Category: பிரதான செய்திகள்

நேற்று 17 07 2021 இரண்டாவது கட்டமான கலந்துரையாடல் தமிழ் தேசிய கட்சிகள் மத்தியில் நடைபெற்றது. தமிழ் மக்கள் தேசிய கூட்டணியின் அங்கத்துவ கட்சிகள் மற்றும் தமிழ் தேசிய கூட்டமைப்பின் அங்கத்துவ கட்சிகளாகிய ரெலோ மட்டும் புளட் உறுப்பினர்களும் கலந்துகொண்டனர்.

ஒருமித்த நிலைப்பாட்டில் செயலாற்றுவது பற்றியதான ஆரம்பகட்ட கலந்துரையாடல் காலை பதினொரு மணியிலிருந்து பகல் ஒன்றரை மணி வரைக்கும் நீதியரசர் சி விக்னேஸ்வரன் அவர்களுடைய நல்லூர் கோவில் வீதி இல்லத்தில் நடைபெற்றது.

ரெலோ சார்பில் தலைவர் செல்வம் அடைக்கலநாதன் செயலாளர் நாயகம் கோவிந்தன் கருணாகரம் அரசியல் குழு உறுப்பினர் வினோ நோகராதலிங்கம் ஊடகப்பேச்சாளர் சுரேந்திரன் புளட் சார்பில் தலைவர் சித்தார்த்தன் தமிழ்தேசிய மக்கள் கூட்டணி சார்பில் தலைவர் நீதியரசர் சி. விக்னேஸ்வரன் திரு சுரேஷ் பிரேமச்சந்திரன், பேராசிரியர் திரு சிவநாதன், திரு. சிற்பரன் , தமிழ் தேசியக் கட்சியின் சார்பில் திரு சிவாஜிலிங்கம், தமிழர் சுயாட்சி கட்சியின் சார்பில் திருமதி அனந்தி சசிதரன் ஆகியோர் கலந்துகொண்டிருந்தனர்.

சுமார் இரண்டரை மணி நேரம் நடைபெற்ற இந்த கலந்துரையாடலில் தமிழ்மக்கள் எதிர்நோக்குகின்ற பிரச்சினைகள் இவற்றிற்கு எதிராக கடந்த காலங்களில் ஒருமித்து செயலாற்றிய வரலாறுகள் மற்றும் எடுக்கப்பட்ட நடவடிக்கைகள், தற்பொழுது இருக்கக்கூடிய அரசாங்கத்தின் மூன்றிலிரண்டு பெரும்பான்மை பலமும் நிறைவேற்று அதிகாரம் துரிதமான முடிவுகளை தமிழ் மக்களுக்கு எதிராக பிரயோகிக்க முற்படும் போக்கு, இழுத்தடிக்கப்படும் மாகாணசபைத் தேர்தல்கள், தேர்தல் முறை மாற்றம், காணி அபகரிப்பு, திட்டமிட்ட குடியேற்றம், சர்வதேச அரசியல் சூழ்நிலைகள், அரசியல் கைதிகளின் விடுதலை, மனித உரிமைப் பேரவை உட்பட பல்வேறு விடயங்கள் முன்னெடுக்கப்பட்டன.

பிரதிநிதித்துவம் உள்ள தமிழ் தேசிய பாராளுமன்ற உறுப்பினர்கள் பலத்தை ஒருமித்து பயன்படுத்தும் வழிமுறைகளும் ஆராயப்பட்டன.

தற்போதைய சூழ்நிலையில் ஏற்கனவே இருக்கும் கட்சிகள் மற்றும் கூட்டுகள் தங்களுடைய கட்டமைப்பை பேணும் வகையிலும் கொள்கை முரண்பாடுகளை தவிர்த்துக் கொள்ளும் வகையிலும் செயல்பட இணக்கம் காணப்பட்ட பட்டது.

ஒருமித்த நிலைபாட்டில் கடந்த காலங்களிலும் பயணித்த அனுபவம் அனைத்து தரப்பினருக்கும் உள்ளது. ஆகவே எதிர்காலங்களிலும் ஒருமித்த நிலைப்பாட்டில் செயல்படுவது எல்லோராலும் வரவேற்கப்பட்டது.

