Category: பிரதான செய்திகள்

இலங்கை இனப்படுகொலைகள் நிகழ்ந்து 13 ஆண்டுகள் ஆகியும் அதற்கு காரணமானவர்கள் தண்டிக்கப்படாததை ஏற்க முடியாது என்று ராமதாஸ் தெரிவித்துள்ளார்.

இதுகுறித்து பாமக நிறுவனர் ராமதாஸ் வெளியிட்டுள்ள அறிக்கையில், “இலங்கையில் வாழும் ஈழத்தமிழர்களுக்கு அதிகாரம் அளிப்பதற்கான நடவடிக்கைகளை சிங்கள ஆட்சியாளர்கள் மேற்கொள்ளவில்லை; இனியும் தாமதிக்காமல் அதற்கான நடவடிக்கைகளை இலங்கை அரசு மேற்கொள்ள வேண்டும் என்று ஐ.நா. மனித உரிமை பேரவையில் இந்தியா வலியுறுத்தியுள்ளது. ஈழத்தமிழர்களுக்கு நீதி வழங்குவதில் இந்தியாவின் நிலை வரவேற்கத்தக்கது; ஆனால், போதுமானதல்ல.

ஜெனிவாவில் நடைபெற்று வரும் ஐ.நா. மனித உரிமை பேரவையின் 51-ஆவது கூட்டத்தில் நேற்று உரையாற்றிய இந்திய தூதர், ”ஈழத்தமிழர்களுக்கு அதிகாரம் வழங்குவதற்காக இலங்கை அரசியலமைப்பு சட்டத்தில் செய்யப்பட்ட 13-ஆவது திருத்தத்தை முழுமையாக செயல்படுத்துதல், மாகாண அவைகளுக்கு கூடுதல் அதிகாரம் வழங்குதல், நீண்டகாலமாக தேர்தல் நடத்தப்படாமல் இருக்கும் மாகாண அவைகளுக்கு உடனே தேர்தல் நடத்துதல் ஆகியவற்றின் மூலம் ஈழத்தமிழர் பிரச்சினைக்கு அரசியல் தீர்வு காணப்படும் என்று அளித்திருந்த வாக்குறுதிகளை நிறைவேற்றுவதில், அளவிடக்கூடிய முன்னேற்றம் எதையும் இலங்கை அரசு எட்டவில்லை” என்று குற்றஞ்சாட்டினார். ஒருங்கிணைந்த இலங்கைக்குள் தமிழர்களுக்கு நீதி, அமைதி, சமத்துவம் மற்றும் கண்ணியமான வாழ்க்கையை உறுதி செய்ய வேண்டும் என்பதுதான் இந்தியாவின் நிலைப்பாடு; இதை இலங்கை உறுதி செய்ய வேண்டும் என்றும் அவர் வலியுறுத்தினார். இலங்கையில் சிங்களர்கள் மட்டுமே ஆட்சிக்கு வர முடியும்; இலங்கை ஆட்சியாளர்களின் மனதில் இருந்து சிங்கள பேரினவாத உணர்வையும், தமிழர்கள் வெறுப்பு மனநிலையையும் அகற்ற முடியாது என்ற சூழலில் இலங்கை இனச்சிக்கலுக்கு தனித்தமிழ் ஈழம் மட்டுமே தீர்வு என்று பாட்டாளி மக்கள் கட்சி உறுதியாக நம்புகிறது. ஆனால், அதற்கான அரசியல் மற்றும் சட்டரீதியான பயணம் மிக நீண்டது என்பதால், அதுவரை ஈழத்தில் வாழும் தமிழர்கள் கண்ணியமாகவும், சுதந்திரமாகவும் வாழ வகை செய்ய வேண்டும்; அதற்கான நடவடிக்கைகளை மேற்கொள்ள வேண்டிய பெருங்கடமை இந்தியாவுக்கு உண்டு என்று பா.ம.க. தொடர்ந்து வலியுறுத்தி வருகிறது. இத்தகைய சூழலில் ஈழத்தமிழர்களுக்கு அதிகாரம் வழங்க வேண்டும் என ஐ.நா.வில் இந்தியா வலியுறுத்தியிருப்பது மனநிறைவை அளிக்கிறது.

