Category: செய்திகள்

பயங்கரவாத தடைச்சட்டத்தை நீக்கக்கோரி கூட்டமைப்பின் பராளுமன்ற உறுப்பினர் சந்திக்குச் சந்தி மேசை வைத்து கடைவிரிக்கின்ற செய்திகள்தான் இப்போது தினமும் வந்தகொண்டிருக்கின்றன.

இந்தக் கொடிய சட்டம் நீக்கப்படவேண்டும் என்பதில் யாருக்கும் கருத்து வேறுபாடு இருக்கும் என்று நினைக்கவில்லை.

அது நீக்கப்பட்டால் இன்று சிறையில் இருக்கும் பல கைதிகள் வெளியே வந்துவிடுவார்கள். சுமந்திரனின் இந்த முயற்சி பாராட்டுக்குரியதுதான்.

இன்று இருக்கும் ராஜபக்ஷ அரசுக்கு இந்தச் சட்டத்தை நீக்குவதற்கு விருப்பம் இருக்கும் என்று யாரும் நம்பப்போவதில்லை.

ஆனால், இதற்கு முன்னர் ஆட்சியிலிருந்த நல்லாட்சி அரசில் இந்தச் சட்டத்தை நீக்குவதற்கு அனைவரும் விருப்பம் தெரிவிக்காவிட்டாலும், அதில் மாற்றங்களைச் செய்யவேண்டும் என்று அனேகமாக எல்லாருமே சொன்னார்கள். சர்வதேச நியமங்களுக்கு அமைய இந்தச் சட்டத்தை மாற்றவேண்டும் என்ற நிலையிலேயே அன்றைய நல்லாட்சி அரசில் அங்கம்வகித்த பல்வேறு கட்சிகளும் கருத்து வெளியிட்டு வந்தன.

அப்போது, அந்தச் சந்தாப்பத்தை பயன்படுத்தி, அதனை மாற்றியமைக்கவாவது நாம் முயன்றிருக்கலாம். அதிலும், தங்களையே சட்ட மேதைகளாகவும், ஜனநாயக காவலர்களாகவும் காட்டிக்கொண்டவர்கள் பலர் அந்த ஆட்சியில் யானைப் பலத்துடன் இருந்தார்கள். அப்போதெல்லாம் அதுகுறித்து எந்த அக்கறையும் இல்லாம் இருந்தவர்கள் இப்போது எதற்காக இப்படி கிராமம் கிராமமாக போகிறார்கள் என்று இந்த ஊர்க்குருவி யோசித்துக்கொண்டிருந்தபோது, தென்னிலங்கை அரசியல்வாதி ஒருவர் தொடர்புகொண்டு அந்த விடயம் குறித்து கேள்வி எழுப்பினார்.

நல்லாட்சி அரசாங்கம் அமைவதற்கு தீவிரமாக உழைத்தவர்களில் அவரும் ஒருவர். அந்தக் காலத்தில் நமது சுமந்திரனுடன் நெருக்கமாக பணியாற்றியவர்.

இந்த ஊர்க்குருவிக்கு எழுந்த சந்தேகம்தான் அவருக்கும் வந்திருக்கின்றது என்பதை அறிந்து கொள்ள முடிந்தது.

அவரும் கேட்டார், நாங்கள் எல்லோரும் முற்றாக நீக்குவதற்கு தயாராக இருக்கவில்லை என்றாலும், சர்வதேச நியமங்களுக்கு அமைய அதனை மாற்றியமைக்க தயாராகத்தானே இருந்தோம், அப்போது அதனை முன்னின்று செய்திருக்கவேண்டியவர், அப்போது செய்யாமல் இருந்துவிட்டு இப்போது, அதுவும் தெற்கில் ராஜபக்ஷக்கள் அரசியல் இறங்கு முகத்தில் இருக்கும்போது, அவர் இந்த விடயத்தை கையில் எடுத்திருப்பது அவர்களுக்கல்லவா இங்கு பலம் சேர்க்கிறது என்று கேட்டார்.

