சுவிட்சர்லாந்தின் சூரிச் மாநிலத்தில் தமிழ் தேசிய வீரர்கள் தின நினைவேந்தல் அனுஷ்டிப்பு

26.07.2026 சுவிட்சர்லாந்தின் சூரிச் மாநிலத்தில் அமைந்துள்ள டூபென்டார்ஃப் (Dübendorf) பகுதியில், தமிழ் ஈழ விடுதலை இயக்கம் (ரெலோ) சுவிஸ் கிளையின் ஏற்பாட்டில் நினைவேந்தல் மற்றும் அஞ்சலி நிகழ்வு அமைதியான முறையில் நடைபெற்றது.

இந்நிகழ்வில் மறைந்த தலைவர்கள் தங்கதுரை, குட்டிமணி, ஜெகன், தேவன், நடேசுதாசன், குமார், குமாரகுலசிங்கம் ஆகியோருக்கும், 1983 ஜூலை 25 மற்றும் 27 ஆகிய நாட்களில் வெலிக்கடை சிறைச்சாலையில் படுகொலை செய்யப்பட்ட 53 தமிழ் அரசியல் கைதிகளுக்கும் மலரஞ்சலி செலுத்தி மரியாதை செலுத்தப்பட்டது.

நிகழ்வில் கலந்துகொண்டவர்கள் மௌன அஞ்சலி செலுத்தி, தமிழர் விடுதலைப் போராட்டத்தில் தமது உயிர்களை அர்ப்பணித்தவர்களின் தியாகத்தையும் நினைவுகூர்ந்தனர். அவர்களின் இலட்சியங்களும் தியாகங்களும் வரலாற்றில் என்றும் நிலைத்திருக்கும் என்பதும் வலியுறுத்தப்பட்டது.

இந்நினைவேந்தல் நிகழ்வை ரெலோ சுவிஸ் நிர்வாகக் குழு ஒழுங்காகவும் அமைதியான முறையிலும் முன்னெடுத்து நடத்தி நிறைவு செய்தது.

“தியாகிகளை நினைவுகூர்வோம் – வரலாற்றை மறவோம்.”

மன்னாரில் தமிழ் தேசிய வீரர்கள் தின நினைவேந்தல் அனுஷ்டிப்பு

நாடு முழுவதும் திட்டமிட்ட வகையில் தமிழ் இனத்தின் மீது 1983 ஆம் ஆண்டு ஆடி மாதம் 23ஆம் திகதி கட்டவிழ்த்து விடப்பட்ட தமிழ் இனப்படுகொலை நினைவேந்தல் வாரத்தின் வெலிக்கடை சிறைச்சாலையில் படுகொலை செய்யப்பட்ட போராளிகளையும் பல்லாயிரக் கணக்கான பொது மக்களையும் நினைவுகூரும் நினைவேந்தல் மன்னாரில் இடம்பெற்றது.

தமிழ் ஈழ விடுதலை இயக்கம் கட்சியின் ஏற்பாட்டில் மன்னாரிலுள்ள ரெலோ அலுவலகத்தில் நேற்று (26) மாலை 43 ஆம் ஆண்டு தமிழ் தேசிய வீரர்கள் தின நினைவேந்தல் நிகழ்வு முன்னெடுக்கப்பட்டது.

கட்சியின் மாவட்ட பொறுப்பாளரும், மன்னார் நகர முதல்வருமான டானியல் வசந்தன் தலைமையில் இடம்பெற்ற குறித்த நினைவேந்தல் நிகழ்வில் கட்சியின் உறுப்பினர்கள், முக்கியஸ்தர்கள் என பலர் கலந்து கொண்டு அஞ்சலி செலுத்தியுள்ளனர்.

அரசியல் கைதிகளுக்கு அஞ்சலி

இதன் போது குட்டிமணி, தங்கத்துரை உள்ளடங்கலாக 53 அரசியல் கைதிகளுக்கும், பொது மக்களுக்குமான நினைவேந்தல் இடம்பெற்றது.

அந்தவகையில் குட்டிமணி, தங்கத்துரை ஆகிய இருவரின் திருவுருவப்படத்திற்கு மாலை அணிவித்து சுடர் ஏற்றி மலர் அஞ்சலி செலுத்தப்பட்டது.

அத்துடன் படுகொலை செய்யப்பட்ட தமிழ் அரசியல் கைதிகளுக்கு அஞ்சலி செலுத்தப்பட்டமை குறிப்பிடத்தக்கது.

Posted in Uncategorized

தமிழ் தேசிய வீரர்கள் தினம் திருகோணமலையில் உள்ள வெலிக்கடை தியாகிகள் அரங்கில் நினைவுகூரப்பட்டது

வெலிக்கடை தியாகிகள் – 25-07-2026 தமிழ் தேசிய வீரர்கள் தினம்

திருகோணமலையில் உள்ள வெலிக்கடை தியாகிகள் அரங்கில் திருகோணமலை மாவட்ட தமிழ் ஈழ விடுதலை இயக்கத்தினால் சுடர் ஏற்றப்பட்டு நினைவுகூரப்பட்டது.