ஆனால், இந்த வலியுறுத்தல் மட்டுமே ஈழத்தமிழர்களுக்கு அதிகாரத்தை பெற்றுத் தந்து விடாது என்பதை இந்தியா உணர வேண்டும். ஈழத்தமிழர்களுக்கு ஓரளவாவது அதிகாரத்தை வழங்குவதற்கான 13-ஆவது அரசியலமைப்புச் சட்டத் திருத்தம், 1987-ஆம் ஆண்டு இந்திய – இலங்கை ஒப்பந்தத்தைத் தொடர்ந்து செய்யப்பட்டதாகும். இந்தியா நினைத்திருந்தால் 13-ஆவது அரசியலமைப்பு சட்டத் திருத்தத்தை அடுத்த சில ஆண்டுகளில் செயல்படுத்தி தமிழர்களுக்கு அதிகாரத்தை பெற்றுக் கொடுத்திருக்க முடியும். ஆனால், அதன்பின் 35 ஆண்டுகள் ஆகியும் இதுவரை எந்த முன்னேற்றமும் இல்லை; அரைகுறை அதிகாரங்களுடன் ஏற்படுத்தப்பட்ட மாகாண அவைகளும் முடக்கப்பட்டு விட்டன. வடக்கு – கிழக்கு மாநிலங்களின் இணைப்பும் ரத்து செய்யப்பட்டு விட்டது. இப்படியாக ஈழத்தமிழர்களுக்கு அதிகாரம் வழங்குவதற்கான இந்தியாவின் முயற்சி ஒரு செ.மீ கூட நகராமல் முடங்கிக் கிடக்கிறது.

பன்னாட்டு அவைகளிலும், இரு தரப்பு பேச்சுகளின் போதும், 13-ஆவது அரசியலமைப்புச் சட்டத்தை செயல்படுத்த வேண்டும் என்று இந்தியா இதுவரை நூறு முறை வலியுறுத்தியிருக்கும். இப்போது 101-ஆவது முறையாக வலியுறுத்துவதால் மட்டும் எந்த பயனும் ஏற்பட்டுவிடாது. மாறாக, இலங்கைக்கு அழுத்தம் கொடுத்து ஈழத்தமிழர்களுக்கு குறைந்தபட்ச அதிகாரத்தையாவது பெற்றுத்தர வேண்டும்.

கடுமையான பொருளாதார நெருக்கடியில் சிக்கித் தவிக்கும் இலங்கை, அதன் அடிப்படைத் தேவைகளுக்குக் கூட இந்தியாவைத் தான் நம்பியிருக்கிறது. இத்தகைய சூழலில், 13-ஆவது அரசியலமைப்பு சட்டத் திருத்தத்தின் அம்சங்களை செயல்படுத்துவதற்கான நடவடிக்கைகளை தொடங்க வேண்டும். அவற்றில் ஏற்படும் முன்னேற்றங்களின் அடிப்படையில் தான் உதவிகளை வழங்க முடியும் என்று நிபந்தனை விதிப்பதன் மூலம் ஈழத்தமிழர்களுக்கு அதிகாரம் பெற்றுத் தர இந்தியா நடவடிக்கை எடுக்க வேண்டும்.

ஐ.நா. மனித உரிமை பேரவையில் ஈழத்தமிழர்களுக்கு அதிகாரம் வழங்க வேண்டும் என வலியுறுத்திய இந்தியா, அங்கு நடைபெற்ற போர்க்குற்றங்கள் மற்றும் இனப்படுகொலைகளுக்கு காரணமானவர்களை தண்டிப்பது குறித்து எந்த கருத்தும் தெரிவிக்காதது ஏமாற்றமளிக்கிறது. இலங்கை இனப்படுகொலைகள் நிகழ்ந்து 13 ஆண்டுகள் ஆகியும் அதற்கு காரணமானவர்கள் தண்டிக்கப்படாததை ஏற்க முடியாது” என்று குறிப்பிட்டுள்ளார்.

தீவகத்தில் கடலட்டை பண்ணை அமைக்கவேண்டாம் சீனாவிற்கு கொடுத்து எமது கடல் வளத்தை இல்லாது செய்யவேண்டாம் என ஊர்காவற்றுறை பிரதேச கடற்றொழிலாளர் கூட்டுறவு சங்கங்களின் சமாச தலைவர் சிவநேசபிள்ளை சிவச்செல்வன் தெரிவித்தார்.

யாழ் ஊடக அமையத்தில் இடம்பெற்ற ஊடகவியலாளர் சந்திப்பில் கலந்துகொண்டு கருத்து தெரிவித்த போதேஅவர் இதனை தெரிவித்தார்.

அவர் மேலும் தெரிவிக்கையில், தீவகத்தை பொறுத்தவரையில் ஆழ்கடல் மீன்பிடியை விட களப்பு கடலை நம்பி தொழில் செய்கின்றவர்களே அதிகம்.

இவர்களது வாழ்வாதாரத்தை யாரும் சிந்திப்பதாக தெரியவில்லை.

கடலட்டை வளர்ப்பு என்பது அந்நியச் செலாவணியை ஊக்குவிக்கும் என்பதில் மாற்றுக்கருத்து கிடையாது. தீவகப் பகுதிகளில் கடலட்டை பண்ணைகளை உருவாக்குவதற்கான இடங்கள் சீன நாட்டுக்கு வழங்கப்பட்டு இருப்பதாக தகவல் வெளியாகி உள்ளது.

