இலங்கையில் இன்று 1,509 பேருக்கு கொரோனா தொற்று

இலங்கையில் இன்று இதுவரையில் 1,509 பேருக்கு கொரோனா தொற்று உறுதிப்படுத்தப்பட்டுள்ளதாக இராணுவத் தளபதி ஜெனரல் சவேந்திர சில்வா தெரிவித்துள்ளார்.

இதன்படி, நாட்டில் பதிவான கொவிட் தொற்றாளர்களின் மொத்த எண்ணிக்கை 506,000 ஆக அதிகரித்துள்ளது.

இதேவேளை, கொரோனா தொற்றில் இருந்து இதுவரை பூரணமாக குணமடைந்தவர்களின் எண்ணிக்கை 433,093 ஆக அதிகரித்துள்ளது.

இதே வேளை கொவிட் தொற்றுக்கு உள்ளாகி நேற்றைய தினம் ஞாயிற்றுக்கிழமை 93 பேர் உயிரிழந்துள்ளதாக சுகாதார சேவைகள் பணிப்பாளர் நாயகம் சற்றுமுன்னர் உறுதிப்படுத்தியுள்ளார்.

அதன்படி, நாட்டில் கொவிட் தொற்றுக்கு உள்ளாகி உயிரிழந்தோரின் எண்ணிக்கை 12,218 ஆக அதிகரித்துள்ளது.

சந்திரிகா வெளியிட்ட மங்கள சமரவீரவின் இரகசிய கடிதத்தால் பரபரப்பு

சிறிலங்காவின் தற்போதைய பிரதமரான மஹிந்த ராஜபக்சவுக்கு, மறைந்த முன்னாள் அமைச்சர் மங்கள சமரவீர எழுதிய இரகசிய கடிதமொன்றை 15 வருடங்களுக்குப் பின்னர் வெளியிட்டு சிறிலங்காவின் முன்னாள் அரசதலைவர் சந்திரிகா குமாரதுங்க பரபரப்பை ஏற்படுத்தியுள்ளார்.

கடந்த 2005 ஆம் ஆண்டில் மஹிந்த ராஜபக்ஷ அரசதலைவராக நியமிக்கப்பட்ட போது, மங்கள சமரவீர தனது கைப்பட எழுதிய கடிதம் ஒன்றையே சந்திரிகா குமாரதுங்க பகிரங்கப்படுத்தியுள்ளார்.

கொரோனா தொற்றுக்கு உள்ளாகி அண்மையில் மரணித்த சிறிலங்காவின் முன்னாள் அமைச்சர் மங்கள சமரவீர, கடந்த 2006 ஆம் ஆண்டு ஜுன் 26 ஆம் திகதியிட்டு, தனது கைப்பட மஹிந்த ராஜபக்சவுக்கு எழுதியிருந்ததாக கூறப்படும் கடிதத்தை சந்திரிகா குமாரதுங்க தனது முகநூலில் வெளியிட்டுள்ளார்.

மங்கள சமரவீர, சிறிலங்கா சுதந்திரக் கட்சியின் தலைவர் பதவியில் இருந்த போது அந்தப் பதவில் இருந்து அவரை நீக்குவதற்காக நடத்தப்பட்ட, கட்சி நிறைவேற்றுச் சபை மற்றும் மத்திய குழுக் கூட்டங்களில் பங்கேற்க மாட்டேன் என்று தெரிவிக்கும் வகையில் குறித்த கடிதத்தை அவர் அனுப்பியதாக சந்திரிகா குமாரதுங்க தனது பதிவில் தெரிவித்துள்ளார்.

கட்சியின் தலைவர் பதவியில் இருந்து கௌரவமான முறையில் விலகுவதாக மங்கள அறிவித்திருந்தாலும், அவரின் பிறந்தநாள் அன்று அவரை பதவியில் இருந்து நீக்குவதற்கு மஹிந்த ராஜபக்ஸ விரும்பியதாகவும் அவர் கூறியுள்ளார்.

அனுர பண்டாநாயக்க, மங்கள சமரவீர மற்றும் ஜெயராஜ் பெர்ணாண்டோபுள்ளே ஆகியோருக்கே அதனை எதிர்க்கும் திறன் அப்போது இருந்தது எனவும், தனது மனச்சாட்சியின் பிரகாரம் உடன்படாத போதிலும் மஹிந்தவின் தலைமையை எதிர்க்க மாட்டேன் என்று பல சந்தர்ப்பங்களில் வாய் மொழியாகவும் எழுத்து மூலமாகவும் மங்கள சமரவீர தெரிவித்திருந்தார் எனவும் அவர் குறிப்பிட்டுள்ளார்.

விடயத்தின் இரகசிய தன்மையை பேணும் வகையில் தனது சொந்தக் கையெழுத்தில் மங்கள சமரவீர குறித்த கடிதத்தை எழுதினார் என அவர் குறிப்பிட்டுள்ளார்.

எனினும் குறித்த கடிதத்தை எழுதி, சரியாக பத்து மாதங்கள் கழித்த பின்னர் எந்தக் காரணமும் இன்றி மங்கள சமரவீர அமைச்சுப் பதவியில் இருந்து நீக்கப்பட்டதாகவும் சந்திரிக்கா குமாரதுங்க குறிப்பிட்டுள்ளார்.

எனினும் மங்கள சமரவீர தனது கொள்கையைக் கைவிடவில்லை என சந்திரிகா தனது சமூக வலைத்தளத்தில் தெரிவித்துள்ளார். மங்கள சமரவீரவினுடையது எனக் கூறப்படும் இந்தக் கடிதம் தற்போது தென்னிலங்கை அரசியல் களத்திலும் பரபரப்பை ஏற்படுத்தியுள்ளது.