ஒருமித்த நிலைப்பாட்டில் செயற்படக்கூடிய விடையங்களை தீர்மானிப்பதற்கு முதல்கட்டமாக எமது மக்களின் பிரச்சனைகள் அடங்கிய விபரத்தை தயாரிக்கவும்

துரிதமாகவும் தீவிரமாகவும் செயற்படுவதற்கு இயன்றளவு தொழில்நுட்ப வசதியை பயன்படுத்தி இணைய வழியின் ஊடாகவும் சந்திப்புகளை மேற்கொள்வதும் என்ற ஒருமித்த நிலைப்பாட்டோடு கலந்துரையாடல் நிறைவு பெற்றது

சுரேந்திரன்
ஊடகப் பேச்சாளர் ரெலோ

அரசாங்க பொறுப்பு முயற்சிகள் பற்றிய குழு (கோப்), அமைச்சு சார் ஆலோசனைக் குழுக்கள் உள்ளிட்ட 13 பாராளுமன்ற குழுக்கள் எதிர்வரும் 03 வாரங்களில் கூடவுள்ளதாக பாராளுமன்ற செயலாளர் நாயகம் தம்மிக்க தசநாயக்க தெரிவித்தார்.

அதற்கமைய, எதிர்வரும் 19 ஆம் திகதி தேசிய திரைப்பட கூட்டுத்தாபனம் கோப் குழு முன்னிலையில் அழைக்கப்பட்டுள்ளதுடன், கோப் குழு அதன் தலைவர் பேராசிரியர் சரித ஹேரத் தலைமையில் கூடவுள்ளது. அன்றைய தினம் நெடுஞ்சாலை அலுவல்கள் பற்றிய அமைச்சு சார் ஆலோசனைக் குழு அதன் தலைவர் அமைச்சர் ஜோன்ஸ்டன் பெர்ணான்டோ தலைமையில் கூடவுள்ளது.

எதிர்வரும் 20 ஆம் திகதி வெகுசன ஊடக அலுவல்கள் பற்றிய அமைச்சு சார் ஆலோசனைக் குழு அதன் தலைவர் அமைச்சர் கெஹெலிய ரம்புக்வெல்ல தலைமையில் கூடவுள்ளதாக செயலாளர் நாயகம் தெரிவித்தார்.

அதற்கு மேலதிகமாக, ஆகஸ்ட் மாதம் 03 ஆம் திகதி சுற்றுலாத்துறை அலுவல்கள் பற்றிய அமைச்சு சார் ஆலோசனைக் குழு அதன் தலைவர் அமைச்சர் பிரசன்ன ரணதுங்க தலைமையிலும், நீதி அலுவல்கள் பற்றிய அமைச்சு சார் ஆலோசனைக் குழு அதன் தலைவர் அமைச்சர் அலி சப்ரி தலைமையிலும் சுகாதார அலுவல்கள் பற்றிய அமைச்சு சார் ஆலோசனைக் குழு அதன் தலைவர் அமைச்சர் பவித்ரா வன்னிஆராச்சி தலைமையிலும் கூடவுள்ளது.

அதேவேளை, ஆகஸ்ட் 04 ஆம் திகதி வெளிநாட்டு அலுவல்கள் பற்றிய அமைச்சுசார் ஆலோசனைக் குழு அதன் தலைவர் அமைச்சர் தினேஷ் குணவர்தன தலையில் பாராளுமன்றத்தில் கூடவுள்ளதாக பாராளுமன்ற செயலாளர் நாயகம் மேலும் தெரிவித்தார்.

ஆகஸ்ட் 05 ஆம் திகதி சுற்றாடல் அமைச்சர் மஹிந்த அமரவீர தலைமையில் சுற்றாடல் அலுவல்கள் பற்றிய அமைச்சு சார் ஆலோசனைக் குழு கூடவுள்ளதுடன், நீதி அலுவல்கள் பற்றிய அமைச்சு சார் ஆலோசனைக் குழுவும் கூடவுள்ளது. மேலும், அன்றைய தினம் கடற்றொழில் அலுவல்கள் பற்றிய அமைச்சு சார் ஆலோசனைக் குழு அத தலைவர் அமைச்சர் டக்ளஸ் தேவானந்தா தலைமையில் கூடவுள்ளது.