இதனால் மீன் வளங்கள் பெரும்பாலும் இல்லாமல் போகும் என்பதுடன் களப்பு கடலை நம்பி தொழில் செய்பவர்கள் பாதிப்படைவார்கள். இதனை கடற்றொழில் அமைச்சர் மற்றும் அதிகாரிகள் கவனத்தில் எடுத்து செயற்பட வேண்டும்.

கடலட்டை பண்ணை அமைக்க அனுமதிக்கும்போது அப்பகுதியை சேர்ந்தவர்களுடன் கலந்துரையாடாமல் அனுமதிக்கப்படுவதுடன், அவர்கள் இடத்தை அடையாளப்படுத்தி விட்டு செல்கின்றார்கள். நேரடியாக அரசாங்கத்திடம் அனுமதி எடுத்து விட்டு வருகின்றார்கள்.

இது தொடர்பாக மக்களுக்கு எதுவும் தெரியாது. ஆகவே எமக்கு தகவல் தெரிந்தவுடன் இதனை ஊடகங்கள் ஊடாக தெரிவித்து எமது எதிர்ப்பை வெளிப்படுத்துகிறோம் – என்றார்.

இந்த ஊடக சந்திப்பில் கலந்துகொண்ட மெலிஞ்சிமுனை கடற்றொழிலாளர் கூட்டுறவுச்சங்க தலைவர் மடுத்தின் பெனடிக், கடலட்டை வளர்ப்புக்கு அனுமதி கொடுக்கப்பட்டால் கடற்றொழிலாளர்களை அது பாதிக்கும் என்றும் கடலட்டை பண்ணைக்கான அனுமதி வழங்ப்படுகின்றது என்றார்.

கடல் தொடுவாய்களை மறைத்து கடலட்டை பண்ணைகள் கட்டப்படுவதனால் மீன்வரத்து குறைந்து கடற்றொழிலாளர்கள் பாதிப்பை எதிர்கொள்வார்கள்.

செயற்கை தொழில்களால் இயற்கை தொழில்கள் தீவகத்தில் பாதிக்கப்படுவதை நாம் விரும்பவில்லை.சீனாவுக்கு எங்களுடைய கடல் வளத்தை கொடுப்பதை முற்றும் முழுதாக நாங்கள் விரும்பவில்லை. எங்களிடம் வளம் இருக்கின்றது.

இன்னொரு நாட்டிடம் அதனை கொடுத்து வளத்தை பெற வேண்டிய அவசியமில்லை. வெளிநாட்டுக்கு வளங்களை கொடுத்து நாங்கள் இன்னொரு நாட்டிடம் வளங்களை பெற வேண்டிய அவசியம் இல்லை தீவக மக்களிடமும் எமது பகுதி புலம்பெயர்ந்த மக்களிடம் இதற்கான வளங்கள் இருக்கின்றன.

கடற்றொழில் அமைச்சரிடம் இது தொடர்பாக முறையிட்ட போதும் அதையும் மீறி கடலட்டை பண்ணை அமைக்க நடவடிக்கை எடுக்கப்படுகிறது என்றார்.

இலங்கையில் நிலவும் இக்கட்டான சூழலைப் பயன்படுத்தி தமது அபிலாஷைகளை நிறைவேற்றும் சில தரப்பினரின் முயற்சிகளை தாம் எதிர்ப்பதாக சீனா தெரிவித்துள்ளது.

ஐக்கிய நாடுகள் மனித உரிமைகள் பேரவையின் 51வது அமர்வில் சமர்ப்பிக்கப்பட்ட இலங்கையின் மனித உரிமைகள் நிலைவரம் தொடர்பான அறிக்கை மீதான விவாதத்தில் கலந்துகொண்டு உரையாற்றும் போதே ஜெனீவாவிலுள்ள சீனாவின் நிரந்தரப் பிரதிநிதி சென் ஜு இவ்வாறு தெரிவித்தார்.

இதேவேளை, சமூக ஸ்திரத்தன்மையை பேணுவதற்கும், இறையாண்மை மற்றும் சுதந்திரத்தைப் பாதுகாப்பதற்கும் இலங்கைக்கு பலமான ஆதரவு வழங்கப்படும் என கூறியுள்ளார்.

இதேவேளை, தமிழ் சிறுபான்மை இனப்பிரச்சினைக்கு அரசியல் தீர்வொன்றை வழங்காமை குறித்து தான் கவலையடைவதாக விவாதத்தில் கலந்துகொண்ட இந்திய பிரதிநிதி இந்திரன் மணிபாண்டே தெரிவித்தார் என்பதும் குறிப்பிடத்தக்கது.

ஐக்கிய நாடுகள் மனித உரிமை பேரவையின் தற்போதைய அமர்வில் இலங்கையை சர்வதேச நீதிமன்றத்தின் முன்னிலையில் பாரப்படுத்துவதற்கான நடவடிக்கைகளை கனடா பிரதமர் எடுக்கவேண்டும் என கனடாவின் பல அமைப்புகளும் நாடாளுமன்ற உறுப்பினர்களும் கூட்டாக வேண்டுகோள் விடுத்துள்ளனர்.

