Category: பிரதான செய்திகள்

தமிழ் தேசிய கட்சிகளின் ரெலோ, தமிழ் அரசு கட்சி, தமிழ் தேசிய மக்கள் முன்னணி, தமிழ் மக்கள் கூட்டணி மற்றும் புளட் ஆகிய கட்சிகளின் பாராளுமன்ற உறுப்பினர்கள் ஒன்றிணைந்து தமிழ் மக்களின் பல்வேறு பிரச்சனைகள் தொடர்பில் அமைச்சர் சமல்ராஜபக்சவை சந்தித்து கலந்துரையாடியுள்ளனர்.

இதன் போது பல்வேறு விடயங்களுக்கு அமைச்சர் சாதகமான பதில்களை வழங்கியுள்ளதுடன் அடுத்த கட்டமாக மீண்டும் ஒரு சந்திப்பை நடத்துவதற்கும் இணக்கம் காணப்பட்டுள்ளது.

1.கல்முனை பிரதேச செயலகத்தை தரமிறக்கும் நடவடிக்கையை நிறுத்தி வைக்க இணக்கம் தெரிவித்தார்.

2. முல்லை கரைத்துறைப்பற்றில் 08 கிராம சேவையார் பிரிவுகளதும் காணி நிர்வாகத்தினை மகாவலி அதிகார சபை பொறுப்பேற்பதனை தற்காலிகமாக நிறுத்த நடவடிக்கை எடுப்பதாக இணங்கினார்.

இது தொடர்பில் குழு அமைத்து ஆராயும் வரை எந்த நடவடிக்கையும் மேலதிகமாக நடைபெறாதனவும் இணங்கினார்.

3. மாதுறு ஓயா இடது கரை நீர்ப்பாசன நீரை வாகனேரி குளத்திற்கு கொண்டு செல்லும் வகையில் விளானோடையில் தடுப்பு அணை அமைக்க வேண்டும் என்ற கோரிக்கைக்கும் இணங்கினார்.

4.மகாவலி நீர் கோடைகாலத்தில் மாவில் பகுதியில் மறிக்கப்பட்டு கோடைகால விவசாயத்திற்காக மூதூர் பகுதிகளுக்கு அனுப்பப்படுகிறது.

இதனால் மாவில் பகுதியிலிருந்து கடற்கரை வரையான 12KM நீளமான பகுதியில் மாகாவலி ஆற்றின் இரு கரைகளிலும் ஏற்று நீர்ப்பாசனம் மூலம் விவசாயம் மேற்கொள்ளும் விவசாயிகள் மார்ச் முதல் செப்ரெம்பர் வரை நீர் இன்மையால் நீர்ப்பாசனம் செய்ய முடியாத நிலையில் பயிர்கள் அழிவடைகிறது.

அதனால் மாதம் இருமுறை மாவில் பகுதியிலிருந்து நீரை திறந்து ஏற்று நீர்ப்பாசன விவசாயிகளுக்கு வசதி செய்யுமாறு கோரனோம் அதற்கும் இணங்கினார்.

5.அபிவிருத்தி உத்தியோகத்தர்களது இடமாற்ற விடயம் பற்றிப் பேசுவதற்கு இம்மாத இறுதியில் நேரம் ஒதுக்குவதாக தெரிவித்தார்.

நாட்டில் கொரோனா பரவல் மீண்டும் தீவிரமடைந்து, பல இடங்களில் சிகிச்சை பெறுவது கடினமாக இருக்கின்ற சூழ்நிலையில் அரசாங்கம் ரஷ்யாவிடம் உலங்கு வானூர்திகளை கொள்வனவு செய்ய எடுக்கும் முயற்சி தொடர்பில் விசனம் வெளியிட்டுள்ளார் எதிர்க்கட்சித் தலைவர் சஜித் பிரேமதாச.

மக்களுக்கு சிகிச்சையளிப்பதற்கே முன்னுரிமை வழங்கப்பட வேண்டும் எனவும் ஹெலிகப்டர் கொள்வனவு தற்போது அவசியமற்றது எனவும் அவர் சுட்டிக்காட்டியுள்ளார்.

இது போன்ற சூழ்நிலையில் அரசாங்கம் பணத்தை விரயப்படுத்துவதை ஏற்றுக்கொள்ள முடியாது என அவர் தெரிவித்துள்ளமை குறிப்பிடத்தக்கது.

கொழும்பு துறைமுக நகர விசேட வர்த்தக ஆணைக்குழு சட்டமூலம் தொடர்பான உயர் நீதிமன்றத்தின் தீர்ப்பு பாராளுமன்றத்திற்கு கிடைக்காமையால், நாளை (05) நடைபெறவிருந்த விவாதம் ஒத்திவைக்கப்பட்டது.

