Author: TELO Admin

பாராளுமன்ற உறுப்பினர் சிவநேசதுரை சந்திரகாந்தன் (பிள்ளையான்) மற்றும் முன்னாள் பாராளுமன்ற உறுப்பினர் விநாயகமூர்த்தி முரளிதரன் (கருணா அம்மான்) ஆகியோர், கிழக்கு மாகாணத்தைச் சேர்ந்த பிரதிநிதிகளுடன், இந்திய பிரதி உயர் ஸ்தானிகர் வினோத் கே ஜேக்கப்பை பெப்ரவரி 02 ஆம் திகதி சந்தித்து பேச்சுவார்த்தை நடத்தியுள்ளனர்.

இந்த சந்திப்புகள் இருவேறு சந்தர்ப்பங்களில் இடம்பெற்றன என இந்திய உயர்ஸ்தானிகராலயம் விடுத்துள்ள ஊடக அறிக்கையில் தெரிவிக்கப்பட்டுள்ளது.

இந்த இரு சந்திப்புக்களிலும் இலங்கையுடனான நீண்ட அபிவிருத்தி பங்குடைமையை பேணுவதற்கான இந்தியாவின் உறுதிப்பாட்டினை பிரதி உயர் ஸ்தானிகர் ஜேக்கப் வலியுறுத்தியிருந்தார். பிரதி உயர் ஸ்தானிகர் ஜேக்கப், சிவநேசதுரை சந்திரகாந்தன் ஆகியோர் மாகாண சபைகள் மற்றும் 13 ஆவது திருத்தத்தினை முழுமையாக அமுல்படுத்துதல் குறித்தும் கலந்துரையாடியுள்ளனர்.

இதேவேளை, போரினால் பாதிக்கப்பட்ட விதவைகள் மற்றும் விசேட தேவையுடையோர்களுக்கான வாழ்வாதார வாய்ப்புக்கள், கல்வி மற்றும் புலமைப்பரிசில் உள்ளிட்ட பல்வேறு விடயங்களின் எதிர்கால அபிவிருத்தி ஒத்துழைப்புக்கான சாத்தியப்பாடுகள் தொடர்பாகவும் இந்த சந்திப்பின்போது திரு.விநாயகமூர்த்தி முரளிதரன் எடுத்துரைத்துள்ளார்.

மாகாண சபை மற்றும் 13 ஆவது திருத்தத்தினை முழுமையாக அமுல்படுத்துதல் ஊடாக தமிழ் மக்களின் அபிலாஷைகளை நிறைவேற்றுவதற்கான சிறந்த வழி அர்த்தப்புஷ்டியான பரவலாக்கம் என்பதே இந்திய அரசாங்கத்தின் நிலைப்பாடு என்பதனை பிரதி உயர் ஸ்தானிகர் இந்த சந்தர்ப்பத்தில் வலியுறுத்திக்கூறினார் எனவும் அவ்வறிக்கையில் மேலும் தெரிவிக்கப்பட்டுள்ளது.

உள்ளுராட்சி மன்றங்களில் பணியாற்றும் சுகாதாரத் தொழிலாளிகளும் நாளாந்தம் கொரோனாத் தொற்றுச் சூழ்நிலைகளில் நேரடியாகப் பணியாற்றுகின்றனர். அவர்களைப் புறந்தள்ளி என்ன கொள்கையின் அடிப்படையில் தடுப்பு மருந்து வழங்கப்பட்டது என தமிழ் ஈழ விடுதலை இயக்கத்தின்(ரெலோ) யாழ் மாவட்ட தலைவரும் வலிகாமம் கிழக்குப் பிரதேச சபைத் தவிசாளரும் ஆன தியாகராஜா நிரோஷ் கேள்வியெழுப்பியபோது அரசின் அறிவிப்பிலும், உலகசுகாதார நிறுவனத்தின் அறிவிப்பிலும் உள்ளுராட்சி மன்ற சுகாதாரத் தொழிலாளிகளுக்கு தொற்றுத்தடுப்பு வழங்குமாறு தெரிவிக்கப்படவில்லை. ஆகவே வழங்கப்படவில்லை என மாகாண சுகாதார பணிப்பாளர் பதிலளித்தார்.