கனடாவின் தமிழ் அமைப்புகளும் ஒன்டாரியோ மாகாண நாடாளுமன்ற உறுப்பினர் லோகன் கணபதியும் கூட்டாக கனடா பிரதமர் ஜஸ்டின் ட்ரூடோ கடிதமொன்றை எழுதியுள்ளனர்.

ஐக்கியநாடுகள் மனித உரிமை பேரவையில் இலங்கை தொடர்பான முதன்மை நாடுகளின் குழுவில் கனடா காணப்படுவதால் இலங்கை தொடர்பான தீர்மானத்தை உருவாக்குவதில் கனடா முக்கிய பங்கை வகிக்கின்றது என கனடா அமைப்புகள் தெரிவித்துள்ளன.

ஐக்கியநாடுகள் மனித உரிமை பேரவையில் இலங்கை தொடர்பான முதன்மை நாடுகளின் குழுவில் கனடா காணப்படுவதால் கனடாவை சேர்ந்த குழுக்களும் மக்களால் தெரிவு செய்யப்பட்ட பிரதிநிதிகளும் மனித உரிமை பேரவையின் தற்போதைய அமர்வு குறித்தும் யுத்த குற்றங்கள் மனித குலத்திற்கு எதிரான குற்றங்கள் தமிழ் மக்களிற்கு எதிராக இழைக்கப்பட்ட இனப்படுகொலைகளிற்கு பொறுப்புக்கூறுவதில் தொடர்ச்சியாக தோல்வியேற்படுவது குறிpத்த எங்கள் கரிசனையை தெரியப்படுத்துவதற்காக உங்களிற்கு இந்த கடிதத்தை எழுதுகின்றோம்,என தமிழ் அமைப்புகள் தெரிவித்துள்ளன

கனடா பிரதமருக்கான கடிதத்தில் மேலும் தெரிவிக்கப்பட்டுள்ளதாவது.

இலங்கை தமிழ் சமூகத்தின் பெரும்பான்மையான தரப்பினரும் இலங்கையை ஐநா சர்வதேச குற்றவியல் நீதிமன்றத்திற்கு பாரப்படுத்தவேண்டிய அவசர நிலைமை தொடர்பில் இலங்கை தொடர்பான முதன்மை நாடுகளை தொடர்புகொண்டுள்ளனர்.

ஐக்கிய நாடுகள் மனித உரிமை ஆணைக்குழுவின் இந்த அமர்வில் ஐநா தீர்மானங்களை இலங்கை நிறைவேற்றியுள்ளதா என்பது குறித்து மதிப்பிடப்படும். 2021 ம் ஆண்டு மார்ச் மாத அறிக்கையில் ஐக்கிய நாடுகள் மனித உரிமை ஆணையாளர் பரிந்துரைத்தபடி மனித உரிமைகளிற்கான ஐக்கியநாடுகளின் நான்கு முன்னாள் ஆணையாளர்களும் இலங்கைக்கு விஜயம் மேற்கொண்டு அறிக்கைகளை வெளியிட்ட 9 அறிக்கையாளர்களும் இலங்கை தொடர்பான ஐக்கியநாடுகள் செயலாளர் நாயகத்தின் நிபுணர்கள் குழுவில் இடம்பெற்றிருந்த அனைத்து உறுப்பினர்களும் பரிந்துரைத்தபடி இலங்கயை சர்வதேச நீதிமன்றத்தின் முன்னிலையில் பாரப்படுத்துமாறு வேண்டுகோள் விடுக்கும் வலுவான தீர்மானத்தை 13 வருடங்களி;;ற்கு முன்னர் குற்றங்களிற்கு பொறுப்புக்கூறுவதற்காக சமர்ப்பிக்குமாறு நாங்கள் உங்களை கேட்டுக்கொள்கின்றோம்.

இலங்கையை சர்வதேச குற்றவியல் நீதிமன்றத்தின் முன்னிலையில் பாரப்படுத்துமாறு வேண்டுகோள் விடுக்கும் நடவடிக்கைக்கு குறைவான நடவடிக்கை எதுவும் எங்கள் மக்கள் எதிர்கொண்ட பாரிய அநீதிக்கு நீதியை பெற்றுக்கொள்வதற்கான வாய்ப்புகளை இல்லாமல் செய்துவிடும் என கனேடியர்களாகிய நாங்கள் வேண்டுகோள் விடுக்கின்றோம்.

இலங்கையை சர்வதேச குற்றவியல் நீதிமன்றத்தின் முன்னிலையில் பாரப்படுத்துமாறு வேண்டுகோள் விடுக்கும் நடவடிக்கைக்கு குறைவான நடவடிக்கைகள் இலங்கை அதிகாரிகளும் பாதுகாப்பு படையினரும் எந்த தயக்கமும் இன்றி இலங்கையில் தமிழர்களிற்கு எதிராக பாரிய அநீதிகளில் ஈடுபடும் நிலையை ஏற்படுத்தும்.

