Category: செய்திகள்

மலையக பெருந்தோட்ட மக்களின் எதிர்கால பாதையை மாற்றுவதற்கான தருணமே இது. மலையக மேம்பாட்டுக்காக அமெரிக்கா தொடர்ந்து உதவிகளை வழங்கும் என்று இலங்கைக்கான அமெரிக்க தூதுவர் ஜூலி சங் தெரிவித்தார்.

இலங்கை தொழிலாளர் காங்கிரஸின் பொதுச்செயலாளரும், நீர்வழங்கல் மற்றும் தோட்ட உட்கட்டமைப்பு வசதிகள் அபிவிருத்தி அமைச்சருமான ஜீவன் தொண்டமானின் அழைப்பின் பேரில் நுவரெலியா மாவட்டத்துக்கு களப்பயணம் மேற்கொண்ட அமெரிக்க தூதுவர், பல தரப்பு சந்திப்புகளில் ஈடுபட்டதுடன், மக்கள், சிவில் சமூக செயற்பாட்டாளர்களையும் சந்தித்து பேச்சு நடத்தினார்.

இவ்விஜயத்தின் ஓரங்கமாக அட்டனில் உள்ள தொண்டமான் தொழில் பயிற்சி நிலையத்துக்கு சென்ற அமெரிக்க தூதுவருக்கு, உற்சாக வரவேற்பளிக்கப்பட்டது.

அதன்பின்னர் அதிகாரிகள் மற்றும் அங்கு பயிற்சிபெறும் மாணவர்களுடன் தூதுவர் கலந்துரையாடினார். இதன்போது, இருதரப்பு உறவுகளுக்கான நினைவுச் சின்னங்களும் வழங்கி வைக்கப்பட்டன.

சௌமியமூர்த்தி தொண்டமான் ஞாபகார்த்த மன்றத்தின் பிரதம நிறைவேற்று அதிகாரி காந்தி சௌந்தர்ராஜன், பெருந்தோட்ட மனிதவள அபிவிருத்தி நிதியத்தின் தலைவர் பாரத் அருள்சாமி, அமைச்சர் ஜீவன் தொண்டமானின் இணைப்புச்செயலாளர் அர்ஜுன் ஜெயராஜ் ஆகியோருடன் கலந்துரையாடல்களில் ஈடுபட்ட அமெரிக்க தூதுவர் ஆங்கிலம் மற்றும் தொழில்நுட்ப கல்விக்கு உதவிகள் வழங்கப்படும் என உறுதியளித்தார்.

அத்துடன், கல்வி, சுகாதாரம் என மலையக பெருந்தோட்டப்பகுதிகளில் பல வேலைத்திட்டங்களை முன்னெடுப்பதற்கும் இணக்கம் தெரிவித்தார்.

மேலும், ” நுவரெலியா மாவட்டம் உள்ளிட்ட பகுதிகளில் வாழும் மலையக பெருந்தோட்ட மக்கள் கடந்த காலங்களில் பல சவால்களை எதிர்கொண்டனர். பல தடைகள் இருந்தன. இதனை நான் அறிவேன். எனவே, மலையக பெருந்தோட்ட மக்களின் எதிர்காலத்துக்கான பாதையை மாற்றுவதற்கான சிறந்த தருணமே இது.

இலங்கை தற்போது மீண்டெழுகின்றது. வர்த்தகம் மற்றும் முதலீடுகளை கொண்டு வருவதற்கு நாம் எதிர்பார்க்கின்றோம். உங்களுக்கு உதவுவதற்கான பங்காளியாக நாம் இருப்போம்.” – என்றார்.

சபாநாயகர் மஹிந்த யாப்பா அபேவர்தன, துருக்கி ஜனாதிபதி ரெசெப் தையிப் எர்டோகனுடன் பேச்சுவார்த்தை நடத்தியுள்ளார்.

கடந்த மாதம் நடைபெற்ற ஜனாதிபதித் தேர்தலில் வெற்றி பெற்ற தையிப் எர்டோகனின் உத்தியோகபூர்வ அரச வைபவத்தில் சபாநாயகர் மஹிந்த யாப்பா அபேவர்தன கலந்துகொண்டார்.

இந்த சந்திப்பின் போது, இரு நாடுகளுக்கும் இடையிலான பல வருட கால இராஜதந்திர உறவை மேலும் வலுப்படுத்தும் வகையில் இலங்கைக்கு விஜயம் செய்யுமாறு சபாநாயகர் அவருக்கு அழைப்பு விடுத்துள்ளார்.

