Author: TELO Admin

இலங்கை அரசாங்கத்துக்கும் சீன மக்கள் குடியரசுக்கும் இடையிலான இராஜதந்திர உறவுகளின் 65ஆவது ஆண்டு நிறைவு மற்றும் சீன கம்யூனிஸ்ட் கட்சியின் 100ஆவது ஆண்டுப் பூர்த்தியை முன்னிட்டு, வெளியிடப்பட்ட புதிய 1,000 ரூபாய் நாணயம், இலங்கை மத்திய வங்கியின் ஆளுநர் பேராசிரியர் டபிள்யூ. டி. லக்ஷ்மனனால் ஜனாதிபதி கோத்தாபய ராஜபக்ஷவிடம் வழங்கி வைக்கப்பட்டது.

இந்த நிகழ்வு, இன்று (06) பிற்பகல் ஜனாதிபதி அலுவலகத்தில் இடம்பெற்றது.

இந்த நினைவு நாணயமானது, இரு நாடுகளுக்கும் இடையிலான நீண்டகால நட்புறவு மற்றும் பரஸ்பர உறவுகளுக்கான விசேட கௌரவமாக வெளியிட்டு வைக்கப்பட்டுள்ளது.

நாணயத்தின் ஒரு பக்கத்தில் இலங்கை மற்றும் சீனாவின் தேசிய கொடிகளுடன், தாமரைத் தடாகம் மஹிந்த ராஜபக்ஷ கலையரங்கின் முன் பக்கத் தோற்றமானது, நாணயத்தின் மத்தியில் காட்சியளிக்கிறது. கலையரங்குக்குக் கீழே பெரிய இலக்கத்தில் 2022 எனக் குறிப்பிடப்பட்டுள்ளது. அத்துடன், ஆங்கிலம், சிங்களம் மற்றும் தமிழ் மொழிகளில் “இலங்கை – சீனா 65 ஆண்டுகள்” என்றும் நாணயத்தில் குறிப்பிடப்பட்டுள்ளது.

நாணயத்தின் மறுபக்கத்தில் 1,000 ரூபாய் மற்றும் “சீன கம்யூனிஸ்ட் கட்சி” என மும்மொழிகளிலும் குறிப்பிடப்பட்டுள்ளது.

500 தங்க நாணயங்களும் 2000 வெள்ளி நாணயங்களும் இவ்வாறு வெளியிடப்பட்டுள்ளதாக மத்திய வங்கி அறிவித்துள்ளது.

பத்திரிகை சுதந்திரத்தை பெருமளவில் முறியடிக்கும் 37 அரச தலைவர்கள் அல்லது அரசாங்கத் தலைவர்களின் விபரங்களை ‘RSF’ என்று அழைக்கப்படும் எல்லைகள் அற்ற நிருபர்கள் அமைப்பு வெளியிட்டுள்ளது.

இந்தப் பட்டியலில் இலங்கையின் ஜனாதிபதி கோத்தபாய ராஜபக்ஷ இடம்பிடித்துள்ளதுடன், முதல் முறையாக இரு பெண்களும் ஒரு ஐரோப்பியரும் உள்வாங்கப்பட்டுள்ளனர்.

ஆர்.எஸ்.எஃப் இன் பத்திரிகை சுதந்திர வரைபடத்தில் 19 பேர் சிவப்பு நிறத்தின் கீழ் வகைப்படுத்தப்பட்டுள்ளன. அதாவது அவர்களின் நிலைமை பத்திரிகை சுதந்திரத்தக்கு “மோசமானது”.

16 நாடுகளின் தலைவர்கள் கறுப்பு நிறத்தின் கீழ் வகைப்படுத்தப்பட்டுள்ளனர். அதாவது அவர்களின் நிலைமை பத்திரிகை சுதந்திரத்துக்கு “மிகவும் மோசமானது”.

பத்திரிகை சுதந்திரத்துக்கு எதிராக செயற்படும் கொடுங்கோலர்களில் மூன்றில் ஒரு பகுதியினர் (13) ஆசிய-பசிபிக் பிராந்தியத்தைச் சேர்ந்தவர்கள் ஆவர்.