இன்று(02) நடைபெற்ற யாழ் மாவட்ட அபிவிருத்திக்குழுக்கூட்டம் கூட்டத்திலேயே தவிசாளரினால் இவ்வினா எழுப்பப்பட்டது.

இவ் வினா எழுப்பப்பிட்டபோது, தவிசாளரின் கேள்வியை மறுத்து இவ்வாறான கேள்விகளைத் தொடுத்து நேரத்தினை வீணடிக்க வேண்டாம் என மாவட்ட அபிவிருத்திக்குழுவின் இணைத்தலைவர்களில் ஒருவரான வடக்கு மாகாண ஆளுநர் பி.எம்.சாள்ஸ் தொவித்து தவிசாளரின் கேள்வியை மறுத்தார்.

எனினும் குறுக்கிட்டுப்பேசிய வலிகாமம் கிழக்கு பிரதேச சபைத் தவிசாளர், உள்ளுராட்சி மன்றங்களில் சுகாதாரத் தொழிலாளிகளாகப் பணியாற்றும் தொழிலாளர்கள் கொரோனா தொற்று அபாயமுள்ள பல பணிகளை நேரடியாகத் தொடர்புற்று பணியாற்றுகின்றனர்.

தனிமைப்படுத்தப்பட்ட இல்லங்களில் கழிவுகளை அகற்றுகின்றனர். கொரோனா தொற்றாளர் வைத்தியசாலையான கோப்பாய் கல்வியற் கல்லூரியில் கூட பல சேவைகளை செய்கின்றனர். கொரோனாத் தொற்று சிகிச்சை நிலைய மலசல கூடக் குழிகள் நிரம்பினால் கூட பிரதேச சபை சுகாதாரத் தொழிலாளிகளே அகற்றியுள்ளனர்.

தொற்றாளர்கள் நடமாடிய சந்தேகத்திற்கு இடமான பகுதிகளை தொற்றுநீக்கம் செய்கின்றனர். ஆனால் அப்படியாகப் பணியாற்றும் தொழிலாளர்களை தொற்று மருந்தில் புறந்தள்ளுவது சரியான சுகாதார அணுகுமுறையல்ல. சகல சபைகளின் சுகாதாரப்பணியாளர்களுக்கும் மருந்து ஏற்றப்பட வேண்டும்.

ஒரு சுகாதாரத் தொழிலாளி தொற்று சந்தேக இடத்தில் தற்செயலாக தொற்றை வாங்குவதற்கு ஏராளமான சந்தர்ப்பங்கள் உள்ளன. வீதிகளில் தவறான முறையில் கழற்றி வீசப்படும் முகக் கவசங்களைக்கூட அகற்றும் பணியில் சுகாதாரத் தொழிலாளிகளே ஈடுபடுகின்றனர் என வலிகாமம் கிழக்குப் பிரதேச சபைத் தவிசாளர் தெரிவித்தார்.

இதற்குப் பதிலளித்த மாகாண சுகாதார பணிப்பாளர் இலங்கைக்கு உலக சுகாதார தாபனம் மருந்துகளைக் கையளிக்கும் போது வரையரைகள் விதிக்கப்பட்டுள்ளன. அரசாங்கம் உள்ளுராட்சி மன்றங்களின் சுகாதாரத் தொழிலாளர்களுக்கு வழங்குமாறு தமக்குப் பணிக்கவில்லை என்றும் மருந்தினை பகிர்வது தமது முடிவு அல்ல அது அரசின் கொள்கை எனவும் பதிலளித்தார்.

சாதாரணமாக சுகாதாரத் திணைக்களங்களில் பணியாற்றும் முகாமைத்துவ உதவியாளர்களுக்கே கொரோனாத் தடுப்பூசி போடப்பட்டுள்ளது. அவர்கள் முன்கள பணியாற்றுவமில்லை. அவ்வாறான நிலையில் பிரதேச சபைகளின் சுகாதாரப் பணியாளர்கள் புறக்கணிக்கப்பட்டுள்ளமை மோசமான முகாமைத்துவம் என விமர்சனம் கிளம்பியுள்ளது.

