Category: பிரதான செய்திகள்

இலங்கை தற்போது முகங்கொடுத்திருக்கும் பொருளாதார நெருக்கடியின் விளைவாக பெண்கள் மற்றும் சிறுவர்கள் மிகமோசமாகப் பாதிக்கப்படுவர் என ஆசிய மற்றும் பசுபிக் பிராந்தியங்களுக்கான ஐக்கிய நாடுகள் பொருளாதார மற்றும் சமூக ஆணைக்குழுவின் தெற்கு மற்றும் தென்மேற்கு ஆசியப்பிராந்திய இணை அலுவலகத்தின் தலைவர் மிஹிகோ டனகா எச்சரித்துள்ளார்.

கைத்தொழில் அமைச்சில் அமைச்சர் ரமேஷ் பத்திரணவுடன் நடைபெற்ற விசேட கலந்துரையாடலின்போதே மிஹிகோ டனகா மேற்குறிப்பிட்டவாறு எச்சரித்துள்ளார்.

இவ்வாறானதொரு அச்சுறுத்தல் நிலைக்கு மத்தியில் பெண்களால் முன்னெடுக்கப்படும் சிறியளவிலான முயற்சியாண்மைகள் மற்றும் வணிக நடவடிக்கைகளை ஊக்குவிப்பதன் மூலம் குடும்பங்களிலுள்ள பெண்கள் மற்றும் சிறுவர்களை இந்த நெருக்கடியிலிருந்து பாதுகாப்பதற்கான சாத்தியப்பாட்டை அதிகரிக்கமுடியும் என்றும் அவர் சுட்டிக்காட்டியுள்ளார்.

அதற்குப் பதிலளித்துள்ள அமைச்சர் ரமேஷ் பத்திரண நாட்டின் பல பகுதிகளிலும் பெண்களின் சிறியளவிலான வணிக முயற்சியாண்மைகளை ஊக்குவிப்பதற்கு அவசியமான செயற்திட்டங்கள் ஒருங்கிணைக்கப்பட்டிருப்பதாகத் தெரிவித்துள்ளார்.

அதுமாத்திரமன்றி கிராமப்புறங்களிலும் பின்தங்கிய பிரதேசங்களிலும் வசிக்கும் பெண்களால் முன்னெடுக்கப்பட்டுவரும் சிறிய வணிக முயற்சியாண்மைகளை நேரில் சென்று பார்வையிடுவதற்கும், அவற்றை சிக்கல்களின்றித் தொடர்வதற்கு அவசியமான வளங்களை வழங்குவதற்கும் நடவடிக்கை எடுக்கப்பட்டிருப்பதாக அவர் மேலும் குறிப்பிட்டுள்ளார்.

நாட்டின் மொத்த சனத்தொகையில் குறைந்தபட்சம் 5.7 மில்லியன் மக்கள் (சனத்தொகையில் 26 சதவீதமானோர்) மனிதாபிமான உதவிகள் தேவைப்படும் நிலையில் இருப்பதாக செஞ்சிலுவை மற்றும் செஞ்சிலுவை சங்கங்களின் சர்வதேச கூட்டிணைவு தெரிவித்துள்ளது.

அதுமாத்திரமன்றி உடனடி மனிதாபிமான உதவிகளை வழங்குவதற்கும், கட்டமைப்பு ரீதியிலும் சேவை வழங்கலிலும் ஏற்பட்டிருக்கும் சீர்குலைவை சீரமைப்பதற்கும் அவசியமான நடவடிக்கைகள் முன்னெடுக்கப்படாவிடின் மேற்குறிப்பிட்ட தொகை மேலும் அதிகரிக்கும் என்றும், அதனால் ஏற்படக்கூடிய பின்விளைவுகள் மேலும் தீவிரமடையும் என்றும் எச்சரித்துள்ளது. இலங்கை தற்போது முகங்கொடுத்திருக்கும் தீவிர பொருளாதார நெருக்கடியின் விளைவாக நாட்டுமக்கள் மத்தியில் ஏற்பட்டுள்ள தாக்கங்கள் தொடர்பில் வெளியிட்டுள்ள ஆய்வறிக்கையிலேயே செஞ்சிலுவை மற்றும் செஞ்சிலுவை சங்கங்களின் சர்வதேச கூட்டிணைவு மேற்குறிப்பிட்டாறு எச்சரித்துள்ளது.