அதேவேளை, எதிர்வரும் 17 ஆம் திகதி நீதி அலுவல்கள் பற்றிய அமைச்சு சார் ஆலோசனைக் குழு கூடவுள்ளதுடன் அன்றைய தினம் அமைச்சர் சீ.பீ. ரத்நாயக்க தலைமையில் வனசீவராசிகள் மற்றும் வனப் பாதுகாப்பு அலுவல்கள் பற்றிய அமைச்சு சார் ஆலோசனைக் குழுவும் கூடவுள்ளது.

ஆகஸ்ட் 18 ஆம் திகதி மீண்டும் நீதி அலுவல்கள் பற்றிய அமைச்சு சார் ஆலோசனைக் குழு கூடவுள்ளதாகவும், 19 ஆம் திகதி உயர் பதவிகள் பற்றிய குழு கூடவுள்ளதாகவும் பாராளுமன்ற செயலாளர் நாயகம் தம்மிக்க தசநாயக்க தெரிவித்தார்.

நாட்டின் பொருளாதாரம் பாரிய வீழ்ச்சியடைந்துள்ள நிலையில் அதனைச் செய்வது தொடர்பிலும், பலமிக்க மாற்று அரசியல் சக்தியை உருவாக்குவது குறித்தும் இன்று பல எதிர்க்கட்சிகள் முக்கிய சந்திப்பில் ஈடுபட்டன.

முன்னாள் சபாநாயகர் கரு ஜயசூரியவின் தலைமையில் கொழும்பிலுள்ள ஜானகி ஹோட்டலில் இந்தச் சந்திப்பு இடம்பெற்றது.

இதில் கலந்துகொள்ள அனைத்து எதிர்க்கட்சிகளின் பிரதிநிதிகளுக்கும் அழைப்பு விடுக்கப்பட்டது.

தமிழர் தரப்பிலுள்ள ஒவ்வொரு கட்சிகளுக்கும் தனித்தனியாக அழைப்பு அனுப்பப்பட்டது. எனினும், இந்தக் கூட்டத்தில் இலங்கைத் தமிழரசுக் கட்சியின் சார்பில் அதன் தலைவர் மாவை சேனாதிராஜாவும், பேச்சாளர் எம்.ஏ.சுமந்திரனும் கலந்துகொண்டனர். தமிழ் முற்போக்குக் கூட்டணி சார்பில் அதன் தலைவர் மனோ கணேசன் உள்ளிட்ட பிரதிநிதிகள் கலந்துகொண்டனர்.

ரெலோ, புளொட், தமிழ் மக்கள் தேசியக் கூட்டணி, தமிழ்த் தேசிய மக்கள் முன்னணி ஆகிய கட்சிகளின் பிரதிநிதிகள் எவரும் சந்திப்பில் பங்கேற்கவில்லை.

ஆனால், சந்திப்புக்கு ஆதரவு தெரிவித்து குறித்த கட்சிகளின் தலைவர்கள் கடிதம் அனுப்பியிருந்தனர்.

இதேவேளை, இன்றைய சந்திப்பில் எதிர்க்கட்சித் தலைவரான ஐக்கிய மக்கள் சக்தியின் தலைவர் சஜித் பிரேமதாஸ பங்கேற்றிருந்த போதிலும், ஐக்கிய தேசியக் கட்சியின் தலைவர் ரணில் விக்கிரமசிங்க பங்கேற்கவில்லை.

சந்திப்புக்கான ரணிலின் ஆதரவுக் கடிதத்துடன் அவரின் பிரதிநிதி ஒருவர் கலந்துகொண்டார்.

முன்னாள் பிரதமர் ரணில் விக்கரமசிங்கவுக்கும், எதிர்க்கட்சித் தலைவர் சஜித் பிரேமதாஸவுக்கும் இடையிலான சந்திப்பொன்று இன்று சனிக்கிழமை(17) பிற்பகல் இடம்பெறவுள்ளது.