மதுபானசாலைகள் திறப்பு குறித்து கருத்து வெளியிட முடியாது – சுகாதார அமைச்சின் பேச்சாளர்

மக்கள் மத்தியில் சிறிலங்கா அரசாங்கம் மீது கடும் விமர்சனத்தை ஏற்படுத்தியிருக்கின்ற மதுபானசாலைகள் திறக்கப்பட்ட விடயம் குறித்து, எந்தவொரு கருத்தையும் ஊடகங்களுக்கு வெளியிட முடியாது என சுகாதார அமைச்சின் பேச்சாளர் மருத்துவர் ஹேமந்த ஹேரத் தெரிவித்துள்ளார்.

கொழும்பில் இன்று நடைபெற்ற ஊடகவியலாளர் சந்திப்பில், மதுபானசாலைகள் திறக்கப்பட்டமை பற்றி சரமாரியான கேள்விகளை ஊடகவியலாளர்கள் முன்வைத்தபோது அவற்றிற்கு பதில் அளிப்பதை தவிர்த்த ஹேமந்த ஹேரத், குறித்த விடயம் தொடர்பில் கேள்விகளை எழுப்பி தம்மை அசௌகரியத்திற்கு உட்படுத்த வேண்டாம் எனவும் கோரியுள்ளார்.

இதன்போது மேலும் கருத்துரைத்த அவர்,

“மதுபானசாலைகள் திறக்கப்பட்டுள்ளமை தொடர்பில் சட்ட ரீதியான நடவடிக்கைகள் முன்னெடுக்கப்பட்டுள்ளதாக அறியக்கிடைத்துள்ளது. எனவே அது குறித்து தற்போது கருத்து வெளியிடுவது பொருத்தமானதாக இருக்காது.

எனவே இவ்விடயம் தொடர்பில் கருத்து தெரிவிப்பத்திலிருந்து நான் விலகிக்கொள்கின்றேன். இது குறித்த கேள்விகளை தொடர்ந்தும் கேட்டு என்னை அசௌகரியத்திற்கு உட்படுத்த வேண்டாம்

. காரணம் என்னால் தெரிவிக்கப்படும் கருத்துக்கள் இவ்விவகாரத்துடன் தொடர்புடைய சட்ட ரீதியான நடவடிக்கைகளில் தாக்கம் செலுத்துவதாகக் காணப்பட்டால் நான் தனித்து தான் அதற்கு முகங்கொடுக்க வேண்டும். எனவே என்னால் இதுபற்றி எதனையும் கூற முடியாது” என்றார்.

வெளிநாட்டு அமைச்சர் ஜீ.எல். பீரிசுக்கும் துருக்கியின் வெளிநாட்டு அமைச்சர் மெவ்லட் சவுஷோலுவுக்குமிடையில் சந்திப்பு

இலங்கையின் வெளிநாட்டு அமைச்சர் ஜீ.எல். பீரிசுக்கும் துருக்கியின் வெளிநாட்டு அமைச்சர் மெவ்லட் சவுஷோலுவுக்குமிடையில் செப்டம்பர் 17ஆந் திகதி சந்திப்பொன்று நியூயோர்க்கில் நடைபெற்றதாக இலங்கை வெளியாட்டமைச்சு இன்றைய தினம் திங்கட்கிழமை அறிக்கையொன்றை வெளியிட்டுள்ளது.

அவ் அறிக்கையில் குறிப்பிடப்பட்டுள்ளதாவது,

ஐக்கிய நாடுகள் பொதுச் சபையின் 76வது அமர்வின் பக்க நிகழ்வாக, நியூயோர்க்கில் உள்ள துருக்கிய நிரந்தரத் தூதரகத்தின் சான்சரிக் கட்டிடத்திலுள்ள துருக்கி இல்லத்தில் வைத்து 2021 செப்டம்பர் 17ஆந் திகதி, வெள்ளிக்கிழமை இருதரப்பு சந்திப்புக்காக துருக்கியின் வெளிநாட்டு அமைச்சர் மெவ்லட் சவுஷோலு இலங்கையின் வெளிநாட்டு அமைச்சர் பேராசிரியர் ஜீ.எல். பீரிஸை வரவேற்றார்.

2016ஆம் ஆண்டு தான் இலங்கை மேற்கொண்ட இரண்டு நாள் விஜயத்தை பயணத்தை வெளிநாட்டு அமைச்சர் சவுஷோலு மகிழ்ச்சியுடன் நினைவு கூர்ந்தார். விஜயத்தின் போது அவருக்கு வழங்கப்பட்ட ஏற்பாடுகளை அமைச்சர் பாராட்டினார். துருக்கிக்கான தனது பல விஜயங்களை அன்போடு நினைவு கூர்ந்த வெளிநாட்டு அமைச்சர் பீரிஸ், தனக்குக் கிடைத்த உயரிய அனுபவங்கள் குறித்து கருத்துத் தெரிவித்தார். தனது நாட்டில் இலங்கையின் கௌரவ துணைத்தூதுவர் ஒருவர் விரைவில் பதவயேற்கவிருப்பது குறித்து துருக்கியின் வெளிநாட்டு அமைச்சர் மகிழ்ச்சி வெளியிட்டார்.

