Category: பிரதான செய்திகள்

மீண்டும் மீண்டும் இந்த அரசு கொரோனாவைக் காரணம் காட்டி எம் நினைவுகளைத் தடுக்க எண்ணுகின்றது. அடக்க அடக்க அதிகரிக்குமே தவிர எம் நினைவுகள் என்றும் அடங்காது. இவ்வாறானா செயற்பாடுகள் மூலம் மேலும் தமிழ் மக்களின் மனங்களைப் புண்படுத்தும் செயற்பாடுகளையே அரசு மேற்கொள்கின்றது என தமிழ் ஈழ விடுதலை இயக்கத்தின் பிரதித் தலைவரும், கிழக்கு மாகாணசபை முன்னாள் பிரதித் தவிசாளருமான பிரசன்னா இந்திரகுமார் தெரிவித்தார்.

திலீபன் நினைவேந்தலை நினைவு கூருவது தொடர்பில் மட்டக்களப்பு நீதவான் நீதிமன்றத்தினால் பிறப்பிக்கப்பட்ட தடையுத்தரவினை இன்றைய தினம் மட்டக்களப்பு பொலிஸ் நிலைய அதிகாரியினால் கையளிக்கப்பட்டதன் பின்னர் கருத்துத் தெரிவிக்கையிலேயே அவர் இவ்வாறு தெரிவித்தார்.

இது தொடர்பில் அவர் மேலும் தெரிவிக்கையில்,

தமிழினத்திற்கான போராட்ட வரலாற்றின் நினைவேந்தல்களை அனுஸ்டிப்பதற்கு எதிரானவர்கள் என்று மட்டக்களப்பில் யாரும் இருக்கமாட்டார்கள். அப்படி இருக்க நினைவேந்தல்களுக்கு எதிரானவர்கள் எதிர்ப்பு நடவடிக்கைகளில் ஈடுபடலாம் என்பது பொய்யான அறிக்கையாகவே தோணுகின்றது. பொலிசாரினால் நீதிமன்றத்திற்கு பொய்யான தகவல்களைச் சொல்லி தடையுத்தரவுகள் பெறப்படுகின்றனவோ எனச் சந்தேகிக்கத் தோணுகின்றது.

அடுத்து கொரோனா, தமிழ் மக்களின் நினைவேந்தல்களுக்கு மாத்திரம் எவ்வாறுதான் கொரோனா பரவுகின்றதோ தெரியவில்லை. ஆளுங்கட்சி அமைச்சர்கள், பாராளுமன்ற உறுப்பினர்கள் எத்தனையோ விழாக்கள் செய்கின்றார்கள். திறக்கப்பட்ட களஞ்சியசாலைகளுக்கு இன்னுமொரு பெயர் வைத்து அதனை மீண்டும் திறக்கின்றார்கள். இந்த நிகழ்வுகளில் எல்லாம் அவர்களின் ஆதரவாளர்கள், அதிகாரிகள் என நூற்றுக்கணக்கானவர்கள் கலந்தும் கொள்கின்றார்கள். அப்போதெல்லாம் இல்லாத கெரோனா எமது நினைவேந்தல்களுக்கு மாத்திரம் எவ்வாறு வருமோ தெரியவில்லை.

மீண்டும் மீண்டும் இந்த அரசு கொரோனாவைக் காரணம் காட்டி எம் நினைவுகளைத் தடுக்க எண்ணுகின்றது. அடக்க அடக்க அதிகரிக்குமே தவிர எம் நினைவுகள் என்றும் அடங்காது. அரசு மக்களின் மனங்களை வெல்வதை விடுத்து மீண்டும் மீண்டும் இவ்வாறானா செயற்பாடுகள் மூலம் தமிழ் மக்களின் மனங்களைப் புண்படுத்துகின்றது என்று தெரிவித்தார்.

ஆணையாளருடைய அறிக்கையை வருடாவருடம் வரவேற்றுக்கொண்டு தான் இருக்கிறோம். வரவேற்பைத் தாண்டி அந்த அறிக்கைகள் எங்கே போகிறது என்பது ஒரு கேள்விக்குறியாகவே உள்ளது. மக்களுக்கு எப்போது நீதி கிடைக்கும் என்பதும் கேள்விக்குறியாகவே உள்ளது என பெங்களூர் பல்கலைக்கழகத்தினுடைய மனித உரிமைகள் தொடர்பிலான பேராசிரியர் போல் நியூமன் தெரிவித்துள்ளார்.

