Category: செய்திகள்

கட்சி அரசியல் அதிகார திட்டங்கள் மற்றும் நாடாளுமன்ற உறுப்பினர்களை விலை கொடுத்து வாங்குவது போன்ற மோசடிகளை புறந்தள்ளி விட்டு, மக்களின் எதிர்பார்ப்புகளை நிறைவேற்றக்கூடிய தலைமைத்துவத்தை தெரிவு செய்ய மனசாட்சிக்கு இணங்க செயற்பட வேண்டும் என கத்தோலிக்க திருச்சபையின் கொழும்பு பேராயர் வணக்கத்திற்குரிய கர்தினால் மெல்கம் ரஞ்சித் ஆண்டகை கோரிக்கை விடுத்துள்ளார்.

நாடாளுமன்ற உறுப்பினர்களுக்கு அனுப்பியுள்ள பகிரங்க கடிதத்தில் அவர் இந்த கோரிக்கையை விடுத்துள்ளார்.

மக்களின் எதிர்பார்ப்பை நிறைவேற்றுவதற்காக கூடிய பங்களிப்பை வழங்க கிடைத்துள்ள வரலாற்று சிறப்புமிக்க சந்தர்ப்பத்தை தவறவிட வேண்டாம்.

அனைத்து அதிகாரங்களுடன் கூடிய ஜனாதிபதி ஒருவர் அதிகாரத்தை கைவிட்டு செல்ல நேரிட்ட அரிய சந்தர்ப்பத்தில், தாய் நாட்டின் எதிர்காலத்திற்காக எடுக்க வேண்டிய மிக தீர்மானகரமான முடிவை நோக்கி நாட்டின் இரண்டு கோடிக்கும் மேற்பட்ட மக்கள் பார்த்துக்கொண்டிருக்கின்றனர்.

நாடாளுமன்றத்தில் மக்கள் பிரதிநிதிகள் கூடி மக்களின் நிலைப்பாட்டுக்கு முரணான முடிவை எடுப்பார்களோ என்ற மிகப்பெரிய அச்சம் மக்களுக்குள் காணப்படுகிறது.

குறுகிய காலத்திற்கு கிடைக்கும் அரசியல் அதிகாரத்தை விட ஆத்ம கௌரவமும் தாய் நாட்டு மக்களின் எதிர்பார்ப்புகளும் முக்கியமானவை எனவும் மெல்கம் ரஞ்சித் ஆண்டகை அந்த கடிதத்தில் கூறியுள்ளார்.

இலங்கைக்கு சர்வதேச சமூகம் உதவி வழங்கும் நடவடிக்கைகளிற்கு பிரிட்டன் தலைமை தாங்க வேண்டும் என பிரிட்டனின் ஓய்வு பெற்ற இராஜதந்திரி பீட்டர் ஹீப் கோரிக்கை விடுத்துள்ளார்.

கார்டியன் ஊடகத்தில் வெளிவந்துள்ள இது தொடர்பான செய்தியில்,

இலங்கை நெருக்கடிக்கான பிரிட்டன் அரசாங்கத்தின் பதில் நடவடிக்கை வெக்கக்கேடானது. மக்கள் பட்டினியால் அவதியுறுகின்றனர், மருந்துகள் இன்மையால் உயிரிழக்கின்றனர். போதியளவு எரிபொருள் இல்லாததால் வேலைக்கு செல்ல முடியாத நிலையில் உள்ளனர் மக்கள். மின்சாரத் தட்டுப்பாடு காணப்படுகின்றது என அவர் சுட்டிகாட்டியுள்ளார்.

இந்த மக்கள் இந்த நிலைமைக்கு ஏன் தள்ளப்பட்டனர் என்பதற்கு அப்பால் நெருக்கடிநிலையில் உள்ள நாட்டிற்கு உதவுவதற்கு பிரிட்டன் தலைமை வகிக்க வேண்டும். நாங்கள் அந்த மக்களின் விரும்பமின்றி 150 ஆண்டுகள் அந்நாட்டை ஆட்சி செய்ததைக் கருத்தில் கொண்டு மிக வேகமாக சர்வதேச நிவாரண முயற்சிக்கு தலைமை தாங்க வேண்டும். பொதுநலவாயத்தின் ஊடாக அதனை செய்யலாம் என அவர் மேலும் தெரிவித்துள்ளார்.

காலி முகத்திடல் போராட்டத்தின் பிரதிநிதிகள் எதிர்கட்சித் தலைவர் சஜித் பிரேமதாசவை கொழும்பில் உள்ள எதிர்க்கட்சித் தலைவர் அலுவலகத்தில் இன்று திங்கட்கிழமை சந்தித்தனர்.காலிமுகத்திடல் போராட்டத்தின் பிரதிநிதிகள் முன்வைக்கும் ‘செயற்திட்டத்தை’ எதிர்காலத்தில் எந்த அரசாங்கமும் கடைப்பிடிக்க வேண்டும் என அவர்கள் எதிர்க்கட்சி தலைவருக்கு வலியுறுத்தியதாக தெரிவித்தனர்.

