Author: TELO Admin

மாகாணங்களுக்கு இடையிலான பஸ் சேவையை இன்று நள்ளிரவு தொடக்கம் இடைநிறுத்த தேசிய போக்குவரத்து ஆணைக்குழு தீர்மானித்துள்ளது.

மாகாணங்களுக்கு இடையில் பயணக் கட்டுப்பாட்டை விதிப்பதற்கு அரசாங்கத்தினால் மேற்கொள்ளப்பட்ட தீர்மானத்திற்கு அமைய போக்குவரத்து சேவையும் இடைநிறுத்தப்படவுள்ளதாக தேசிய போக்குவரத்து ஆணைக்குழுவின் பணிப்பாளர் நாயகம் கமாண்டர் நிலான் மிராண்டா குறிப்பிட்டார்.

இதேவேளை, மாகாணங்களுக்கு இடையிலான பஸ் போக்குவரத்தை நேற்று (10) நள்ளிரவு முதல் இடைநிறுத்தியுள்ளதாக இலங்கை போக்குவரத்து சபையின் பிரதி பொது முகாமையாளர் A.H.பண்டுக ஸ்வர்ணஹங்ச குறிப்பிட்டார்.

எனினும், ஒரு மாகாணத்திலிருந்து மற்றுமொரு மாகாணத்திற்கு அரச சேவைக்காக பயணிக்கும் ஊழியர்களுக்காக மட்டுப்படுத்தப்பட்ட அளவில் பஸ் சேவை முன்னெடுக்கப்படும் என அவர் கூறினார்.

இதேவேளை மாகாணங்களுக்கு இடையிலான ரயில் போக்குவரத்து சேவையும் இன்று நள்ளிரவு முதல் இடைநிறுத்தப்படுவதாக ரயில்வே போக்குவரத்து அத்தியட்சகர் காமினி செனவிரத்ன குறிப்பிட்டார்.

ரயில்வே பொது முகாமையாளரின் தலைமையில் இன்று நடைபெற்ற கலந்துரையாடலின் போது இந்த தீர்மானம் எடுக்கப்பட்டதாக அவர் கூறினார்.

மேல் மாகாணத்திற்குள் அலுவலக ரயில்கள் மாத்திரம் இன்று சேவையில் ஈடுபடும் என ரயில்வே போக்குவரத்து அத்தியட்சகர் தெரிவித்தார்.

அம்பேபுஸ்ஸ, கொச்சிக்கடை, அலுத்கம மற்றும் அவிசாவளை ஆகிய பகுதிகளுக்கு மாத்திரமே இன்று நள்ளிரவுக்கு பின்னர் அலுவலக ரயில்கள் சேவையில் ஈடுபடும் என அவர் குறிப்பிட்டார்.

எனினும், வழமையாக சேவையில் ஈடுபடுத்தப்படும் 48 ரயில்களும் இன்று நள்ளிரவின் பின்னர் சேவையில் ஈடுபடுத்தப்பட மாட்டாது எனவும் ரயில்வே போக்குவரத்து அத்தியட்சகர் தெரிவித்தார்.

இன்றைய கலந்துரையாடலின் போது எடுக்கப்பட்ட தீர்மானத்திற்கு அமைய, இன்று நள்ளிரவின் பின்னர் மாகாணங்களுக்குள் மாத்திரம் ரயில் போக்குவரத்து முன்னெடுக்கப்படவுள்ளது.

இலங்கையில் அதிகரித்து வரும் கொரோனா வைரஸ் பரவல் தொற்று நிலைமையை கருத்திற்கொண்டு கிழக்கு மாகாணத்தில் மாவட்டங்களுக்கிடையில் பயணத்தடை விதிக்குமாறு கிழக்கு மாகாண ஆளுநர் அநுராதா யஹம்பத் பாதுகாப்பு பிரிவினக்கு அறிவுறுத்தல் விடுத்துள்ளார்.

ஆளுநரால் வெளியிடப்பட்டுள்ள அறிக்கை ஒன்றில் இந்த விடயம் தொடர்பாக தெரிவிக்கப்பட்டுள்ளது.

மேலும் கிழக்கு மாகாணத்தில் உள்ள வர்த்தக நிலையங்களை மாலை 6 மணியுடன் மூடவதற்கு நடவடிக்கை எடுக்குமாறு ஆளுநர் அறிவுறுத்தியுள்ளதாக இந்த அறிக்கையில் தெரிவிக்கப்பட்டுள்ளது.

இதேவேளை தேவையற்ற பயணங்களை தவிர்த்துக்கொள்ளுமாறு பொது மக்களுக்கு அறிவுறுத்தல் விடுக்கப்பட வேண்டும் எனவும் கிழக்கு மாகாண ஆளுநர் இந்த அறிக்கையில் தெரிவித்துள்ளார்.

முள்ளிவாய்க்கால் நினைவேந்தலுக்கு ஒன்றுகூடாது வீடுகளில் நினைவேந்தல் செய்யலாம்- இராணுவதளபதி.

கொரோனா பரவல் அதிகரித்துள்ள நிலையில் எதிர்வரும் மே 18 ஆம் திகதி முள்ளிவாய்க்கால் நினைவேந்தலைக் கடைப்பிடிப்பதற்காக முள்ளிவாய்க்கால் மண்ணில் மக்கள் அரசியல்வாதிகள் என்று எவர் ஒன்றுகூடினாலும் அனைவரும் கூண்டோடு கைதுசெய்யப்படுவார்கள் என இராணுவத்தளபதியும் கொவிட் செயலணி தலைவருமான சவேந்திரசில்வா தெரிவித்துள்ளார்.

