Author: TELO Admin

வலிகாமம் கிழக்குப் பிரதேச சபையில் முள்ளிவாய்க்கால் நினைவேந்தல் நிகழ்வுகள் இன்று காலை ஈகைச் சுடரேற்றப்பட்டு உணர்வு பூர்வமாக இடம்பெற்றன.

சுகாதார நிலைமைகளைக் கருத்தில் கொண்டு அச் சமயத்தில் பிரசன்னமாகியிருந்த பிரதேச சபையின் உறுப்பினர்கள், உத்தியோகத்தர்கள், பணியாளர்களுடன் மட்டுப்படுத்தப்பட்டதாக அனுஸ்டிக்கப்பட்டது.

தமிழ் ஈழ விடுதலை இயக்கத்தின் (ரெலோ) யாழ் மாவட்ட அமைப்பாளரும் வலிகாமம் கிழக்கு பிரதேச சபைத் தவிசாளரும் ஆன தியாகராஜா நிரோஷ் தலைமையில் இடம்பெற்ற இந் நிகழ்வுகளில், போர் முடிவுறுத்தப்பட்டு 12 ஆண்டுகள் முடிவடைகின்ற போதும் தமிழ் மக்கள் கொன்றழிக்கப்பட்டதற்கு நீதி கிட்டவில்லை என்பதை நினைவு கூர்ந்து 12 நிமிடங்கள் அகவணக்கம் செலுத்தப்பட்டது. அக வணக்கத்தினைத் தொடர்ந்து பிரதேச சபையின் தவிசாளார் தியாகராஜா நிரோஷ் பொது ஈகைச்சுடரினை ஏற்றிவைத்தார்.

பிரதேச சபை வளாகத்தில் உள்ள நினைவேந்தலுக்காக ஒதுக்கப்பட்டுள்ள இடம் சிவப்பு மஞ்சல் கொடிகள் பறக்கவிடப்பட்டு இன ஒடுக்குமுறைக்கு எதிரான உணர்வுகள் வெளிப்படுத்தப்பட்டிருந்தமை குறிப்பிடத்தக்கது.

தமிழ் ஈழ சைபர் படையணி என்ற அமைப்பு பல இணையத்தளங்களிற்குள் ஊருடுவி அவற்றை செயல்இழக்கச்செய்துள்ளது என அதிகாரிகள் தெரிவித்துள்ளனர்.

இலங்கையின் கணிணி அவசரநிலை குழுவினர் இதனை அறிவித்துள்ளனர்.

மூன்று இணையத்தளங்களை இலக்குவைத்து சைபர்தாக்குதல் இடம்பெற்றதாக அந்த குழு தெரிவித்துள்ளது.

சுகாதார அமைச்சின் இணையத்தளம் இலங்கைக்கான சீன தூதரகத்தின் இணையத்தளம் ரஜரட்ட பல்கலைகழகத்தின் இணையத்தளம் ஆகியன மீது சைபர் தாக்குதல் இடம்பெற்றுள்ளது.

விடுதலைப்புலிகளின் கொடிகளுடன் தமிழ் ஈழம் சைபர் படையணி முள்ளிவாய்க்கால் என குறிப்பிடப்பட்டுள்ளதாகஇலங்கையின் கணிணி அவசரநிலை குழுவினர் தெரிவித்துள்ளனர்.

பாதிக்கப்பட்ட இணையத்தளங்களை மீள இயங்க செய்துள்ளோம் மேலதிக பாதிப்பினை தவிர்ப்பதற்கான நடவடிக்கைகளை எடுத்துள்ளோம் எனஇலங்கையின் கணிணி அவசரநிலை குழுவினர் தெரிவித்துள்ளனர்

பயங்கரவாத நடவடிக்கைகளை தூண்டாத வகையிலும் சுகாதார நடைமுறைகளுக்கு கட்டுப்பட்டும் முள்ளிவாய்க்கால் நினைவேந்தல் நிகழ்வுகளை மேற்கொள்ளலாம் என்று நீதிமன்றம் வழங்கிய கட்டளையின் பின்னர், முள்ளிவாய்க்கால் நினைவேந்தல் வளாகத்துக்கு,தமிழ் ஈழ விடுலை இயக்கத்தின் தலைமை குழு உறுப்பினரும்,வட மாகாண சபையின் முன்னாள் உறுப்பினரும், முல்லைத்தீவு மாவட்ட அமைப்பாளருமான புவனேஸ்வரன்,சட்டத்தரணி தனஞ்சயன் மற்றும் முன்னாள் வட மாகாண சபையின் உறுப்பினர் துரைராசா ரவிகரன், உள்ளிட்ட சிலர் சென்றிருந்தனர்

இதன்போது, குறித்த பகுதியில், பொலிஸார் குவிக்கப்பட்டு இருந்த நிலையில், இவ்விடத்துக்குள் செல்ல முடியாது எனத் தெரிவித்த பொலிஸார், அவர்களை தடுத்து நிறுத்தியுள்ளனர்.