தமது பரஸ்பர விஜயங்களை மதிப்பீடு செய்கையில், இரு நாடுகளுக்கும் இடையிலான நட்புறவின் சிறந்த உறவுகளை, குறிப்பாக பொருளாதார மற்றும் வர்த்தக உறவுகளை வலுப்படுத்துவதற்காக ஏனைய மட்டங்களிலான விஜயங்கள் மற்றும் தொடர்புகளின் மூலம் பிணைப்புக்களை மேலும் மேம்படுத்துவதற்கு இது ஒரு சிறந்த தருணமாகும் என இரு வெளிநாட்டு அமைச்சர்களும் குறிப்பிட்டனர். இரு நாடுகளும் புவியியல் ரீதியாக வெகு தொலைவில் இருந்தாலும், இரு நாடுகளுக்கிடையேயான உறவுகள் மிக நெருக்கமாக இருந்ததாக வெளிநாட்டு அமைச்சர் சவுஷோலு குறிப்பிட்டார். வென்டிலேட்டர்கள் மற்றும் ஏனைய உபகரணங்களை வழங்கி கோவிட்-19 தொற்றுநோயின் போது துருக்கி இலங்கைக்கு தாராளமாக நல்கிய ஆதரவுகள் குறித்து குறிப்பிட்ட வெளிநாட்டு அமைச்சர் பீரிஸ், சுனாமியின் பின்னர் வீட்டுவசதிகளை வழங்கி நல்கிய ஆதரவுகளைப் பாராட்டினார். இரு நாடுகளுக்குமிடையிலான இருதரப்பு வர்த்தகம் 100 மில்லியன் அமெரிக்க டொலரிலிருந்து படிப்படியாக அதிகரித்து வருவதாகவும், இந்த ஆண்டில் 200 மில்லியன் அமெரிக்க டொலர்களை எட்டும் என்றும் கணிக்கப்பட்டுள்ளது.

துருக்கிக்கு ஏற்றுமதி செய்யும் தேயிலையை 80% இலிருந்து பல்வகைப்படுத்த வேண்டிய அவசியம் குறித்து எடுத்துரைத்த வெளிநாட்டு அமைச்சர் பீரிஸ், கட்டுமானம் மற்றும் மருந்து போன்ற அபிவிருத்திப் பகுதிகளில் பொருளாதாரம், வர்த்தகம் மற்றும் முதலீட்டிற்கான மிகப்பெரிய ஊக்குவிப்பு இரு நாடுகளுக்கும் இடையே இருப்பதாகக் குறிப்பிட்டார். துருக்கி நிபுணத்துவம் பெற்றுள்ள தொழில்கள் மற்றும் உள்ளூர் சந்தை மற்றும் அதற்கு அப்பால் உள்ள மருந்துகளைத் தயாரிப்பதற்காக குறிப்பிட்ட பொருளாதார சுதந்திர வலயங்களைக் கொண்டு இந்தப் பகுதியை அபிவிருத்தி செய்வதற்கு இலங்கை விரும்புகின்றது. துருக்கிய கட்டுமானத் துறை உலகின் இரண்டாவது பெரியதாகும் என்றும், தாம் தமது பிராந்தியத்தில் மட்டுமல்லாது உலகளாவிய ரீதியில் பல திட்டங்களைக் கொண்டிருப்பதாகவும் துருக்கிய வெளிநாட்டு அமைச்சர் வலியுறுத்தினார். இரு நாடுகளுக்கும் இடையிலான கூட்டுத் திட்டங்கள், முதலீடுகள் மற்றும் முன்முயற்சிகளுக்கு வாய்ப்பு;களை வழங்க உதவும் விலக்களித்தல், இரட்டை வரிவிதிப்பு, முதலீட்டு ஊக்குவிப்பு மற்றும் பாதுகாப்பு ஆகிய முக்கிய ஒப்பந்தங்களை இறுதி செய்வதற்காக இரு அமைச்சர்களும் ஆர்வம் தெரிவித்தனர். முக்கியமான உலகளாவிய சர்வதேச மையமாக தமது வகிபாகத்தை அதிகரிக்கும் துருக்கியின் இரண்டாவது சர்வதேச விமான நிலையம் போன்ற உட்கட்டமைப்புக்கான வெற்றிகரமான தனியார் திட்டங்களுக்கான அனுபவத்தை துருக்கியின் வெளிநாட்டு அமைச்சர் குறிப்பிட்டார்.

அங்காரா மற்றும் கொழும்புக்கு இடையேயான விமான இணைப்பை ஆராய்வதற்கான சாத்தியக்கூறுகள் மற்றும் பிராந்தியத்திற்கான குறியீட்டுப் பங்கு விமானங்கள், புதிய நிலைகளுக்கான இணைப்புக்கள் மற்றும் உறவுகளை அதிகரிக்கக்கூடிய சாத்தியக்கூறுகள் உட்பட, மக்களுக்கிடையிலான தொடர்புகளை மேம்படுத்துதல் குறித்து இரு அமைச்சர்களும் கலந்துரையாடினர். இறுதி செய்யப்பட்ட மற்றும் இறுதிக் கட்டங்களில் உள்ள ஒப்பந்தங்களை விரைவுபடுத்துவதற்கு இரு தரப்பினரும் ஒப்புக்கொண்டனர்.