ஜெனீவாவில் நேற்று (12) ஐக்கிய நாடுகள் மனித உரிமை பேரவையின் 51 ஆவது கூட்டத்தொடர் ஆரம்பமான நிலையில் அங்கு கருத்து தெரிவித்த இலங்கையின் வெளிவிவகார அமைச்சர் ஜனாதிபதி சட்டத்தரணி அலி சப்ரியின் கருத்துக்கு வலிந்து காணாமல் ஆக்கப்பட்டவர்களின் உறவுகள் கடும் கண்டனம் வெளியிட்டுள்ளதோடு தமக்கு சர்வதேச விசாரணையே தேவை எனவும் முல்லைத்தீவு மாவட்ட வலிந்து காணாமல் ஆக்கப்பட்டுள்ளவர்களின் உறவுகள் தெரிவித்துள்ளனர்.

முல்லைத்தீவு மாவட்ட வலிந்து காணாமல் ஆக்கப்பட்டுள்ளவர்களின் உறவுகள் சங்க தலைவி மரியசுரேஷ் ஈஸ்வரி மற்றும் செயலாளர் பிரபாகரன் றஞ்சனா ஆகியோர் சற்று முன்னர் முல்லைத்தீவு ஊடக அமையத்தில் நடத்திய ஊடகவியலாளர் சந்திப்பிலேயே இவ்வாறு தெரிவித்தனர்.

அவர்கள் மேலும் கருத்து தெரிவிக்கையில், ஐக்கிய நாடுகள் மனித உரிமை பேரவையின் 51 ஆவது கூட்டத்தொடர் ஆரம்பமான நிலையில் அங்கு இலங்கை தொடர்பான விடயத்தில் வலிந்து காணாமல் ஆக்கப்பட்டவர்களது விடயம் தொடர்பில் சர்வதேச விசாரணையை தொடர்ச்சியாக கோரிவரும் எமக்கு சர்வதேச விசாரணையை வலியுறுத்தி எந்த விடயமும் முன்வைக்கப்படாமையானது கவலையளிக்கிறது. இதேவேளை, இந்த கூட்டத்தொடரில் சர்வதேச விசாரணையை தொடர்பான தீர்ணம் கொண்டுவரப்பட வேண்டும் என வலியுறுத்துக்கிறோம்.

இதேவேளை, பாதிக்கப்பட்ட தரப்புக்களாக நாம் இன்று 13 ஆண்டுகளாக போராடி எந்த தீர்வும் இல்லாது சர்வதேச விசாரணையை வலியுறுத்தி ஆரம்பித்த தொடர்ச்சியான போராட்டம் இன்று 2015 ஆவது நாளாக தொடர்கிறது. இந்நிலையில் ஜெனீவாவில் நேற்று (12) ஐக்கிய நாடுகள் மனித உரிமை பேரவையின் 51 ஆவது கூட்டத்தொடர் ஆரம்பமான நிலையில் அங்கு கருத்து தெரிவித்த இலங்கையின் வெளிவிவகார அமைச்சர் ஜனாதிபதி சட்டத்தரணி அலி சப்ரியின் கருத்தானது எமது உணர்வுகளை புரந்தள்ளி அரசை பாதுகாப்பதாக அமைந்துள்ளதோடு குறித்த கருத்துக்கு கடும் கண்டணத்தையும் வெளியிட்டுள்ளனர்.

இன்று திங்கட்கிழமை ஜெனீவாவில் மனித உரிமைகள் பேரவையின் கூட்டத் தொடா் ஆரம்பமாகவுள்ளது. இலங்கை விவகாரம் இதில் முக்கியமாகப் பேசப்படவுள்ளது.

புதிய தீா்மானம் ஒன்றும் நிறைவேற்றப்படவிருக்கின்றது. இந்தப் பின்னணியில் இவை தொடா்பில் தமிழா் தரப்பிலிருந்து முக்கியமாகச் செயற்பட்டுவரும் ரெலோ அமைப்பின் பேச்சாளா் சுரேந்திரன் குருசுவாமி உயிரோடைத் தமிழ் வானொலியின் தாயக களம் நிகழ்வில் இந்த வாரம் கலந்துகொண்டு முக்கிய தகவல்களைத் தருகின்றாா்.

கேள்வி – இலங்கை தொடா்பான மனித உரிமைகள் ஆணையாளரின் அறிக்கை வெளிவந்திருக்கின்றது. இந்த அறிக்கை தொடா்பான உங்களுடைய கருத்து என்ன? இதன் முக்கிய அம்சங்களாக நீங்கள் எதனைக் கருதுகின்றீா்கள்?