2009 ஆம் ஆண்டு எமது ஆயுதப்போராட்டம் மௌனிக்கப்பட்டதன் பின்பு தமிழ் மக்கள் கடும் அநீதிக்குள் தள்ளப்பட்டிருக்கின்றார்கள் என மட்டக்களப்பு ரெலோ பாராளுமன்ற உறுப்பினர் கோவிந்தன் கருணாகரம் தெரிவித்தார்.

தமிழ்த் தேசியக் கூட்டமைப்பினால் எற்பாடு செய்யப்பட்டிருந்த பொங்கல் விழா களுதாவளை ஈஸ்வரன் ஆலய முன்றலில் மண்முனை தென் எருவில் பற்று பிரதேச சபை தவிசாளர் யோகநாதன் தலைமையில் நடைபெற்றது.

இந் நிகழ்வில் மட்டக்களப்பு மாவட்ட பாராளுமன்ற உறுப்பினர் இரா.சாணக்கியன், முன்னாள் பாராளுமன்ற உறுப்பினர்களான பொன்.செல்வராசா, பா.அரியநேத்திரன், ஞா.ஸ்ரீநேசன், முன்னாள் மாகாண சபை உறுப்பினர் மா.நடராசா, மட்டக்களப்பு மாநகர மேயர் சரவணபவன் மற்றும் பிரதேச சபைகளின் தவிசாளர்கள், பிரதேச சபை உறுப்பினர்கள் என பலரும் கலுந்து கொண்டனர்.

இந் நிகழ்வில் அதிதியாக கலந்து கொண்டு உரையாற்றும் போதே இவர் இவ்வாறு தெரிவித்தார்.

அவர் அங்க தொடர்ந்து உரையாற்றுகையில்-

எமது பிரதேசம் தற்போது படும் இன்னல்களை நாங்கள் அறிந்த வண்ணவே இருக்கின்றோம். தற்போது வடகிழக்கிலே கடந்த காலங்களில் தமிழ் மக்கள் அடிமைகளாக இரண்டாம்தர பிரஜைகளாக நடாத்தப்பட்டதன் காரணமாக இந்த நாடு பல போராட்டங்களை சந்தித்து வந்திருந்தது. 2009 ஆம் ஆண்டு எமது ஆயுதப்போராட்டம் மௌனிக்கப்பட்டதன் பின்பு தமிழ் மக்கள் கடும் அநீநிதிக்குள் தள்ளப்பட்டிருக்கின்றார்கள். இவை அனைத்திற்கும் ஒரு தீர்வு வேண்டி வெளி உலகத்திற்கு எடுத்துக் கூறப்பட வேண்டும். குறிப்பாக எதிர்வரும் மார்ச் மாதம் ஜெனிவாவிலே மனித உரிமை பேரவைக்கான கூட்டத்தொடர் ஆரம்பிக்க இருப்பதால் எமது பிரச்சினையை உலக நாடுகளுக்கு தெளிவுபடுத்தும் முகமாக பொத்துவிலில் இருந்து பொலிகண்டி வரை மாபெரும் பேரணி ஒன்றினை நடாத்துவதற்கான வடகிழக்கு சிவில் சமூகத்தின் தீர்மானத்திற்கு தமிழ்த் தேசியக் கூட்டமைப்பும் ஆதரவு வழங்க இருக்கின்றது.

எதிர் வரும் மார்ச் மாதம் ஜெனிவாவிலே கொண்டுவர இருக்கும் பிரச்சினை மிகவும் கடுமையானதாக இருக்க வேண்டும் என்பது எமது அவாவாக இருக்கின்றது. இதனை அறிந்த கோட்டபாய ராஜபக்ச மூவர் கொண்ட குழுவினை நியமித்திருக்கின்றார். கடந்த காலங்களிலே இங்கு தமிழர்களுக்கு நடந்த அட்டூழியங்களை கண்டறிவதற்கான ஒரு ஆணைக்குழுவை நியமித்துள்ளார். இதில் உள்ள ஆச்சரியம் என்னவென்றால் அவர் பாதுகாப்பு அமைச்சின் செயலாளராக இருக்கும் போது நடைபெற்ற அநியாங்களை கண்டறிவதற்கு அவரே ஆணைக்குழுவை நியமித்துள்ளார். இந்த செயற்பாடு என்பது இந்த நாட்டு மக்களையல்ல ஐக்கிய நாடுகள் சபையைக் கூட ஏமாற்றும் வித்தையாகவே நாங்கள் இதனை பார்க்கின்றோம்.

