Category: பிரதான செய்திகள்

இலங்கை, சர்வதேச நாணய நிதியத்திற்கு கோரிக்கைகள் அடங்கிய யோசனைகளை முன்வைத்தாலும் உடனடியாக நிதியம், நிதியுதவிகளை வழங்காது என தெரிவிக்கப்படுகிறது.

இலங்கையில் ஏற்பட்டுள்ள பொருளாதார நெருக்கடியில் இருந்து மீள, நிதியமைச்சர் பசில் ராஜபக்ச எதிர்வரும் ஏப்ரல் மாதம் அமெரிக்காவின் வொஷிங்டனில் அமைந்துள்ள சர்வதேச நாணய நிதியத்திற்கு விஜயம் செய்ய உள்ளார்.

அப்போது அவர், கோரிக்கைகள் அடங்கிய யோசனைகளை நாணய நிதியத்திடம் சமர்ப்பிக்க உள்ளார். எனினும் கோரிக்கைகளை முன்வைத்தாலும் உடனடியாக நாணய நிதியம் நிதியுதவிகளை வழங்காது.

அதற்கு நீண்ட செயற்பாடுகள் இருக்கின்றன. அத்துடன் கடந்து செல்ல வேண்டிய சில தடைகளும் இருக்கின்றன. இதில் முதல் தடை சர்வதேச நாணய நிதியத்தின் உறுப்பு நாடுகளின் வாக்கெடுப்புக்கு இலங்கை உட்பட வேண்டும் என்பதாகும்.

வாக்கெடுப்பில் இலங்கை குறைந்தது 50 சத வீத வாக்குகளை பெற வேண்டும். இலங்கை 11 உறுப்பு நாடுகளில் வாக்குகளை பெற்றாக வேண்டும்.

தற்போது காணப்படும் சூழ்நிலையில், சர்வதேச நாணய நிதியத்தின் உறுப்பு நாடுகளான சீனா, இந்தியா மற்றும் அமெரிக்கா போன்ற நாடுகளின் வாக்குகளை பெறுவது இலங்கை சிரமமாக இருக்கலாம்.

அதேவேளை பிரித்தானியா உட்பட ஐரோப்பிய நாடுகள் இலங்கை சம்பந்தமாக எப்படியான பிரதிபலிப்பை வெளியிடும் என்பது சிக்கலுக்குரியது. இந்த நாடுகள் எடுக்கும் முடிவின் அடிப்படையிலேயே சர்வதேச நாணய நிதியம், இலங்கைக்கு நிதியுதவியை வழங்குவதா இல்லையா என்று தீர்மானிக்கும் எனக் கூறப்படுகிறது.

இலங்கையில் பெட்ரோலியக் கூட்டுத்தாபனம் வரலாற்றில் இல்லாத அளவுக்கு எரிபொருள் விலையை உயர்த்துவதற்காக கடந்த சில வாரங்களாக எரிபொருட்களை மறைத்து வைத்திருந்ததாக தகவல் வெளியாகியுள்ளது.

20,000 மெற்றிக் டன் பெற்றோல், 7,000 மெற்றிக் டன் சுப்பர் டீசல், 6,000 மெற்றிக் டன் சுப்பர் பெற்றோலைக் கிடங்குகளில் மறைத்து வைத்து, விலை அதிகரித்ததாக ஐக்கிய மக்கள் சக்தி கட்சியின் பெற்றோலிய ஊழியர் சங்கத்தின் பொதுச் செயலாளர் ஆனந்த பாலித தெரிவித்துள்ளார்.

ஒரு கறுப்புச் சந்தை வியாபாரி கூட இவ்வாறான சட்டவிரோத கொடுக்கல் வாங்கலில் ஈடுபடவில்லை என அவர் குறிப்பிட்டுள்ளார். எரிபொருள் விலை அதிகரிக்கப்படுவதற்கு மூன்று நாட்களுக்கு முன்னர் செலுத்தப்பட்ட 55,000 மெற்றிக் டன் எரிபொருள் இறக்கப்படாமல் கப்பலில் வைக்கப்பட்டிருந்ததாகவும் ஆனந்த பாலித சுட்டிக்காட்டினார்.

கூட்டுத்தாபனத்தில் உள்ள கிடங்குகளில் 20,000 மெட்ரிக் டன் பெட்ரோல், 7,000 மெட்ரிக் டன் சூப்பர் டீசல் மற்றும் 6,000 மெட்ரிக் டன் சூப்பர் பெட்ரோல் இருந்ததும் விநியோகிக்கப்படவில்லை.