நினைவுத் தூபிக்கு தமிழ் ஈழ விடுதலை இயக்கத்தின் இளைஞர் அணிச் செயலாளரும் திருகோணமலை மாநகர சபை உறுப்புனருமான தி.பிரபாதரன் மற்றும் மாநகரசபை உறுப்பினர் சற்பரூபன், திருகோணமலை பட்டனமும் சூழலும் பிரதேசசபை உறுப்பினர்கள் தமிழ் ஈழ விடுதலை இயக்கத்தின் நிருவாக செயலாளர் நித்தி மாஸ்டர், திருகோணமலை மாவட்ட செயலாளர் விஜயகுமார் தலைமைக்குழு உறுப்பினர் இலண்டன் ரூபன் மற்றும் பொதுக்குழு உறுப்பினர்கள் ஆதரவாளர்களின் பங்களிப்புடன் நினைவு தூபிக்கு மாலை அணிவிக்கப்பட்டு நினைவுச் சுடரேற்றப்பட்டு நினைவு கொள்ளப்பட்டது.

Posted in Uncategorized

‘சட்டம் பொதுமக்களுக்கு மட்டுமா?’; யாழ்ப்பாணத்தில் 90% அரச கட்டிடங்கள் உள்ளூராட்சி அனுமதி இன்றி சட்டவிரோதமாக இயங்குவது அம்பலம்!

யாழ்ப்பாண மாவட்டத்தில் அரசாங்கத்தின் நிதி ஒதுக்கீடுகளின் கீழ் கட்டப்பட்ட கட்டிடங்களில் 90 சதவீதமானவை, அந்தந்தப் பகுதிகளுக்குரிய உள்ளூராட்சி சபைகளின் (பிரதேச சபைகள்/மாநகரசபை) முறையான கட்டிட அனுமதி பெறப்படாமலேயே சட்டவிரோதமான முறையில் கட்டப்பட்டுள்ளதாக ரெலோ வின் தலைமை குழு உறுப்பினரும் வலிகாமம் கிழக்கு பிரதேச சபையின் தவிசாளருமான தியாகராஜா நிரோஷ் பகிரங்கமாக வெளிப்படுத்தியுள்ளார்.

சாதாரண பொதுமக்களின் சட்டவிரோத கட்டுமானங்களை உடனடியாக இடித்து தள்ள நீதிமன்ற உத்தரவுகளைப் பெற்றுக்கொள்ளும் அரச இயந்திரம், தங்களின் சொந்த நிறுவனங்கள் என்று வரும்போது சட்டத்தை அப்பட்டமாக மீறி வருவதாக அவர் குற்றம் சாட்டியுள்ளார்.

அனுமதியற்ற கட்டுமானங்களும் பொதுப்பாதுகாப்பு அபாயமும்
மாவட்டத்திலுள்ள பல பாடசாலைகள் மற்றும் அரச அலுவலகங்கள் எவ்வித முறையான கட்டிட அனுமதியோ அல்லது ‘குடியிருப்பு சான்றிதழோ’ (COC) இன்றியே பல வருடங்களாக நடத்தப்பட்டு வருகின்றன.

நாளாந்தம் ஆயிரக்கணக்கான பொதுமக்கள் மற்றும் பள்ளி மாணவர்கள் கூடும் இந்த அரச கட்டிடங்களின் சுகாதாரம், தீயணைப்பு பாதுகாப்பு வழிமுறைகள் மற்றும் பொதுப் பாதுகாப்பு குறித்து இதுவரை எவ்வித உத்தியோகபூர்வ உத்தரவாதமும் உறுதிப்படுத்தப்படவில்லை என்பது பாரியதொரு ஆபத்தாகும்.

90% சட்டவிரோத கட்டுமானங்கள்: அரச நிதியுதவியுடன் மாவட்டத்தில் மேற்கொள்ளப்படும் கட்டிட கட்டுமானங்களில் பெரும்பாலானவை பிரதேச சபைகளை முழுமையாகப் புறக்கணித்தே செய்யப்பட்டுள்ளன.

10 வருட கால எல்லை மற்றும் தடை: ஆளுநரின் புதிய அறிவுறுத்தலின்படி, கடந்த 10 வருடங்களுக்குள் கட்டப்பட்ட கட்டிடங்களுக்கு வர்த்தக அனுமதிப்பத்திரம் (Trade License) வழங்கப்பட வேண்டுமாயின், ‘குடியிருப்பு சான்றிதழ்’ சமர்ப்பிக்கப்படுவது கட்டாயமாக்கப்பட்டுள்ளது. இதனால் பல அரச நிறுவனங்கள் முடங்கும் அபாயம் ஏற்பட்டுள்ளது.

அபராதத்துடன் கூடிய சலுகைக்காலம்: தற்போது சட்டவிரோத மட்டத்தில் உள்ள அரச கட்டிடங்களுக்கான நிலு வரி மற்றும் அபராதங்களைச் செலுத்தி, அவற்றை விரைவாக வரன்முறைப்படுத்துவதற்கு பிரதேச சபை சில தளர்வுக் கொள்கைகளை (Flexibility) வழங்கத் தயாராக உள்ளது.