மேற்படி சந்திப்புக்கள் ஏற்பாட்டை முன்னாள் சபாநாயகர் கரு ஜயசூரிய மேற்கொண்டுள்ளமையும் இங்கு குறிப்பிடத்தக்கது.

முன்னாள் அமைச்சர் ரிஷாத் பதியுதீனின் கொழும்பு பெளத்தாலோக்க மாவத்தை வீட்டில், வீட்டு வேலைகளுக்கு அமர்த்தப்பட்டிருந்த ஜூட் குமார் ஹிஷாலினி எனும் 16 வயது சிறுமி , உடலில் தீ பரவி பலத்த காயங்களுக்குள்ளாகி உயிரிழந்த சம்பவம் தொடர்பில் தீவிர விசாரணைகள் ஆரம்பிக்கப்பட்டுள்ளன.

கொழும்பு தெற்கு சிறுவர் மற்றும் மகளிர் துஷ்பிரயோக தடுப்புப் பிரிவு அதிகாரிகளும், பொரளை பொலிஸாரும் இணைந்து இந்த தீவிர புலன் விசாரணைகளை ஆரம்பித்துள்ளதாக பொலிஸ் ஊடகப் பேச்சாளரும் குற்றவியல் மற்றும் போக்குவரத்து விவகாரங்களுக்கான பிரதானியுமான சிரேஷ்ட பிரதிப் பொலிஸ் மா அதிபர் அஜித் ரோஹண தெரிவித்தார்.

இறக்கும் போது 16 வயதும் 8 மாதங்களும் பூர்த்தியான குறித்த அட்டன் – டயகம மேற்கு பகுதியைச் சேர்ந்த குறித்த சிறுமி விவகாரத்தில் இதுவரை வெளிப்படுத்தப்பட்டுள்ள தகவல்களை மையப்படுத்தி இந்த விசாரணைகள் முன்னெடுக்கப்பட்டு வருவதாக சிரேஷ்ட பிரதிப் பொலிஸ் மா அதிபர் அஜித் ரோஹண மேலும் குறிப்பிட்டார்.

கடந்த 3 ஆம் திகதி வெள்ளியன்று உடலில் தீ பரவியமை காரணமாக கொழும்பு தேசிய வைத்தியசாலையில் ஹிஷாலினி அனுமதிக்கப்பட்டுள்ளதுடன், வைத்தியசாலை பொலிஸ் பொறுப்பதிகாரி இது தொடர்பில் பொரளை பொலிசாருக்கு அறிவித்து முறையிட்ட நிலையில், இந்த விவகாரத்தில் விசாரணைகள் ஆரம்பிக்கப்பட்டிருந்தன.

இது தொடர்பில் கடந்த 7 ஆம் திகதி கொழும்பு மேலதிக நீதிவான் லோச்சனீ அபேவிக்ரம முன்னிலையில் பொரளை பொலிஸாரால் விடயங்கள் தெளிவுபடுத்தப்பட்டு, இரசாயன பகுப்பாய்வுக்கான உத்தரவுகள் பெற்றுக்கொள்ளப்பட்டிருந்தன.

இந் நிலையில் பலத்த தீ காயங்களுக்குள்ளான ஹிஷாலினி கொழும்பு தேசிய வைத்தியசாலையில் 73 ஆவது சிகிச்சை அறையில் தீவிர சிகிச்சைப் பிரிவு 2 இல் சிகிச்சைப் பெற்று வந்த நிலையில் கடந்த 15 ஆம் திகதி உயிரிழந்தார்.

இதனையடுத்து கொழும்பு தேசிய வைத்தியசாலைக்கு சென்ற, கொழும்பு மேலதிக நீதிவான் ரஜீந்ரா ஜயசூரிய, வழக்கிலக்கம் பீ/52944/2/21 இற்கு அமைய, உயிரிழந்த ஹிஷாலினி தொடர்பில் பிரேத பரிசோதனைகளை முன்னெடுக்க உத்தரவிட்டிருந்தார்.

அதன்படி ஹிஷாலினியின் சடலம் மீதான பரிசோதனைகள் கொழும்பு சட்ட மருத்துவ நச்சு ஆய்வியல் நிலையம் ஊடாக முன்னெடுக்கப்பட்டது.

