Category: பிரதான செய்திகள்

கொவிட் அபாயம் காரணமாக இலங்கை உட்பட பல நாடுகளுக்கு விதிக்கப்பட்ட பயணத் தடையை நீக்க ஜப்பானிய அரசு நடவடிக்கை எடுத்துள்ளது.

அதன்படி, நாளை (20) முதல் இலங்கை, இந்தியா, மாலைத்தீவு, நேபாளம், பங்களாதேஷ் மற்றும் ஆப்கானிஸ்தான் ஆகிய நாடுகளில் இருந்து வருபவர்களுக்கு விதிக்கப்பட்ட தடை நீக்கப்படுவதாக ஜப்பான் அரசு அறிவித்துள்ளது.

டெல்டா கொவிட் திரிபு அவதானத்தை கருத்திற் கொண்டு கடந்த ஜூன் மாதம் ஜப்பானிய அரசால் இவ்வாறு தடை விதிக்கப்பட்டது.

எவ்வாறாயினும், சம்பந்தப்பட்ட நாடுகளில் இருந்து வருபவர்கள் விமான நிலையத்தில் கொவிட் பரிசோதனைக்கு மேலதிகமாக மூன்று நாள் தனிமைப்படுத்தலுக்கு உட்படுத்தப்பட வேண்டும் என்று ஜப்பானிய அரசாங்கம் அறிவித்துள்ளது.

கொவிட் தொற்று நோய்க்கான சிவப்பு பட்டியலில் இருந்து இலங்கையை நீக்க பிரிட்டன் கடந்த தினம் தீர்மானித்திருந்தது.

எதிர்வரும் 22 ம் திகதி முதல் இலங்கையை சிவப்பு பட்டியலில் இருந்து நீக்க பிரிட்டன் முடிவு செய்துள்ளதாக தெரிவிக்கப்படுகிறது.

நாட்டில் தற்போது பால்மாவிற்கு பாரிய தட்டுப்பாடு ஏற்பட்டுள்ளது. சர்வதேச சந்தையில் அதிகரித்த விலை மற்றும் இறக்குமதி செலவு அதிகரிப்பு இலங்கை ரூபாவின் வீழ்ச்சி என பல்வேறு காரணங்களால் பால்மா நிறுவனங்கள் விலை அதிகரிப்பை கோரியிருந்தன.

எனினும் அரசாங்கம் விலை அதிகரிப்புக்கு அனுமதி வழங்காத நிலையில் நாட்டில் பால்மாவுக்கு தட்டுப்பாடு ஏற்பட்டிருந்தது.

இந்த நிலையில் உள்நாட்டு சந்தையில் பால்மா 400 கிராம் ஒன்றின் விலையை 200 ரூபாவினால் அதிகரிக்க நிதியமைச்சு அனுமதி வழங்கியுள்ளதாக தகவல்கள் வெளியாகியுள்ளன.

பால்மா உற்பத்தி நிறுவனங்களின் பிரதிநிதிகளுக்கும், நிதியமைச்சருக்கும் இடையே நடந்த சந்திப்பில் இந்த இணக்கம் வெளியிடப்பட்டிருப்பதாக தெரிவிக்கப்படுகின்றது. ஏற்கனவே 400 கிராம் பால்மா பக்கற் ஒன்றின் விலை 380 ரூபாவிற்கு விற்பனை செய்யப்பட்டமை குறிப்பிடத்தக்கது.

வெலிக்கடை மற்றும் அனுராதபுரம் சிறைச்சாலையில் இதுவரை சிசிடிவி கெமராக்கள் இதுவரை பொருத்தப்படவில்லை என சிங்கள ஊடகம் ஒன்று நடத்திய தேடுதலில் கண்டுபிடிக்கப்பட்டுள்ளது.

வெலிக்கடை சிறைச்சாலையில் சிறை மருத்துவமனை, மகளிர் சிறை, கொழும்பு விளக்கமறியல் சிறை மற்றும் மெகசின் சிறை , கொழும்பு சிறை வளாகத்திலேயே சிசிடிவி அமைந்துள்ளன.

வெலிக்கடை மற்றும் அனுராதபுரம் சிறைச்சாலையில் சிசிடிவி கெமராக்கள் இல்லை என்பது அதிர்ச்சியை ஏற்படுத்தியுள்ளது.

இந்த சிறைகளில் சிசிடிவி கெமராக்களை நிறுவுவதற்கான முதற்கட்ட பணிகள் நடந்து வருகின்றன.

பணியை முடிக்க இன்னும் மூன்று மாதங்கள் ஆகும் என்று சிறைத்துறை கூறியது.

மேலும், அனுராதபுரம் சிறைச்சாலையில் சிசிடிவி கெமராக்கள் பொருத்த இன்னும் முடிவு செய்யப்படவில்லை என்றும் குறிப்பிடப்பட்டுள்ளது.