எரிபொருளுக்கு உண்மையாகவே தட்டுப்பாடு ஏற்படவில்லை. நாட்டிற்கு வந்த எரிபொருளுக்கு பணம் செலுத்தப்பட்டிருந்தது. எனினும் அரசாங்கம் விலை அதிகரிக்கும் வரை விநியோகிக்கப்படவில்லை.

கறுப்புச் ந்தை வியாபாரி கூட இவ்வாறு செய்ய மாட்டார் என மக்கள் சக்தி கட்சியின் பெற்றோலிய ஊழியர் சங்கத்தின் பொதுச் செயலாளர் ஆனந்த பாலித தெரிவித்துள்ளார்.

இலங்கை தற்போதைய பொருளாதார நெருக்கடிகளிலிருந்து மீள்வதற்கு நுண்பாகப்பொருளாதாரத்தை உரியவாறு மறுசீரமைத்து, முகாமைசெய்வது அவசியம் என்று வலியுறுத்தியுள்ள ஆசிய அபிவிருத்தி வங்கி, தற்போதைய சவால்களை எதிர்கொள்வதற்கும் அனைவரையும் உள்ளடக்கிய வளர்ச்சியை அடைந்துகொள்வதற்கும் இலங்கைக்கு அவசியமான ஒத்துழைப்புக்களை வழங்குவதற்குத் தாம் தயாராக இருப்பதாகவும் தெரிவித்துள்ளது.

ஆசிய அபிவிருத்தி வங்கியின் தலைவர் மஸாட்சுகு அசகவா இரண்டு நாட்கள் உத்தியோகபூர்வ விஜயமொன்றை மேற்கொண்டு கடந்த வியாழக்கிழமை நாட்டை வந்தடைந்ததுடன் அன்றைய தினமே ஜனாதிபதி கோட்டாபய ராஜபக்ஷவையும் சந்தித்துக் கலந்துரையாடியுள்ளார்.

இச்சந்திப்பின்போது சமூக, நிதி மற்றும் கடன் ரீதியான சவால்களை எதிர்கொள்வதற்கு அவசியமான ஒத்துழைப்புக்களை இலங்கைக்கு ஆசிய அபிவிருத்தி வங்கி தொடர்ந்து வழங்கும் என்று அவர் ஜனாதிபதியிடம் உறுதியளித்துள்ளார்.

மேலும் இலங்கை விஜயம் குறித்துத் கருத்து வெளியிட்டுள்ள அவர் ‘இலங்கைக்கு மீண்டும் வருகைதருவதையிட்டு மகிழ்ச்சியடைகின்றேன்.

நான் ஆசிய அபிவிருத்தி வங்கியின் தலைவர் கிமிமஸா றருமிசுவுடன் கடந்த 1991 ஆம் ஆண்டில் முதன்முறையான இந்த அழகிய நாட்டிற்கு வருகைதந்திருந்தேன். அப்போது நான் அவரது சிரேஷ்ட ஆலோசகராவேன்.

சுமார் 30 வருடங்களின் பின்னர், எதிர்வரும் செப்டெம்பர் மாதம் எமது வருடாந்தக் கூட்டத்தை நடத்துவதற்கு இலங்கை தயாராகின்றது. அந்தவகையில் ஆசிய அபிவிருத்தி வங்கியின் தலைவர் என்ற ரீதியில் நான் இப்போது இலங்கை எனது முதலாவது விஜயத்தை மேற்கொண்டிருக்கின்றேன்’ என்றும் தெரிவித்துள்ளார்.

அதனைத்தொடர்ந்து கொழும்பு பண்டாரநாயக்க ஞாபகார்த்த சர்வதேச மாநாட்டு மண்டபத்திற்குச்சென்று அதனைப் பார்வையிட்ட அவர், ‘ஆசிய அபிவிருத்தி வங்கியின் 2022 ஆம் ஆண்டிற்கான வருடாந்தக்கூட்டம் இங்குதான் நடைபெறவிருக்கின்றது.

கடந்த 2019 ஆம் ஆண்டிற்குப் பிறகு எதிர்வரும் செப்டெம்பர் மாதம் முதன்முறையாக பிராந்திய அதிகாரிகள் நேரடியாக இங்கு வருகைதரவிருக்கின்றார்கள்.

அத்தோடு ஆசிய அபிவிருத்தி வங்கியின் வருடாந்தக்கூட்டம் தெற்காசியாவின் நடைபெறும் இரண்டாவது முறை இதுவாகும்’ என்று குறிப்பிட்டுள்ளார்.