இந்தச் சட்டம் முற்றாக நீக்கப்படவேண்டும் என்பது நமது விருப்பம். அப்படியிருக்கையில், அதற்காக உழைக்கும் ஒருவர்பற்றி நாமும் குறைகூற முயாதல்லவா?

நான் சொன்னேன்:

“முன்னர் அவர் கனவான் அரசியல் செய்தவர். இவ்வாறு வீதியில் இறங்கியெல்லாம் தன்னால் அரசியல் செய்யமுடியாது என்று நினைத்துக்கொண்டிருந்தவர். ஆனால் இப்போது அப்படியல்ல, தன்னாலும் வீதியில் இறங்கி அரசியல் செய்யலாம் என்று நினைத்து இறங்கிப் பார்த்தார். தன்னாலும் முடியும் என்று தெரிந்தபோது, இப்போது எல்லா விடயங்களையும் கையில் எடுத்துக்கொண்டு வீதிக்கு இறங்கியிருக்கிறார் போலும்’’ என்று அவருக்காக வாதிடவேண்டியதாயிற்று.

அது சரிதான், இப்போது அரசாங்கம் இந்த பயங்கரவாத தடைச்சட்டத்தை திருத்துவதற்காக திருத்தச் சட்டமூலம் ஒன்றை பாராளுமன்றில் தாக்கல் செய்திருக்கின்றதே. அதனை வழக்கம்போல சட்ட சவாலுக்கு உட்படுத்துவதை விட்டுவிட்டு, அவர் வீதிக்கு இறங்கியிருப்பதுதான் நமக்குள் கேள்வியை உருவாக்குகின்றது என்றார் அவர்.

சுமந்திரனின் சகபாடியான ஒரு பெண் சட்டத்தரணி, இந்த புதிய சட்டமூலத்தை சவாலுக்கு உட்படுத்தி, நீதிமன்றப் படிகளில் ஏறியிருக்கிறார். சுமந்திரன் வீதியில் இறங்கியிருக்கிறார் என்று அவருக்கு விளக்கமளித்தேன்!

அந்த சட்டத்தை நீக்கவேண்டும் என்று மேற்குலகும், குறிப்பாக ஐரோப்பிய ஒன்றியமும் இலங்கைக்கு அழுத்தம்கொடுக்கும்போது, அதனை பேசுபொருளாக்கினால் ராஜபக்ஷக்கள் தெற்கில் அரசியல் செய்ய அதுவும் உதவும் என்ற வாதமும் நிராகரிக்கக்கூடியது இல்லைத்தான்.

அதற்காக நாம் இந்தச் சந்தர்ப்பத்தை பயன்படுத்துவதும் நல்லதுதானே!

– ஊர்க்குருவி

கொழும்பு மாநகர முதல்வர் ரோசி சேனாநாயக்கா இன்றைய தினம் யாழ்ப்பாணம் மநகர சபைக்கு விஜயம் மேற்கொண்டார்.

சிநேக பூர்வ விஜயத்தில் கொழும்பு மாநகர முதல்வரை யாழ்ப்பாணம் மாநகர சபையின் ரெலோ பிரதி முதல்வர் து.ஈசன் வரவேற்றார்.

யாழ்ப்பாணம் மாநகர சபையின் பிரதான நூலகம் 1959ஆம் ஆண்டு அமைக்கப்பட்ட காலம் முதல் இன்றைய வரையான வரலாற்றையும் தெரிவித்து நூலகத்தின் தற்போதைய பணிகளை நேரில் காண்பித்தனர்.

இதன்போது யாழ்ப்பாணம் பிரதி முதல்வருடன் மாநகர ஆணையாளர் ரி.ஜெயசீலனும் உடன் இருந்து கொழும்பில் இருந்து வந்தவர்களிற்கு வழிகாட்டினார்.