இந்த ஆய்வறிக்கையானது நாடளாவிய ரீதியில் 11 மாவட்டங்களைச்சேர்ந்த 2,871 குடும்பங்களிடம் நேரடியாக நடத்தப்பட்ட நேர்காணல்கள், நுவரெலியா மாவட்டத்தில் 10 கிராமங்களிலுள்ள 300 குடும்பங்களிடம் பிரத்யேகமாக நடத்தப்பட்ட ஆய்வுகள், 24 குழு ரீதியான கலந்துரையாடல்கள், தகவல் வழங்குனர்கள் 15 பேரிடம் நடத்தப்பட்ட நேர்காணல்கள், ஏனைய தரவுகள் ஆகியவற்றை அடிப்படையாகக்கொண்டு தயாரிக்கப்பட்டுள்ளது.

அவ்வறிக்கையில் சுட்டிக்காட்டப்பட்டிருக்கும் முக்கிய விடயங்கள் வருமாறு,

பொருளாதார நெருக்கடியின் விளைவாக உணவுப்பாதுகாப்பு மற்றும் மக்களின் வாழ்வாதாரம் என்பன நேரடியாகப் பாதிக்கப்பட்டிருப்பதுடன் கல்வி, சுகாதாரம் உள்ளிட்ட அத்தியாவசிய சேவை வழங்கலில் இடையூறுகள் ஏற்பட்டுள்ளன. குறிப்பாகக் கல்வித்துறையில் ஏற்பட்டிருக்கும் தாக்கங்களுக்கு அப்பால் சிறுவர் பாதுகாப்பு தொடர்பான அச்சுறுத்தல் வெகுவாக உயர்வடைந்துள்ளது. சேதன விவசாயத்திற்கு முழுமையாக மாறும் திட்டம் தோல்வியடைந்ததன் விளைவாக மொத்த உள்நாட்டு உற்பத்தியில் ஏற்பட்ட வீழ்ச்சி இந்நெருக்கடியை மேலும் தீவிரப்படுத்தியுள்ளது.

எனவே தற்போது சீர்குலைந்திருக்கும் கட்டமைப்புக்கள், கல்வி, சுகாதாரம் உள்ளிட்ட சேவை வழங்கல்கள், விவசாயம், மீன்பிடி உள்ளிட்ட பலதரப்பட்ட துறைகளுக்கு அவசியமான வசதிகள் என்பன உடனடியாக சீரமைக்கப்படாவிட்டால், ஏற்கனவே வெகுவாகப் பாதிக்கப்பட்டுப் பின்னடைவைச் சந்தித்திருக்கும் மக்கள் மேலும் பின்நோக்கித் தள்ளப்படுவர். ஏற்கனவே நாட்டிலுள்ள பெரும்பாலான குடும்பங்கள் இந்நெருக்கடியைக் கையாள்வதற்கு உணவு வேளைகளைத் தவிர்த்தல், சுகாதாரசேவைப்பெறுகையை பிற்போடல், பிள்ளைகளின் பாடசாலைக்கல்வியை இடைநிறுத்தல் மற்றும் வருமானமீட்டும் நோக்கில் அவர்களை வேலைக்கு அனுப்புதல், தமது சொத்துக்களை விற்பனை செய்தல் போன்ற உத்திகளைக் கையாண்டுவருகின்றன. குறிப்பாக தற்போது 11 சதவீதமான குடும்பங்கள் வருமானத்தை இழந்திருக்கும் அதேவேளை, 62 சதவீதமான குடும்பங்களின் வருமானத்தில் பாரிய வீழ்ச்சியேற்பட்டுள்ளது. அதேபோன்று நாட்டின் மொத்த சனத்தொகையில் 4.9 மில்லியன் மக்கள் உணவுப்பாதுகாப்பின்மை நிலைக்கு முகங்கொடுத்துள்ளனர்.