இதேவேளை, சிறைச்சாலைகள் மறுசீரமைப்பு முன்னாள் இராஜாங்க அமைச்சர் லோஹான் ரத்வத்த மது போதையில் வெலிக்கடை மற்றும் அனுராதபுரம் சிறைச்சாலைக்குள் நுழைந்து கைதிகளை அச்சுறுத்தியதாக குற்றம் சுமத்தப்படுகின்றது.

எனினும், இந்த குற்றச்சாட்டை  லோஹான் ரத்வத்த நிராகரிப்பதாக கூறியிருந்தார். மேலும், சிறைக்குள் அவருக்கு எதிராக சதித்திட்டம் தீட்டப்பட்டு வருவதாகவும் கூறினார்.

இந்த சம்பவம் குறித்து சிறைத் துறை ஏற்கனவே சிறப்பு விசாரணையைத் தொடங்கியுள்ளது.

இது தொடர்பில், முதலில் அனுராதபுரம் சிறைச்சாலையின் அதிகாரிகள் மற்றும் கைதிகளிடம் இருந்து வாக்குமூலம் பெறப்பட்டதாக சிறைத்துறை ஆணையர் கூறினார்.

அநுராதபுரம் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகளை படுகொலை செய்வதற்கான சூழ்ச்சியுடனேயே லொஹான் ரத்வத்த சிறைக்கு வந்திருப்பார் என்ற சந்தேகம் தற்போது ஏற்பட்டிருப்பதாக ஐக்கிய மக்கள் சக்தியின் பாராளுமன்ற உறுப்பினர் மனோ கணேசன் தெரிவித்துள்ளார்.

அநுராதபுரம் சிறையிலுள்ள தமிழ்க் கைதிகளை சந்திக்க அவர் இன்றைய தினம் சென்றபோது சிறைக்குள் பிரவேசிக்க அதிகாரிகள் அனுமதி மறுத்துள்ளனர்.

இருந்த போதிலும் சபாநாயகர் மஹிந்த யாப்பா அபேவர்தனவிடம் குறித்த பாராளுமன்ற உறுப்பினர்கள் முறையிட்டதன் பின்னர் சபாநாயகரது பணிப்புரைக்கமைய, அவர்கள் உட்பிரவேசிக்க அனுமதி அளிக்கப்பட்டுள்ளது.

கைதிகளுடன் சந்திப்பை நடத்திய பின்னர் அங்கிருந்து திரும்பிய மனோ கணேசன் ஊடகங்களிடம் குறித்த சந்தேகத்தை வெளிப்படுத்தியுள்ளார்.

தமிழ் அரசியல் கைதிகளை பார்வையிடுவதற்கு பாராளுமன்ற உறுப்பினர்களான மனோகணேசனுடன்காவிந்த ஜயவர்தன மற்றும் ரோஹண பண்டார ஆகியோர் சிறைக்குச் சென்றிருந்தமை குறிப்பிடத்தக்கது

சிறைச்சாலைகள் மறுசீரமைப்பு முன்னாள் இராஜாங்க அமைச்சர் லொஹான் ரத்வத்த, மதுபோதையில் அநுராதபுரம் சிறைச்சாலைக்குச் சென்று, தமிழ் அரசியல் கைதிகளை துப்பாக்கி முனையில் மிரட்டியதுடன், மண்டியிட வைத்த சம்பவம் பெரும் அதிர்வலைகளை ஏற்படுத்தியிருந்தது.

அனுராதபுரத்தில் தடுத்து வைக்கப்பட்டுள்ள தமிழ் அரசியல் கைதிகள் அனைவரினதும் பாதுகாப்பை உறுதிப்படுத்துமாறு தமிழ்த் மக்கள் தேசிய கூட்டணியின் பொதுச் செயலாளரும் முன்னாள் பாராளுமன்ற உறுப்பினருமான சிவசக்தி ஆனந்தன் பகிரங்கமாக கோரிக்கை விடுத்துள்ளார்.

அவர் இன்று (18) விடுத்துள்ள ஊடக அறிக்கையிலேயே இதனைக் குறிப்பிட்டுள்ளார்

மேலும் அவ் ஊடக அறிக்கையில் தெரிவிக்கப்பட்டுள்ளதாவது,

கடந்த ஞாயிற்றுக்கிழமை மதுபோதையில் அனுராதபுரம் சிறைச்சாலைக்குள் தனது சகபாடிகளுடன் பிரவேசித்த விடயதானத்திற்கு பொறுப்பாகவிருந்த இராஜாங்க அமைச்சர் லொஹான் ரத்வத்த தமிழ் அரசியல் கைதிகள் அனைவரையும் முழந்தாளிடச் செய்து இருவரை மிகமோசமாக அச்சுறுத்தியுள்ளார்.