அதற்கு மேலாக அவரும் அவருடன் இருக்கும் அமைச்சர்களும் என்ன கூறுகின்றனர். அந்நிய சக்திகள் ஒரு நாட்டின் இறைமைக்குள் மூக்கை நுழைக்கக் கூடாது விரலை நுழைக்கக் கூடாது என்றெல்லாம் கூறிவருகின்றனர். நீங்கள் இந்த நாட்டிலே இருக்கின்ற சிறுபான்மை இனமான தமிழ் பேசும் சமூகத்திற்கு இழைக்கின்ற இன்னல்களுக்கா சர்வதேசம் மூக்கையல்ல முழு உடலையே நுழைக்கும் அளவிற்குதான் நீங்கள் செயற்பட்டுக் கொண்டு இருக்கின்றீர்கள் என்பதனை நீங்கள் உணர வேண்டும்.

ஆயுதப் போராட்டத்தை முடிவுக்கு கொண்டு வந்த நீங்கள் தொடர்ந்து போராடிவரும் எமது இனத்திற்காக நீங்கள் மக்ளளது அபிலாசைகளை வெல்லக் கூடிதொரு தீர்வினை உங்களால் கொடுக்க முடியும். காரணம் பாராளுமன்றத்தில் உங்களுக்கு பெரும்பான்மை இருக்கின்றது முழு அதிகாரத்தையும் நீங்கள் இருபதாவது திருத்தச்சட்டத்தின் மூலம் பெற்றிருக்கின்றீர்கள். ஆகவே உங்களால் தமிழ் மக்களுக்குரிய நியாயமான தீர்வினை வழங்க முடியும். அவ்வாறு வழங்கிவிட்டு சர்வதேசத்திடம் மூக்கை நுழைக்க வேண்டாம் என்று கூறுங்கள் அவர்களும் மூக்கை நுழைக்கமாட்டார்கள்.

குறிப்பாக 2020 ஆம் ஆண்டிற்கு பிற்பாடு வடக்கு கிழக்கு பிரதேசங்களை பௌத்த மயமாக்கும் ஒரு நிகழ்ச்சி நிரலின் கீழ் இந்த அரசாங்கம் செயற்பட்டுக் கொண்டு இருக்கின்றது. எல்லையோரங்களில் இருக்கும் காணிகள் அனைத்தும் கபளிகரம் செய்யப்பட்டுக் கொண்டு இருக்கின்றது இந்த நேரத்தில் தமிழ் மக்களாகிய நாங்கள் அனைவரும் ஒற்றுமையாக இருக்க வேண்டும். கடந்த காலங்களிடையே தமிழ்த் தேசியம் பேசும் கட்சிகளிடையே குழப்பங்கள் ஏற்பட்டு இருந்தது அவை அனைத்தையும் மறந்து எமது எதர் காலத்தில் ஒற்றமையாக ஜனநாயக ரீதியில் இராஜதந்திர ரீதியில் போராடி எமது மக்களுக்குரிய உரிமைகளை பாதுகாக்க வேண்டும் என இதன்போது தெரிவித்தார்.

தமிழர்கள் தீர்வுக்காகவும் நீதிக்காகவும் ஜனநாயக வழியில் போராடினால் அந்தப் போராட்டத்தை எவரும் கொச்சைப்படுத்தக்கூடாது என்று முன்னாள் ஜனாதிபதியும் ஸ்ரீலங்கா சுதந்திரக் கட்சியின் தலைவருமான மைத்திரிபால சிறிசேன தெரிவித்துள்ளார்.