இலங்கைக்கான இருநாள் உத்தியோகபூர்வ விஜயத்தையடுத்து வெளியிட்டுள்ள அறிக்கையில் அவர் மேலும் கூறியிருப்பதாவது:

இலங்கை தற்போதைய பொருளாதார நெருக்கடிகளிலிருந்து மீள்வதற்கு நுண்பாகப்பொருளாதாரத்தை உரியவாறு மறுசீரமைத்து, முகாமைசெய்வது அவசியமாகும். இருப்பினும் கொரோனா வைரஸ் பரவலைத்தொடரந்து உருவான பல்வேறு சவால்களை உரியவாறு கையாள்வதற்கான நடவடிக்கைகளை இலங்கை முன்னெடுத்திருக்கின்றது.

பணவீக்கத்திற்கு மத்தியில் நிதி மற்றும் வெளியக இருப்பை சரியான மட்டத்தில் பேணுவதற்கென எடுக்கப்பட்ட நடவடிக்கைகளும் அதில் உள்ளடங்குகின்றன.

தற்போதைய சவால்களை எதிர்கொள்வதற்கும் அனைவரையும் உள்ளடக்கிய வளர்ச்சியை அடைந்துகொள்வதற்கும் இலங்கைக்கு அவசியமான ஒத்துழைப்புக்களை வழங்குவதற்கு ஆசிய அபிவிருத்தி வங்கி தயாராக இருக்கின்றது என்று அவர் அவ்வறிக்கையில் தெரிவித்துள்ளார்.

இவ்வாறானதொரு பின்னணியில் ஆசிய அபிவிருத்தி வங்கியின் 55 ஆவது வருடாந்தக்கூட்டம் எதிர்வரும் செப்டெம்பர் மாதம் ‘கொவிட்-19 தொற்றுப்பரவலுக்குப் பின்னரான உலகத்தில் காலநிலை மாற்றத்திற்கு இசைவான மீள்தன்மையுடைய பசுமைப்பொருளாதாரத்தைக் கட்டியெழுப்பல்’ என்ற தொனிப்பொருளில் இலங்கையில் நடைபெறவுள்ளமை குறிப்பிடத்தக்கது.

அரசு ஆபத்தில் இருக்கும்போது அரசை காப்பாற்ற ஜனாதிபதி தன்னை சந்திக்க வருமாறு அழைப்பு என தமிழ்த் தேசியக் கூட்டமைப்பின் வன்னி மாவட்ட நாடாளுமன்ற உறுப்பினரும் தமிழ் ஈழ விடுதலை இயக்கத்தின் (ரெலோ) தலைமை குழு உறுப்பினருமான வினோநோகதாரலிங்கம் தெரிவித்துள்ளார்.

ஜனாதிபதி எதிர்வரும் 15 ஆம் திகதி தன்னை சந்திக்க வருமாறு தமிழ் தேசியக்கூட்டமைப்புக்கு அழைப்பு விடுத்துள்ளார். நாடு இன்று மிகவும் இக்கட்டான் நிலையில் இருக்கின்றது.

விலைவாசிகள் ஒவ்வொருநாளும் விடிய விடிய ஏறிக்கொண்டே இருக்கின்றது. அத்தியாவசிய பொருட்களுக்கான தட்டுப்பாடு மிக மோசமாக இருக்கின்றது. வரிசை யுகத்தினை மீண்டும் சந்திக்கும் நிலை வந்துகொண்டிருக்கின்றது. எந்த பொருளை வாங்க வேண்டுமாக இருந்தாலும் வரிசையில் நின்றுதான் வாங்க வேண்டியுள்ளது.

எரிபொருளின் விலை வானலாவ உயர்கின்றது. எரிவாயுவுக்கு தட்டுப்பாடு, விலை உயர்வு, சீமெந்தை பெற முடியாதுள்ளது. 2000 ருபா வரைக்கு செல்லும் நிலை உள்ளது. இன்னும் நாட்கள் செல்ல செல்ல ஒவ்வொரு பொருட்களின் விலையும் உயர்ந்துகொண்டிருக்கின்றது.

ஜனாதிபதி கோத்தபாய தற்போது மிகவும் தடுமாறிக்கொண்டிருக்கின்ற நிலைமை காணப்படுகின்றது. அவர் தலைமையிலான அரசாங்கம் இந்த நாட்டை ஆள முடியாமல் தத்தளித்துக்கொண்டிருக்கின்றது. அவருக்கு ஆதரவாக வாக்களித்த 69 இலட்சம் மக்களும் அவரை துரத்தியடிக்க வேண்டும் அவர் இந்த நாட்டை ஆள தகுதியற்றவர் என சொல்லும் நிலை உருவாகிக்கொண்டிருக்கின்றது.

