு செய்து, இலங்கையில் நடைபெறுகின்ற மனித உரிமை மீறல்கள், தமிழர்களுக்கு எதிராக ஒடுக்குமுறைகளைக் கண்காணிப்பதற்கு ஆவன செய்ய வேண்டும்.

05. இலங்கையில் நடைபெறுகின்ற மனித உரிமை மீறல்களைக் கண்காணித்து, உடனுக்குடன் நடவடிக்கை மேற்கொள்ள வேண்டும்.

06. தொடர்புடைய உறுப்பினர்களுடன் இலங்கைக்கு நேரில் சென்று ஆய்வு செய்ய வேண்டும்.

07. இலங்கையின் வடக்கு, கிழக்கு மாநிலங்களில் மனித உரிமை மீறல்கள் குறித்து ஐ.நா. பொதுப்பேரவைக்கும் மனித உரிமைகள் மன்றத்திற்கும் ஆய்வு அறிக்கை வழங்க வேண்டும்.

08.பிரச்சினைகளை உடனுக்குடன் வெளிக்கொணர வேண்டும். அதிகாரபூர்வ செய்தி அறிக்கைகளை வெளியிட வேண்டும்.

09.இலங்கைச் சிறைகளில் அடைக்கப்பட்டுள்ள தமிழர்களை விடுவித்து நீதி வழங்க வேண்டும்” என அவர் கோரிக்கை விடுத்துள்ளார்.

பொத்துவில் முதல் பொலிகண்டி வரையான வடகிழக்கு சிவில் அமைப்புக்களின் போராட்டத்திற்கு ரெலோ பூரண ஆதரவை தெரிவித்துள்ளது.

இது தொடர்பில் விடுக்கப்பட்டுள்ள ஊடக அறிக்கையில் பொத்துவிலில் தொடங்கி பொலிகண்டி வரை நடைபெறவுள்ள வடக்கு கிழக்கு சிவில் அமைப்புக்களின் ஏற்பாட்டில் நடைபெறவுள்ள தமிழின ஒடுக்குமுறைக்கு எதிரான ஐனநாயகப் போராட்டத்திற்கு தமிழ் ஈழ விடுதலை இயக்கம் (ரெலோ ) எமது முழுமையான பூரண ஆதரவை தெரிவிக்கின்றோம்.

தமிழ் மக்களின் இன விடுதலைக்காக தொடர்ச்சியாக ஐனநாயக முறையில் போராடி வரும் எமது கட்சி அண்மைக் காலங்களில் கூர்மையடைந்துள்ள தமிழின அழிப்பை தடுத்து நிறுத்த பல இடங்களிலும் களத்தில் நின்று குரல் கொடுப்பதுடன் சர்வதேச ரீதியாகவும் இலங்கை அரசாங்கத்தின் அட்டூழியங்களை மனித உரிமைகள் சார்பான அமைப்புக்களுக்கும்,மனிதவுரிமைகளை பாதுகாக்கும் நாடுகளுக்கும் அறிக்கை இட்டு அழுத்தங்களை இயன்ற வரை பிரயோகித்து வருகின்றோம். இச் செயற்பாடு தமிழர் தாயகப் பகுதியின் எட்டு மாவட்டங்களிலும் தொடர்ந்து எம்மால் முன்னெடுக்கப்பட்டு வருகின்றது.

இதன் தொடர்ச்சியாக வடகிழக்கு இணைந்த ஒரு ஐனநாயகப் போராட்டத்தை சிவில் அமைப்புக்கள் ஏற்பாடு செய்துள்ளமையை நாம் வரவேற்கின்றோம் அது மட்டுமல்ல எமது பூரண ஆதரவையும் தெரிவிக்கின்றோம் அத்துடன் இந்த ஐனநாயகப் போராட்டத்தில் தமிழர் தாயகத்தில் உள்ள அனைத்து தமிழ்த் தேசியம் சார்ந்த அமைப்புக்களையும் தமிழ் பேசும் முஸ்லிம் அமைப்புக்களையும் ஆதரவு வழங்குமாறு கேட்டுக் கொள்கின்றோம் என தெரிவிக்கப்பட்டுள்ளது.