இந்த விடயத்தை சபாநாயகர் மஹிந்த யாப்பா அபேவர்தன உறுதிப்படுத்தினார்.

கல்விப் பொதுத் தராதர சாதாரண தரப் பரீட்சை மற்றும் கல்விப் பொதுத் தராதர உயர்தரப் பரீட்சை ஆகிய இரண்டு பரீட்சைகளையும் நடத்தும் மாதங்களில் மேற்கொள்ளப்பட்ட மாற்றம் இவ்வாண்டு அமுல்படுத்தப்படமாட்டாது என கல்வி அமைச்சின் செயலாளர் கபில பெரேரா தெரிவித்துள்ளார்.

ஓகஸ்ட் மாதம் சாதாரண தர பரீட்சையையும், டிசம்பரில் உயர்தர பரீட்சையும் நடத்துவதற்கு அமைச்சரவை அனுமதி வழங்கியிருந்தது.

இருப்பினும் இந்த மாற்றம் 2022 ஆண்டு அல்லது 2023 ஆம் ஆண்டே அமுல்படுத்தப்படும் என அவர் தெரிவித்துள்ளார்.

இதேவேளை 10 மற்றும் 11 ஆம் தரங்களுக்கான பாடத்திட்டத்தை ஒரு வருடமும் 09 மாதங்களுக்கு மட்டுப்படுத்தி மறுசீரமைக்க கல்வி அமைச்சர் முன்மொழிந்த யோசனைக்கும் அமைச்சரவை அனுமதி வழங்கியிருந்தது.

அதன்படி, அரச பல்கலைக்கழகங்களுக்கு மாணவர்களைத் தேர்ந்தெடுப்பதற்கு எடுக்கும் காலத்தை குறைப்பதன் மூலம் குறுகிய காலத்தில் மாணவர்கள் முதல் பட்டப்படிப்பைப் பெறுவதற்கான வாய்ப்பு வழங்கப்படவுள்ளமை குறிப்பிடத்தக்கது.

தமிழர் இதயபூமியை மகாவலி எல் வலயம் அபகரிக்க முயற்சி என தமிழ் ஈழ விடுதலை இயக்கத்தின் இளைஞர் அணித் தலைவரும் முன்னாள் மாகாண சபை உறுப்பினருமான சபா குகதாஸ் தெரிவித்துள்ளார்.

முல்லைத்தீவு மாவட்டத்தில் மகாவலி எல் வலயத்தின் மூலம் கபளீகரம் செய்ய முயற்சிக்கும் மத்திய அரசாங்கத்தின் முயற்சிக்கு வடக்கு மாகாண ஆளுநர் நிர்வாகம் உடன்படக் கூடாது அதனை தடுத்து நிறுத்த வேண்டும்.

தமிழர்கள் பூர்வீகமாக வாழ்ந்த பிரதேசங்களை சிங்கள குடியேற்றங்களுக்கு உட்படுத்தி தமிழர் தாயக கோட்பாட்டை உடைக்கும் பேரினவாத அரசாங்கத்தின் நிகழ்ச்சி நிரலை தடுத்து நிறுத்த தொடர்ந்து தமிழ் மக்கள் போராடி வரும் நிலையில் வடக்கு கிழக்கு இணைப்பை நிலத் தொடர்பு ரீதியாக இல்லாது ஒழிக்கும் இந்த மகாவலி எல் வலயம் திட்டமிட்ட ஒரு இனவழிப்பு என்பதை தெட்டத் தெளிவாக காட்டுகின்றது.

முல்லைத்தீவு மாவட்டம் தமிழர்களின் இதய பூமி அதனை அபகரிக்கும் பாரிய திட்டம் முதற்கட்டமாக மணலாறு பிரதேசம் வெலிஓயா என்ற பெயர்மாற்று சிங்கள குடியேற்றத்துடன் ஆரம்பமாகி தென்னமரவடி,கொக்குளாய்,கொக்குத் தொடுவாய்,கருநாட்டுக்கேணி,செம்மலை தண்ணீர் ஊற்று என பெரும் நிலப் பிரதேசங்களை உள்ளடக்கி 16 அதிகமான கிராம உத்தியோகத்தர் பிரிவுகளை கொண்ட ஒரு சிங்கள பிரதேச செயலகப் பிரிவை குறிவைத்து நகர்த்தப்படுகின்றது.