“சட்டம் அனைவருக்கும் சமமாக இருக்க வேண்டும்”
இது குறித்து வலிகாமம் கிழக்கு பிரதேச சபை தவிசாளர் தியாகராஜா நிரோஷ் விடுத்துள்ள நேரடி உத்தியோகபூர்வ அறிவிப்பில் விவரிக்கப்பட்டுள்ளதாவது:

“சட்டம் என்பது பொதுமக்களுக்கு மாத்திரமல்ல, அரச அதிகாரிகளும் அரசியல்வாதிகளும் கூட சட்டத்திற்கு அடிபணிய வேண்டும். சாதாரண மக்கள் மீது மட்டும் சட்டத்தை மிகக் கொடூரமாகப் பாய்ச்சிவிட்டு, நாட்டில் ‘சட்டத்தின் ஆட்சி’ (Rule of Law) நிலவுகிறது என்று நாம் பெருமகிழ்ச்சி அடைய முடியாது. சட்டம் அனைவருக்கும் சமமாகவே அமுல்படுத்தப்பட வேண்டும்.”
யாழ்ப்பாண மாவட்டச் செயலகத்தில், மாவட்ட அபிவிருத்திக் குழுத் தலைவரும் அமைச்சருமான இராமலிங்கம் சந்திரசேகர் தலைமையில் நடைபெற்ற உத்தியோகபூர்வக் கூட்டத்தின் போதே தவிசாளரால் இந்த விபரங்கள் பகிரங்கமாக முன்வைக்கப்பட்டன.

இதன் அடிப்படையில், இனிவரும் காலங்களில் கட்டிட சட்ட விதிமுறைகளை மீறும் மற்றும் பிரதேச சபைகளைப் புறக்கணிக்கும் அரச நிறுவனங்களுக்கு எதிராகவும் கடுமையான சட்ட நடவடிக்கைகளை எடுக்க உள்ளூராட்சி சபைகள் தீர்மானித்துள்ளன.

ரெலோ தலைவர் சிறீ சபாரத்தினரம் கல்வி கற்ற யா/கல்வியங்காடு செங்குந்தா இந்துக் கல்லூரிக்கு உதவி

தமிழ் ஈழ விடுதலை இயக்கத்தின் மறைந்த தலைவர் சிறீ சபாரத்தினரம் கல்வி கற்ற யா/கல்வியங்காடு செங்குந்தா இந்துக் கல்லூரிக்கு உதவி கையளிப்பு
யாழ்ப்பாணம் கல்வியங்காட்டில் அமைந்த செங்குந்தா இந்து கல்லூரிக்கு போட்டோ கொப்பி இயந்திரம் மற்றும் பயன்பாட்டிற்கு ஏற்றவாறு கூரை செப்பனிடப்பட்டு அரங்கமும் கையளிக்கப்பட்டது.

மாணவர்களுக்கான வினாத்தாள்கள் அச்சிடவும் மற்றும் கல்வித் தேவைகளுக்காக போட்டோ கொப்பி இயந்திரம் ஒன்று பாடசாலை சமூகத்தினால் கோரிக்கை விடுக்கப்பட்டதை அடுத்து சுரேந்திரன் குருசுவாமியால் முன்னெடுக்கப்பட்ட நடவடிக்கையினால் தமிழ் ஈழ விடுதலை இயக்கத்தின் தலைவரும் கௌரவ பாராளுமன்ற உறுப்பினருமான செல்வம் அடைக்கலநாதன் அவர்களுடைய பன்முகப்படுத்தப்பட்ட நிதி ஊடாக இந்த உதவி திட்டங்கள் இன்று பாடசாலைக்கு கையளிக்கப்பட்டன.

இந்நிகழ்வில் ரெலோ சார்பில் அதன் உப தலைவர் குருசுவாமி சுரேந்திரன் அவர்களும் யாழ் மாவட்ட செயலாளரும் முன்னாள் யா/ மாநகர சபை பிரதிமேயர் துரைராஜா ஈசன் அவர்களும் கலந்து கொண்டனர்.

தமிழ் தேசிய விடுதலைப் போராட்டத்தில் முதல் முதல் தொடங்கப்பட்ட இயக்கமாக, தலைவர் தங்கதுரை தளபதி குட்டிமணி ஆகியோர் உட்பட பல போராளிகள் ஒன்றிணைந்து உருவாக்கியது தமிழ் ஈழ விடுதலை இயக்கம்.

அவர்களின் கைதுக்கு பின்னர் இந்த மாபெரும் தொன்மை வாய்ந்த இயக்கத்தை தலைமை தாங்கியவர் மறைந்த தலைவர் சிறீ சபாரத்தினம். அவர் செங்குந்தா பகுதியைச் சேர்ந்தவரும் இந்த பள்ளிக்கூடத்தின் பழைய மாணவரும் ஆவார்.

அவர் நினைவாகவே இந்த உதவி திட்டம் பாடசாலைக்கு வழங்கி வைக்கப்பட்டது.

தலைவர் சிறீ சபாரத்தினம் காலத்தில் மிகப் பெரிய பலமான கட்டமைப்பு கொண்ட விடுதலை இயக்கமாக ரெலோ திகழ்ந்தது.

இந்திய இலங்கை ஒப்பந்தத்தின் பின்னர் ரெலோ ஒரு ஜனநாயக அரசியல் கட்சியாக மாற்றம் பெற்று வடக்கு கிழக்கு முழு மாவட்டங்களிலும் செல்வாக்கு செலுத்தும் அரசியல் கட்சியாக பயணித்துக் கொண்டிருக்கிறது.

