Author: Telobatti

மனித உரிமைகளுக்கான உயர்ஸ்தானிகர் அலுவலகத்தினால் நிறுவ முயற்சிக்கப்படும் தற்காலிகமான பொறிமுறைகளை இலங்கையால் ஏற்றுக்கொள்ள முடியாது என வெளிவிவகார அமைச்சர் பேராசிரியர் ஜீ.எல். பீரிஸ் தெரிவித்துள்ளார்.
இந்தப் பொறிமுறையானது ஐநா.சாசனத்தின் ஆவணங்களுக்கு ஏற்ப அமையவில்லை என்றும் அவர் கூறியுள்ளார்.
பொதுநலவாய அமைப்பின் பொதுச் செயலாளர் பட்ரிசியா ஸ்கொட்லேன்ட்டுடன் வீடியோ ஊடாக நடத்தப்பட்ட கலந்துரையாடல் ஒன்றிலேயே ஜீ.எல்.பீரிஸ் இவ்வாறு தெரிவித்துள்ளார்.
நியூயோர்க் நகரில் இருந்து வெளிவிவகார அமைச்சர் இந்தக் கலந்துரையாடலில் கலந்துகொண்டிருந்தார்.
பொதுநலவாய அமைப்பின் ஸ்தாபக உறுப்பு நாடு என்ற வகையில் இலங்கை முன்னெச்சரிக்கையாகவும், அமைப்பின் மதிப்புக்கள், கொள்கைகள் மற்றும் குறிக்கோள்களுக்கு இணங்க அர்ப்பணிப்புடன் செயற்படுவதாக அமைச்சர் பீரிஸ் இதன்போது தெரிவித்துள்ளார்.
பொதுநலவாய நாடுகளுடன் வணிகம், கல்வி, தொழிற்பயிற்சி மற்றும் பருவநிலை மாற்றம் உள்ளிட்ட பல துறைகளிலான ஒத்துழைப்பை இலங்கை மேலும் எதிர்பார்ப்பதாக அவர் குறிப்பிட்டுள்ளார்.
இதேவேளை உள்ளூர் நிறுவனங்கள் தமது ஆணைகளை நிறைவேற்றுவதற்குப் போதுமான அமைப்புக்கள் தேவைப்படுகின்றன. இந்த நிறுவனங்களால் மேற்கொள்ளப்படும் பணிகளை வெளிப்புற அமைப்புக்களால் மாற்றவோ அல்லது கையகப்படுத்தவோ முடியாது என்றும் கூறியுள்ளார்.
இந்நிலையில் வர்த்தகம், விளையாட்டு, இளைஞர்கள் மற்றும் வன்முறைத் தீவிரவாதத்தை எதிர்த்தல் உள்ளிட்ட பல்வேறு துறைகளிலான இலங்கையின் தொடர்ச்சியான ஒத்துழைப்பை பொதுநலவாய அமைப்பு பாராட்டுவதாக பொதுச்செயலாளர் ஸ்கொட்லேன்ட் இதன்போது தெரிவித்துள்ளதாக வெளிவிவகார அமைச்சின் ஊடகப் பிரிவு குறிப்பிட்டுள்ளது.

உள்நாட்டு உற்பத்தியை மேம்படுத்தும் நோக்கத்துடன், அடுத்த ஆண்டுக்கான இறக்குமதி கட்டுப்பாடுகள் தொடரும். அத்துடன் முன்மொழியப்பட்ட 2022 வரவு செலவுத் திட்டத்தின் முக்கிய அம்சங்களில் தனியார் துறை திட்டங்களுக்கு முன்னுரிமை அளிக்கப்படும் என்று இலங்கை நிதி அமைச்சகத்தின் மூத்த அதிகாரிகள் தெரிவித்துள்ளனர்.

“உற்பத்தி பொருளாதாரம்” என்பது எதிர்வரும் நவம்பர் மாத வரவு செலவுத் திட்டத்தின் கருப்பொருளாக இருப்பதால், விவசாயம், சாலை மேம்பாடு, நீர்ப்பாசனம் மற்றும் புதுப்பிக்கத்தக்க எரிசக்தி துறைகளில் அமைச்சகங்களுக்கு அதிக ஒதுக்கீடுகள் செய்யப்படவுள்ளன.

