Category: தற்போதைய செய்திகள்

தமிழீழ விடுதலைப் புலிகள் மீதான தடையை தொடர்ந்து நீடிக்க பிரித்தானிய அரசாங்கம் தீர்மானித்துள்ளதாக பிரித்தானிய உள்துறை அமைச்சை மேற்கோளிட்டு இலங்கை வெளிவிவகார அமைச்சு தெரிவித்துள்ளது.

பிரித்தானியாவில் 2000 ஆம் ஆண்டு பயங்கரவாத தடைச்சட்டத்தின் கீழ், மேன்முறையீட்டு ஆணைக்குழுவின் தீர்மானத்தின் பின்னர் பிரித்தானியாவின் உள்துறை அமைச்சின் செயலாளரினால் குறித்த தீர்மானம் மேற்கொள்ளப்பட்டுள்ளது.

இதன்மூலம் ஐரோப்பிய ஒன்றியம் உட்பட உலகெங்கிலும் உள்ள 30 க்கும் மேற்பட்ட நாடுகளைப் போலவே, தமிழீழ விடுதலைப் புலிகளும் பிரித்தானியாவில் தடைசெய்யப்பட்ட அமைப்பாக உள்ளது.

உலகளாவிய மற்றும் பிராந்திய பாதுகாப்பை பாதிக்கும் பிற குற்றச் செயல்கள் காரணமாக இந்த நாடுகளில் தமிழீழ விடுதலைப் புலிகள் அமைப்பினை ஆரம்பத்தில் தடை செய்திருந்தனர்.

இந்நிலையில் உலகளாவிய மற்றும் பிராந்திய அமைதி மற்றும் பாதுகாப்பிற்கு ஆபத்தை விளைவிக்கும் பயங்கரவாதம் மற்றும் வன்முறை தீவிரவாதத்தை கட்டுப்படுத்தும் அனைத்து முயற்சிகளிலும் பிரிட்டனுடன் இணைந்து பணியாற்ற விரும்புவதாக இலங்கை வெளிவிவகார அமைச்சு குறிப்பிட்டுள்ளது.

யாழ்ப்பாணம், வல்வெட்டித்துறை நகர சபையின் புதிய தலைவரை தெரிவு செய்வதற்கான அமர்வு இன்று காலை நகர சபைக்குரிய மண்டபத்தில், வடக்கு மாகாண உள்ளூராட்சி ஆணையாளர் ம.பற்றிக்டிரஞ்சன் தலைமையில் சுகாதார நடைமுறைகளுக்கு உட்பட்டு ஆரம்பமானது.

அமர்வில் சுயேட்சைக் குழு உறுப்பினர்கள் மூவரும் ஈழ மக்கள் ஜனநாயக கட்சி உறுப்பினர்கள் இருவர் என ஐந்து உறுப்பினர்கள் மாத்திரமே பங்கேற்றனர். இதனால் அமர்வு சுமார் 30 நிமிடங்கள் ஒத்திவைக்கப்பட்டது.

பின்னர் அமர்வு ஆரம்பிக்கப்பட்டபோதும் கோரம் போதாமையினால்  திகதி குறிப்பிடப்படாமல் தலைவரை தெரிவு செய்வதற்கான அமர்வு ஒத்திவைக்கப்பட்டது.

வல்வெட்டித்துறை நகர சபைத் தலைவராக செயல்பட்ட தமிழ் தேசியக் கூட்டமைப்பைச் சேர்ந்த  கோணலிங்கம் கருணானந்தராசா அண்மையில் கோவிட்-19 நோய்த்தொற்றினால் பாதிக்கப்பட்டு உயிரிழந்தார்.

இதனால் ஏற்பட்ட வெற்றிடத்துக்கே புதிய தலைவருக்கான தெரிவு இடம்பெறவிருந்தது.

வல்வெட்டித்துறை நகர சபையில் தமிழ்த் தேசியக் கூட்டமைப்பின் 7 உறுப்பினர்களும், சுயேட்சைக் குழுவில் 4 உறுப்பினர்களும், தமிழ்த் தேசிய மக்கள் முன்னணி மற்றும் ஈழ மக்கள் ஜனநாயக கட்சி என்பன தலா 2 உறுப்பினர்களையும் சிறிலங்கா சுதந்திரக்கட்சி மற்றும் தமிழர் விடுதலைக் கூட்டணி என்பன தலா ஒரு உறுப்பினர்களையும் கொண்டுள்ளமை குறிப்பிடத்தக்கது.