உயிர்த்த ஞாயிறு தின பயங்கரவாதத் தாக்குதலின் போது இலங்கையில் இரண்டு துருக்கி நாட்டவர்கள் மரணித்தமைக்காக வெளிநாட்டு அமைச்சர் பீரிஸ் இரங்கல் தெரிவித்ததுடன், தீவிரவாதக் குழுக்களுடன் தொடர்புடையவர்கள் தொடர்பான விசாரணைகள் மற்றும் சட்ட நடைமுறைகள் குறத்த புதுப்பிக்கப்பட்ட தகவல்களை வழங்கினார். தீவிரவாதத்தை அதன் அனைத்து வடிவங்களிலும் மற்றும் தொடர்புகளிலும் எதிர்கொள்ள வேண்டியதன் அவசியத்தை இரு அமைச்சர்களும் வெளிப்படுத்தியதுடன், மனித உரிமைகள் அரசியல்மயமாக்கப்படுவதையும், சில தரப்பினர்கள் மனித உரிமைகளை கருவிகளாகத் தேர்ந்தெடுத்து பயன்படுத்துவதையும் எதிர்த்த அதே வேளை, ஐக்கிய நாடுகள் சபை மற்றும் ஏனைய அரங்குகளில் சர்வதேச ஒத்துழைப்பை விரிவுபடுத்துவதாக உறுதியளித்தனர்.

தான் இலங்கைக்கு விஜயமொன்றை மேற்கொள்ளவிருந்ததாகவும், எனினும் கோவிட் தொற்றுநோயின் காரணமாக விஜயத்தை ஒத்திவைக்க நேர்ந்ததாகவும் வெளிநாட்டு அமைச்சர் சவுஷோலு குறிப்பிட்டார். எதிர்வரும் காலங்களில் இலங்கைக்கு விஜயம் மேற்கொள்ளுமாறு வெளிநாட்டு அமைச்சர் பீரிஸ் துருக்கிய வெளிநாட்டு அமைச்சருக்கு அழைப்பு விடுத்தார்.

நட்புறவு மற்றும் நெருக்கமான உறவை விரிவாக்குவதற்கு இரு அமைச்சர்களும் எதிர்பார்த்ததுடன், கோவிட் தொற்றுநோய்க்குப் பின்னர் தொடர்புகளை மேலும் ஆரம்பிக்க முடியும் என நம்பிக்கை தெரிவித்தனர்.

கொரோனாவின் 5 ஆவது அலையை தடுப்பதற்கான ஆறு பரிந்துரைகள் அறிவிப்பு

இலங்கையில் கொரோனா வைரஸின் ஐந்தாவது அலை ஏற்படுவதை தடுப்பதற்கு பின்பற்ற வேண்டிய ஆறு பரிந்துரைகளை அரச மருத்துவ அதிகாரிகள் சங்கம் முன்வைத்துள்ளது.
கொரோனா மூன்றாம் அலையின் தாக்கம் இலங்கையில் கட்டுப்படுத்தப்பட்டு வருகிறது. அதேநேரம், ஐந்தாம் அலை இன்னும் சில மாதங்களில் தாக்கக்கூடும் என்று அரச மருத்துவ அதிகாரிகள் சங்கம் எச்சரித்துள்ளது.
எனவே, முதலாவது மற்றும் இரண்டாவது அலையின் தீவிரம் குறைந்த பிறகு அலட்சியமாக இருந்ததே, மூன்றாம் அலையில் ஏற்பட்ட பேரிழப்புகளுக்கு முக்கிய காரணமாக அமைந்தது.
அந்தவகையில், அடுத்து வரும் ஐந்தாம் அலையில் இருந்து தற்காத்துக் கொள்வதற்கான முக்கிய சில பரிந்துரைகளை அரச மருத்துவ அதிகாரிகள் சங்கம் வெளியிட்டுள்ளது.
அவையாவன:
1. தேசிய ஆலோசனைக் குழுவின் வழிகாட்டுதல்கள் மற்றும் ஒப்புதலின் படி நாட்டின் சனத் தொகையில் 70 சதவீதத்துக்கும் அதிகமானவர்களுக்கு முழுமையான தடுப்பூசி மற்றும் பாடசாலை மாணவர்களுக்கு தடுப்பூசி போடுதல்.
2. தொற்று நோய்களுக்கான தேசிய ஆலோசனை குழுவின் ஒப்புதலுக்கு உட்பட்டு இரண்டு டோஸ் தடுப்பூசிகளையும் பெற்றவர்களுக்கு நவம்பர் தொடக்கத்தில் இருந்து மூன்றாவது பூஸ்டர் டோஸை செலுத்துவதற்கான நடவடிக்கைகளை ஆரம்பித்தல்.
3. சுகாதார வழிகாட்டுதல்களின்படி புதிய வாழ்க்கை முறைக்கு மக்களை உள்வாங்கல்.
4. தடுப்பூசி போடப்பட்ட போதிலும் வைரஸினால் பாதிக்கப்பட்டு நேர்மறை அறிகுறியற்ற நபர்களை அடையாளம் காண இலவசமாக வழங்கக்கூடிய, எளிமையான ஒரு கொவிட் பரிசோதனை முறையொன்றை அறிமுகம் செய்தல்.
5. சமூகத்தில் பரவி வரும் கொரோனா கொத்தணிகளை அடையாளம் காண, அனைத்து மாவட்டங்களையும் உள்ளடக்கியதாக எழுமாறாக மாதிரிப் பரிசோதனைகளை முன்னெடுத்தல்.
விஞ்ஞான மற்றும் சீரான முறையில் மரபணு சோதனையை நடத்துவதன் மூலம் சாத்தியமான புதிய திரிபுகளை அடையாளம் கண்டு, ஆரம்பத்தில் இருந்தே சமூகத்தில் பரவுவதை தடுக்க உத்திகளை செயல்படுத்தல்.

உள்ளகப் பொறிமுறையினூடான பிரச்சினைத் தீர்வுக்கு பேச்சுக்கு வருமாறு புலம்பெயர் தமிழர்களுக்கு ஜனாதிபதி அழைப்பு!