இலங்கையில் ஏற்பட்டுள்ள நுண்பாகப்பொருளாதார சீர்குலைவானது சமூக மற்றும் குடும்ப மட்டத்தில் பாரிய மனிதாபிமான அவசரநிலையாக நிலைமாற்றமடைந்திருப்பதுடன் அதன்விளைவாக பெருமளவானோர் உணவு, எரிபொருள், எரிவாயு, மருந்து உள்ளிட்ட அத்தியாவசியப்பொருட்களைப் பெற்றுக்கொள்வதில் நெருக்கடிகளை எதிர்கொண்டுள்ளனர் என்று அவ்வறிக்கையில் சுட்டிக்காட்டப்பட்டுள்ளது.

அதுமாத்திரமன்றி மக்கள்மீது பாரிய தாக்கத்தை ஏற்படுத்தியுள்ள இந்நெருக்கடியை உரியவாறு கையாள்வதற்கு ஒவ்வொரு துறைசார்ந்து முன்னெடுக்கப்படவேண்டிய நடவடிக்கைகள் குறித்த பரிந்துரைகளும் அவ்வறிக்கையில் உள்ளடக்கப்பட்டுள்ளமை குறிப்பிடத்தக்கது

நிதி அமைச்சராக மீண்டும் தற்போதைய வெளிவிவகார அமைச்சர் ஜனாதிபதி சட்டத்தரணி அலி சப்றியை நியமிக்க அரசாங்கம் ஆரம்பகட்ட இணக்கமொன்றுக்கு வந்துள்ளது.

புதிதாக அமைச்சரவை அந்தஸ்துள்ள அமைச்சர்கள் ஐவரை நியமிப்பது தொடர்பில் ஜனாதிபதி ரணில் விக்ரமசிங்க, பிரதமர் தினேஷ் குனவர்தன மற்றும் முன்னாள் ஜனாதிபதி மஹிந்த ராஜபக்ஷ  ஆகியோருக்கு இடையே நடந்த சிறப்பு கலந்துரையாடலில் இது குறித்து அவதானம் செலுத்தப்பட்டதாக அறிய முடிகின்றது.

அரசியலமைப்பின் 21 ஆவது திருத்தச் சட்டத்தின் பிரகாரம், ஜனாதிபதிக்கு பாதுகாப்பு அமைச்சு தவிர வேறு எந்த அமைச்சுப் பதவிகளையும் வகிக்க முடியாது. அதன்படி, சமர்ப்பிக்கப்படும் வரவுச் செலவு திட்டத்தை மையப்படுத்தி அமைச்சரவையிலும் மாற்றங்கள் செய்யப்படவுள்ளதாக அறிய முடிகின்றது.

அதன்போது, வரவு செலவுத் திட்ட முன் மொழிவுகளை அமுல்ச் செய்வது மற்றும் சர்வதேச நாணய நிதியத்துடனான தொடர்புகளையும் பேச்சுவார்த்தையையும் முன்னோக்கி எடுத்துச் செல்வது போன்ற பிரதான பொறுப்புக்களை  ஒப்படைத்து நிதி அமைச்சை அலி சப்றியிடம் மீள கையளிப்பது தொடர்பில் அவதானம் திரும்பியுள்ளது.

இதனைவிட, புதிதாக  5 அமைச்சரவை அமைச்சுக்களை  ஏற்படுத்த அவதானம் திரும்பியுள்ளதுடன்,  பொது ஜன பெரமுன கட்சியின் மூவருக்கும் ஸ்ரீ லங்கா சுதந்திர கட்சியின் பிரபலம் ஒருவரும் உள்ளடங்கலாக ஐவருக்கு அவற்றை வழங்கவும் ஆரம்பகட்டமாக பேசப்பட்டுள்ளதாக அறிய முடிகின்றது.