இதேவேளை கோட்டாபய ராஜபக்ஷ மற்றும் ரணில் விக்கிரமசிங்க பதவி விலக வேண்டும் என்பதே காலி முகத்திடல் போராட்டக்கார்களின் முக்கிய கோரிக்கையாக இருப்பதாக பிரதிநிதிகள் தெரிவித்தனர்.இது தொடர்பாக எடுக்கப்பட வேண்டிய நடவடிக்கைகள் குறித்து ஆலோசிப்பதற்காகவே இன்று எதிர்க்கட்சித் தலைவரைச் சந்தித்ததாகவும் போராட்டக்கார்களின் பிரதிநிதிகள் தெரிவித்தனர்.(

இங்கிலாந்தில் தஞ்சமடையும் அகதிகளை அச்சுறுத்துவதற்காகவே ருவாண்டாவில் அகதிகளை சிறைப்படுத்தும் திட்டத்தை இங்கிலாந்து உள்துறை அமைச்சர் பிரீத்தி பட்டேல் நடைமுறைக்கு கொண்டு வந்திருக்கிறார் என முன்னாள் அவுஸ்திரேலிய தடுப்பு முகாம் அகதி குற்றம் சாட்டியிருக்கிறார்.

நவுருத்தீவில் அவுஸ்திரேலியா அகதிகளை சிறைப்படுத்தி வைத்திருந்தது போலவே இங்கிலாந்தும் முயற்சித்திருக்கிறது என அந்த அகதி தெரிவித்திருக்கிறார்.

எல்லி ஷகிபா முதன் முதலில் நவுருத்தீவுக்கு கொண்டு செல்லப்பட்ட போது இங்கு சிறிது காலமே இருப்போம் என எண்ணியிருக்கிறார். ஆனால், ஈரானிலிருந்து வெளியேறி இந்தோனேசியா வழியாக அவுஸ்திரேலியாவில் தஞ்சமடைந்த அவர் அத்தீவில் 6 ஆண்டுகள் ஆஸ்திரேலிய அரசால் தடுத்து வைக்கப்பட்டிருந்தார்.

“எங்களை உதாரணமாக காட்டுவதற்காகவே அவுஸ்திரேலியா நவுருத்தீவு முகாம் உருவாக்கியது. அவுஸ்திரேலியாவுக்கு படகு வழியாக வரும் அகதிகளுக்கு என்னவாகும் என்னாகும் என்பதை சொல்லும் விதமாக இம்முகாம் நடைமுறைக்கு கொண்டு வரப்பட்டது,” எனக் கூறுகிறார் அமெரிக்காவில் தற்போது வசித்து வரும் முன்னாள் அகதியான எல்லி ஷகிபா.

“அவுஸ்திரேலியா செய்ததை தான், தற்போது இங்கிலாந்து உள்துறை அமைச்சர் பீரித்தி பட்டேல் செய்கிறார்,” என ஷகிபா கூறியிருக்கிறார்.

ஐரோப்பியாவிலிருந்து இங்கிலாந்தை படகு வழியாக சென்றடையும் தஞ்சக்கோரிக்கையாளர்களை ருவாண்டாவுக்கு அனுப்பும் புதியதொரு ஒப்பந்தம் இங்கிலாந்து- ருவாண்டா இடையே சமீபத்தில் கையெழுத்தானது. கடந்த ஆண்டு மட்டும் சிறிய படகுகள் வழியாக சுமார் 28 ஆயிரம் இங்கிலாந்தில் தஞ்சமடைந்திருக்கின்றனர், இந்த எண்ணிக்கை கடந்த 2020ல் 8500 ஆக இருந்தது.

தற்போதைய புதிய ஒப்பந்தத்தின் படி, இங்கிலாந்தில் சிறிய படகுகள் வழியாக தஞ்சமடைபவர்களை அந்நாட்டிலிருந்து 6400 கிலோ மீட்டர் அப்பால் உள்ள ருவாண்டாவுக்கு இங்கிலாந்து அரசு அனுப்பயிருக்கிறது. சட்டவிரோத புலம்பெயர்வை தடுப்பதற்கான நடவடிக்கையாக சொல்லப்படும் இதை இங்கிலாந்து எதிர்க்கட்சியினரும் அகதிகள் நல செயல்பாட்டாளர்களும் ‘மனிதாபிமானமற்றது, மக்கள் பணத்தை வீணடிப்பது’ என கடுமையாக விமர்சித்துள்ளமை இங்கு குறிப்பிடத்தக்கது.

கோட்டாபயவை கைது செய்ய வேண்டுமென பிரித்தானியாவின் லிபரல் ஜனநாயகக் கட்சியின் தலைவர் இட் டேவி  (Sir Ed Davey) வலியுறுத்தியுள்ளார்.

கோட்டாபய ராஜபக்ச இலங்கையை விட்டு தப்பிச் சென்றமை குறித்து பிரித்தானியாவின் லிபரல் ஜனநாயகக் கட்சியினால் கடுமையான எதிர்ப்பு வெளியிடப்பட்டுள்ளது, கோட்டாபயவை கைது செய்யுமாறு விடுக்கப்பட்ட கோரிக்கைக்கு கன்சர்வேட்டிவ் மற்றும் தொழிற் கட்சிகளும் ஆதரவு வெளியிட்டுள்ளன.