‘ஈழநாடு’ குழுமத்தின் தலைவர் குகநாதன், தமிழ் தேசிய மக்கள் முன்னணியினரைப் பார்த்து அடிக்கடி சொல்லுவார், இவர்கள் பிள்ளையைப் பெறவும் விரும்புகின்றார்கள். அதேவேளை, கன்னித் தன்மையுடன் இருக்கவேண்டும் என்றும் நினைக்கின்றார்கள் என்று.

அவர்கள் கொள்கையில் உறுதியாக இருப்பதால், அதற்காக கன்னியாகவே இருக்கவேண்டும் என்பது கொள்கை என்றால் அவர்களால் எந்தக் காலத்திலுமே பிள்ளை பெற்றுக்கொள்ளமுடியாது. அவர்கள் பிள்ளையைப் பெறவேண்டும் என்றால் சில விட்டுக்கொடுப்புக்களைச் செய்யத்தான்வேண்டும் என்பது அவரது கருத்தாக இருக்கவேண்டும்.

சில வருடங்களுக்கு முன்னர் சங்கிலியன் பூங்காவில் நடந்த முன்னணியின் கூட்டம் ஒன்றில் பேசிய ஒருவர், அவர்களின் தலைவரை பிரபாகரனுடன் ஒப்பிட்டு பேசியது பலருக்கும் சிரிப்பிற்கிடமாக இருந்தபோதிலும், முன்னணியின் தலைவர் தனது கொள்கையில் உறுதியாக இருப்பதை வைத்துத்தான் அவர் அப்படிச் சொல்கிறார் என்று நினைத்தவர்களும் உண்டு.

ஒருநாடு இரு தேசம் என்ற தமது கொள்கையில் அவர்கள் உறுதியாக இருப்பது பாராட்டுக்குரியதுதான், அதற்காக அதேகொள்கையைத்தான் விடுதலைப் புலிகளும் கொண்டிருந்தார்கள் என்று முன்னணியின் செயலாளர் செல்லையா கஜேந்திரன் இப்போது தெரிவித்திருப்பதைப் பார்க்கின்றபோது, அவர்களும் இப்போது மற்றைய அரசியல்வாதிகளுக்கு சளைத்தவர்கள் அல்லர் என்பதை நிரூபித்திருக்கின்றார்கள்.

விடுதலைப் புலிகள் ஆயுதத்தில் மாத்திரமே நம்பிக்கை கொண்டிருக்கின்றனர். அவர்கள் அரசியல் தீர்வு ஒன்றிற்கு எந்தக் கட்டத்திலும் வரப்போவதில்லை என்று, அரசாங்கம் சர்வதேசத்தை புலிகளுக்கு எதிராக அணிதிரட்ட எடுத்த சதியை முறியடிக்க, புலிகள் தமிழீழத்திற்கு நிகரான தீர்வை ஏற்றுக்கொள்ள தயாராக இருப்பதாகக் கூறியே பேச்சுவர்த்தைக்கு முன்வந்திருந்தார்கள் என்பது தெரிந்ததுதான். ஆனால், அதற்காக அவர்கள் தனிநாட்டுக்காக போராடவில்லை, தமிழர் தேசத்தை அங்கீகரிக்கவே போராடினார்கள் என்று அவர் கூறியிருப்பது புலிகள் மீதான சேறடிப்பு என்பதை புரிந்துகொள்ள அதிகம் ஆராய்ச்சி செய்யவேண்டியதில்லை.