தமிழ் ஈழ விடுதலைப் புலிகளின் தலைவர் பிரபாகரன் உட்பட கிட்டு, செல்லக்கிளி, சாள்ஸ் அன்ரனி ஆகியோரோடு விடுதலைப் புலிகளால் போற்றப்படும் பல தளபதிகள் தமிழ் ஈழ விடுதலை இயக்கத்தின் உறுப்பினர்கள் என்பது வரலாறு.

இந்நிகழ்வில் கலந்து கொண்டு பொழுது இந்த வரலாறுகள் நினைவு கூரப் பட்டன.

Posted in Uncategorized

தமிழ் ஈழ விடுதலை இயக்கம் 12 வது தேசிய மாநாட்டுப் பிரகடனம் 14 06 2026

தமிழ் ஈழ விடுதலை இயக்கத்தின் 12 வது தேசிய மாநாடு இன்று வவுனியாவில் நடைபெற்று இருக்கும் வேளையில் கட்சியின் மாநாட்டுப் பிரகடனம் பின்வருமாறு

ஈழத் தமிழ் மக்களின் தாயக பூமியான வடக்கு கிழக்கு பிரதேசத்தை உள்ளடக்கிய எமது சுயநிர்ணய உரிமையை அனுபவிக்க கூடிய மீளப் பெறப்பட முடியாத பூரண அதிகாரம் உடைய சமஸ்டி முறையிலான சுயாட்சி அலகொன்றை அரசியல் தீர்வாக பெற்றுக் கொள்வதற்காக தொடர்ந்து அரசியல் ரீதியாக சகல நடவடிக்கைகளையும் முன்னெடுக்கவும்

எமது மக்கள் மீது நிகழ்த்தப்பட்ட யுத்த குற்றங்கள் மனித உரிமை மீறல்கள் மற்றும் இனப்படுகொலை ஆகியவற்றுக்கான சர்வதேச நீதிப் பொறிமுறையை பெற்றுக் கொள்ளும் வரை உள்நாட்டு மற்றும் சர்வதேச சக்திகளோடு ஒன்றிணைந்து செயல்படவும்

காணாமல் ஆக்கப்பட்ட உறவுகளுக்கான நீதிப் பொறிமுறையை பெற்றுக் கொள்வதற்கான சகல நடவடிக்கைகளையும் மேற்கொள்ளவும்
எமது தாயக மண்ணில் அரச இயந்திரங்களினால் தொடர்ந்தும் திட்டமிட்டு ஆக்கிரமிக்கப்பட்ட மற்றும் ஆக்கிரமிக்கப்பட்டு வரும் காணிகளை மீட்கவும் மேலதிகமான அபகரிப்புகளை தடுக்கவும் தொடர்ந்து உரிய அனைத்து நடவடிக்கைகளையும் முன்னெடுக்கவும்

நிரந்தரமான அரசியல் தீர்வை பெற்றுக் கொள்ளும் வரையில் ஏற்கனவே அரசியல் யாப்பில் உள்ள மாகாண சபை முறைமையை முற்று முழுதாக நடைமுறைப்படுத்தவும் மாகாண சபை தேர்தல்களை விரைந்து நடத்த தொடர்ந்து அரசுக்கு அழுத்தம் கொடுக்கவும்

எமது மக்களின் நலிந்து போன பொருளாதாரத்தை மீளக் கட்டியமைக்கும் முகமாக, பலதரப்பட்ட முதலீடுகளின் ஊடாக எமது மக்களின் வாழ்க்கை தரத்தை உயர்த்தக்கூடிய இனக்குடிப் பரம்பலை பேணக்கூடிய தற்சார்பு பொருளாதார கட்டமைப்பை உருவாக்குவதற்கான அனைத்து வேலை திட்டங்களையும் அர்ப்பணிப்புடன் செயல்படுத்தவும்

எமது சமுதாயத்தின் உள்ள அனைத்து தரத்தினரதும் வாழ்க்கை தரத்தினையும் சமூக மேம்பாட்டையும் பாதுகாப்பையும் உறுதி செய்யும் வகையில் நமது அரசியல் நடவடிக்கைகளை தொடர்ந்து முன்னெடுக்கவும்

அனைத்து வேலை திட்டங்களையும் நடைமுறைச் சாத்தியமான வகையில் முன்னெடுப்பதற்கு பிராந்திய வல்லரசு நாடான இந்தியாவுடனான நமது உறவை தொடர்ந்து பேணிப் பாதுகாக்கவும மற்றைய சர்வதேச நேச சக்திகளை ஒருங்கிணைக்கவும் உரிய வேலைத்திட்டங்களை தொடர்ந்தும் முன்னெடுக்கவும்
தமிழ் தேசிய பரப்பில் உள்ள அனைத்து அரசியல் கட்சிகளையும் சமூக அமைப்புகளையும் எமது பிரதான பலமாக விளங்குகின்ற புலம்பெயர் உறவுகளையும் ஒருங்கிணைத்து தமிழ் மக்களை ஒரு தேசமாக கட்டி எழுப்பும் அனைத்து வேலை திட்டங்களையும் அயராத முன்னெடுக்கவும்

இப் பிரகடனம் விதந்துரைக்கிறது.