பதில் – இம்முறை மிக விபரமான ஒரு அறிக்கையை நாம் காணக்கூடியதாக இருக்கின்றது. கடந்த மாா்ச் மாதம் கூட 11 பக்க அறிக்கை ஒன்றை அவா் வெளியிட்டிருந்தாா். கடந்த செப்டம்பா் மாதத்திலிருந்து தமிழ்த் தேசியப் பரப்பில் இருக்கும் ஆறு கட்சிகள் ஒன்றிணைந்து கலந்துரையாடிய நிலையில் ஐந்து கட்சிகளின் சாா்பில் அறிக்கையிட்டிருந்தோம். அதற்குப் பின்னா் ஐ.நா. மனித உரிமைகள் ஆணையாளா் அலுவலகத்தின் உத்தியோகஸ்த்தா்களோடும் நாம் தொடா்ச்சியாக கலந்துரையாடியிருந்தோம். அதன் பிரதிபலனாக மாா்ச் மாத அறிக்கையில் பல விடயங்கள் உள்வாங்கப்பட்டிருந்தது. இந்த முறை உயா் ஸ்தானிகா் உத்தியோகபுா்வமாக அறிக்கையாக வெளியிட்டுள்ளாா்.

குறிப்பாக இன ரீதியான வேலைத் திட்டங்கள் வடக்கு கிழக்கில் நடைபெறுவது. மதம் சாா்ந்து மொழிசாா்ந்து மேலாதிக்கத்துடன் நடந்துகொள்வது போன்ற விடயங்கள் குறிப்பிடப்பட்டுள்ளன. குருந்துாா் மலை விவகாரம் உள்வாங்கப்பட்டிருக்கின்றது. அங்கு மக்கள் எதிா்கொள்கின்ற இராணுவ ஒடுக்குமுறைகள், முன்னாள் போராளிகளின் பிரச்சினைகள், காணாமல் ஆக்கப்படுவோரின் பிரச்சினைகள் என்பவை குறிப்பிடப்பட்டிருக்கின்றது. அமைதியான போராட்டங்களில் ஈடுபட்டுள்ளவா்கள் எதிா்கொள்ளும் பிரச்சினைகள், பயங்கரவாதத் தடைச்சட்டத்தின் விளைவுகள் என நாம் அறிக்கையிட்ட பல உள்ளடக்கப்பட்டிருப்பதை காணமுடிகின்றது.

அதேபோல பொறுப்புக்கூறலுக்கான உள்ளக பொறிமுறை தோல்வியடைந்திருக்கின்றது என்பதையும் இந்த அறிக்கை குறிப்பிடுகின்றது. ஜனாதிபதியை சந்தித்தபோதும் இதனை நாம் கூறியிருந்தோம். சா்வதேச பொறிமுறை ஒன்றுக்கு அரசாங்கம் இணங்காவிட்டால் இந்தப் பிரச்சினைக்குத் தீா்வைக்காணமுடியாது என்பதை நாம் வலியுறுத்தியிருந்தோம். இதனைவிட இராணுவ ஆக்கிரமிப்பு போன்ற விடயங்களையும் ஆணையாளரின் அறிக்கை குறிப்பிடுகின்றது. மாா்ச் 21 ஆம் திகதிய அறிக்கைக்கு மேலதிகமாக இவற்றை அவா் சுட்டிக்காட்டியிருக்கின்றாா்.

வடக்கு கிழக்கு தமிழ் மக்களின் பிரச்சினைகளை இதில் அவா் ஒட்டுமொத்தமாக அறிக்கையிட்டிருப்பதும், நிதி மோசடி இடம்பெற்றுள்ளது என்பதை சுட்டிக்காட்டி அதில் சம்பந்தப்பட்டவா்கள் தண்டிக்கப்பட வேண்டும் என்பதை அவா் முதல் தடவையாக குறிப்பிட்டிருப்பதும் முக்கியமானது. இதனை ஒரு ஆரோக்கியமான முன்னேற்றமாகவே நாம் பாா்க்கிறோம்.

கேள்வி – இந்த அறிக்கையில் தெரிவிக்கப்பட்டிருக்கும் விடயங்கள் இலங்கை தொடா்பாக நிறைவேற்றப்படவிருக்கும் தீா்மானத்திலும் பிரதிபலிக்கும் என எதிா்பாா்க்கின்றீா்களா?