கொரோனா பரவுவதை கட்டுப்படுத்துவதற்காக பல்வேறு விடயங்கள் அறிவிக்கப்பட்டுள்ளன. கடந்த 3 ஆம் திகதியிலிருந்து அரச மற்றும் தனியார் நிகழ்வுகள்​ மற்றும் நயினாதீவில் இடம்பெறவிருந்த வெசாக் நிகழ்வுகளும் நிறுத்தப்பட்டுள்ளன. அத்துடன் கொரோனா கட்டுப்பாட்டுக்காக விசேட வர்த்தமானியும் வெளியிடப்பட்டுள்ளது.

நினைவுகூரலுக்கு மக்கள் முள்ளிவாய்க்காலில் ஒன்றுகூடினால் அரசில்வாதிகள் மக்கள் என்ற வேறுபாடு இல்லாது கைதுசெய்யப்படுவார்கள்.

இறந்தவர்களை நினைவுகூரும் உரிமையை நாம் மறுக்கவில்லை. வீடுகளில் தனித்து அதனைச் செய்வதில் எமக்கு ஆட்சேபனையில்லை என தெரிவித்துள்ளார்.

நாடு முழுவதையும் முடக்குவதற்கு எவ்வித தீர்மானமும் இதுவரையில் எடுக்கப்படவில்லை என இராணுவ தளபதி ஜெனரல் ஷவேந்திர சில்வா தெரிவித்துள்ளார்.

இருப்பினும் எதிர்வரும் நாட்களில் மாகாணங்களுக்கு இடையிலான போக்குவரத்து கட்டுப்பாடு விதிக்க வாய்ப்பு இருப்பதாகவும் அவர் தெரிவித்துள்ளார்.

அதனால் நீண்ட வரிசைகளில் நின்று பொருட்களை கொள்வனவு செய்து சேகரிக்க தேவையில்லை எனவும் அவர் தெரிவித்துள்ளார்.

தமிழ் ஈழ விடுதலை இயக்கம் சுவிஸ் கிளையால் மறைந்த தலைவர் சிறி அண்ணா, மற்றும் அவருடன் மரணித்த 350க்கும் மேற்பட்ட போராளிகளுக்கும், பொதுமக்களுக்கும், சுவிஸ் கிளையால் சூரிச் மாநிலத்தில் முப்பத்தி ஐந்தாவது ஆண்டு நினைவஞ்சலி செலுத்தப்பட்டது,

அத்துடன் 1985ஆம் ஆண்டு மே 9-ஆம் தேதி எமது இயக்கம் நடத்திய மிகப்பெரிய இராணுவத் தளமான கொக்காவில் இராணுவ முகாம் தாக்குதலில் வீரமரணமடைந்த ஒன்பது போராளிகளுக்கும் 36வது ஆண்டு நினைவஞ்சலி செலுத்தப்பட்டது.

இந்நிகழ்வானது மூத்த உறுப்பினர் விமல் அவர்களின் தலைமையில்,

எமது மூத்த உறுப்பினரும் மதிப்பிற்குரிய சிவா அண்ணன் அவர்களின் அஞ்சலி உரையுடன் ஆரம்பமானது.

இந்நிகழ்வுக்கு மிக மட்டுப்படுத்தப்பட்ட உறுப்பினர்கள் அழைக்கப்பட்டனர்.

இதில் கலந்து கொண்ட அனைத்து உறுப்பினர்களும் Corona தடுப்பூசி (இரண்டையும்) போட்டுள்ளனர்.

எமது வேண்டுகோளை ஏற்று வீடுகளில் இருந்து அஞ்சலி செலுத்திய, மற்றும் Zoom, தொலைபேசி வாயிலாக, ஸ்கைப் , வாட்ஸ்அப் ஊடாக அஞ்சலி செலுத்திய அனைத்து சுவிஸ் கிளை உறுப்பினர்களுக்கும் எமது நன்றிகளை தெரிவித்துக்கொள்கின்றோம்.

நன்றி கிளை நிர்வாகம்.

நாட்டிலுள்ள பாடசாலைகள், பல்கலைக்கழகங்கள், முன்பள்ளிகள் மற்றும் பிரிவெனாக்கள் என்பனவற்றை மீளத் திறப்பது தொடர்பில் எதிர்வரும் புதன்கிழமை (12) கலந்துரையாடுவதற்கு எதிர்பார்த்துள்ளதாக கல்வியமைச்சு தெரிவித்துள்ளது.

இந்த கலந்துரையாடலில் கலந்துகொள்வதற்காக வைத்தியர்கள், கல்விசார் நிபுணர்கள் உள்ளிட்டோரை அழைப்பதற்கு எதிர்பார்ப்பதாக கல்வியமைச்சர், பேராசிரியர் ஜீ.எல். பீரிஸ் தெரிவித்துள்ளார்.

இதன்போது பெறப்படுகின்ற ஆலோசனைகளின் பிரகாரம் பாடசாலைகளை மீள திறப்பது தொடர்பான தீர்மானம் மேற்கொள்ளப்படும் என கல்வியமைச்சர் கூறியுள்ளார்.