முன்னாள் நிதியமைச்சர் ரவி கருணாநாயக்க, நாடாளுமன்றத்திற்கு வருவதற்கு தயாராகி வருவதாக முன்னாள் ஜனாதிபதி மகிந்த ராஜபக்ச தனக்கு நெருக்கமானவர்களிடம் கூறியுள்ளதாக வாராந்த பத்திரிகை ஒன்று செய்தி வெளியிட்டுள்ளது.

அரசாங்கத்தில் இணைந்து அமைச்சு பதவி ஒன்றை பெற்றுக்கொள்வதற்காக ரவி கருணாநாயகக இவ்வாறு நாடாளுமன்றத்திற்கு பிரவேசிக்க உள்ளதாகவும் பொதுஜன பெரமுனவின் தேசிய பட்டியல் நாடாளுமன்ற உறுப்பினர் ஒருவர் பதவி விலகி ரவி கருணாநாயக்கவுக்கு வாய்ப்பு அளிக்க உள்ளதாக மகிந்த ராஜபக்ச கூறியுள்ளதாக தெரிவிக்கப்படுகிறது.

அதேவேளை ரவி கருணாநாயக்க ஐக்கிய தேசியக்கட்சியின் பொதுச் செயலாளராக நியமிக்கப்பட உள்ளதாக நேற்று தகவல்கள் வெளியாகி இருந்தன. ஐக்கிய தேசியக்கட்சியின் கொழும்பு மாவட்ட முன்னாள் நாடாளுமன்ற உறுப்பினரான ரவி கருணாநாயக்க, நல்லாட்சி அரசாங்கத்தில் நிதியமைச்சராக பதவி வகித்தார்.

அப்போது இலங்கை மத்திய வங்கியில் நடந்த பிணை முறி மோசடி தொடர்பான குற்றச்சாட்டை அடுத்து அவர் நிதியமைச்சர் பதவியில் இருந்து விலகினர். கடந்த பொதுத் தேர்தலில் ஐக்கிய தேசியக்கட்சியின் சார்பில் மீண்டும் போட்டியிட்ட அவர் உட்பட கட்சியினர் அனைவரும் தோல்வியடைந்தனர்.

இலங்கையின் நிலைமை குறித்து அடுத்த வாரம் இங்கிலாந்து நாடாளுமன்றம் விவாதிக்கப்பட உள்ளதாக தகவல்கள் தெரிவிக்கின்றன. இலங்கையின் மனித உரிமைகள் மற்றும் பொருளாதார நிலைமைக்கான பிரித்தானியாவின் பதில் குறித்த பின்வரிசை வணிகக் குழுவின் விவாதம் எதிர்வரும் 9ஆம் திகதி பொதுச்சபையில் நடத்த திட்டமிடப்பட்டுள்ளது.

இங்கிலாந்து நாடாளுமன்றத்தின் பின்வரிசை உறுப்பினர்களுக்கு அவர்கள் விருப்பமான விவாதங்களை முன்வைக்க, பின்வரிசை வணிகக்குழு வாய்ப்புகளை வழங்குகிறது.

முன்னதாக கடந்த ஜெனீவா மனித உரிமைப் பேரவை அமர்வின் போது பிரித்தானியா தலைமையிலான இலங்கை தொடர்பான முக்கிய குழுவே, இலங்கைக்கு எதிரான யோசனையை முன்னகர்த்தி அதனை நிறைவேற்றியது. இதன்படி இலங்கையின் போர் குற்றம் தொடர்பான பொறுப்புக்கூறல் உள்நாட்டில் இருந்து சர்வதேசத்தின் கைகளுக்கு செல்கிறது. எனினும் இதனை இலங்கை கடுமையாக ஆட்சேபித்து வருகிறது.