Posted in Uncategorized

தமிழ் ஈழ விடுதலை இயக்கத்தின் 12 வது தேசிய மாநாட்டில் தலைவராக செல்வம் அடைக்கலநாதன் மீண்டும் ஏகமனதாக தெரிவானார் 

தமிழ் ஈழ விடுதலை இயக்கத்தின் பனிரெண்டாவது(12) தேசிய மாநாடு இன்று வவுனியா மாவட்டத்தில் மதியம் 2:30 மணிக்கு வோர்ஸ் மண்டபத்தில் நடைபெற்றது.

இந்த மாநாட்டில் எட்டு மாவட்டங்களில் இருந்தும் கலந்து கொண்ட பொதுக்குழு உறுப்பினர்களினால் மத்திய குழு உறுப்பினர்கள், தலைமை குழு உறுப்பினர்கள் உட்பட கட்சி நிர்வாகிகளின் தேர்வு நடைபெற்றது.

இத் தேர்வுகளில் தமிழ் ஈழ விடுதலை இயக்கத்தின் தலைவராக கௌரவ பாராளுமன்ற உறுப்பினர் செல்வம் அடைக்கலநாதன் அவர்கள் தெரிவு செய்யப்பட்டார்.

கட்சியின் உப தலைவராக திரு குருசுவாமி சுரேந்திரன் அவர்கள் தெரிவு செய்யப்பட்டார்.

செயலாளர் நாயகமாக முன்னாள் பாராளுமன்ற உறுப்பினர் கோவிந்தன் கருணாகரன் தெரிவு செய்யப்பட்டார்.

மேலும் கட்சியின் நிதிச் செயலாளராக திரு கமலவிஜிந்தன் அவர்களும், தேசிய அமைப்பாளராக திரு செந்தில்நாதன் மயூரன் அவர்களும், நிர்வாகச் செயலாளராக திரு பரமலிங்கம் நித்தியானந்தன் அவர்களும் இளைஞரணிச் செயலாளராக திரு தியாகராஜா பிரபாகரன் அவர்களும் ஏகமனதாக தெரிவு செய்யப்பட்டார்கள்.

செயலாளர் அறிக்கை, நிதிச்செயலாளர் அறிக்கை மற்றும் தலைவர் உரையுடன் உப தலைவரால் கட்சியின் மாநாட்டு பிரகடனமும் வெளியிடப்பட்டது.

Posted in Uncategorized

பொன் சிவகுமாரன் நினைவேந்தல்: ரெலோ வின் தலைமை குழு உறுப்பினரும் வலிகாமம் கிழக்கு பிரதேச சபையின் தவிசாளருமான நிரோஷ் விசாரணைக்கு அழைப்பு

பொன் சிவகுமாரனின் நினைவேந்தல் நிகழ்வு ஏற்பாடு தொடர்பில் ரெலோ வின் தலைமை குழு உறுப்பினரும் வலிகாமம் கிழக்கு பிரதேச சபையின் தவிசாளருமான தியாகராஜா நிரோஷ் காவல்துறை விசாரணைக்கு அழைக்கப்பட்டுள்ளார்.

தமிழ் மக்களின் விடுதலைக்காக முதல் வித்தாக நஞ்சருந்தி தன்னுயிரை ஆகுதியாக்கிய பொன் சிவகுமாரனின் 52 ஆவது நினைவேந்தல் உரும்பிராயில் உள்ள திருவுருவச்சிலையில் வழமைபோன்று எதிர்வரும் 5 ஆம் திகதி வெள்ளிக்கிழமை காலை 8 மணிக்கு வலிகாமம் கிழக்கு பிரதேச சபையினால் உத்தியோகபூர்வமாக ஏற்பாடு செய்யப்பட்டுள்ளது.

உணர்வெழுச்சியுடன் நினைவேந்தல் நிகழ்வுகள் ஏற்பாடு

வலிகாமம் கிழக்கு பிரதேச சபையின் தீர்மானத்திற்கு அமைவாக உத்தியோகபூர்வமாக உணர்வெழுச்சியுடன் நினைவேந்தல் நிகழ்வுகள் ஏற்பாடு செய்யப்பட்டு வருகின்றன.

இந் நினைவேந்தலை ஏற்பாடு செய்துவரும் நிலையிலேயே வலிகாமம் கிழக்கு பிரதேச சபைத் தவிசாளர் தியாகராஜா நிரோஷ் கோப்பாய் காவல்துறையினரால் விசாரணைக்கு அழைக்கப்பட்டுள்ளார்.

விசாரணைக்கு அழைப்பு

பிரதேச சபையின் தீர்மானத்திற்கு அமைய பிரதேச சபைக்குச் சொந்தமான சந்தை வளாகத்தில் பிரதேச சபையின் உறுப்பினர்கள், உணர்வாளர்கள், உரும்பிராய் பிரதேச இளைஞர்கள் உணர்வுபூர்வமாக நினைவேந்தல் நிகழ்வுகளை ஏற்பாடு செய்துவரும் நிலையில் புலனாய்வாளர்கள் ஏற்கனவே புகைப்படம் மற்றும் காணொளி எடுப்பதில் ஈடுபட்டு வந்த நிலையில் தற்போது தமக்குக் கிடைக்கப்பெற்ற முறைப்பாடு ஒன்றின் அடிப்படையில் வலிகாமம் கிழக்குப் பிரதேச சபையின் தவிசாளர் தியாகராஜா நிரோஷ் விசாரணைக்கு அழைக்கப்பட்டுள்ளார்

நினைவேந்தல்களுக்கு தடையில்லை என அரசாங்கம் சொல்லளவில் தெரிவித்து வருகின்றபோதும் செயலளவில் நினைவேந்தல் உரிமைகளைக்கூட அங்கீகரிக்காத போக்கே காணப்படுவதாக வலிகாமம் கிழக்கு பிரதேச சபை தவிசாளர் தியாகராஜா நிரோஷ் குற்றஞ்சாட்டியுள்ளமை குறிப்பிடத்தக்கது.