வல்வெட்டித்துறை நகர சபையில் தமிழ்த் தேசியக் கூட்டமைப்பு 7 உறுப்பினர்களைக் கொண்டுள்ளது.

சுயேட்சைக் குழு 4 உறுப்பினர்களையும் தமிழ்த் தேசிய மக்கள் முன்னணி மற்றும் ஈபிடிபி என்பன தலா 2 உறுப்பினர்களையும் சிறிலங்கா சுதந்திரக் கட்சி, தமிழர் விடுதலைக் கூட்டணி என்பன தலா ஒரு உறுப்பினர்களையும் கொண்டுள்ளன.

உயிர்த்த ஞாயிறு தின குண்டுத் தாக்குதல்கள் தொடர்பிலான விசாரணைகளுக்கு என கைது செய்யப்பட்டு, விளக்கமறியல் உத்தரவின் கீழ், மெகசின் சிறைச்சாலையில் தடுத்து வைக்கப்பட்டுள்ள, முன்னாள் அமைச்சரும் வன்னி மாவட்ட பாராளுமன்ற உறுப்பினருமான ரிஷாத் பதியுதீனிடம் இருந்து சிறைச்சாலை அதிகாரிகள் கையடக்கத் தொலைபேசி ஒன்றினை மீட்டுள்ளனர்.

மெகசின் சிறைச்சாலையின் தலைமை சிறைக் காவலரும் மற்றொரு காவலரும், நேற்று  (1) இரவு வேளையில், ரிஷாத் பதியுதீன் தடுத்து வைக்கப்பட்டுள்ள சிறைச்சாலை அறையின் பக்கம் மேற்பார்வைக்காக சென்ற போது, அவர் தொலைபேசியில் கதைப்பதை கண்டுள்ளதாகவும், பின்னர் அவர் அந்த தொலைபேசியை சிறை அறைக்கு வெளியே வீசிய நிலையில் அதனை கைப்பற்றியதாகவும் சிறைச்சாலைகள் ஊடகப் பேச்சாளர் , சிறைச்சாலைகள் ஆணையாளர் ( நிர்வாகம்) சந்தன ஏக்கநாயக்க கூறினார்.

‘ வழமையான சிறை அறை மேற்பார்வையில் பிரதான பாதுகாவலரும் மற்றொருவரும் நேற்று இரவு ஈடுபட்டிருந்துள்ளனர்.

இதன்போது ரிஷாத் பதியுதீன் தொலைபேசியில் யாருடனோ உரையாடிக் கொண்டிருப்பதை அவர்கள் அவதானித்துள்ளனர்.

இந்த நிலையில், பிரதான சிறைக்காவலர் தான் தொலைபேசியில் கதைப்பதை அவதானித்ததை அறிந்த ரிஷாத் பதியுதீன், சிறைச்சாலைகள் ஜன்னல் வழியே தொலைபேசியை வீசி எரிந்துள்ளார். இதனையடுத்து, அந்த தொலைபேசியை உடனடியாகவே சிறை அதிகாரிகள் மீட்டுள்ளனர்.

எனவே சிறைச்சாலைகள் கட்டளை சட்டத்தின் பிரகாரம் ரிஷாத் பதியுதீனை கையடக்கத் தொலைபேசி வைத்திருந்தமை தொடர்பில் சிறைச்சாலைகள்  தீர்பாயம் முன் நிறுத்தவுள்ளோம். ‘ என சிறைச்சாலைகள் ஊடகப் பேச்சாளர் சந்தன எக்கநாயக்க கூறினார்.

ஏற்கனவே சிறைச்சாலைகள் வைத்தியர் ஒருவரை அச்சுறுத்தியதாக, முன்னாள் அமைச்சர் ரிஷாத் பதியுதீன் சிறைச்சாலைகள் தீர்பாய விசாரணையையும், பொலிஸ் விசாரணைகளையும் எதிர்க்கொண்டுள்ள பின்னணியிலேயே தற்போது  தொலைபேசி வைத்திருந்த விடயமும் வெளிப்பட்டுள்ளது.