பதில் – கடந்த முறை ஆணையாளா் தனது அறிக்கையில் சா்வதேச நியாயாதிக்கத்துக்கு உட்பட்ட பொறிமுறையின் அடிப்படையில் நாடுகள் குற்றவாழிகளைக் கைது செய்ய வேண்டும் அவா்கள் மீது வழக்குத தொடுக்க வேண்டும் எனக் குறிப்பிட்டிருந்தாா். அந்த விடயம் பின்னா் பேரவையின் அறிக்கையில் உள்வாங்கப்பட்டது. இதேபோல ஆணையாளா் குறிப்பிட்ட சாட்சியங்களைத் திரட்டுதல் என்ற விடயமும் பின்னா் பேரவையின் தீா்மானத்தில் உள்வாங்கப்பட்டது. சா்வதேச குற்றவியல் நீதின்றத்துக்குப் பாரப்படுத்த வேண்டும் என்ற அவரது பரிந்துரை பேரவையின் தீா்மானத்தில் உள்வாங்கப்பட்டிருக்கவில்லை. ஆனால், இம்முறை அவா் தெரிவித்திருக்கும் பல விடயங்கள் பேரவையின் பிரேரணையில் உள்வாங்கப்படும் என எதிா்பாா்க்கிறோம். அதற்கான கோரிக்கையை மனித உரிமைகள் பேரவை அங்கத்துவ நாடுகளுக்கு அனைத்து தமிழ்த் தரப்பினரும் ஒன்றிணைந்து முதல் தடவையாக அனுப்பிவைத்துள்ளோம். தமிழ்த் தரப்பினா் அனைவரும் ஒன்றிணைந்து இந்த கோரிக்கையை முன்வைத்திருப்பதால், அது பிரேரணையில் உள்வாங்கப்படலாம் என்ற எதிா்பாா்ப்பு இருக்கிறது.

கேள்வி – அரசாங்கத்தின் பிரதிநிதிகள் ஏற்கனவே ஜெனீவாவுக்கு சென்றுவிட்டாா்கள். முக்கிய சந்திப்புக்களை அவா்கள் அங்கு முன்னெடுக்கின்றாா்கள். தமிழா் தரப்பின் நகா்வுகள் எவ்வாறுள்ளன?

பதில் – அரசாங்கப் பிரதிநிதிகள் ஜெனீவாவுக்குச் செல்வதற்கு முன்னரே மனித உரிமைகள் ஆணையாளருக்கும் அங்கத்துவ நாடுகளுக்கும் ஓகஸ்ட் மாத முற்பகுதியிலேயே எங்களுடைய கோரிக்கைகளை நாங்கள் அனுப்பிவைத்திருக்கின்றோம். அதில் மனித உரிமைகள் பேரவை சா்வதேச குற்றவியல் நீதிமன்றத்துக்கு இந்தப் பிரச்சினையை பாரப்படுத்த வேண்டும் என்பதை நாம் தெளிவாகக்குறிப்பிட்டிருக்கின்றோம். அங்கு சென்றால் வீட்டோ அதிகாரம் பாவிக்கப்படும் என அவா்கள் தெரிவித்தமைக்கு, வடகொரியாவையும், சூடானையும் நாம் உதாரணம் காட்டி இவை அனைத்தும் பாதுகாப்புச் சபையின் ஊடாக சா்வதேச குற்றவியல் நீதிமன்றத்துக்குப் பாரப்படுத்தப்பட்டிருக்கும் நிலையில் – நீங்கள் பின்வாங்க வேண்டிய அவசியமில்லை என்ற அழுத்தத்தை நாம் பிரயோகித்திருக்கின்றோம். இப்போது வீட்டோ அதிகாரம் பயன்படுததப்படும் எனப் பேசுவதை பிரதான நாடுகள் நிறுத்திவிட்டன. இதனை ஒரு பெரிய வெற்றியாக நாம் கருதுகின்றோம்.

இதனைத்தாண்டி வெளிநாடுகளில் அந்தத்ந நாடுகளின் வெளிநாட்டு அமைச்சுக்களுடனும், இங்கிருக்கும் அவா்களுடைய பிரதிநிதிகளுடனும் நாம் நேரடியாக சந்திக்கின்றோம். அத்துடன் மெய்நிகா் சந்திப்புக்கள் சிலவற்றையும் மேற்கொள்கின்றோம். பிரித்தானியாவின் புதிய பிரதமராகப் பதவியேற்றுள்ள லிஸ் அம்மையாருடனும் இணைய வழியில் நாம் பேச்சுக்களை நடத்தியிருக்கின்றோம். நீதி, பொறுப்புக்கூறல், நல்லிணக்கம் என்பற்றில் அவா் தனது உறுதிப்பாட்டை வெளிப்படுத்தியுள்ளாா். இதனைவிட புலம்பெயா்ந்த உறவுகளும் இது போன்ற ஆக்கபுா்வமான முயற்சிகளை முன்னெடுத்துவருகின்றனா். அந்த வகையில் அரச தரப்பினா் ஜெனீவா செல்வதற்கு முன்னதாகவே எமது தரப்பு முயற்சிகள் ஆரம்பமாகிவிட்டன.

கேள்வி – சா்வதேச குற்றவியல் நீதிமன்றத்துக்கு இலங்கையை கொண்டு செல்வதுதான் உங்கள் இலக்கு எனக் கூறுகின்றீா்கள். இதற்காக உங்களிடமுள்ள உபாயம் என்ன?