Posted in Uncategorized

உயிர்த்த ஞாயிறு தாக்குதல் தொடர்பாக அரசாங்கம் முன்னெடுக்கும் விசாரணைகளுக்கு ஆதரவு!!.

பாராளுமன்ற உறுப்பினர் கெளரவ செல்வம் அடைக்கலநாதன் அவர்கள் 6/3/2026 பாராளுமன்ற அமர்வில் ஆற்றிய உரையின் முழுமையான காணொளி.
இன்றைய தினம் பயங்கரவாத தடைச்சட்டம் நீடிக்கின்ற விவாதத்திலே சில கருத்துக்களை சொல்லலாம் என்று விளைகின்றேன் .

முதலாவது இந்த உயிர்த்த ஞாயிறு தாக்குதலில் அரசாங்கம் எடுத்துக்கொண்டு இருக்கின்ற அந்த நடவடிக்கைகளுக்கு எங்களுடைய முழு ஆதரவையும் நாங்கள் தெரிவித்துக்கொள்ளுகின்றோம். தொடர்ச்சியாக இந்த உயிர்த்த ஞாயிறு தாக்குதலை சம்மந்தப்பட்டவர்கள் கைது செய்யப்பட்டவேண்டும், விசாரித்து ஒரு நீதி கிடைக்கவேண்டும் என்ற நிலையிலே நாங்கள் இந்த உயிர்த்த ஞாயிறு தாக்குதல் சம்மந்தமாக கைது செயற்படுகின்ற விசாரனை செயற்படுகின்ற அத்தனை விடையங்களுக்கும் எங்களை பொறுத்தமட்டிலே நாங்கள் ஆதரவு தருகிறோம் என்பதை குறிப்பிட விரும்புகின்றேன்.

இரண்டாவது விடயம் இந்த இப்பொழுது நடைபெறுகின்ற போர் சூழல் காரணமாக பல பேரும் பாராளுமன்றத்திலே கருத்துகளை சொல்லுகிறார்கள். உண்மையிலே இது தவறான இந்த போர் என்பது நாங்கள் ஏற்றுக்கொள்ள முடியாது. ஏனென்றால் எங்களுடைய நாட்டிலே எங்களுடைய மக்களுடைய எங்களுடைய இனம் சார்ந்த அடக்கு முறைக்கு எங்களுடைய மக்கள் இந்த போரால் பாதிக்கப்பட்டதை நாங்கள் நன்கு உணர்ந்ததன் அடிப்படையிலே இந்த போர் என்பது உண்மையிலே நாங்கள் ஏற்றுக்கொள்ளவில்லை.

இதிலே பல உயிர்கள் காவுகொள்ளப்படுவதை நாங்கள் ஏற்றுக்கொள்ளவில்லை. இருந்தாலும் என்னைப்பொறுத்த மட்டிலே இந்த போர் சம்மந்தமாக குரல் கொடுக்கின்ற எம்மவர்கள் அது யாராக இருந்தாலும் சரி , அவர்களுடைய அந்த எண்ணக்கருவை பார்க்கின்ற போது இந்த போர் சம்மந்தமாக மிக ஒரு உச்சகட்டமான கருத்துகளை சொல்லிவருகிறார்கள், குத்திமுறிகிறார்கள் என்று தமிழிலே சொல்லலாம்.

ஆனால் எங்களுடைய இனம் சார்ந்த போராட்டத்திலே நியாயத்தை கதைப்பதற்கு இந்த நாட்டிலே யாரும் இருக்கவில்லை என்ற கவலையை நான் இங்கு பதிவு செய்கின்றேன். இப்பொழுது பேசுகிறவர்களெல்லாம், போராட்டம், ஆர்ப்பாட்டம் நடத்துபவர்களெல்லாம், எங்களுடைய இனம் சார்ந்த , உரிமை சார்ந்த பிரச்சனைகளை அது நியாயமானது என்று சொல்லுவதற்கு யாரும் இந்த நாடாளுமன்றத்தில் முன்வரவில்லை என்பதை நான் இங்கு எங்களுடைய இனம் சார்ந்த என்னுடைய அடக்குமுறைக்குள் இறந்துபோன, அடக்குமுறைக்குள் என்னுடைய இனம் சார்ந்த அந்தப்போரை நாங்கள் நடத்துகின்றபோது அது அந்தப்போர் தவறானது, அந்த இனத்தின் பிரச்சினை என்பது தீர்க்கப்படவேண்டும் என்று செல்லுகின்ற வகையிலே இங்கு யாருமே குரல் கொடுக்கவில்லை என்பதை நான் இந்த உயர்சபையிலே எனது பதிவை நான் வைத்துக்கொள்ள விரும்புகிறேன்.