இந்த நாடு வெளிநாடுகளில் பிச்சை எடுத்துக்கொண்டிருக்கின்றது. இனிமேல் நாங்கள் பிச்சை எடுக்க வேண்டிய நிலைமை உருவாகியுள்ளது. இந்த நாட்டின் ஒவ்வொரு குடிமகனும் பிச்சை எடுக்க வேண்டிய நிலைமை உள்ளது.

இவ்வாறான நிலையில்தான் நாட்டை ஆட்டம் காண செய்து விட்டு நாட்டை அதாலபாதாழத்திற்குள் தள்ளிவிட்டு தான் தப்புவதற்காக இவ்வளவு காலமும் பேச முடியாத நிலையில் இருந்துகொண்டு ஐ. நா. மனித உரிமை பேரவையில் கேள்வி மேல் கேள்வி எழுப்பப்பட்டுக்கொண்டிருக்கும் இந் நிலையில் தன்னையும் இந்த அரசாங்கத்தினையும் தப்ப வைப்பதற்காக எங்களோடு பேச வேண்டும் என்ற வார்த்தை கூறப்பட்டுள்ளது.

நாட்டில் பெற்றோல் , டீசல் உள்ளிட்ட எரிபொருட்கள் மற்றும் சமையல் எரிவாயு உள்ளிட்டவற்றுக்கு நிலவும் தட்டுப்பாடு தொடர்ந்து கொண்டிருக்கிறது.

எதிர்வரும் நாட்களில் இந்த நெருக்கடிகளுக்கு தீர்வு கிட்டும் என்று பொறுப்பு கூற வேண்டிய தரப்பினர் தெரிவித்த போதிலும் , நாடளாவிய ரீதியில் எரிபொருட்களை பெற்றுக் கொள்வதற்காக மக்கள் நீண்ட வரிசையில் காத்திருப்பதை அவதானிக்க முடிகிறது.

மீண்டும் எரிபொருள் விலை அதிகரிப்பு

இவ்வாறான நிலையில் வியாழக்கிழமை நள்ளிரவு முதல் அமுலாகும் வகையில் ஐ.ஓ.சி. நிறுவனம் எரிபொருள் விலையை அதிகரித்துள்ளது.

அனைத்து வகையான டீசலின் விலைகளை 75 ரூபாவாலும் , அனைத்து வகையான பெற்றோலின் விலைகளை 50 ரூபாவாலும் அதிகரித்துள்ளதாக ஐ.ஓ.சி. நிறுவனம் அறிவித்துள்ளது.

கடந்த பெப்ரவரி 24 ஆம் திகதி ஒரு லீற்றர் டீசலின் விலை 15 ரூபாவாலும் , ஒரு லீற்றர் பெற்றோல் விலை 20 ரூபாவாலும் ஐ.ஓ.சி. அதிகரித்தது.

பெப்ரவரியில் இரண்டாவது தடவையாக இவ்வாறு எரிபொருள் விலை அதிகரிக்கப்பட்டது. அதற்கு முன்னர் பெப்ரவரி 6 ஆம் திகதியும் ஐ.ஓ.சி. நிறுவனம் எரிபொருள் விலையை அதிகரித்தமை குறிப்பிடத்தக்கது.

தொடரும் சமையல் எரிவாயு தட்டுப்பாடு

நாட்டில் நிலவும் டொலர் நெருக்கடியின் காரணமாக இறக்குமதி நிறுவனங்களுக்கு கடன் கடிதங்கள் விடுவிக்கப்படாமையின் காரணமாக கடந்த இரு வாரங்களாக சமையல் எரிவாயுவிற்கு பாரிய தட்டுப்பாடு நிலவுகிறது.

இதனால் நாடளாவிய ரீதியிலுள்ள பல உணவகங்களுக்கும் , பேக்கரிகளும் , சிற்றுண்டிசாலைகளும் மூடப்பட்டுள்ளன.

இந்நிலையில் சமையல் எரிவாயு விநியோகத்தை ஆரம்பித்துள்ளதாக லிட்ரோ நிறுவனம் அறிவித்துள்ளது.