கொழும்பு விஷேட சட்ட வைத்திய நிபுணர் எம்.என். ரூஹுல் ஹக் இந்த பிரேத பரிசோதனைகளை முன்னெடுத்த நிலையில், வெளிப்புற தீக்காயங்கள் , கிருமி தொற்றினால் ஏற்பட்ட அதிர்ச்சி மரணத்துக்கான காரணமாக அதில் கண்டறியப்பட்டுள்ளது.

விஷேடமாக குறித்த பிரேத பரிசோதனை அறிக்கையின் படி, விஷேட சட்ட வைத்திய நிபுணர் எம்.என். ரூஹுல் ஹக், 3 சிறப்பு குறிப்புக்களை இட்டுள்ளதுடன், அதில் ஹிஷாலினியின் உடலில் 72 வீதமான பகுதி தீயினால் முற்றாக எரிந்துள்ளதாக குறிப்பிட்டுள்ளார்.

அத்துடன் ஹிஷாலினி எந்தவிதமான சித்திரவதைகள், கொடுமைகளுக்கும் உள்ளாக்கப்பட்டதற்கான சான்றுகள் இல்லை என குறிப்பிட்டுள்ள சட்ட வைத்திய அதிகாரி, நாற்பட்ட பாலியல் ஊடுருவல் தொடர்பிலான சான்றுகள் உள்ளதாக சுட்டிக்கட்டியுள்ளார்.

இந் நிலையிலேயே ஹிஷாலினி விவகாரத்தில் இருவேறு விடயங்களை மையப்படுத்தி பொலிஸார் விசாரணைகளை தீவிரப்படுத்தியுள்ளனர்.

ஹிஷாலினி பாலியல் துஷ்பிரயோகங்களுக்கு உள்ளாக்கப்பட்டுள்ளாரா, அவர் வீட்டு வேலைக்காக சேர்க்கப்படும் போது 16 வயதை பூர்த்தி செய்திருந்தாரா என்பது தொடர்பில் விசாரணைகள் தொடர்கின்றன.

நாட்டின் எதிர்காலத்திற்காக முன்னெடுக்கப்படும் கொள்கை சார்ந்த திட்டங்களுக்கு ஒரு சிலர் எதிர்ப்பு தெரிவிப்பது எதிர்கால தலைமுறையினருக்கு இழைக்கும் மாபெரும் துரோகமாக கருதப்படும்.

பல்கலைக்கழக மானியங்கள் ஆணைக்குழு சட்ட மூலத்தில் உள்ள தடைகளை நீக்கி கொத்தலாவல பாதுகாப்பு பல்கலைக்கழகம் பல்கலைக்கழக மானியங்கள் ஆணைக்குழுவின் கீழ் கொண்டு வரப்படும் என ஜனாதிபதி கோட்டாபய ராஜபக்ஷ பௌத்த மகாசங்கத்தினரிடம் குறிப்பிட்டார்.

ஜனாதிபதி தலைமையில் நேற்று வெள்ளிக்கிழமை பௌத்த ஆலோசனை சபை ஜனாதிபதி செயலகத்தில் கூடியது. இதன் போதே ஜனாதிபதி மேற்கண்டவாறு குறிப்பிட்டார்.

ஜனாதிபதி மேலும் குறிப்பிட்டதாவது,

உயர் கல்விக்காக வெளிநாடுகளுக்கு செல்லும் மாணவர்கள் அதிக நிதியை செலவு செய்கிறார்கள். இந் நிதியை சேமிக்க வேண்டுமாயின் உயர் தரம் வாய்ந்த பல்கலைகழகங்கள் நாட்டில் உருவாக்கப்பட வேண்டும்.

பல்கலைக்கழக மானியங்கள் ஆணைக்குழு சட்ட மூலத்தில் உள்ள தடைகளை நீக்கி கொத்தலாவல பாதுகாப்பு பல்கலைக்கழகம் பல்கலைக்கழக மானியங்கள் ஆணைக்குழுவின் கீழ் கொண்டு வரப்படும் என ஜனாதிபதி குறிப்பிட்டார்.