அடுத்ததாக சொல்லப்படுகிறது இந்த போர் கப்பல் இலங்கையிலே அடிபட்டது அதற்கு இந்தியாதான் காரணம், பொறுப்பென்றால்லாம் இங்கே பேசுகிறார்கள். என்னைப்பொறுத்தமட்டிலே உங்களுக்கு இந்தியா பொருளாதார தடை வருகின்றபோது இங்கு வரவேண்டும் ,இந்த இயற்கை அனர்த்தம் ஏற்படும் போது முதன்முறையாக கால்பதித்தது இந்தியா, அது வரவேண்டும். ஆனால் ஒரு சினேகபூர்வமான போர் கப்பல், ஒரு இந்தியாவிலே நடந்த சினேகபூர்வமான பயிற்சியிலே அவர்கள் காலம் கடந்து அவர்கள் இங்கே வந்து இலங்கை அரசிடம் இங்கே தங்கவேண்டும் என்று கேட்டதாக அறிகின்ற போது ஏன் இந்தியாவை குறை சொல்கின்ற ஒரு நிலையை நீங்கள் கொள்ளுகிறீர்கள் என்பது எனக்கு தெரியவில்லை.

என்னைப்பொறுத்த மட்டிலே இந்த விடயத்திலே இந்தியாவை நீங்கள் குற்றம் சாட்டக்கூடாது, இயலாது. அது சரியான தவறானதொரு விடயம் என்பதை நான் இங்கு சொல்லிக்கொள்ள விரும்புகிறேன்.

உண்மையிலே குழுக்களின் பிரதி தவிசாளர் அவர்களே பயங்கரவாத தடைச்சட்டம் என்பது எங்களுடைய மக்கள் சுமந்த அந்த வலி சுமந்த நாட்களை இப்பொழுதும் நாங்கள் இந்த பயங்கரவாத தடை சட்டத்தின் ஊடாக ஏன் ஆயுதம் எடுத்து போராடிய JVP கூட இந்த பயங்கரவாத தடைச்சட்டத்தை சந்தித்தது பல பேர் படுகொலை செய்யப்பட்டார்கள்.

இப்பொழுதும் எங்களுடைய இனம் சார்ந்த போராட்டங்களை அடக்குவதற்காகத்தான் இந்த பயங்கரவாத தடைச்சட்டம் மீண்டும் நீடிக்கப்படுகிறதா என்று அதிகம் சந்தேகம் வருகிறது. ஒரு சமூகம் தன்னுடைய பிரச்சனையை போராட்டத்தினூடாக கொண்டுவருகின்ற போது அந்த பிரச்சினை நியாயமானதாக இருக்கின்ற போது அந்த போராட்டம் நடைபெறக்கூடாது என்பதற்காகத்தான இந்த பயங்கரவாத தடைச்சட்டம் நீடிக்கப்படுகிறது?

இதிலே சொல்லப்படுகிறது இந்த இப்பொழுது இருக்கிற நாட்டின் சூழல் காரணமாக .பெற்றோல் இல்லை, Queue வில் நிற்கிறது இப்படியான பிரச்சனைகளுக்கு, இப்படியான பிரச்சினைகளை கருத்தில் கொண்டுதான் இந்த பயங்கரவாத தடைச்சட்டம் நீடிக்கப்படுகிறது என்று சொல்லி சொல்லப்படுகிறது. இதற்கு சட்டங்கள் இருக்கிறது. ஏன் பயங்கரவாத தடைச்சட்டத்தை நீங்கள் கொண்டுவாறீர்கள்? இந்த பயங்கரவாத தடைச்சட்டத்தினூடக மூன்று மாதங்கள் விசாரனைக்காக நீதிமன்றம் கொண்டுபோகாமல் வைத்திருக்கமுடியும்.

ஆகவே ஒரு போராட்டம் செய்கின்ற இப்பொழுது இந்த எண்ணை இல்லை என்று ,பெற்றோல் இல்லை என்று மக்கள் போராட்டம் செய்கின்ற அந்த சூழல் ஏற்படுமாக இருந்தால் அதை நாங்கள் எப்படி ஒரு சட்ட ரீதியாக அதை கையாளவேண்டும். இந்த பயங்கரவாத தடைச்சட்டத்தினூடாக ஒரு ,DO வை போட்டு பல மாதங்களாக, அவர்களை விசாரனை என்ற பெயரிலே நீதி மன்றத்திற்கு கொடுக்காத ஒரு சூழலை உருவாக்குகின்ற ஒரு இந்த சட்டத்தை நீங்கள் நடைமுறைப்படுத்துவது எங்களை பொறுத்தமட்டிலே ஏற்றுக்கொள்ள முடியாது.

எங்களுடைய பிரதமர் அவர்கள் தன்னுடைய கருத்தை சொல்லுகின்றபோது சொன்னார் இந்த பயங்கரவாத தடைச்சட்டம் நீடிக்கின்ற போதும் கூட இந்த பயங்கரவாத தடைச்சட்டத்தினூடக யாராவது பாதிக்கப்பட்டுள்ளார்களா?சொல்லுங்கள் என்று இங்கே பிரதமர் அவர்கள் பேசுகின்ற போது எடுத்துச்சொன்னார்கள். என்னைப்பொறுத்த மட்டிலே இந்த உயிர்த்த ஞாயிறு தாக்குதலில் கைது செய்யப்படுபவர்கள் இந்த சட்டத்திலே கைது செய்யப்படுவது தவறு என்று நான் சொல்லவில்லை.