எரிவாயு இறக்குமதிக்கான கொடுப்பனவுகள், கடன் கடிதங்களை விடுவித்துக் கொள்வதில் காணப்பட்ட சிக்கல்களுக்கு தீர்வு காணப்பட்டதையடுத்து எரிவாயு விநியோக நடவடிக்கை முன்னெடுக்கப்பட்டுள்ளதாக தெரிவிக்கப்பட்டுள்ளது.

அதற்கமைய நேற்றிலிருந்து கெரவலப்பிட்டி லிட்ரோ எரிவாயு சேமிப்பு முனையத்திலிருந்து இறக்குதல் , நிரப்;புதல் மற்றும் விநியோகம் ஆகியவை ஆரம்பிக்கப்பட்டுள்ளதாக தெரிவிக்கப்பட்டுள்ளமை குறிப்பிடத்தக்கது.

வாகனங்களின் வரிசைகளில் மாற்றம் இல்லை

பெற்றோல் மற்றும் டீசல் உள்ளிட்ட எரிபொருள் தட்டுப்பாட்டுக்கு கடந்த திங்கட்கிழமை முதல் தீர்வு வழங்கப்படும் என்று தெரிவிக்கப்பட்ட போதிலும் , எரிபொருள் நிரப்பும் நிலையங்களுக்கு முன்னாள் வாகனங்கள் நீண்ட வரிசை இன்னும் குறைவடையவில்லை.

நாட்டின் சில பிரதேசங்களில் நள்ளிரவு வேளைகளிலும் வாகனங்கள் எரிபொருளுக்காக காத்திருப்பதை அவதானிக்க முடிகிறது. சுமார் இரு கிலோ மீற்றரை விட நீண்ட வரிசையில் வாகனங்கள் காத்திருப்பது குறிப்பிடத்தக்கதாகும்.

‘எரிபொருள் விலை 254 ரூபாவாகக் காணப்படுகிறது. நாம் எவ்வாறு வாழ்க்கையைக் கொண்டு செல்வது?’ , ‘மோட்டார் சைக்கிளை நிறுத்திவிட்டு நடந்து செல்வதே பொறுத்தமானதமாக இருக்கும்’ , ‘நாட்டின் பொருளாதாரத்தை முறையாக முகாமைத்துவம் செய்யாமையே இதற்கான காரணமாகும்.’ , ‘இதே போன்ற ஆட்சி தொடர்ந்தால் யுத்தத்தை விட மோசமான நிலைமையே ஏற்படும்.’ என்று வாகனங்களில் வரிசையில் காத்திருந்த சாரதிகள் விசனம் வெளியிட்டனர்.

பொதுமக்கள் அசௌகரியம்

சமையல் எரிவாயுவை பெற்றுக் கொள்ள முடியாமையால் ஹோட்டல் உரிமையாளர்கள் மாத்திரமின்றி சாதாரண மக்களின் அன்றாட நடவடிக்கைகளும் பாதிக்கப்பட்டுள்ளன.

குறிப்பாக கொழும்பு உள்ளிட்ட பெருநகர்ப்பகுதிகளில் தொடர்மாடி குடியிருப்புக்களில் வாழும் மக்களே இதனால் அதிகளவில் பாதிக்கப்பட்டுள்ளனர்.

தொடர்மாடி குடியிருப்புக்களில் மண்ணெண்ணெய் அடுப்பு மற்றும் விறகு அடுப்பு பாவனைக்கு அனுமதி வழங்கப்பட மாட்டாது என்பதால் இந்த மக்கள் பாதிக்கப்பட்டுள்ளனர்.

அத்தியாவசிய பொருட்களின் விலைகள் அதிகரித்துள்ளமையால் உணவு விலைகளும் அதிகரித்துள்ளன. இதன் காரணமாக சமைத்த உணவை கொள்வனவு செய்வதிலும் மக்கள் பெருமளவில் பாதிக்கப்பட்டுள்ளனர்.

அது மாத்திரமின்றி புறநகர் பகுதிகளில் சுற்றுலாத்துறையுடன் தொடர்புடைய தொழிலில் ஈடுபட்டுள்ள மக்களும் இதனால் பாதிக்கப்பட்டுள்ளனர்.

எரிவாயு இன்மையின் காரணமாக விறகு அடுப்புக்களில் உணவை சமைப்பதால் , சில சந்தர்ப்பங்களில் புகை மணம் வருவதால் சுற்றுலாப்பயணிகள் உணவை வாங்குவதில் பின்வாங்குவதாக சுற்றுலாத்தொழிலாளர்கள் தெரிவித்துள்ளமை குறிப்பிடத்தக்கது.