பதில் – இலங்கை குறித்த பிரதான நாடுகள் ஐ.நா. பாதுகாப்பு சபையிலும் அங்கத்துவ நாடுகளாக இருக்கின்றன. அதாவது அமெரிக்கா, பிரித்தானியா, ஜோ்மனி ஆகிய நாடுகள் பிரதான நாடுகளாக தொடா்ந்தும் இருக்கின்றன. இவை பாதுகாப்புச் சபையிலும் உறுப்பு நாடுகளாக இருக்கின்றன. அதனால், இந்த நாடுகளால் பேரவையில் முன்னெடுக்கப்படும் தீா்மானங்கள் பாதுகாப்புச் சபையினாலும் முன்னெடுக்கப்படும்.

புலம்பெயா் அமைப்புக்களின் ஊடாக அந்த நாடுகளில் இருக்கக்கூடிய அரசாங்கங்கள் மற்றும் கட்டமைப்புக்களுக்கு அழுத்தம் கொடுப்பதன் மூலமாக இந்தக் கோரிக்கைகளை நகா்த்த முடியும். தமிழ்க் கட்சிகள் ஒருமித்த நிலைப்பாட்டில் இவ்வாறு அழுத்தம் கொடுத்தால் அது தாக்கத்தை ஏற்படுத்தும். தாயகத்தில் இருக்கக்கூடிய கட்சிகள் அமைப்புக்கள் ஒன்றிணைந்து கோரிக்கைகளை முன்வைப்பதும், புலம்பெயா்ந்த நாடுகளில் இருக்கும் அமைப்புக்கள் அங்குள்ள அரசுகளிடம் இந்தக் கோரிக்கையை வலியுறுத்துவதன் மூலமாக இந்த விடயத்தை நகா்த்துகின்ற பொறிமுறையைத்தான் நாம் கையாள்கின்றோம்.

கேள்வி – ஜனாதிபதி ரணில் விக்கிரமசிங்கவை சந்தித்து பேச்சுவாா்த்தை ஒன்றை கடந்த வாரம் நடத்தியிருந்தீர்கள். ஜெனீவா கூட்டத் தொடா் ஆரம்பமாகவுள்ள நிலையில் ரணிலை காப்பாற்றுவதற்கான ஒரு முயற்சி இது என்ற குற்றச்சாட்டு ஒன்று முன்வைக்கப்பட்டிருக்கின்றது. இது குறித்த உங்கள் கருத்து என்ன?

பதில் – இது ஆதாரமற்ற – நியாயமற்ற ஒரு குற்றச்சாட்டு. சா்வதேச குற்றவியல் நீதிமன்றத்தில் இலங்கையைப் பாரப்படுத்த வேண்டும் என்பதில் கடுமையாக உழைத்தது எமது கட்சிதான். சா்வதேச ரீதியிலும் அதற்கான ஆதரவை நாம் திரட்டியிருந்தோம். இந்த விடயத்தில் அதிகளவுக்குத் தீவிரமாகச் செயற்பட்டவா்கள் நாங்கள். ரணிலைச் சந்தித்தது அவரைக் காப்பாற்றுவதற்கான சந்திப்பல்ல என்பதை நீங்கள் அவதானித்திருப்பீா்கள்.

இந்தச் சந்திப்பின் போது பல விடயங்களை நாங்கள் கோரியிருந்தோம். அரசியல் கைதிகள் விடயத்தைப் பொறுத்தவரையில் அது தொடா்பான ஆதாரபுா்வமான ஆவணத்தை நாம் கையளித்தோம். இதேவிடயத்தை மனித உரிமைகள் ஆணையாளரின் அறிக்கயிலும் தெரிவிக்கப்பட்டுள்ளது. பொறுப்புக்கூறல் விடயத்தைப் பொறுத்தவரையில், உள்நாட்டுப் பொறிமுறையின் மூலமாக இந்தப் பிரச்சினைக்குத் தீா்வைக்காண முடியாது என்பதை நாம் தெளிவாகத் தெரிவித்திருந்தோம். அதனை ஆணையாளா் தனது அறிக்கையில் சுட்டிக்காட்டியிருக்கின்றாா். மனித உரிமைகள் பேரவையின் பிரேரணையிலும் அது நிச்சயமாக இடம்பெறும்.

இவற்றைவிட காணி அபகரிப்பு, இராணுவப் பிரசன்னம் போன்ற விடயங்களையும் நாம் அவரிடம் பிரஸ்தாபித்திருந்தோம். அந்த விடயங்கள் கூட ஆணையாளரின் அறிக்கையில் உள்வாங்கப்பட்டிருப்பதை அவதானிக்கலாம்.

ஆக, ரணிலைப் பாதுகாப்பதற்காக அல்ல. அவரை ஐ.நா.வில் மேலும் மாட்டிவிடுவதற்கான ஒரு தந்திரோபாய நகா்வாகத்தான் நாம் அவரைச் சந்தித்திருந்தோமே தவிர, அவரைப் பாதுகாப்பதற்கல்ல என்பதை நீங்கள் புரிந்துகொள்ளலாம்.