சமீபத்தில் உலகையே உலுக்கிய துருக்கியில் ஏற்பட்ட நிலநடுக்கத்தின் போது பாதிக்கப்பட்டவர்களுக்கு நிவாரணம் வழங்க முன் வந்த இலங்கைக்கு ஜனாதிபதி எர்டோகன் நன்றியும் தெரிவித்துள்ளார்.

சர்வதேச நாணய நிதியத்தின் வேலைத்திட்டத்தின் முன்னேற்றம், பொருளாதார சீர்திருத்தங்கள் மற்றும் கடன் மறுசீரமைப்பு செயற்பாடுகள் தொடர்பிலும் இலங்கையும் அமெரிக்காவும் கலந்துரையாடியுள்ளன.

நிதி இராஜாங்க அமைச்சர் ஷெஹான் சேமசிங்கவிற்கும், ஆசியாவிற்கான அமெரிக்க திறைசேரியின் பிரதி உதவி செயலாளர் ரொபேர்ட் கப்ரோத்துக்கும் இடையில் இந்த சந்திப்பு இடம்பெற்றது.

இக்கலந்துரையாடல் பலனளித்ததாகவும், இலங்கை எதிர்கொள்ளும் சவால்கள் மற்றும் இறக்குமதிக் கட்டுப்பாட்டை படிப்படியாக தளர்த்துவதற்கான திட்டங்கள் உள்ளிட்ட பல்வேறு விடயங்கள் பேசப்பட்டதாகவும் இராஜாங்க அமைச்சர் தெரிவித்தார்.

இலங்கையின் பொருளாதார மீட்புச் செயற்பாட்டிற்கான தொடர்ச்சியான ஆதரவிற்காக அமெரிக்க அரசாங்கத்தின் அர்ப்பணிப்பு மற்றும் தொழில்நுட்ப ஆதரவிற்கும் இராஜாங்க அமைச்சர் இதன்போது பாராட்டு தெரிவித்தார்.

மருதங்கேணி பொலிஸ் நிலையத்தில் நாளையதினம் ஆஜராகுமாறு தனக்கு அழைப்பு விடுக்கப்பட்டுள்ளதாக கஜேந்திரகுமார் பொன்னம்பலம் தெரிவித்துள்ளார்.

இந்த வாரம் நாடாளுமன்றத்தில் கலந்து கொள்வதற்காக கொழும்புக்கு செல்லும் நிலையில் இந்த அழைப்பு பொலிஸாரினால் விடுக்கப்பட்டுள்ளது என அவர் டுவிட்டரில் தெரிவித்துள்ளார்.

தான் நாடாளுமன்ற கூட்டத்தொடரில் கலந்து கொள்ளவுள்ளதால் இது குறித்து சபாநாயகருக்கு அறிவிக்க உள்ளதாகவும் கஜேந்திரகுமார் பொன்னம்பலம் தெரிவித்துள்ளார்.

சபாநாயகரிடம் கலந்துரையாடிய பின்னர் அடுத்த நடவடிக்கைகள் குறித்து முடிவை எடுப்பேன் என பொலிஸ்நிலைய பொறுப்பதிகாரிக்கு தெரிவித்துள்ளதாக குறிப்பிட்டுள்ளார்.

இருப்பினும் சபாநாயகரை தொடர்புகொள்ள எடுத்த முயற்சி பயனளிக்கவில்லை என்றும் குறுஞ்செய்தி ஒன்றினை அவருக்கு அனுப்பியுள்ளதாகவும் கஜேந்திரகுமார் பொன்னம்பலம் தெரிவித்துள்ளார்.

இதேநேரம் இச்சம்பவம் தொடர்பாக பிரதி சபாநாயகருக்கு அறிவித்துள்ளதாகவும் நாடாளுமன்ற அமர்வுகள் முடிவடைந்த பின்னர் அடுத்தகட்ட நடவடிக்கைகளை எடுக்க ஒப்புக்கொண்டார் என்றும் கூறியுள்ளார்.

தியாகி பொன் சிவகுமாரனின் அர்ப்பணிப்பினாலேயே தமிழ் மக்களின் போராட்டம் மிக வேகமாக முன்னேறி சர்வதேசம் கண்காணிக்குமளவிற்கு மாற்றப்பட்டது என முன்னாள் வடக்கு மாகாண சபையின் உறுப்பினர் எம்.கே சிவாஜிலிங்கம் தெரிவித்தார்.