தனது கருத்து, சர்ச்சையை ஏற்படுத்திய பின்னர், அதுகுறித்து விளக்கமளித்த கஜேந்திரன், பின்வருமாறு தெரிவித்திருக்கிறார்:

“…விடுதலைப் புலிகள் தமிழீழத்திற்காக போராடிவந்த நிலையில், அரசுடன் நேரடியாக இடம்பெற்ற பேச்சுக்களிலும் சர்வதேச மத்தியஸ்தத்துடன் இடம்பெற்ற பேச்சுக்களின்போதும் தமிழ்த் தேசத்தின் இருப்பைப் பாதுகாக்கக்கூடிய தீர்வை அரசுத் தரப்பு முன்வைத்தால் பரிசீலிக்கத் தயாராக இருந்தார்கள் என்ற உண்மையை வெளிப்படுத்த முற்பட்ட வேளையில், நான் கூறிய கருத்துக்களானவை, விடுதலைப் புலிகள் தனிநாட்டுக்காக போராடவில்லை என தவறாக அர்த்தப்படுத்துவதற்கு ஏதுவாக அமைந்திருந்தது. தெளிவற்ற வகையில் அந்தக் கருத்து வெளிவந்தமைக்காக நான் மனம் வருந்துகின்றேன்.”

மேற்கண்டவாறுதான் தனது மன்னிப்பு அறிக்கையில் கஜேந்திரன் தெரிவித்திருக்கின்றார்.

‘டான் ரிவி’யில் சுரேஸ் பிரேமச்சந்திரனுடனான நிகழ்ச்சியில் சுரேஸ், “2009 வரை தனி நாட்டுக்கான யுத்தம் ஒன்று நடக்கிறது. தனி நாட்டுக்கான யுத்தம் நடக்கும்போது எல்லோருக்கும் ஓர் எதிர் பார்ப்பு இருந்தது.” என்று கூறிக்கொண்டிருந்தபோது குறுக்கிட்ட கஜேந்திரன் எம். பி., “தனிநாட்டுக்கான யுத்தம் அல்ல, தமிழ்த் தேசம் அங்கீகரிக்கப்பட வேண்டும் என்பதற்கான யுத்தம்” என்றார். அத்துடன், “இவர்கள் (சுரேஸ்), அரசாங்கம் புலிகளை அழித்தது சரியென்று சொல்லப் பார்க்கிறார்” என்றும் கூறினார். இதன்மூலம் அவர் சொல்ல வருவது, புலிகள் தனிநாடு கேட்டுத்தான் போராடினார்கள் என்றால் அது புலிகளை அரசு அழித்தது சரி என்றாகிவிடும். அப்படியல்ல, அவர்கள் தமிழ் தேசத்தை அங்கீகரிக்கவே போராடினார்கள் என்கிறார் கஜேந்திரன்.

அவரது கருத்துக்கும், மறுப்பு அறிக்கைக்கும் எந்த தொடர்பும் இருப்பதாக தெரியவில்லை. புலிகள், பேச்சுவார்த்தை மேசையில் தனிநாட்டுக்கு நிகரான தீர்வை முன்வைத்தால் பரிசீலிக்க தயாராக இருக்கிறோம் என்று சொன்னார்களே தவிர, தமிழ்த் தேசத்தின் இருப்பைப் பாதுகாக்கக்கூடிய தீர்வை பரிசீலிக்கத் தாயராக இருந்தார்கள் என்பது சரியானதல்ல.

ஒருவர் தனது மனதில் என்ன நினைக்கின்றார் என்பதை அறியவேண்டும் என்றால், அவரை நன்றாக மதுஅருந்த வைத்துவிட்டு அவரைக் கிளறினால் அடிமனதில் இருப்பதை அறிந்துகொள்ளலாம் என்பார்கள். மதுபோதை ஊட்டுவதும், ஒருவரை கோபப்படுத்துவதும் ஒன்றானதுதான். ஒருவரை கோபப்படுத்துவதாலும் அவரின் அடிமனதை அறியலாம் என்பார்கள்.

கோபப்படுத்தி, சுரேஸ் அவரின் ஆழ்மனதை வெளிச்சத்திற்கு கொண்டு வந்திருக்கிறார்.