இதையடுத்து, குறித்த தரப்பினருக்கும் பொலிஸாருக்கும் இடையில் முறுகல் நிலை ஏற்பட்டது.

திருகோணமலை மாவட்ட முன்னாள் பாராளுமன்ற உறுப்பினர் க.துரைரெட்ணசிங்கம் மரணம் அடைந்துள்ளார்.

இவர் மூதூர் கிழக்கு சேனையூர் மத்திய கல்லூரியின் முன்னாள் அதிபரும்,
திருகோணமலை மாவட்ட சாரணர் சங்கத்தின் குருளைச் சாரணர் பிரிவுக்கு பொறுப்பான உதவி மாவட்ட ஆணையாளரும், இலங்கை தமிழரசு கட்சியின் திருகோணமலை மாவட்ட முந்நாள் தலைவரும் ஆவார்.

கந்தளாய் தள வைத்தியசாலையில் கொவிற் தொற்று சிகிச்சைக்கு உட்பட்டிருந்த நிலையில் சிகிச்சை பலனின்றி மரணமானார்.

சடலம் தற்போது கந்தளாய் தள வைத்தியசாலையின் பிரேத அறையில் வைக்கப்பட்டுள்ளது.

திருகோணமலை மாவட்ட மேனாள் பாராளுமன்ற உறுப்பினர் துரைரட்ணசிங்கம் ஐயாவின் ஆத்மா சாந்தியடைய பிரார்த்தித்து அஞ்சலிக்கின்றோம்.

தமிழ் ஈழ விடுதலை இயக்கம்

மே 18 – தமிழினப் படுகொலையின் நினைவு நாள். இவ்வாண்டு மே 18 தமிழினப் படுகொலையின் 12வது ஆண்டு நினைவு நாளாகும் .

தமிழ் மக்களை கொடூரமாக அழித்ததோடல்லாமல் நமது நினைவையும் அடக்கும் ஒரு மோசமான அரசின் ஆட்சியில் இந்த நினைவு கூறலை நாங்கள் எதிர்கொள்கின்றோம்.

எமது பல்கலைக்கழகத்தில் அமைக்கப்பட்டிருந்த முள்ளிவாய்க்கால் நினைவுத்தூபியை திட்டமிட்டு அழித்த அரசு எமது மாணவரின் போராட்டத்தின் காரணமாக அதனை மீள அமைக்க வழி விட்டது.

இப்போது வருடாவருடம் எமது மக்கள் பொங்கும் உணர்வுகளோடு வந்து அழுது ஆறிச்செல்லும் முள்ளிவாய்க்கால் நினைவுச்சுடர் தூபியை மிலேச்சத்தனமாக அழித்ததோடு நினைவுகளையும் வஞ்சகமாக கவர்ந்து சென்று அடைந்துள்ளது.

மேலும் கொரோனாவைக் காரணம் காட்டி முல்லைத்தீவு பகுதியை முடக்கி நாம் எந்த விதத்திலும் முள்ளிவாய்க்காலை அணுக முடியாதபடி தடுத்துள்ளது .

இவர்களது இழி செயலுக்கு வரலாறு பதில் சொல்லும் .ஆகவே மக்கள் இவ்வாண்டு முள்ளிவாய்க்கால் நினைவு முற்றம் மூடப்பட்டது என்றால் நாங்கள் எமது வீட்டு முற்றங்களை நினைவு முற்றங்களாக்குவோம்.

முள்ளிவாய்க்கால் நினைவேந்தல் பொதுக்கட்டமைப்பு கேட்டுக்கொண்டபடி

மாலை 6 மணிக்கு ஆலயங்களில் மணியொலி எழுப்புவோம்.

எமது வீட்டு முற்றங்களில் நினைவுச் சுடர் ஏற்றுவோம் .

இல்லங்களில் ஒரு வேளை உணவாக முள்ளிவாய்க்கால் கஞ்சியை தயாரித்து உண்போம்.

அந்த வேளையில் எமது எதிர்கால சந்ததியினருக்கு இனப் படுகொலையின் உண்மையை எடுத்து விளக்குவோம்

நினைவிடத்தை அழிக்கலாம் நினைவுகளை அழிக்க முடியாது என்பதை உரத்துச் சொல்வோம் .