48வது கூட்டத்தொடர் முக்கியத்துவம் வாய்ந்ததாக இருந்தாலும் தீர்மானம் மிக்கதாக இல்லாத சூழ்நிலையிலும் இந்த கூட்டத்தொடரில் ஆணையாளரினுடைய அறிக்கையினை நீங்கள் எப்படி அவதானிக்கிறீர்கள் என ஊடறுப்பு நிகழ்ச்சியில் வினவியபோதே அவர் மேற்கண்டவாறு தெரிவித்துள்ளார்.

அவர் மேலும் தெரிவிக்கையில்,

அறிக்கை வெளிவந்த அடுத்த நாளே வெளியுறவுத்துறை அமைச்சர் ஜி.எல். பீரிஸ், வெளியிலிருந்து எந்த ஒரு அழுத்தமும் எமது நாட்டுக்கு வர முடியாது, வரவும் கூடாது. மனித உரிமை ஆணையகத்துக்கு அழுத்தம் கொடுக்க எந்த உரிமையும் இல்ல என தெளிவாகச் சொல்லியிருக்கின்றார்.

ஆணையாளருடைய அறிக்கையை வருடாவருடம் வரவேற்றுக்கொண்டு தான் இருக்கிறோம். வரவேற்பைத் தாண்டி அந்த அறிக்கைகள் எங்கே போகின்றது ஒரு கேள்விக்குறியாகவே உள்ளது.

மக்களுக்கு எப்போது நீதி கிடைக்கும் என்பதும் கேள்விக்குறியாகவே உள்ளது. இவ்வாறு இன்னும் எத்தனை வருடங்களுக்கு இருக்கப்போகின்றது என்பதும் கேள்விக்குறியாகவே உள்ளது என தெரிவித்துள்ளார்.

தமிழீழ விடுதலைப் புலிகளைக் கண்டு அஞ்சிய முன்னாள் இராஜாங்க அமைச்சர் லொஹான் ரத்வத்த, அப்பாவி தமிழ் அரசியல் கைதிகளை அச்சுறுத்துவது வீரம் கிடையாது என ஐக்கிய மக்கள் சக்தியின் பாராளுமன்ற உறுப்பினர் சரத் பொன்சேகா தெரிவித்துள்ளார்.

கொழும்பில் இடம்பெற்ற செய்தியாளர் சந்திப்பின்போதே அவர் இவ்வாறு கூறினார்.

குறித்த ஊடகவியலாளர் சந்திப்பில் சரத் பொன்சேகா மேலும் கூறியுள்ளதாவது, “இந்த நாட்டை முன்னேற்ற வேண்டுமெனில், அதற்கு தகுதியானவர்களுக்கு அதிகாரம் வழங்கப்பட வேண்டும்.

போதைப்பொருள் வியாபாரிகளுக்கும், துப்பாக்கிகளை வைத்து அச்சுறுத்தல்களை மேற்கொள்வோருக்கும் அமைச்சுப் பதவிகளைக் கொடுத்து, இந்த நாட்டை ஒருபோதும் முன்னேற்ற முடியாது.

லொஹான் ரத்வத்தவின் நடவடிக்கைகள் இன்று அனைவராலும் விமர்சிக்கப்படுகிறது. இவர் யுத்தம் இடம்பெற்ற காலத்தில் விடுதலைப் புலி உறுப்பினரின் பெயரைக் கேட்டாலோ அல்லது அவர்களைக் கண்டால்கூட ஒழிந்துக் கொள்வாராக இருக்கும்.

ஆனால், இன்று 15 வருடங்களுக்கு மேலாக சிறையில் வாடும் அப்பாவி தமிழ் அரசியல் கைதிகளை அச்சுறுத்துகிறார். அந்தக் கைதிகள் இன்று அனைத்தையும் கைவிட்டுள்ளார்கள். அப்படியாவர்களை மண்டியிட வைத்து அவர்களின் தலையில் துப்பாக்கியை வைக்கிறார்.

இது எவ்வளவு கீழ்த்தரமான செயற்பாடு. இவ்வாறான செயற்பாடுகளை வீரன் ஒருவன் ஒருபோதும் செய்ய மாட்டான். குடிபோதையில் ஒருவன் துப்பாக்கித் தூக்கினால், அவன் வீரன் கிடையாது.

நானும் சிறைக்கைதியாக இருந்துள்ளேன். அவர்கள் அனுபவிக்கும் துன்பம் எனக்கும் தெரியும். இந்த நிலையில், நான் கைதிகளிடம் ஒரு கோரிக்கையை முன்வைக்கிறேன். இவ்வாறான சண்டியர்கள் இனிமேல் சிறைச்சாலைக்குள் நுழைந்து அச்சுறுத்தினால், அவர்களுக்கு தகுந்த பாடத்தை கற்பியுங்கள்.