இருந்தாலும் சில சந்தர்ப்பங்களில் இந்த போராட்டங்கள் வலுப்பெறும் போது இந்த மக்கள் தங்களுடைய அந்த உரிமையை போராட்டங்களாக மாற்றுகின்ற போது இந்த பயங்கரவாத தடைச்சட்டம் அவர்கள் மீது பாயாதா என்ற உத்தரவாதம் யாரும் கொடுக்கமுடியாது குழுக்களின் பிரதி தவிசாளர் அவர்களே. அவர்களை இந்த சட்டத்தின் கீழ் தான் கைதுசெய்ய வேண்டும். ஏனென்றால் இந்த சட்டம் நீடிக்கப்புகிறது.

அந்தவகையிலே இந்த பயங்கரவாத தடைச்சட்டம் என்பது நீடிப்பு என்பது எங்களை பொறுத்தமட்டிலே நாங்கள் கண்டிப்பதன் ஊடகவும், இதை எதிர்ப்பதற்கு தயாராக இருக்கிறோம். ஏனென்றால் இந்த பயங்கரவாத தடைச்சட்டத்தினூடக இன்றைக்கும் வலிசுமந்துகொண்டு இருக்கின்ற எங்களுடைய இனத்தின் சார்பாக நாங்கள் சொல்லுகிறோம் பயங்கரவாத தடைச்சட்டம் ஒழிக்கப்பட வேண்டும், நீடிக்கப்படக்கூடாது, இது இல்லாதொழிக்கப்படவேண்டும் என்று கையெழுத்து வேட்டையினூடாக எங்களது மக்கள் அதனை உங்களுக்கு அனுப்பிவைத்துள்ளார்கள். அந்த வகையிலே இந்த பயங்கரவாத தடைச்சட்டம் இல்லாதொழிக்கப்படவேண்டும் என்ற அந்த கோரிக்கையை முன்வைக்கிறேன்.

அ.செல்வம் அடைக்கலநாதன்
வன்னி பாராளுமன்ற உறுப்பினர்.
தலைவர்
தமிழீழ விடுதலை இயக்கம் ( ரெலோ )

முல்லைத்தீவு மாவட்ட வைத்தியசாலையில் அனுமதிக்கப்பட்ட சிறுமியின் மரணத்திற்கு நீதிகோரி கவனயீர்ப்பு போராட்டம்

மாணவியின் மரணத்தை கண்டித்து முல்லையில் ஆர்ப்பாட்ட பேரணி.

முல்லைத்தீவு மாவட்டத்தில் சிலாவத்தை பகுதியில் அண்மையில் சிகிற்சைக்கா அனுமதிக்கப்பட்ட பாடசாலை மாணவி வைத்தியசாலையின் அசமந்த போக்கு காரணமாக உயிரிழந்த அந்த துன்பியல் நிகழ்வானது பொது மக்களிடையேயும், வைத்தியசாலையின் வட்டாரத்திலும் பாரிய அதிர்வலைகளை தோற்றுவித்திருந்தது.

மாணவி மரணித்த அந்த துன்பியல் நிகழ்வை கண்டித்தும் வைத்தியசாலை மற்றும் வைத்தியர்களின் அசமந்த போக்கை கண்டித்தும், சிறுமியின் உயிரிழப்புக்கு காரணமானவர்கள் தண்டிக்கப்பட வேண்டும் என்பதனை வலியுறுத்திய அதே நேரத்தில் வைத்தியசாலையில் இருந்து இவ்வாறான உயிர் இழப்புகள் ஏற்படாதவாறு அதாவது வைத்தியர்களினதும் வைத்தியசாலையினதும் அசமந்த போக்கு மற்றும் பொறுப்பற்ற தனத்தால் எதிர்காலத்தில் இவ்வாறான உயிரிழப்புகள் ஏற்படாதவகையிலும், மருத்துவத்திற்காக அனுமதிக்கப்படும் நோயாளர் மட்டில் பொறுப்பாக நடந்துகொள்ளவேண்டும் என்பதனையும் வலியுறுத்திய முல்லைத்தீவு மாணவர்கள் மற்றும் மக்களால் கண்டன ஆர்ப்பாட்டம் இன்றைய தினம் 29/12/2025 திங்கட்கிழமை முன்னெடுக்கப்பட்டது.

மேலும் இவ் விடயம் தொடர்பாக ஜனாதிபதி அவர்களது கவனத்திற்கு கொண்டுசெல்வதற்கான முழு ஏற்பாடுகளும் செய்யப்பட்டுள்ளதுடன் இன்றைய போராட்டத்தின் உணர்வுகளையும், மக்களின் உரிமைகளையும், உணர்வுகளையும் மதித்து அவர்களின் போராட்டத்திற்கு வலுச்சேர்க்கும் முகமாகவும் மக்களுக்கான நீதியை பெற்றுக்கொடுக்கும் வகையிலும் வன்னி பாராளுமன்ற உறுப்பினரும் தமிழ் ஈழ விடுதலை இயக்கம் ரெலோ தலைவருமான கெளரவ செல்வம் அடைக்கலநாதன் அவர்களும் மக்களின் போராட்டத்தில் கலந்துகொண்டிருந்தமை குறிப்பிடத்தக்கது.