அத்துடன் காலணிகளை நாக்கால் சுத்தம் செய்யுமாறு மனித விழுமியங்களுக்கு முற்றிலும் முரணான மிலேச்சத்தனமான செயற்பாடுகளை முன்னெடுத்திருப்பதாகவும் குரலற்றவர்களுக்கான குரல் அமைப்பின் தலைவர் கோமகன் குறிப்பிட்டிருக்கின்றார்.

இவ்விதமான செயற்பாடுகள் இந்த நாட்டில் சிறுபான்மையினத் தேசிய இனங்களை தற்போது ஆட்சியில் உள்ளவர்கள் எவ்வாறு நடத்துகின்றார்கள் என்பதை சர்வதேசத்திற்கு வெளிச்சம் போட்டுக் காட்டியுள்ளது. ஆகவே, இத்தகைய குரூரமான மனோநிலை கொண்டவர்களிடத்தில் நீதியை, நியாயத்தினை எதிர்பார்க்க முடியுமா என்பதும் அப்பட்டமாக வெளியாகியுள்ளது.

தற்போது இராஜாங்க அமைச்சர் சிறைச்சாலை விடயதானத்திலிருந்து மட்டும் பதவியில் இருந்து இராஜினாமாச் செய்துள்ளார். இந்த செயற்பாட்டை அரசாங்கம் குறித்த விடயத்திற்கான பொறுப்புக்கூறலாக படம் காட்டுவதற்கு முயற்சிக்கின்றது.

மேலும், சிறைச்சாலை நிர்வாகம் இவ்விதமான சம்பவம் ஒன்றே நடைபெறவில்லை என்கிறது. இராஜாங்க அமைச்சர் சிறைக்குச் சென்றேன் மதுபோதையில்லை என்று வாக்குமூலம் கூறுகின்றார். பொதுமக்கள் பாதுகாப்பு அமைச்சர் அனுமதிப்பத்திர துப்பாக்கியை வைத்திருந்தார் இராஜாங்க அமைச்சர் என்கிறார்.இவ்வாறு பல விநோதமான கருத்துக்கள் வெளியாகியுள்ளன.

இதனைவிட இலங்கை மனித உரிமைகள் ஆணைக்குழு விசாரணைகளை தீவிரமாக முன்னெடுப்பதாகவும் கூறுகின்றது. இந்த ஆணைக்குழு கடந்த காலங்களில் எத்தனை விடயங்களுக்க நீதியை நிலைநாட்டியிருக்கின்றது என்பது ஊரறிந்த உலகறிந்த விடயம். ஆக இந்த விசாரணைக்குழுவின் முடிவு இப்போதே தெரிந்ததொன்றே.

இந்த நிலையில் அனுராதபுரம் சிறைச்சாலையில் உள்ள தமிழ் அரசியல் கைதிகள் மிகுந்த பாதுகாப்பு அச்சத்திற்கு உள்ளாகியிருப்பதாக அவர்களின் உறவினர்கள் தெரிவித்துள்ளனர். ஏற்கனவே இலங்கையின் வரலாற்றில் வெலிக்கடை, மகசீன. அனுராதபுர கலவரங்களும் கைதிகள் படுகொலை விடயங்களும் தமிழர்களை மையப்படுத்தியே அரங்கேற்றப்பட்டிருக்கின்றது

அவ்வாறிருக்கையில், மிக சொற்பமான எண்ணிக்கையில் உள்ள தமிழ் அரசியல் கைதிகளுக்கு திரைமறைவில் தீட்டப்படும் திட்டங்களால் ஆபத்துக்கள் ஏற்பட்டு விடுமோ என்ற அச்சம் வெகுவாகவே ஏற்பட்டுள்ளது. இதனைவிட, அதிகாரத்தில் உள்ள இராஜாங்க அமைச்சர் ஒருவருக்கு எதிராக சாட்சியமளிக்கின்றபோது அவர்களின் பாதுகாப்பு நிச்சயம் கேள்விக்குறியாகும்.
காரணம், சிறை அதிகரிகளும் இந்த விடயத்தில் நியாயமாக நடந்துகொள்ளும் மனோநிலையில் இல்லை. ஆகவே வேறெந்த காரணங்களை வைத்தும் தமிழ் அரசியல் கைதிகள் பழிவாங்கப்படுவதற்கும் வாய்ப்புக்கள் இல்லாமல் இல்லை.எனவே, அவர்களின் பாதுகாப்பை உடன் உறுதிப்படுத்த வேண்டும். அதற்கு முதற்கட்டமாக அவர்களை வடக்கு கிழக்கில் உள்ள சிறைச்சாலைகளுக்கு இடமாற்ற வேண்டும் என்று வலியுறுத்துகின்றேன் என்றுள்ளது.