அரசாங்கம் லொஹான் ரத்வத்தவை, சிறைச்சாலைகள் இராஜாங்க அமைச்சுப் பதவியில் இருந்து மட்டும்தான் நீக்கியுள்ளதே தவிர, அவருக்கு ஏனைய அமைச்சுப் பதவிகள் அப்படியே தான் உள்ளன.

இவருக்கு எதிராக இன்னும் பல முறைப்பாடுகளும் உள்ளன. பாராளுமன்றிலும் நான் இதுதொடர்பாக ஏற்கனவே கூறியுள்ளேன்.

ஐ.நா.வில் இலங்கைக்கு எதிராக அறிக்கையொன்று சமர்ப்பிக்கப்பட்டுள்ள நிலையிலேயே, இவ்வாறான சம்பவம் ஒன்று இடம்பெற்றுள்ளது” என அவர் குறிப்பிட்டள்ளார்.

நாங்கள் இறந்து விட்டோம் என்றால் சாட்சியங்கள் அழிந்து விடும். அதனையே அரசாங்கம் எதிர்பார்த்துக் கொண்டிருக்கின்றது என மன்னார் மாவட்ட வலிந்து காணாமல் ஆக்கப்பட்ட உறவுகளை தேடும் சங்கத்தின் இணைப்பாளர் மனுவல் உதயச்சந்திரா தெரிவித்துள்ளார்.

https://youtu.be/Ssht2US5QhM

ஆகவே இலங்கை இராணுவத்தையோ அல்லது அரசாங்கத்தையோ நாங்கள் நம்பவில்லை. இதனால் எங்களுக்கு சர்வதேசம் ஒரு நல்ல பதிலை வழங்க வேண்டும் என்ற கோரிக்கையை நாம் விடுக்கின்றோம் என அவர் தெரிவித்துள்ளார்.

இன்று (வெள்ளிக்கிழமை) நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே மனுவல் உதயச்சந்திரா இவ்வாறு குறிப்பிட்டுள்ளார்.

குறித்த ஊடகவியலாளர் சந்திப்பில் அவர் மேலும் கூறியுள்ளதாவது, “ஜெனிவா 48 ஆவது அமர்வு இடம்பெற்று வருகின்றது.

இந்நிலையில் நாங்கள் ஜெனிவாவிடம் கோரிக்கை ஒன்றை முன்வைக்கின்றோம். காணாமல் ஆக்கப்பட்ட உறவுகளுக்கு ஒரு தீர்வு தேவை. காணாமல் ஆக்கப்பட்ட உறவுகளுக்காக அம்மாக்கள் இன்று சுமார் 1500 நாட்களாக வீதியில் இறங்கி போராடி வருகின்றனர்.

நாங்கள் வீதியில் இறங்கி எமது உறவுகளை மீட்க போராடுவது  உலக நாடுகளுக்கே தெரியும். நாங்கள் நீதிக்காக போராடி வருகிறோம் தவிர நிதிக்காக போராடவில்லை.

மன்னார் மாவட்டத்தில் முப்படையை நம்பியே நாங்கள் இருந்தோம். ஒன்றும் நடக்காது எமது பிள்ளைகள் பாதுகாப்பாக இருப்பார்கள் என்று நம்பி இருந்ததோம்.

இவ்வாறு ஒப்படைக்கப்பட்ட எமது பிள்ளைகளுக்கு என்ன நடந்தது என்று இதுவரை எந்ததொரு தகவலும் இல்லை.

ஆகவே, நாங்கள் இறப்பதற்கு முன் எமது பிள்ளைகளின் நிலை என்ன என்று எமக்கு தெரிய வேண்டும். எமது பிள்ளைகளின் நிலை என்ன? அவர்களை எங்கே வைத்துள்ளீர்கள்? அவர்கள் இருந்தால் அவர்களை விடுதலை செய்ய உதவுங்கள் என்றுதான் நாங்கள் இன்று உலக நாடுகளிடம் கேட்கின்றோம்.

எமது பிள்ளைகளை வீதியில் நின்று தேடுகின்ற அம்மாக்களாக நாங்கள் இருக்கின்றோம். அவர்களின் கண்ணீரை உலக நாடுகள் பார்த்துக் கொண்டு இருக்கின்றது.

ஜெனிவா பேச்சுவார்த்தையில் எமக்கு ஒரு நல்ல முடிவு கிடைக்க வேண்டும். இலங்கை இராணுவத்தையோ அல்லது அரசாங்கத்தையோ நாங்கள் நம்பவில்லை.

எங்களுக்கு சர்வதேசம் ஒரு நல்ல பதிலை வழங்க வேண்டும் என்ற கோரிக்கையை ஜெனிவா 48 ஆவது அமர்வில் கோரிக்கை விடுக்கின்றோம்.

