Category: தற்போதைய செய்திகள்

கட்சி அரசியல் அதிகார திட்டங்கள் மற்றும் நாடாளுமன்ற உறுப்பினர்களை விலை கொடுத்து வாங்குவது போன்ற மோசடிகளை புறந்தள்ளி விட்டு, மக்களின் எதிர்பார்ப்புகளை நிறைவேற்றக்கூடிய தலைமைத்துவத்தை தெரிவு செய்ய மனசாட்சிக்கு இணங்க செயற்பட வேண்டும் என கத்தோலிக்க திருச்சபையின் கொழும்பு பேராயர் வணக்கத்திற்குரிய கர்தினால் மெல்கம் ரஞ்சித் ஆண்டகை கோரிக்கை விடுத்துள்ளார்.

நாடாளுமன்ற உறுப்பினர்களுக்கு அனுப்பியுள்ள பகிரங்க கடிதத்தில் அவர் இந்த கோரிக்கையை விடுத்துள்ளார்.

மக்களின் எதிர்பார்ப்பை நிறைவேற்றுவதற்காக கூடிய பங்களிப்பை வழங்க கிடைத்துள்ள வரலாற்று சிறப்புமிக்க சந்தர்ப்பத்தை தவறவிட வேண்டாம்.

அனைத்து அதிகாரங்களுடன் கூடிய ஜனாதிபதி ஒருவர் அதிகாரத்தை கைவிட்டு செல்ல நேரிட்ட அரிய சந்தர்ப்பத்தில், தாய் நாட்டின் எதிர்காலத்திற்காக எடுக்க வேண்டிய மிக தீர்மானகரமான முடிவை நோக்கி நாட்டின் இரண்டு கோடிக்கும் மேற்பட்ட மக்கள் பார்த்துக்கொண்டிருக்கின்றனர்.

நாடாளுமன்றத்தில் மக்கள் பிரதிநிதிகள் கூடி மக்களின் நிலைப்பாட்டுக்கு முரணான முடிவை எடுப்பார்களோ என்ற மிகப்பெரிய அச்சம் மக்களுக்குள் காணப்படுகிறது.

குறுகிய காலத்திற்கு கிடைக்கும் அரசியல் அதிகாரத்தை விட ஆத்ம கௌரவமும் தாய் நாட்டு மக்களின் எதிர்பார்ப்புகளும் முக்கியமானவை எனவும் மெல்கம் ரஞ்சித் ஆண்டகை அந்த கடிதத்தில் கூறியுள்ளார்.

இலங்கைக்கு சர்வதேச சமூகம் உதவி வழங்கும் நடவடிக்கைகளிற்கு பிரிட்டன் தலைமை தாங்க வேண்டும் என பிரிட்டனின் ஓய்வு பெற்ற இராஜதந்திரி பீட்டர் ஹீப் கோரிக்கை விடுத்துள்ளார்.

கார்டியன் ஊடகத்தில் வெளிவந்துள்ள இது தொடர்பான செய்தியில்,

இலங்கை நெருக்கடிக்கான பிரிட்டன் அரசாங்கத்தின் பதில் நடவடிக்கை வெக்கக்கேடானது. மக்கள் பட்டினியால் அவதியுறுகின்றனர், மருந்துகள் இன்மையால் உயிரிழக்கின்றனர். போதியளவு எரிபொருள் இல்லாததால் வேலைக்கு செல்ல முடியாத நிலையில் உள்ளனர் மக்கள். மின்சாரத் தட்டுப்பாடு காணப்படுகின்றது என அவர் சுட்டிகாட்டியுள்ளார்.

இந்த மக்கள் இந்த நிலைமைக்கு ஏன் தள்ளப்பட்டனர் என்பதற்கு அப்பால் நெருக்கடிநிலையில் உள்ள நாட்டிற்கு உதவுவதற்கு பிரிட்டன் தலைமை வகிக்க வேண்டும். நாங்கள் அந்த மக்களின் விரும்பமின்றி 150 ஆண்டுகள் அந்நாட்டை ஆட்சி செய்ததைக் கருத்தில் கொண்டு மிக வேகமாக சர்வதேச நிவாரண முயற்சிக்கு தலைமை தாங்க வேண்டும். பொதுநலவாயத்தின் ஊடாக அதனை செய்யலாம் என அவர் மேலும் தெரிவித்துள்ளார்.