” பத்திரிகை சுதந்திரத்தை சூறையாடும் 37 தலைவர்கள் தற்சமயம் உலகம் முழுவதும் உள்ளனர். இந்த பட்டியல் முழுமையானது என்று யாரும் சொல்ல முடியாது” என்று ஆர்எஸ்எஃப் பொதுச்செயலாளர் கிறிஸ்டோஃப் டெலோயர் கூறினார்.

“இவ்வாறான தலைவர்கள் ஒவ்வொருவரும் அவர்களது சொந்த பாணியைக் கொண்டுள்ளனர். சிலர் பகுத்தறிவற்ற மற்றும் சித்தப்பிரமை உத்தரவுகளை பிறப்பித்து பயங்கரவாத ஆட்சியை முன்னெடுக்கின்றார்கள். மற்றவர்கள் கடுமையான சட்டங்களின் அடிப்படையில் கவனமாக கட்டமைக்கப்பட்ட மூலோபாயத்தை பின்பற்றுகிறார்கள்.

பட்டியலில் புதிதாக நுழைந்தவர்களில் மிகவும் குறிப்பிடத்தக்கவர் சவூதி அரேபியாவின் 35 வயதான கிரீட இளவரசர் முகமது பின் சல்மான்.

அவர் தனது கைகளில் உள்ள அனைத்து சக்திகளின் மையமாகவும், பத்திரிகை சுதந்திரத்தை சகித்துக் கொள்ளாத ஒரு முடியாட்சிக்கு தலைமை தாங்குகிறார். அவரது அடக்குமுறை முறைகளில் உளவு மற்றும் அச்சுறுத்தல்கள் அடங்கும், அவை சில நேரங்களில் கடத்தல், சித்திரவதை மற்றும் நினைத்துப்பார்க்க முடியாத பிற செயல்களுக்கு வழிவகுத்தன.

ஜமால் காஷோகியின் கொடூரமான கொலை வெறுமனே காட்டுமிராண்டித்தனமான ஒரு கொள்ளையடிக்கும் முறையை அம்பலப்படுத்தியது.

பட்டியலில் புதிதாக நுழைந்தவர்களில் பிரேசில் ஜனாதிபதி ஜெய்ர் போல்சனாரோவும் அடங்குவர், ஊடகங்களைப் பற்றிய ஆக்ரோஷமான மற்றும் கசப்பான சொல்லாட்சி தொற்றுநோய் தொடங்கியதிலிருந்து புதிய உயரங்களை எட்டியுள்ளது.

மற்றும் ஒரு ஐரோப்பிய பிரதம அமைச்சர், ஹங்கேரியின் விக்டர் ஆர்பன் ஆவார். அவர் 2010 இல் மீண்டும் ஆட்சிக்கு வந்ததிலிருந்து ஊடக பன்மைத்துவத்தையும் சுதந்திரத்தையும் சீராகவும் திறம்படவும் குறைமதிப்பிற்கு உட்படுத்தியவராகவும் காணப்படுகிறார்.

முதன் முறையாக பட்டியலில் இரு பெண்களும் உள்வாங்கப்பட்டுள்ளனர். அவர்கள் இருவரும் ஆசியாவிலிருந்து வந்தவர்கள் ஆவார்.

ஒருவர் கேரி லாம், அவர் 2017 முதல் ஹாங்காங் சிறப்பு நிர்வாக பிராந்தியத்தின் தலைமை நிர்வாகி, லாம் சீன ஜனாதிபதி ஜி ஜின்பிங்கின் கைப்பாவை என்பதை நிரூபித்துள்ளார்,

இப்போது ஊடகங்களுக்கு எதிரான தனது கொள்ளையடிக்கும் கொள்கைகளை வெளிப்படையாக ஆதரிக்கிறார். ஜூன் 24 அன்று ஹொங்கொங்கின் முன்னணி சுயாதீன செய்தித்தாள் ஆப்பிள் டெய்லியை மூடுவதற்கும், அதன் நிறுவனர் ஜிம்மி லாய், 2020 ஆர்எஸ்எஃப் பத்திரிகை சுதந்திர பரிசு பெற்றவரை சிறையில் அடைப்பதற்கும் அவரது தலைமை வழிவகுத்தது.