2022ஆம் ஆண்டு முழுவதும் வாகன இறக்குமதி உள்ளிட்ட இறக்குமதிகள் கட்டுப்படுத்தப்படும்.எனினும் மின்சார கார்களின் இறக்குமதி ஊக்குவிக்கப்படும் என்று எதிர்பார்க்கப்படுகிறது.

பொதுத்துறையில் கூடுதல் செலவுகள் குறைக்கப்படும். மூன்று ஆண்டு பின்னடைவுக்குப் பின்னர் சுற்றுலாத்துறையை புத்துயிர் பெற வைக்கும் வகையில், வருடாந்த வருவாயை ஐந்து பில்லியன் அமெரிக்க டொலராக உயர்த்தும் நோக்கத்துடன் ஹோட்டல் துறைக்கு ஊக்கத்தொகை வழங்கப்படும் என்று தெரிவிக்கப்பட்டுள்ளது.

ஏற்றுமதி வருவாயை அதிகரிக்கும் நோக்கில் மீன் இறக்குமதி திட்டங்களுக்கும் ஊக்கத்தொகை வழங்கப்படும். இதேவேளை ஆசிரியர்களின் சம்பள ஒழுங்கின்மை பிரச்சனைக்கு தீர்வு கண்டால், சம்பளத்தை படிப்படியாக உயர்த்துவதற்கான திட்டம் அறிமுகப்படுத்தப்படும் என்று நிதி அமைச்சக அதிகாரிகள் தெரிவித்துள்ளனர்.

2 வது தடுப்பு மருந்துக்குத் தேவையான 1 இலட்சத்து 20 ஆயிரம் ஸ்புட்னிக்-வி தடுப்பூசிகள் இன்று (19) காலை இலங்கையை வந்தடைந்ததாக  இராஜாங்க அமைச்சர் பேராசிரியர் சன்ன ஜயசுமன தெரிவித்துள்ளார்.

இலங்கையில் ஸ்புட்னிக்-வி தடுப்பூசியின் முதலாவது டோசை பெற்றுக்கொண்ட அனைவருக்கும் வழங்குவதற்கு இது போதுமானது எனவும் இராஜாங்க அமைச்சர் பேராசிரியர் சன்ன ஜயசுமன தெரிவித்துள்ளார்.

இதேவேளை, இலங்கையின் மொத்த சனத்தொகையான 2 கோடியே 19 இலட்சத்து 19 ஆயிரத்து 413 பேரில், 50 வீதமானோருக்கு இதுவரையில் கொவிட் வைரஸுக்கு எதிரான இரண்டு தடுப்பூசி டோஸ்களும் ஏற்றப்பட்டிருப்பதாக இராஜாங்க அமைச்சர் பேராசிரியர் சன்ன ஜயசுமன தெரிவித்திருந்தமை குறிப்பிடத்தக்கது.

நாட்டில் தற்போது பால்மாவிற்கு பாரிய தட்டுப்பாடு ஏற்பட்டுள்ளது. சர்வதேச சந்தையில் அதிகரித்த விலை மற்றும் இறக்குமதி செலவு அதிகரிப்பு இலங்கை ரூபாவின் வீழ்ச்சி என பல்வேறு காரணங்களால் பால்மா நிறுவனங்கள் விலை அதிகரிப்பை கோரியிருந்தன.

எனினும் அரசாங்கம் விலை அதிகரிப்புக்கு அனுமதி வழங்காத நிலையில் நாட்டில் பால்மாவுக்கு தட்டுப்பாடு ஏற்பட்டிருந்தது.

இந்த நிலையில் உள்நாட்டு சந்தையில் பால்மா 400 கிராம் ஒன்றின் விலையை 200 ரூபாவினால் அதிகரிக்க நிதியமைச்சு அனுமதி வழங்கியுள்ளதாக தகவல்கள் வெளியாகியுள்ளன.

பால்மா உற்பத்தி நிறுவனங்களின் பிரதிநிதிகளுக்கும், நிதியமைச்சருக்கும் இடையே நடந்த சந்திப்பில் இந்த இணக்கம் வெளியிடப்பட்டிருப்பதாக தெரிவிக்கப்படுகின்றது. ஏற்கனவே 400 கிராம் பால்மா பக்கற் ஒன்றின் விலை 380 ரூபாவிற்கு விற்பனை செய்யப்பட்டமை குறிப்பிடத்தக்கது.