இனங்களுக்கிடையில் ஒற்றுமையை பலப்படுத்திக்கொண்டு முன்னோக்கி நகர்வதற்கான முழுமையான ஒத்துழைப்பை, மிகவும் நேர்மறையான  முறையில் ஐக்கிய நாடுகள் சபை இலங்கைக்கு வழங்குமென்று, அதன் பொதுச் செயலாளர் அன்டனியோ குட்டரெஸ் (Antonio Guterres), ஜனாதிபதி கோட்டாபய ராஜபக்ஷவிடம் தெரிவித்தார்.

நியூயோர்க்கிலுள்ள ஐக்கிய நாடுகள் சபைத் தலைமையகத்தில், நேற்றைய தினம் (ஞாயிற்றுக்கிழமை) இடம்பெற்ற ஜனாதிபதிக்கும் ஐ.நா பொதுச் செயலாளருக்கும் இடையிலான விசேட சந்திப்பின் போதே, அவர் மேற்கண்டவாறு தெரிவித்தார்.

ஐ.நா தலைமையகத்துக்குப் பிரவேசித்த ஜனாதிபதியை அன்புடன் வரவேற்ற குட்டரெஸ், 1978ஆம் ஆண்டில், சர்வதேச நாடாளுமன்றச் சங்கத்தைப் பிரதிநிதித்துவப்படுத்தி இலங்கைக்குத் தான் விஜயம் செய்திருந்ததையும் கண்டி, அநுராதபுரம், பொலன்னறுவை மற்றும் திருகோணமலை ஆகிய பிரதேசங்களுக்குச் சுற்றுலா சென்றதையும், அதன்போதான அழகான நினைவுகளையும் ஞாபகப்படுத்தினார்.

ஐக்கிய நாடுகள் சபையின் அகதிகளுக்கான ஆணையாளராக, இலங்கை தொடர்பில் தான் பணியாற்றியமை மற்றும் 2006ஆம் ஆண்டில் அப்போதைய ஜனாதிபதியாக இருந்த மஹிந்த ராஜபக்ஷவினை சந்தித்தமை குறித்தும், குட்டரெஸ் நினைவுபடுத்தினார்.

சுமார் 30 ஆண்டுகள் நிலவிய யுத்தம் காரணமாக, மிகவும் சிக்கலான நிலைமைக்கு விழவேண்டிய சூழ்நிலை ஏற்பட்டாலும், இந்து சமுத்திர வலயத்தில், மாபெரும் சமூக மற்றும் பொருளாதாரப் பணிகளை நிறைவேற்றும் இலங்கையிடமிருந்து, தொடர்ந்தும் அப்பணியை எதிர்பார்ப்பதாக, பொதுச் செயலாளர் எடுத்துரைத்தார்.

ஐ.நா பொதுச் செயலாளருடன் கலந்துரையாடக் கிடைத்தமையிட்டு தான் மகிழ்ச்சியடைவதாக ஜனாதிபதி தெரிவித்துள்ளார்.

சிறிய பொருளாதாரத்தைக் கொண்டுள்ள இலங்கை போன்ற நாடொன்று, கொரோனா தொற்றுப் பரவலுக்கு மத்தியில் முகங்கொடுத்துள்ள சவால்கள் தொடர்பில், ஜனாதிபதி ராஜபக்ஷ, ஐ.நா பொதுச் செயலாளருக்கு எடுத்துரைத்தார்.

கொரோனா தொற்றுப் பரவலுக்கு மத்தியில், இலங்கையின் கல்வி மற்றும் பொருளாதாரத்துக்கு ஏற்பட்டுள்ள பாரிய அச்சுறுத்தல்கள் தொடர்பிலும் தீர்க்கமான முறையில் எடுத்துரைத்த ஜனாதிபதி, தொற்றுப்பரவலை வெற்றிகரமாக எதிர்கொள்ள, உலக சுகாதார ஸ்தாபனம் வழங்கி வரும் ஒத்துழைப்புக்கும், பாராட்டுகளைத் தெரிவித்தார்.

இதுவரையில், இலங்கையின் மொத்தச் சனத்தொகையில் அரைவாசிக்கும் மேற்பட்டோருக்கு  தடுப்பூசி ஏற்றப்பட்டுள்ளதாகச் சுட்டிக்காட்டிய ஜனாதிபதி, நவம்பர் மாத இறுதிக்குள், 15 வயதுக்கு மேற்பட்ட அனைவருக்கும் தடுப்பூசி ஏற்றுவதற்கான நடவடிக்கைகள் எடுக்கப்பட்டுள்ள என, தரவுகளுடன் எடுத்துரைத்தார்.

இதன்போது, தடுப்பூசி ஏற்றலில் இலங்கை அடைந்துள்ள முன்னேற்றத்துக்கு, பொதுச் செயலாளர், தனது பாராட்டுகளைத் தெரிவித்தார்.

2019ஆம் ஆண்டில் ஜனாதிபதியாகத் தெரிவான தான், பொதுமக்களுக்கு வழங்கிய உறுதிமொழிகளை அவ்வாறே நிறைவேற்றுவதில், கொரோனா தொற்றுப் பரவலானது பெரும் தடையாக இருக்கின்றதெனத் தெரிவித்த ஜனாதிபதி, இருப்பினும், 30 வருட காலமாக நிலவிய யுத்தத்தை முடிவுக்குக் கொண்டுவந்ததன் பின்னர் ஏற்பட்ட இடைநிலைப் பிரச்சினைகளைத் தீர்ப்பதற்காக எடுத்த நடவடிக்கைகள் தொடர்பில் விரிவாகத் தெளிவுபடுத்தினார்.