இன்றையதினம் யாழ் உரும்பிராயில் இடம்பெற்ற தியாகி பொன் சிவகுமாரனின் நினைவேந்தல் நிகழ்வில் கலந்து கொண்ட பின்னர் ஊடகங்களிட்ம் கருத்து தெரிவிக்கும் போதே இவ்வாறு தெரிவித்தார்.

அவர் மேலும் தெரிவிக்கையில்,

தமிழினத்திற்கெதிரான அடக்குமுறைகள் கட்டங்கட்டமாக முன்னேறிக்கொண்டிருந்த காலப்பகுதியில் தமிழ் மக்களின் உயர் கல்வியைப் பறிக்கின்ற தரப்படுத்தலு்கெதிராக போராட முற்பட்ட மாணவரணியில் முன்னணியி்ல் செயற்பட்டவர் தான் தியாகி பொன் சிவகுமாரன்.

தமிழாராய்ச்சி மாநாட்டில் 9 பேர் பொலிசாரால் கொலை செய்யப்பட்ட சம்பவமும் அவரது மனதில் காயத்தை ஏற்படுத்திய காரணத்தினால் அவர் வன்முறையைதன தவிர வேறு வழியில்லை எனப் பல தாக்குதல்களைத் தொடுத்திருந்தார்.

அந்த காப்பகுதியில் பணத்தேவைக்காக வங்கியைக் கொள்ளையிட முயன்ற போது பொலிசாரால் சுற்றிவளைக்கப்பட்ட வேளையில் சயனைட் அருந்தி வீரமரணத்தைத் தழுவி்க்கொண்டார்.

வீர மரணத்தைத் தழுவிய மறுநாள் ஒரு சிலரே இறுதிக்கிரியைகளில் பங்கெடுத்திருந்த நிலையில் மறுநாள் இறுதிக்கிரியைகள் ஒத்திவைக்கப்பட்ட நிலையில் பல்லாயிரக்கணக்கில் தமிழ்த் தலைவர்கள் மற்றும் மக்கள் திரண்டிருந்தனர்.

உரும்பிராய் வேம்பன் மயானத்திலே பல்லாயிரக்கணக்கான மக்கள் திரண்டிருந்த வேளையிலே அவரது உடல் வைக்கப்பட்ட.பெட்டியை செங்குத்தாக மக்களுக்கு காண்பிக்கக்கூடிய நிலைகூடத் தோன்றியது.

முதலாவது போராளியாக தன்னை ஈகம் செய்த இழப்பு பேரிழப்பாகும். அதற்கு ஒரு வாரத்திற்கு முன்னர் கூட நாங்கள் சந்தித்துப் பேசியிருந்தோம். அவ்வாறு அர்ப்பணிப்பற்ற முறையிலே அவர் செய்த ஈகம் தான் போராட்டத்திற்கான வீச்சை வழங்கியது. அது பின்னாளியே நடைமுறை அரசாங்கமாக கட்டியெழுப்பப்படுவதற்கு வழிவகுத்தது.

அவரது தியாகம் பலரது கண்களை விழிக்க வைத்ததுடன் தமிழீழப் போராட்டத்தின் திருப்பு முனையாக இருந்தது. அதன் பின்னே இளைஞர்கள் இயக்கங்களில் இணைந்து போராட்டம் மிக வேகமாக முன்னேறி சர்வதேசம் கண்காணிக்குமளவிற்கு மற்றப்பட்டதும் சிவகுமாரனின் அர்ப்பணிப்பே காரணம்.

அண்மையிலும் லண்டனில் இவர்களுடன் செயற்பட்ட பல தலைவர்களைச் சந்தித்த போது தியாகி சிவகுமாரன் பற்றிய பல விடயங்களை உரையாடியிருந்தனர்.

இவரது திருவுருவச் சிலை பல சந்தர்ப்பங்களில் உடைக்கப்பட்டது. 1975 ம் ஆண்டு 1 வது நினைவேந்தலிலே கவிஞர் காசியானந்தன் தலைமையில் இடம்பெற்ற சிலை திறப்பு விழாவிற்கு தந்தை செல்வா கூட பிரசன்னமாயிருந்தார்.

பல்லாயிரக்கணக்கான மக்களின் இதயத்திலிருக்கும் தலைவராக சிவகுமாரன் விளங்கினார் என்றால் மிகையாகாது. தமிழீழ இலட்சியத்திற்காக தன்னுயிரை ஈந்த அவரின் தியாகம் போற்றப்பட வேண்டும். – என்றார்