– ஊர்க்குருவி

மன்னார் திருக்கேதீஸ்வர ஆலயத்தின் மகா சிவராத்திரி நிகழ்வுகளுக்காக நாட்டின் சகல பாகங்களில் இருந்தும் பக்தர்கள் வருகை தரவுள்ள நிலையில் பக்தர்களின் நலனை கருத்தில் கொண்டு சகல ஏற்பாடுகளும் முன்னெடுக்கப்பட்டுள்ளதாக மன்னார் மாவட்ட அரசாங்க அதிபர் திருமதி ஏ.ஸ்ரான்லி டிமெல் தெரிவித்துள்ளார்.

எதிர்வரும் 1ஆம் திகதி மன்னார் திருக்கேதீஸ்வர ஆலயத்தின் மகா சிவராத்திரி நிகழ்வுகள் இடம்பெறவுள்ள நிலையில் முன் ஆயத்த நடவடிக்கைகள் தொடர்பில் ஆராயும் அவசர கலந்துரையாடல் வெள்ளிக்கிழமை மன்னார் மாவட்டச் செயலகத்தில் இடம்பெற்றது.

திருக்கேதீஸ்வர ஆலய பரிபாலகர் சபை, திணைக்களத் தலைவர்கள் என பலரும் குறித்த கலந்துரையாடலில் கலந்து கொண்டிருந்தனர்.

இதன்போது கருத்து வெளியிட்டுள்ள மாவட்ட அரசாங்க அதிபர் திருமதி ஏ.ஸ்ரான்லி டி மெல், “கடந்த வருடத்தை விட இவ்வருடம் நாட்டின் சகல பாகங்களில் இருந்தும் பக்தர்கள் வருகை தர அனுமதி வழங்கி உள்ளோம்.

வருகை தருகின்ற பக்தர்கள் முழுமையாக தடுப்பூசியை பெற்றுக் கொண்டவர்களாக இருக்க வேண்டும். தடுப்பூசியை பெற்றுக்கொண்டமைக்கான ஆதாரமாக தடுப்பூசியை அட்டையை அல்லது தடுப்பூசி அட்டையினை கையடக்கத் தொலைபேசியில் புகைப்படம் எடுத்து கொண்டு வர வேண்டும்.

கடமையில் ஈடுபடுத்தப்படும் பொது சுகாதார பரிசோதகர்கள் நுழைவாயிலில் பரிசீலனை செய்வார்கள். இதன்போது காண்பிக்க வேண்டும். திருக்கேதீஸ்வர ஆலயத்திற்கு வருகை தருகின்ற சகல பக்தர்களும் சுகாதார விதிமுறைகளை உரிய முறையில் கடைபிடிக்க வேண்டும்.

அதற்கான சகல ஒழுங்குகளும் சுகாதார திணைக்களத்தினால் மேற்கொள்ளப்பட்டுள்ளது. உணவு வழங்குவதற்கான வியாபார நிலையங்கள் அமைக்கப்படும். ஆனால் உணவை பெற்றுக் கொண்டு சென்று உண்ண வேண்டும்.

உணவகங்களில் இருந்து சாப்பிட முடியாது. பாலாவி தீர்த்தத்தில் இறங்கி குளிப்பதற்கு சுகாதார துறையினரால் அனுமதி வழங்கப்படவில்லை. ஆனால் பக்தர்கள் பாலாவி தீத்தத்தை பெற்றுக் கொள்வதற்கு அங்கு கடமையில் இருக்கும் தொண்டர்கள் நீரை அள்ளி பக்தர்களுக்கு கொடுக்க நடவடிக்கை மேற்கொள்ளப்பட்டுள்ளது.

