அமெரிக்கப்பிரஜை என்ற ரீதியில் நான் முதலாவது தலைமுறையைச் சேர்ந்தவளாவேன். எனக்கு ஐந்து வயதாக இருந்தபோது எனது குடும்பம் கொரியாவிலிருந்து அமெரிக்காவிற்குக் குடிபெயர்ந்தது.
ஆகவே என்னைப்பொறுத்தமட்டில் பல்லினத்தன்மை மற்றும் சகிப்புத்தன்மை என்பன மிகவும் முக்கியமான விடயங்களாகும் என்று தெரிவித்துள்ள இலங்கைக்கான புதிய அமெரிக்கத்தூதுவர் ஜுலி சங், இலங்கைக்கு மீண்டும் வருகைதருவது கனவொன்று நனவானதைப்போன்ற விடயமாகும் என்றும் குறிப்பிட்டுள்ளார்.
இலங்கைக்கான புதிய அமெரிக்கத்தூதுவராக நியமிக்கப்பட்டுள்ள ஜுலி சங் சனிக்கிழமை (19 )கொழும்பை வந்தடைந்துள்ள நிலையில், இலங்கை மக்களுக்குத் தன்னை அறிமுகப்படுத்திக்கொள்ளும் வகையில் தனது உத்தியோகபூர்வ டுவிட்டர் பக்கத்தின் ஊடாகப் பகிர்ந்திருக்கும் காணொளியிலேயே அவர் மேற்கண்டவாறு குறிப்பிட்டிருக்கின்றார்.
அக்காணொளியில் ஜுலி சங் மேலும் கூறியிருப்பதாவது:
என்னைப்பொறுத்தமட்டில் இலங்கைக்கு மீண்டும் வருகைதருவது கனவொன்று நனவானதைப்போன்ற விடயமாகும்.
நான் பத்து வருடங்களுக்கு முன்னர் இலங்கைக்கு வருகைதந்திருந்தேன். அந்த நினைவுகள் இப்போதும் தெளிவாகவும் புதிதாகவும் என்னுள் பதிந்திருக்கின்றன.
ஆச்சரியம் மிகுந்த இயற்கை அழகு, சுவையான உணவுப்பொருட்கள் மற்றும் வாசனைத்திரவியங்கள் புகையிரம் மற்றும் முச்சக்கரவண்டிகள், அவையனைத்திற்கும் மேலாக அப்போது நான் சந்தித்த இலங்கை மக்கள் காண்பித்த அன்பு உள்ளிட்ட அனைத்தும் நினைவிருக்கின்றன.
இவ்வாறானதொரு பின்னணியில் தற்போது இலங்கைக்கான தூதுவராகப் பதவியேற்பது எனக்குக் கிடைத்த கௌரவமாகும்.
அதனூடாக இலங்கையின் கலாசாரம், பாரம்பரியம் உள்ளிட்ட பல்வேறு விடயங்கள் தொடர்பில் மேலும் அறிந்துகொள்வதற்கு எதிர்பார்க்கின்றேன்.
உலகின் பல்வேறு பகுதிகளிலிருந்தும் குடியேறிய மக்களின் முயற்சியினால் கடந்த இரு நூற்றாண்டு காலமாக நவீன தொழில்நுட்ப மாற்றங்கள் மற்றும் புத்தாக்கங்களை உள்வாங்கி அமெரிக்கா முன்னேற்றம் கண்டிருப்பதுடன் அதன் பொருளாதார வளர்ச்சிக்குப் பலரும் பங்களிப்புச்செய்திருக்கின்றார்கள்.
அந்த முயற்சி இலங்கைக்கான தூதுவர் என்ற ரீதியில் நான் ஆற்றவிருக்கும் பணியிலும் பிரதிபலிக்கும். அதன்படி இலங்கையிலுள்ள சிவில் சமூக அமைப்புக்கள், வர்த்தகத்துறையினர் மற்றும் இளைஞர்கள் உள்ளிட்ட தரப்புக்களுடன் ஒன்றிணைந்து பணியாற்றுவதன் ஊடாக மக்களுக்கு இடையிலான தொடர்புகளை வலுப்படுத்துவதற்கு எதிர்பார்த்துள்ளேன்.
இவற்றுக்கு முன்னர் என்னைப் பற்றிய சில விடயங்களைப் பகிர்ந்துகொள்வதற்கு விரும்புகின்றேன்.
அமெரிக்கப்பிரஜை என்ற ரீதியில் நான் முதலாவது தலைமுறையைச் சேர்ந்தவளாவேன். எனக்கு ஐந்து வயதாக இருந்தபோது எனது குடும்பம் கொரியாவிலிருந்து அமெரிக்காவிற்குக் குடிபெயர்ந்தது.
ஆகவே பல்லினத்தன்மை மற்றும் சகிப்புத்தன்மை என்பன எனக்கு மிகமுக்கியமான விடயங்களாக இருப்பதில் ஆச்சரியம் எதுவுமில்லை.
எனது குடும்பம் இலங்கை – அமெரிக்க சமூகத்தினர் பெருமளவிற்கு செறிந்துவாழும் பகுதியான கலிபோர்னியாவில் குடியேறியது.
இந்நிலையில் எமது செல்லநாய் மார்த்தாவுடன் எனது கணவர் மற்றும் மகனும் என்னுடன் இலங்கைக்கு வருகின்றார்கள்.
அதேபோன்று மலையேறல், நீச்சல் உள்ளிட்ட அனைத்து விளையாட்டுக்களையும் பார்வையிடுவது எனக்குப் பிடித்த விடயமாகும்.
எனவே குறிப்பாக கிரிக்கெட் பற்றி அறிந்துகொள்வதற்கும் இலங்கையின் தேசிய அணியை ஊக்குவிப்பதற்கும் எதிர்பார்த்துள்ளேன்.
என்னை இலங்கைக்கு வரவேற்றமைக்கு நன்றி கூறுவதுடன் இயலுமானவரை உங்களில் பலரைச் சந்திப்பதற்கு ஆர்வத்துடன் இருக்கின்றேன் என்று தெரிவித்துள்ளார்.