பாதிக்கப்பட்டோருக்கு நட்டஈடு வழங்கல், காணிகளை மீளக் கையளித்தல் மற்றும் 2009ஆம் ஆண்டில், மஹிந்த ராஜபக்ஷவின் வழிகாட்டலின் கீழ் வடக்கு, கிழக்கு மாகாணங்களில் முன்னெடுக்கப்பட்ட பாரிய அபிவிருத்திகள் மற்றும் வடக்கு மாகாண சபைக்கான உறுப்பினர்களை, ஜனநாயக ரீதியில் தேர்ந்தெடுப்பதற்காக ஏற்படுத்திக்கொடுத்த வாய்ப்பு தொடர்பிலும், ஜனாதிபதி எடுத்துரைத்தார்.

காணாமற்போனோர் தொடர்பில், அரசாங்கம் என்ற ரீதியில் எடுக்கக்கூடிய நடவடிக்கைகளை விரைவில் முன்னெடுப்பதாகவும் மரணச் சான்றிதழ்களை வழங்கும் நடவடிக்கைகளை விரைவுபடுத்துவதாகவும், பொதுச் செயலாளரிளிடம், ஜனாதிபதி தெரிவித்தார்.

பயங்கரவாதச் செயற்பாடுகளுடன் தொடர்புடையவர்கள் என்ற சந்தேகத்தின் பேரில் கைது செய்யப்பட்டிருந்த இளைஞர்களில் பலரை, தான் ஆட்சிக்கு வந்ததன் பின்னர் விடுவித்துள்ளதாக எடுத்துரைத்த ஜனாதிபதி, அவ்வாறு விடுவிக்க முடியாத ஏனையோர் தொடர்பான வழக்கு நடவடிக்கைகள் துரிதப்படுத்தப்பட்டு வருவதாகவும் நீண்ட காலமாகத் தடுப்பிலுள்ள தமிழ் இளைஞர்கள் தொடர்பிலான சட்டச் செயற்பாடுகள் முடிவடைந்த பின்னர், நீண்ட காலம் தடுப்பில் இருந்ததைக் கருத்திற்கொண்டு, ஜனாதிபதியின் பொது மன்னிப்பின் பேரில் அவர்களை விடுவிப்பதற்குத் தான் தயங்கப் போவதில்லை என்றும், பொதுச் செயலாளரிடம் தெரிவித்தார்.

இலங்கைக்குள் மிகவும் பலமான முறையில் ஜனநாயகத்தை நிலைநாட்டுவதே தன்னுடைய இலக்கு என்றும் அதன்படி, போராட்டக்காரர்கள் மீது முன்னரைப் போன்று தடியடி, நீர்த்தாரைத் தாக்குதல் போன்றவற்றை நடத்த, தன்னுடைய ஆட்சியின் கீழ் ஒருபோதும் அனுமதியில்லை என்றும் போராட்டக்காரர்களுக்கென்றே, தன்னுடைய அலுவலகத்துக்கு முன்னால்  தனி இடமொன்று ஒதுக்கப்பட்டுள்ளதென்றும், ஜனாதிபதி தெரிவித்தார்.

நாட்டுக்குள் அபிவிருத்தி மற்றும் நல்லிணக்கத்தை ஏற்படுத்துவதற்காக, சிவில் அமைப்புகளுடன் இணைந்து தான் செயற்படும் விதம் தொடர்பிலும், ஜனாதிபதி கோட்டாபய ராஜபக்ஷ தெளிவுபடுத்தினார்.

இலங்கையின் உள்ளகப் பிரச்சினைகள், நாட்டுக்குள்ளேயே உள்ளகப் பொறிமுறையினூடாகத் தீர்க்கப்பட வேண்டுமென்றும் அதற்காக, புலம்பெயர் தமிழர்களுடனான பேச்சுவார்த்தைக்குத் தான் அழைப்பு விடுப்பதாகவும், ஜனாதிபதி தெரிவித்தார்.

ஐக்கிய நாடுகள் சபையுடன், எப்போதும் மிக நெருக்கமாகப் பணியாற்றத் தயாரென மீண்டுமொருமுறை எடுத்துரைத்த ஜனாதிபதி, நாட்டுக்குள் மீண்டும் பிரிவினைவாதம் ஏற்படப்போவதில்லை என்பதைத் தன்னால் உறுதிப்படத் தெரிவிக்க முடியுமென்ற போதிலும், மதவாதத் தீவிரவாதம் தொடர்பில், அரசாங்கம் என்ற ரீதியில் இலங்கை போன்று ஏனைய நாடுகளும் அவதானமாக இருக்க வேண்டும் எனவும் எடுத்துரைத்தார்.

கொழும்பு நகரின் முக்கிய 03 காணிகளை 99 வருட குத்தகைக்கு வழங்கத் திட்டம்

கொழும்பு நகரிலுள்ள மேலும் பெறுமதிமிக்க 03 காணிகளை 99 வருட குத்தகை அடிப்படையில் முதலீட்டு திட்டங்களுக்கு வழங்குவதற்கான விளம்பரங்கள்  பத்திரிகைகளில் வௌியிடப்பட்டிருந்தன.

நகர அபிவிருத்தி அதிகார சபையினரால் இந்த விளம்பரங்கள் பிரசுரிக்கப்பட்டுள்ளன.

கலப்பு அபிவிருத்தி திட்டத்திற்காக கொழும்பு டி.ஆர். விஜேவர்தன மாவத்தையிலுள்ள 03 காணிகளை வழங்குவதற்கு இதன்மூலம் விலைமனு கோரப்பட்டுள்ளது.