ஆலயத்திற்கு வர முடியாத பக்தர்களுக்காக தொலைக்காட்சிகளில் நேரடியாக ஒளிபரப்பு செய்ய நடவடிக்கைகள் எடுக்கப்பட்டு வருகிறது. தனியார் மற்றும் அரச வாகனங்களின் போக்குவரத்து நடவடிக்கைகளுக்காக தனித்தனி இடங்கள் ஒதுக்கப்பட்டுள்ளது.

மேலும் ஏனைய அவசிய நடவடிக்கைகள் முன்னெடுக்கப்பட்டுள்ளன.“ எனத் தெரிவித்துள்ளார்.

இந்திய வம்சாவளி மலையக மக்களின் அரசியல் ஆவணம் எதிர்வரும் 21 ஆம் திகதி கொழும்பில் இறுதி வடிவம் பெறும் என தமிழ் முற்போக்கு கூட்டணியின் தலைவர், பாராளுமன்ற உறுப்பினர் மனோ கணேசன் தெரிவித்துள்ளார்.

இந்த விடயம் தொடர்பில் பாராளுமன்ற உறுப்பினர் மனோ கணேசன் அறிக்கை ஒன்றை வௌியிட்டுள்ளார்.

கண்டி சமூக அபிவிருத்தி மன்றம், சமூக செயற்பாட்டாளர் கௌதமன் பாலச்சந்திரனின் ஏற்பாட்டில் இந்திய வம்சாவளி மலையக மக்களின் அரசியல் ஆவணம் தயாரிக்கப்பட்டு வருவதாக அந்த அறிக்கையில் குறிப்பிடப்பட்டுள்ளது.

ஜனாதிபதி கோட்டாபய ராஜபக்ஸ, இந்திய பிரதமர் நரேந்திர மோடி, இலங்கையின் எதிர்க்கட்சித் தலைவர் சஜித் பிரேமதாச உள்ளிட்ட கட்சித் தலைவர்கள், தமிழக முதல்வர் மு.க.ஸ்டாலின், தமிழகக் கட்சிகளின் தலைவர்கள், பிரிட்டன், அமெரிக்கா, ஐரோப்பிய ஒன்றியம் உள்ளிட்ட சர்வதேச நாட்டு அரசுகள், சர்வதேச நிறுவனங்களுக்கும் இந்த ஆவணத்தை சமர்ப்பிக்க தீர்மானிக்கப்பட்டுள்ளது.

புதிய அரசியல் அமைப்பை தயாரிக்கும் நடவடிக்கையில் இலங்கை அரசாங்கம் ஈடுபட்டு வரும் நிலையில், மலையக மக்கள் தொடர்பாக விரிவுபடுத்தப்பட்ட நிலைப்பாட்டு கோரிக்கைகளை அரசுக்கு அறிவித்து, பேச்சுவார்த்தைகளில் ஈடுபட உத்தேசித்துள்ளதாகவும் பாராளுமன்ற உறுப்பினர் மனோ கணேசன் விடுத்துள்ள அறிக்கையில் குறிப்பிடப்பட்டுள்ளது.

இந்திய வம்சாவளி மலையக மக்கள் தொடர்பில் இலங்கை அரசுடன், இந்திய அரசுக்கும் காணப்படுகின்ற கடப்பாடுகள் நல்லெண்ண அடிப்படையில் நிறைவேற்றப்பட வேண்டும் என அந்த அறிக்கையில் தெரிவிக்கப்பட்டுள்ளது.

பிரித்தானிய மகாராணியாரின் அரசாங்கத்திற்கும் மலைய மக்கள் தொடர்பில் காணப்படும் பெரும் கடட்பாட்டை எடுத்துக்கூறி, பேச்சுவார்த்தைகளில் ஈடுபட தீர்மானிக்கப்பட்டுள்ளதாக தமிழ் முற்போக்கு கூட்டணியின் தலைவர், பாராளுமன்ற உறுப்பினர் மனோ கணேசன் தனது அறிக்கையினூடாக சுட்டிக்காட்டியுள்ளார்.