ஈழத் தமிழர்களுக்கு 2009 ஆண்டு முள்ளிவாய்க்கால் மண்ணில் இலங்கை அரசபடைகளால் மேற்கொள்ளப்பட்ட அதியுச்ச படுகொலைகளை தமிழ் இனப்படுகொலை என உலக நாடுகளின் மக்கள் பிரதிநிதிகளின் மன்றங்கள் ஏற்றுக் கொள்ளவும், தீர்மானங்களாக நிறைவேற்றவும், சட்டமூலங்களாகவும் நிறைவேற்றவும் ஆரம்பித்துவிட்டன இது நீதி வேண்டிப் போராடும் ஈழத் தமிழர்களுக்கு கிடைத்த முதற் கட்ட வெற்றியாகும் என தமிழ் ஈழ விடுதலை இயக்கத்தின் இளைஞர் அணித் தலைவரும் முன்னாள் மாகாண சபை உறுப்பினருமான சபா குகதாஸ் தெரிவித்துள்ளார்.

இது தொடர்பில் அவர் மேலும் தெரிவிக்கையில்,

முதலாவது தமிழ் இனப்படுகொலைத் தீர்மானம் வடக்குமாகாண சபையில் 10/02/2015 ஏகமனதாக நிறைவேற்றப்பட்டது. பின்னர் தமிழர் தாயகத்தில் உள்ளூராட்சி மன்றங்களில் நிறைவேற்றப்பட்டன.

அடுத்த கட்டமாக ஈழத் தமிழர்களின் தொப்புக் கொடி உறவான தமிழகத்தில் 2015/09/16 தமிழக சட்டசபையில் அன்றைய முதலமைச்சர் ஐெயலலிதா அம்மையாரால் முள்ளிவாய்க்காலில் நடைபெற்றது, “தமிழ் இனப்படுகொலை தான்” என ஏகமனதாக தீர்மானம் நிறைவேற்றப்பட்டது. இதற்கு முன் 2014/05/25 தமிழக முதல்வர் ஐெயலலிதா அவர்களினால் சட்டசபையில் ஈழத் தமிழர்களுக்கு நிரந்தரத் தீர்வாக ஒரு பொது வாக்கெடுப்பு நடாத்த வேண்டும் என்ற தீர்மானமும் நிறைவேற்றப்பட்டது.

ஐக்கிய நாடுகள் சபையில் வீட்டோ அதிகாரம் உடைய நாடான பிரான்சில் 08/04/201 இவ்றி_சூர்_சென் (ivry-sur-seine) நகரசபையிலும், 13/02/2021 பாரிஸ் பொபினி நகரசபையிலும், 11/02/2021 திரான்சி(Drancy) நகரசபையிலும் தொடர்ச்சியாக தமிழ் இனப்படுகொலைத் தீர்மானங்கள் மூன்று சபைகளிலும் ஏகமனதாக நிறைவேற்றப்பட்டுள்ளது. அத்துடன் சுயநிர்ணய உரிமைக்கான பொதுவாக்கெடுப்பும் நடாத்த வேண்டும் என்ற தீர்மானங்களும் பிரான்ஸ் நகரசபைகளில் நிறைவேற்றப்பட்டுள்ளது.

கனடாவில் ஒன்ராறியோ மாநில சட்டசபையில் தமிழ் சட்டமன்ற உறுப்பினர் விஐய் தணிகாசலம் அவர்களால் கொண்டுவரப்பட்ட தமிழ் இனப்படுகொலை வரலாற்றை மாணவர்களுக்கு கற்பிக்கும் முகமாக மே மாதத்தில் இனப்படுகொலை வாரம் என்ற 104 இலக்க சட்டமூலம் 06/05/2021 ஒன்ராறியோ சட்டசபையில் ஏகமனதாக மூன்றாம் வாசிப்பின் மூலம் நிறைவேற்றப்பட்டுள்ளது. இது ஒன்ராறியோவில் வாழும் 350,000 தமிழர்களுக்கும் ,ஈழத் தமிழர்களுக்கும் கிடைத்த வெற்றியாகும்.

ஆகவே ஈழத் தமிழர்களுக்கு நடந்தது இனப்படுகொலை தான் என்பதை உலக நாடுகள்  இனி வரும் நாட்களில் ஏற்றுக் கொள்ளுவதற்கான நல்ல சகுணம் உருவாகியுள்ளது. அத்துடன் இனப்படுகொலை நடந்தமைக்கான போதிய ஆதாரங்கள் ,சாட்சியங்கள் இருக்கின்றபோது பாதிக்கப்பட்ட மக்களுக்கான நீதி நிச்சயமாக கிடைக்கும் என்றும் இனப்படுகொலை நடந்த 12 ஆண்டில் கொல்லப்படட அனைத்து உறவுகள் மீதும் சபதம் செய்வோம்”என்றார்.