மற்றைய நபர் 2009 முதல் பங்களாதேஷின் பிரதம அமைச்சராக இருக்கும் ஷேக் ஹசினா.

அவரது கொள்ளையடிக்கும் சுரண்டல்களில் 2018 இல் டிஜிட்டல் பாதுகாப்பு சட்டத்தை ஏற்றுக்கொள்வது 70 க்கும் மேற்பட்ட ஊடகவியலாளர்கள் மற்றும் பதிவர்கள் மீது வழக்குத் தொடர வழிவகுத்தது.

இந்தப் பட்டியலில் புதிதாக இலங்கையின் ஜனாதிபதி கோத்தபாய ராஜபக்ஷவும் இடம்பிடித்துள்ளார்.

ஶ்ரீ லங்கா பொதுஜன பெரமுனவின் தேசியப் பட்டியல் பாராளுமன்ற உறுப்பினர் பதவிக்கு பசில் ராஜபக்ஸவின் பெயர் பரிந்துரைக்கப்பட்டுள்ளது.

பசில் ராஜபக்ஸவின் பெயர் தமக்கு பரிந்துரைக்கப்பட்டுள்ளதாக தேசிய தேர்தல்கள் ஆணைக்குழுவின் தலைவர் தெரிவித்தார்.

பாராளுமன்ற உறுப்பினர் ஜயந்த கெட்டகொட இன்று முற்பகல் தனது பதவியை இராஜினாமா செய்தார்.

இவரின் இராஜினாமாவால் ஏற்பட்ட தேசியப் பட்டியல் பாராளுமன்ற உறுப்பினர் வெற்றிடத்திற்காக பசில் ராஜபக்ஸவின் பெயர் தேசிய தேர்தல்கள் ஆணைக்குழுவிற்கு அனுப்பி வைக்கப்பட்டுள்ளது.

இருதரப்பு மற்றும் பலதரப்பு அரங்குகளில் பரஸ்பர நலன்களை முன்னேற்றுவதற்காக அமெரிக்காவுடன் இணைந்து பணியாற்றத் தயாராக இருப்பதாக இலங்கை தெரிவித்துள்ளது. வெளியுறவு அமைச்சர் தினேஷ் குணவர்தன அமெரிக்க வெளியுறவுத்துறை செயலர் அண்டனி பிளிங்கனுக்கு எழுதிய கடிதத்திலேயே மேற்கண்ட விடயத்தினை தெளிவுபடுத்தியுள்ளார்.

1948 இல் இராஜதந்திர உறவுகள் நிறுவப்பட்டதிலிருந்து, அமெரிக்காவுடனான இலங்கையின் உறவுகள் பரஸ்பர நன்மை பயக்கும் ஒத்துழைப்பின் பல்வேறு பகுதிகளிலும் தொடர்ந்து விரிவடைந்து வருகின்றன.எங்கள் இரு நாடுகளின் மற்றும் மக்களின் முன்னேற்றத்திற்காக இந்த பன்முக மற்றும் துடிப்பான கூட்டாண்மை மேலும் பலப்படுத்தப்பட்டு ஆழமடையும் என்று நான் நம்புகிறேன்.

கொவிட்-19 தொற்றுநோயைக் கட்டுப்படுத்த அமெரிக்கா அளித்த விலைமதிப்பற்ற ஆதரவையும் உதவியையும் அரசாங்கத்துடன் இணைந்து இலங்கை மக்களும் பாராட்டுகின்றனர் என அக்கடிதத்தில் தெரிவிக்கப்பட்டுள்ளது.

அத்துடன் அமெரிக்க ஜனாதிபதி பைடனின் சமீபத்திய முயற்சி, தேவைப்படும் நாடுகளுக்கு மில்லியன் கணக்கான தடுப்பூசிகள் அளவுகள் நன்கொடையாக வழங்குதல் உள்ளிட்ட செயற்பாடுகளுக்கும் தினேஷ் குணவர்த்தன பாராட்டுக்களை தெரிவித்தார்.

இக் கடித்தில் வெளியுறவு அமைச்சர், அமெரிக்காவின் சுதந்திரத்தின் 245 ஆவது ஆண்டு விழாவின் சந்தர்ப்பத்தில் தனது மனமார்ந்த வாழ்த்துக்களையும் தெரிவித்தார்.