விளம்பரத்தின் படி,
கொழும்பு – 10,  டி.ஆர். விஜேவர்தன மாவத்தையின் இலக்கம் 12 இலுள்ள இலங்கை கண்காட்சி மற்றும் மாநாட்டு மத்திய நிலையம்
இலக்கம் 38 இலுள்ள மக்கள் வங்கி கிளை
இலக்கம் 40 இலுள்ள சதொச கட்டடத் தொகுதி என்பன இந்த திட்டத்திற்காக முன்மொழியப்பட்டுள்ளன.

இலங்கை கண்காட்சி மற்றும் மாநாட்டு மத்திய நிலையம் அமைந்துள்ள காணியின் பெறுமதி 3.7 பில்லியன் ரூபாவாகும்.

மக்கள் வங்கியின் கிளை அமைந்துள்ள காணியின் பெறுமதி 1.3 பில்லியன் ரூபா எனவும் சதொச கட்டடத் தொகுதி அமைந்துள்ள காணியின் பெறுமதி 1.6 பில்லியன் ரூபா எனவும் குறிப்பிடப்பட்டுள்ளது.

இந்த காணிகளில் மேற்கொள்ளப்படவுள்ள திட்டங்களுக்கான யோசனைகளை முன்வைப்பதற்கு ஒரு மாதம் மாத்திரமே வழங்கப்பட்டுள்ளது.

இதேவேளை, செலந்திவ முதலீட்டு திட்டத்தினூடாகவும் வௌிவிவகார அமைச்சு அமைந்துள்ள கட்டடத் தொகுதி, ஹில்டன் மற்றும் க்றேண்ட் ஒரியன்ட் ஹோட்டல்கள் உள்ளிட்ட கொழும்பு நகரின் பெறுமதியான பல சொத்துக்களை முதலீட்டு திட்டங்களுக்கு வழங்குவதற்கான யோசனைகள் முன்வைக்கப்பட்டுள்ளமையும் குறிப்பிடத்தக்கது.

மக்களுக்கு மற்றுமொரு அதிர்ச்சி செய்தி ; பால் மா, கோதுமை மா, சீமெந்து விலைகள் அதிகரிக்கலாம்!

பால் மா, கோதுமை மா மற்றும் சீமெந்து ஆகியவற்றின் விலைகளை எதிர்வரும் தினங்களில் அதிகரிக்க வேண்டிய நிலைமை ஏற்படும் என நுகர்வோர் விவகார இராஜாங்க அமைச்சின் உயர் அதிகாரியொருவர் தெரிவித்துள்ளார்.

நுகர்வோர் விவகார அதிகார சபையின் விலை குழுவினால் நடத்தப்பட்ட கண்காணிப்பின் பிரகாரம், வாழ்க்கைச் செலவுக் குழுவின் அனுமதியுடன் இந்த பொருட்களுக்கான விலையை அதிகரிக்க நேரிடும் என அவர் கூறியுள்ளார். இந்த பொருட்களுக்கான விலை, சர்வதேச சந்தையில் அதிகரித்துள்ள பின்னணியில், குறித்த பொருட்களுக்கான விலையை அதிகரிக்குமாறு நிறுவனங்கள் கடந்த 6 மாத காலமாக கோரியிருந்ததாகவும் அவர் குறிப்பிட்டுள்ளார்.

இந்த விடயம் தொடர்பில் தாம் தொடர்ச்சியாக கலந்துரையாடல்களை நடத்தி வருவதாகவும் அவர் தெரிவித்தார். இந்த நிலையில், வாழ்க்கை செலவுக் குழுவின் இறுதி அனுமதி பெற்றுக்கொள்ளப்பட்டதன் பின்னர், குறித்த பொருட்களுக்கான விலைகள் அதிகரிக்கப்படும் என அவர் குறிப்பிட்டார். இலங்கையில் ஒரு கிலோகிராம் பால் மாவின் விலை 940 ரூபாவாக இருக்கும் போது, சர்வதேச சந்தையில் ஒரு மெற்றிக் தொன் பால் மாவின் விலை 3070 டொலராக காணப்பட்டது என அவர் சுட்டிக்காட்டியுள்ளார்.

எனினும், அதே பால் மா ஒரு மெற்றிக் தொன்னின் தற்போதைய விலை 3700 டொலர் என அவர் குறிப்பிட்டார். இதனால், எதிர்வரும் தினங்களில் குறித்த மூன்று பொருட்களின் விலைகளும் அதிகரிக்கப்படுவதற்கான சாத்தியம் எழுந்துள்ளதாக அந்த அதிகாரி தெரிவித்துள்ளார்.

இதேவேளை அண்மையில் பிறிமா நிறுவனம் ஒரு கிலோ கோதுமை மாவுககான விலையயை 12 ரூபாவால் அதிகரித்தமையும் சிமெந்து பைக்கற் ஒன்றின் விலை 100 ரூபாவால் அதிகரித்தமையும் குறிப்பிடத்தக்கது.

நாட்டில் அரசியல் அழுத்தம் அதிகரித்துள்ளது – முருந்தெட்டுவே ஆனந்த தேரர்

அரசியல் அழுத்தம் எல்லையை மீறியுள்ளதால் சுயாதீன நிறுவனங்களிலும், கூட்டுத்தாபனங்களிலும் நிறுவன பிரதானிகள் பதவி விலகுகின்றனர் என அபயராம விகாரையின் விகாராதிபதி முருந்தெட்டுவே ஆனந்த தேரர் தெரிவித்துள்ளார்.