வரலாற்று சிறப்புமிக்க யாழ்ப்பாணம் – நயினாதீவு நாகபூசணி அம்மன் கோவிலின் வருடாந்த மகோற்சவம் இவ்வருடம் நடைபெறாது என அறிவிக்கப்பட்டுள்ளது.

மகோற்சவம் ஜூன் 10 ஆம் திகதி இடம்பெறவிருந்த நிலையில், கொரோனா தொற்று காரணமாக இம்மாதம 06 ஆம் திகதிக்கு ஒத்திவைக்கப்பட்டது.

எனினும், நாட்டின் தற்போதைய நிலையை கருத்திற்கொண்டு இவ்வருட மகோற்சவத்தை நடத்தாமலிருப்பதற்கு தீர்மானித்துள்ளதாக நாகபூசணி அம்மன் ஆலயத்தின் அறங்காவலர் சபையின் தலைவர் க.பரமலிங்கம் தெரிவித்தார்.

சீனாவின் உயர்மட்ட சட்டமன்ற உறுப்பினர் லி ஜான்ஷு செவ்வாய்க்கிழமை பீஜிங்கில் இருந்து காணொளி இணைப்பு மூலமாக சபாநாயகர் மஹிந்த யாபா அபேவர்தனவுடன் பேச்சுவார்த்தை நடத்தியுள்ளார்.

இந்த தகவலை சீனாவின் சின்ஹுவா செய்தி நிறுவனம் தெரிவித்துள்ளது.

தேசிய மக்கள் காங்கிரஸ் (NPC) நிலைக்குழுவின் தலைவரான லி, இரு நாடுகளின் தலைவர்கள் எட்டியுள்ள முக்கிய ஒருமித்த கருத்தை அமுல்படுத்துவதற்கும், இருதரப்பு உறவுகளை மேம்படுத்துவதற்கும் சீனா இலங்கையுடன் இணைந்து செயல்பட தயாராக இருப்பதாக கூறினார்.
அரசியல் பரிமாற்றங்களை மேம்படுத்தவும், கொவிட் -19 ஒழப்புக்கான ஒத்துழைப்பை ஆழப்படுத்தவும், பலதரப்பு ஒருங்கிணைப்புக்கு ஒத்துழைக்கவும் இதன்போது அவர் அழைப்பு விடுத்தார்.
சந்திப்பின் போது, லி சீனாவின் கோட்பாடுகள் மற்றும் கொவிட் -19 தோற்றம் குறித்த நிலைப்பாட்டையும் சபாநாயகர் மஹிந்த யாபா அபேவர்தனவுக்கு தெளிவுபடுத்தியுள்ளார்.
கொவிட் -19 இன் தோற்றத்தை கண்டறிவது ஒரு சிக்கலான அறிவியல் விடயம் என்றும் இது கூட்டு ஆராய்ச்சி மூலம் உலகெங்கிலும் உள்ள விஞ்ஞானிகளால் மட்டுமே மேற்கொள்ளப்பட முடியும்.
தொற்றுநோய்க்கு எதிரான ஒத்துழைப்புக்கான அறிவியல் சூழல் மற்றும் தோற்றத்தின் தீவிரத்தன்மையை பாதுகாப்பதற்கும் மற்றும் ஒரு சிறந்த சூழ்நிலையை பராமரிப்பதற்கும் சீனா இலங்கையுடன் இணைந்து செயல்பட தயாராக உள்ளது என்றும் லி தெரிவித்தார்.
இதன்போது சபாநயகர் இறையாண்மையைப் பாதுகாக்கவும், பொருளாதார மற்றும் சமூக வளர்ச்சியை ஊக்குவிக்கவும், கொவிட் -19 க்கு எதிரான போராட்டத்தில் இலங்கையின் முயற்சிகளுக்கு உறுதியான ஆதரவளிப்புக்காக சீனாவுக்கு நன்றி தெரிவித்தார்.