இப்பகுதியில் வாழ்ந்த தமிழர்கள் 1984 ஆண்டின் பின்னர் யுத்தத்தினால் இடம்பெயர ஆரம்பித்து 2010 வரை அகதிகளாக அவலங்களை அனுபவித்து மிகுந்த வறுமையில் தற்போது குடியேறி வாழும் போது போதிய உதவிகள் இன்றி துன்படுகின்றனர்.

வடக்கு மாகாணத்தில் 75000 இளைஞர் யுவதிகள் வேலைவாய்ப்பு இல்லாமல் பெரும் துயரங்களை அனுபவிக்கின்றனர்.

அவர்களுக்கான சுய தொழில் முயற்சிக்கு காணிகள் வழங்குவதன் மூலம் தொழில் வாய்ப்பு பிரச்சினைக்கு தீர்வு வழங்கலாம் அத்துடன் தற்சார்புப் பொருளாதாரத்தை மேம்படுத்தலாம்.

இதற்கு வடக்கு மாகாண ஆளுநர் நிர்வாகம் அரசாங்கத்திடம் திட்டங்களை முன் மொழிந்து இளைய தலைமுறையின் நல்வாழ்விற்கு உதவி புரிய வேண்டும்.

ஏற்கனவே புதிய தொழில் முயற்சியாளர்களுக்கு காணி வழங்க விண்ணப்பங்கள் கோரப்பட்டு விண்ணப்பித்தோர் எதிர்பார்த்து காத்திருக்கும் போது அவர்களுக்கான தீர்வையாவது இதன் ஊடாக தீர்க்க நடவடிக்கை எடுங்கள்.

வடக்கு மாகாண ஆளுநர் நிர்வாகம் நியாயமற்ற குடியேற்ற திட்டத்திற்கு ஒத்துழைப்பு வழங்காது தமிழர்களின் இருப்பை பாதுகாக்க நீதியாக நடந்து கொள்ள வேண்டும்.

ஊடகங்களின் கருத்துச்சுதந்திரத்தை உறுதிப்படுத்த வேண்டிய பொறுப்பு அரசாங்கத்திற்கு உள்ளது. ஊடகவியலாளர்கள் மீதான வன்முறைச் சம்பவங்கள் தொடர்பில் முழுமையான விசாரணைகளை நடத்தி, குற்றவாளிகளை சட்டத்தின் முன்நிறுத்துவதற்கு அரசாங்கம் நடவடிக்கை எடுக்கவேண்டும் என்று சர்வதேச மன்னிப்புச்சபை வலியுறுத்தியுள்ளது.

சர்வதேச பத்திரிகை சுதந்திர தினத்தை முன்னிட்டு, இலங்கை தொடர்பில் சர்வதேச மன்னிப்புச்சபை அதன் உத்தியோகபூர்வ டுவிட்டர் பக்கத்தில் செய்திருக்கும் பதிவிலேயே மேற்கண்டவாறு குறிப்பிட்டுள்ளது.

மக்களின் கருத்துச்சுதந்திரத்தை, குறிப்பாக ஊடகங்களின் கருத்துச்சுதந்திரத்தை அரசாங்கம் உறுதிப்படுத்த வேண்டும் என்று அப்பதிவில் சுட்டிக்காட்டியிருக்கும் மன்னிப்புச்சபை, ஊடகத்துறையில் பணியாற்றுவோருக்கான பாதுகாப்பான சூழலை உறுதிசெய்வதன் மூலம் அவர்கள் எவ்வித அச்சமும் இழப்புமின்றி உண்மையான செய்திகளை அல்லது தகவல்களை வெளியிடுவதற்கு அல்லது பேசுவதற்கு இடமளிக்க முடியும் என்றும் தெரிவித்துள்ளது.

மேலும் அண்மைய வருடங்களில் தொடர்ச்சியாக அவதானிக்கப்பட்டுவரும் ஊடகவியலாளர்கள் மீதான அடக்குமுறைகள் மிகவும் கவலைக்குரியவையாகும் என்றும் சர்வதேச மன்னிப்புச்சபை குறிப்பிட்டுள்ளது.

ஊடகவியலாளர்கள் மீதான அடக்குமுறைகள் பற்றிய குற்றச்சாட்டுக்கள் தொடர்பில் அரசாங்கம் எவ்வித பக்கச்சார்புமின்றி முழுமையாக விசாரணை மேற்கொள்வதுடன், அவற்றுடன் சம்பந்தப்பட்ட குற்றவாளிகளை சட்டத்தின்முன் நிறுத்த வேண்டும் என்றும் மன்னிப்புச்சபை வலியுறுத்தியுள்ளமை குறிப்பிடத்தக்கது.