எங்களுக்கு நல்ல தீர்வு கிடைக்க வேண்டும். எங்களின் காலங்கள் இன்னும் அதிகம் இல்லை. நாங்கள் இறந்து விட்டோம் என்றால் சாட்சியங்கள் அழிந்து விடும். அதனையே அரசாங்கம் பார்த்துக் கொண்டு இருக்கின்றது.

ஒரு அம்மா உயிருடன் இருக்கும் வரை  பிள்ளைகளுக்கான போராட்டம் நடந்து கொண்டு இருக்கும்” என அவர் குறிப்பிட்டுள்ளார்.

நாடளாவிய ரீதியில் தற்போது அமுல்படுத்தப்பட்டுள்ள தனிமைப்படுத்தல் ஊரடங்கு சட்டம் செப்ரம்பர் 21ஆம் திகதி தனிமைப்படுத்தல் ஊரடங்கு நீக்கப்படும் என எதிர்பார்த்திருந்த நிலையில் எதிர்வரும் ஒக்ரோபர் முதலாம் திகதி வெள்ளிக்கிழமை அதிகாலை 04 மணி வரை நீடிக்கப்பட்டுள்ளது.

ஜனாதிபதி கோட்டாபய ராஜபக்ஸவின் தலைமையில் இன்று (17) முற்பகல் கூடிய கொவிட் ஒழிப்பு விசேட குழு கூட்டத்தில் இதற்கான தீர்மானம் எடுக்கப்பட்டுள்ளது.

எதிர்வரும் 20 ஆம் திகதி தாக்குதல் ஒன்று நடத்தப்படலாம் என கிடைக்கப்பெற்றதாக கூறப்படும் தகவல் ஒன்றுக்கு அமைய, கட்டுநாயக்க – பண்டாரநாயக்க சர்வதேச விமான நிலையம் மற்றும் மத்தளை, மஹிந்த ராஜபக்க்ஷ சர்வதேச விமான நிலையம் ஆகியவற்றின் பாதுகாப்பு பலப்படுத்தப்பட்டுள்ள நிலையில், குறித்த தகவல் தொடர்பில் தீவிர அவதானம் செலுத்தப்பட்டுள்ளது. இது தொடர்பில் தேசிய உளவுச் சேவை விசேட அவதானம் செலுத்தி இரகசிய விசாரணைகளை முன்னெடுத்துள்ளதாக அறிய தெரிய வருகிறது.

அதன்படி தாக்குதல் குறித்த எச்சரிக்கை மின்னஞ்சலானது, பங்களாதேஷின் இராணுவத்துடன் தொடர்புடைய நிறுவனம் ஒன்றின் இணையத் தளத்தை ‘ஹெக்’ செய்து, அதன் ஊடாக அனுப்பி வைக்கப்பட்டுள்ளமை கண்டறியப்பட்டுள்ளது.

பயங்கரவாத தாக்குதல் தொடர்பில் கடந்த செவ்வாயன்று (14) இரவு விமான நிலையத்துக்கு கிடைக்கப்பெற்றதாக கூறப்படும் மின்னஞ்சலில், எதிர்வரும் 20 ஆம் திக்தி விமான நிலையங்கள் மற்றும் அரச கட்டிடங்கள் மீது தாக்குதல் நடத்தப் போவதாகவும், தாம் பெயரிடும் நால்வரை உடனடியாக விடுவிக்க வேண்டும் எனவும் குறிப்பிடப்பட்டிருந்ததாக தெரிய வருகிறது.

எவ்வாறயினும் உறுதிப்படுத்தப்படாத தகவல் ஒன்றாக குறித்த தகவல் கிடைக்கப்பெற்றிருப்பினும் முன்கூட்டிய பாதுகாப்பு நடவடிக்கைகளின் நிமித்தம் இவ்வாறு விசேட பாதுகாப்பு நடவடிக்கைகள் முன்னெடுக்கப்பட்டதாக உயர் பொலிஸ் அதிகாரி ஒருவர் கூறினார்.

இந்த பாதுகாப்பு நடவடிக்கைகளில், விமானப்படையினர் மற்றும் விசேட அதிரடிப் படையினர், பொலிஸ் குழுக்கள் இணைந்து ஈடுபட்டுள்ளனர்.

இந்த மின்னஞ்சலானது, ‘ஹெக்கர்ஸ்’ என அறியப்படும் இணையங்களை முடக்கும் திட்டமிட்ட குழு ஒன்றின் வேலையாக இருக்கலாம் என சந்தேகிக்கப்படும் நிலையில், உளவுத் துறை சிறப்பு நடவடிக்கைகள் தொடர்கின்றன.