காலி முகத்திடல் போராட்டத்தின் பிரதிநிதிகள் எதிர்கட்சித் தலைவர் சஜித் பிரேமதாசவை கொழும்பில் உள்ள எதிர்க்கட்சித் தலைவர் அலுவலகத்தில் இன்று திங்கட்கிழமை சந்தித்தனர்.காலிமுகத்திடல் போராட்டத்தின் பிரதிநிதிகள் முன்வைக்கும் ‘செயற்திட்டத்தை’ எதிர்காலத்தில் எந்த அரசாங்கமும் கடைப்பிடிக்க வேண்டும் என அவர்கள் எதிர்க்கட்சி தலைவருக்கு வலியுறுத்தியதாக தெரிவித்தனர்.

இதேவேளை கோட்டாபய ராஜபக்ஷ மற்றும் ரணில் விக்கிரமசிங்க பதவி விலக வேண்டும் என்பதே காலி முகத்திடல் போராட்டக்கார்களின் முக்கிய கோரிக்கையாக இருப்பதாக பிரதிநிதிகள் தெரிவித்தனர்.இது தொடர்பாக எடுக்கப்பட வேண்டிய நடவடிக்கைகள் குறித்து ஆலோசிப்பதற்காகவே இன்று எதிர்க்கட்சித் தலைவரைச் சந்தித்ததாகவும் போராட்டக்கார்களின் பிரதிநிதிகள் தெரிவித்தனர்.(

நாடு முழுவதும் அவசரகால நிலையை பிரகடனப்படுத்தி பதில் ஜனாதிபதி ரணில் விக்கிரமசிங்க வர்த்தமானி அறிவித்தலை வெளியிட்டுள்ளார்.

இன்று முதல் அமுலுக்கு வரும் வகையில் இந்தப் பிரகடனம் பிறப்பிக்கப்பட்டுள்ளது.

நாளை மறுதினம் பாராளுமன்றத்தில் ஜனாதிபதிக்கான வாக்கெடுப்பு நடத்தப்படவுள்ள நிலையிலேயே பதில் ஜனாதிபதி இந்தப் பிரகடனத்தை செய்துள்ளார்.

எரிபொருள் நெருக்கடி ஐரோப்பிய ஒன்றியத்தை மிகப்பெரும் பொருளாதார வீழ்ச்சியை நோக்கி தள்ளிவருவதாக அனைத்துலக நாணய நிதியத்தின் தலைவர் Kristalina Georgieva தெரிவித்துள்ளார்.

உக்ரைன் போர் ஐரோப்பிய ஒன்றியத்தின் பொருளாதாரத்தை கடுமையாக பாதித்து வருகின்றது. இது 2022 மற்றும் 2023 ஆம் ஆண்டுகளின் பொருளாதார வளர்ச்சியை கடுமையாக பாதிக்கும்.

பணவீக்கத்தை குறைப்பதற்கு நாடுகள் பல வழிமுறைகளை நாடுகின்றன. பணவீக்கம் பொருளாதார மீட்சியை பாதிப்பதுடன், மக்களின் வாழ்க்கைத் தரத்தையும் பாதிக்கும். எரிபொருள் மற்றும் உணவுப் பற்றக்குறையே பிரதான கராணமாக உள்ளது.

இதனை தடுக்கவேண்டுமெனில் நாடுகள் பொருளாதார மற்றும் ஏற்றுமதித் தடைகளை நீக்க வேண்டும் என்பதுடன் ஏனைய நாடுகளுக்கு உதவிகளையும் வழங்கவேண்டும் என அவர் மேலும் தெரிவித்துள்ளார்.