இந்த விடயம் தொடர்பாக கருத்து வெளியிட்டுள்ள அவர், “கடந்த எமது ஆட்சியில் தமிழர்களின் மனதை நாம் வென்றிருந்ததோடு சர்வதேச சமூகத்தின் மனதையும் வென்று காட்டியிருந்தோம். ஆனால், இந்த ஆட்சியில் அவற்றை ஏன் சாதிக்க முடியாமல் உள்ளது என்பது தொடர்பில் அரசு ஆராய்ந்து பார்க்க வேண்டும்.

அதைவிடுத்து இன முறுகலை மேலும் வலுவடையைச் செய்யும் விதத்திலும் சர்வதேச மட்டத்தில் நாட்டுக்கு அபகீர்த்தியை ஏற்படுத்தும் வகையிலும் அரசிலுள்ள சிலர் கருத்துக்கள் வெளியிடுவதை உடன் நிறுத்த வேண்டும்.

இது தொடர்பில் ஜனாதிபதி, பிரதமர் ஆகிய இருவரும் கவனம் செலுத்த வேண்டும். பிரச்சினைகளை ஏற்படுத்த முனைவோரை ஜனாதிபதியும் பிரதமரும் தூரத்தில் வைத்திருக்க வேண்டும். அவர்களைப் பக்கத்தில் வைத்துக்கொண்டு ஆட்சியைத் திறம்பட முன்னெடுக்க முடியாது” என அவர் மேலும் தெரிவித்துள்ளார்.

சுதந்திர தினத்துக்கு எதிர்ப்புத் தெரிவிக்கும் வகையில், அத்தினத்தைக் கரிநாளாகவும் கறுப்புப்பட்டி அணிந்தும் அனுஷ்டிக்குமாறு அழைப்பு விடுத்துள்ள வலிந்து காணாமல் ஆக்கப்பட்டவர்களின் உறவுகள், அடையாள உண்ணாவிரதப் போராட்டத்துக்கும் அழைப்பு விடுத்துள்ளது,

இந்தக் கரிநாள் அடையாள உண்ணாவிரதப் போராட்டம், இன்று (02) முதல் 6ஆம் திகதி வரையிலும் நான்கு நாள்களுக்கு, கிளிநொச்சி கந்தசுவாமி ஆலய முன்றலில் இடம்பெறுமென அறிவிக்கப்பட்டுள்து.

கிளிநொச்சியில், வலிந்து காணாமல் ஆக்கப்பட்டவர்களின் உறவுகளது அலுவலகத்தில், நேற்று (01) நடத்தப்பட்ட ஊடகவியலாளர் சந்திப்பிலேயே வடக்கு, கிழக்கு வலிந்து காணாமல் ஆக்கப்பட்டவர்களின் உறவுகளால் பகிரங்க அழைப்பு விடுக்கப்பட்டது.

கிளிநொச்சி மாவட்ட வலிந்து காணாமல் ஆக்கப்பட்ட உறவுகளின் இணைப்பாளர் கதிர்காமநாதன் கோகிலவாணி, கருத்துரைக்கையில்.

“இலங்கையின் சுதந்திர தினத்தை கரிநாளாக அனுஷ்டிக்கும் வகையில் கறுப்புப்பட்டி அணிந்து, 2ஆம் திகதி தொடக்கம் (இன்றுமுதல்) 6ஆம் திகதி வரை அடையாள உண்ணாவிரதப் போராட்டம் முன்னெடுக்கப்படவுள்ளது” என்றார்.

அத்துடன், நாளை 3ஆம் திகதியும் மறுநாள் 4ஆம் திகதியும், வடக்கு, கிழக்கு மாவட்டங்களில் வலிந்து காணாமலாக்கப்பட்டவர்களின் உறவினர்கள், உணவு தவிர்ப்புப் போராட்டத்தில் ஈடுபடவுள்ளனர் எனத் தெரிவித்த அவர், இந்தப் போராட்டத்தில் பங்கேற்குமாறு,

வர்த்தக சங்கங்கள், முச்சக்கரவண்டி சங்க உறுப்பினர்கள், பஸ் உரிமையாளர் சங்க உறுப்பினர்கள், தமிழ் உறவுகள் அனைவரையும் கலந்து கொள்ளுமாறும் அழைப்புவிடுத்தார்.