அபயராம விகாரையில் இடம்பெற்ற ஊடகவியலாளர் சந்திப்பில் கலந்துக்கொண்டு கருத்துரைக்கையில் மேற்கண்டவாறு தெரிவித்துள்ளார்.

அவர் மேலும் குறிப்பிடுகையில்,

அரசாங்கத்தின் செயற்பாடு சிறுபிள்ளைத் தனமாக உள்ளது. 2024 ஆம் ஆண்டு வரை அனைத்தையும் சகித்துக் கொள்ள வேண்டிய நிலை காணப்படுகிறது. நல்லாட்சி அரசாங்கத்தினால் ஏற்பட்ட பாதிப்பிலிருந்து நாடு மீள வேண்டும் என்பதற்காகவே 2019 ஆம் ஆண்டு ஆட்சி மாற்றத்தை ஏற்படுத்த முன்னின்று செயற்பட்டோம்.

மக்களும் பல்வேறு எதிர்பார்ப்புகளுக்கு மத்தியில் ஆட்சி மாற்றத்தை ஏற்படுத்தினார்கள். ஆனால் இன்று அனைவரின் எதிர்பார்ப்பும் பொய்யாக்கப்பட்டுள்ளது. தவறை திருத்திக் கொண்டு அரசாங்கம் சிறந்த முறையில் செயற்பட வேண்டும் என ஆலோசனை வழங்கினோம்.

எமது ஆலோசனைகளுக்கு மதிப்பளிக்கப்படவில்லை. தற்போது கடுமையாக விமர்சிக்கிறோம் அதனையும் அரசாங்கம் பொருட்படுத்தவில்லை. ஆகவே இனி செய்வதற்கு ஒன்றுமில்லை. 2024 ஆம் ஆண்டு வரை அனைத்தையும் சகித்துக் கொண்டிருக்கத் தீர்மானித்துள்ளோம்.

ஆட்சி மாற்றத்திற்கு முன்னின்று செயற்படுவதால் மக்கள் வினவும் கேள்விகளுக்குப் பதிலளிக்கக் கடமைப்பட்டுள்ளோம் எனத் தெரிவித்துள்ளார்.

இலங்கையில் நிறுவ முயற்சிக்கப்படும் தற்காலிக பொறிமுறைகளை ஏற்க முடியாது: மைச்சர் பேராசிரியர் ஜீ.எல்.பீரிஸ்

மனித உரிமைகளுக்கான உயர்ஸ்தானிகர் அலுவலகத்தினால் நிறுவ முயற்சிக்கப்படும் தற்காலிகமான பொறிமுறைகளை இலங்கையால் ஏற்றுக்கொள்ள முடியாது என வெளிவிவகார அமைச்சர் பேராசிரியர் ஜீ.எல். பீரிஸ் தெரிவித்துள்ளார்.
இந்தப் பொறிமுறையானது ஐநா.சாசனத்தின் ஆவணங்களுக்கு ஏற்ப அமையவில்லை என்றும் அவர் கூறியுள்ளார்.
பொதுநலவாய அமைப்பின் பொதுச் செயலாளர் பட்ரிசியா ஸ்கொட்லேன்ட்டுடன் வீடியோ ஊடாக நடத்தப்பட்ட கலந்துரையாடல் ஒன்றிலேயே ஜீ.எல்.பீரிஸ் இவ்வாறு தெரிவித்துள்ளார்.
நியூயோர்க் நகரில் இருந்து வெளிவிவகார அமைச்சர் இந்தக் கலந்துரையாடலில் கலந்துகொண்டிருந்தார்.
பொதுநலவாய அமைப்பின் ஸ்தாபக உறுப்பு நாடு என்ற வகையில் இலங்கை முன்னெச்சரிக்கையாகவும், அமைப்பின் மதிப்புக்கள், கொள்கைகள் மற்றும் குறிக்கோள்களுக்கு இணங்க அர்ப்பணிப்புடன் செயற்படுவதாக அமைச்சர் பீரிஸ் இதன்போது தெரிவித்துள்ளார்.
பொதுநலவாய நாடுகளுடன் வணிகம், கல்வி, தொழிற்பயிற்சி மற்றும் பருவநிலை மாற்றம் உள்ளிட்ட பல துறைகளிலான ஒத்துழைப்பை இலங்கை மேலும் எதிர்பார்ப்பதாக அவர் குறிப்பிட்டுள்ளார்.
இதேவேளை உள்ளூர் நிறுவனங்கள் தமது ஆணைகளை நிறைவேற்றுவதற்குப் போதுமான அமைப்புக்கள் தேவைப்படுகின்றன. இந்த நிறுவனங்களால் மேற்கொள்ளப்படும் பணிகளை வெளிப்புற அமைப்புக்களால் மாற்றவோ அல்லது கையகப்படுத்தவோ முடியாது என்றும் கூறியுள்ளார்.
இந்நிலையில் வர்த்தகம், விளையாட்டு, இளைஞர்கள் மற்றும் வன்முறைத் தீவிரவாதத்தை எதிர்த்தல் உள்ளிட்ட பல்வேறு துறைகளிலான இலங்கையின் தொடர்ச்சியான ஒத்துழைப்பை பொதுநலவாய அமைப்பு பாராட்டுவதாக பொதுச்செயலாளர் ஸ்கொட்லேன்ட் இதன்போது தெரிவித்துள்ளதாக வெளிவிவகார அமைச்சின் ஊடகப் பிரிவு குறிப்பிட்டுள்ளது.