அரசாங்கத்தின் கொள்கைகளை ஏற்றுக்கொள்ளாதவர்கள் வெளியேறுவதற்கான கதவுகளை அரசாங்கம் திறந்துவைத்துள்ளது என பிரதமர் மகிந்த ராஜபக்ச தெரிவித்துள்ளார்.
அரசாங்கத்தை விமர்சிக்கும் விதத்தில் சில அமைச்சர்கள் வெளியிட்டுள்ள கருத்துக்கள் குறித்து ஐலண்ட் நாளிதழிற்கு கருத்து தெரிவிக்கையில் அவர் இதனை குறிப்பிட்டுள்ளார்.

நாங்கள் எவரையும் பலவந்தமாக வைத்திருக்கவில்லை, என தெரிவித்துள்ள பிரதமர் அரசியல்கூட்டணியொன்றில் மாறுபட்ட கொள்கைகள் காணப்படுவது வழமை எனவும் அவர் தெரிவித்துள்ளார்.

இன்றைய அரசியலில் உள்ள வேறுபலர் போல இல்லாமல், நாங்கள் உள்ளக ஜனநாயகத்தை பேணுகின்றோம் எனவும் அவர் தெரிவித்துள்ளார்.

அரசாங்கத்தில் உள்ள எவரும் வெளியேறலாம், மக்களின் நம்பிக்கை எங்கள் மீது உள்ளது எனவும் பிரதமர் தெரிவித்துள்ளார்.

எங்கள் தேர்தல் விஞ்ஞாபனத்தில் வாக்குறுதியளித்தபடி நாங்கள் அபிவிருத்தி திட்டங்களை முன்னெடுக்கின்றோம், அதற்காகவே மக்கள் எங்களிற்கு பெரும் ஆணையை வழங்கியுள்ளனர் என அவர் குறிப்பிட்டுள்ளார்.

சில அரசியல்வாதிகள் ஊடகங்களின் கவனத்தை ஈர்ப்பதற்காக சர்ச்சைக்குரிய கருத்துக்களை தெரிவிக்கின்றனர் அதனை பெரிதுபடுத்தக்கூடாது என பிரதமர் தெரிவித்துள்ளார்.

எனினும் அரசாங்கத்தை நாங்கள் முன்னெடுக்கும் விதம் குறித்து எவராவது உண்மையிலேயே அதிருப்தியடைந்திருந்தால் அவர்கள் வெளியேறுவதற்காக எங்கள் கதவுகள் எப்போதும் அகலத்திறந்திருக்கின்றன அதேபோன்று நாங்கள் ஆட்சி செய்யும் விதம் பொருத்தமானது என கருதி எவராவது எங்களுடன் இணைய விரும்பினால் எங்கள் கதவுகள் அவர்களிற்காகவும் திறந்திருக்கின்றன எனவும் அவர் தெரிவித்துள்ளார்.

இலங்கைக்கான பிரிட்டன் தூதுவர் சாரா ஹல்டன் மற்றும் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் ஆகியோருக்கிடையிலான முக்கிய சந்திப்பு இன்று நடைபெற்றது.

கொழும்பிலுள்ள பிரிட்டன் தூதுவரின் உத்தியோகபூர்வ வாசஸ்தலமான வெஸ்ட் மினிஸ்டர் ஹவுஸில் இந்தச் சந்திப்பு இடம்பெற்றது.

இதன்போது இலங்கையில் முஸ்லிம் சமூகத்தைப் பாதிக்கும் அண்மைய நடவடிக்கைகள் தொடர்பாகக் கலந்துரையாடியதாக பிரிட்டன் தூதுவர் தனது ருவிட்டரில் பதிவிட்டுள்ளார்.

இலங்கையில் சட்டத்தின் ஆட்சி மற்றும் அனைத்து சமூகங்களையும் உள்ளடக்கிய நல்லிணக்க முயற்சிகளுக்கு பிரிட்டன் ஆதரவு வழங்கும் என்றும் சாரா ஹல்டன் மேலும் குறிப்பிட்டுள்ளார்.